NÍʼKHÓO 12

Ndiéjunʼ gándoo muʼni mu makuwáanʼ gagi mbá guʼwáanʼ rá.

Rí phú itháan gíʼdoo numuu rí makuwáanʼ gagi náa mbá guʼwáanʼ rí maʼndulúʼ kuʼyamijná (Efesios 5:33)

Adán ga̱jma̱a̱ Eva kúwá náa ku̱ba̱ʼ mitsaanʼ

Xtángoo ndrígóo Diúu̱ naʼthí rí bi̱ nidamijná gíʼmaa maxtáa mbáa xa̱biya̱ ga̱jma̱a̱ mbáa a̱ʼgu̱.

Mbáa xa̱bu̱ nañewu̱u̱n a̱ʼgiu̱u̱ bi̱ nandoo káñuu; mbáa a̱ʼgu̱ niʼni mújúunʼ rí mi̱khu̱ ajmbio̱o̱

Mbáa xa̱biya̱ bi̱ májánʼ a̱jkiu̱u̱n nandoo kaʼyoo a̱ʼgiu̱u̱, tsíríyúu ga̱jma̱a̱ ndaʼyoo rí ndayóoʼ a̱ʼgiu̱u̱.

Mbáa a̱ʼgu̱ bi̱ ninújunʼ gíʼmaa rí mambáyuu ajmbio̱o̱.

Mbáa ndxájulú nambáyúu a̱ʼdióo mu magíʼ edxu̱u̱ náa reunión

E̱ji̱n gíʼmaa rí munimbu̱ún náa anu̱ún ga̱jma̱a̱ náa ru̱du̱ún.

Ganindxaʼ xa̱bu̱ bi̱ májánʼ a̱jkiu̱u̱n ga̱jma̱a̱ mbáa xa̱bu̱ jmbi, xátani gíníin eʼwíínʼ, xánindxaʼ mbáa xa̱bu̱ bi̱ naʼninduwaʼ (Colosenses 3:5, 8-10)

Xabuanii nusngáá aʼdiún ga̱jma̱a̱ dí naʼthí náa Biblia

Ajngá rawunʼ Diúu̱ naʼthí rí xa̱bu̱ bi̱ ninigúnʼ gíʼmaa rí maʼndoo kaʼyoo a̱ʼgiu̱u̱ xóo nandoo kaʼyaminaʼ ikhaa, ga̱jma̱a̱ xúʼko̱ má gíʼmaa mbaʼyamajkuu wéñuʼ ajmbio̱o̱ a̱ʼgu̱ bi̱ ninújunʼ.

Mbáa a̱ʼgu̱ nagawúunʼ índo̱ ndaʼyoo rí ajmbio̱o̱ nayejxu̱u̱ i̱mba̱a̱ a̱ʼgu̱

Mbáa xa̱bu̱ bi̱ ninigúnʼ o bi̱ ninújunʼ ra̱májánʼ mubu̱nʼ gajmiún eʼwíínʼ á mu raʼkháa ajmbio̱o̱ o a̱ʼgiu̱u̱. Diúu̱ naʼthí rí xa̱bu̱ bi̱ nidamijná gíʼmaa rí makuwá má xúʼko̱ nájmi̱i̱n.

Mbá guʼwíin kúwá ruyejxi̱ índo̱ narámáʼ a̱jkha̱ʼ

Jeobá naʼthúún bi̱ kuwa mbá guʼwíín rí gíʼmaa muni̱ mu makuwá gagi.