Ndiéjunʼ ñajunʼ eni bi̱ ni̱ndxu̱ún siervos ministeriales rá.

Náa Biblia naʼthí rí kuwa xa̱bekha bi̱ nuni ñajunʼ náa congregación: Bi̱ kuya̱ edxu̱u̱ ga̱jma̱a̱ siervos ministeriales (Filipenses 1:1). Náa mámbá congregación kuwa mbaʼin a̱ngia̱xo xóo bugi. Ndiéjunʼ ñajunʼ eni rí mambayaxoʼ ikháanʼ bi̱ ni̱ndxu̱ún siervos ministeriales rá.

Numbañún xa̱bu̱ bi̱ kuya̱ edxu̱u̱ náa congregación. Bi̱ ñajunʼ siervos ministeriales ni̱ndxu̱ún xa̱bekha bi̱ nambáxuun májánʼ gajmiún Dios, ga̱jma̱a̱ nuni májánʼ wéñuʼ ñajunʼ ndrígu̱ún, tikhun ni̱ndxu̱ún jiáma ga̱jma̱a̱ eʼwíínʼ ni̱ndxu̱ún xa̱bu̱ wanii. Nuriyaʼ awan mu muni ñajunʼ rí ndayóoʼ náa congregación rí gíʼdoo wéñuʼ numuu ga̱jma̱a̱ kikháá ñajunʼ guma mámbá xmáná. Rígi̱ naʼni rí maguapin bi̱ kuya edxu̱u̱ musngáa májánʼ wéñuʼ ga̱jma̱a̱ nuxnún ikha bi̱ kuwa náa congregación.

Gíʼdoo numuu ñajunʼ rí eni. Tikhun siervos ministeriales nundriguíin májánʼ wéñuʼ xa̱bu̱ bi̱ naguaʼnu náa nagimbáanʼxo ga̱jma̱a̱ nuthun náa mutrigi̱i̱n. Iʼwíínʼ nutrigi̱i̱n mu mbuyáá a̱jua̱nʼ rí nawán, nuxna i̱yi̱i̱ʼ, nuraxi mbújkha̱a̱ ga̱jma̱a̱ nuthun a̱ngia̱xoʼ bi̱ kuwa náa congregación náa minaʼ gutaraʼa. Xúʼko̱ má nuyambáá náa Guʼwá magimbáanʼ mu miʼni̱i̱ náa ndayóoʼ maguma̱a̱ ga̱jma̱a̱ numbañún a̱ngia̱xoʼ bi̱ ñajúnʼ wanii, nuni xó má ethún bi̱ kuya̱ edxu̱u̱. Tséʼniuu má ndiéjunʼ ñajunʼ guáʼdáá siervos ministeriales, ikhiin nuni ga̱jma̱a̱ xúgíʼ a̱jkiún rí najuixnún muni ga̱jma̱a̱ xúgínʼ a̱ngia̱xoʼ nduyamajkún (1 Timoteo 3:13).

Ikhiin nugíiʼ mbá xkri̱da májánʼ rí nambáxuun gajmiún Dios. Bi̱ ñajúnʼ siervos ministeriales naxtaʼwíin ga̱jma̱a̱ numuu rí xú káʼnii xa̱bu̱ ni̱ndxu̱ún náa inuu Dios. Índo̱ nanújngun guxna discurso náa plataforma naʼni itháan gujkhuʼ fe ndrígáxoʼ; xkri̱da rí nugíiʼ índo̱ nagún gutaraʼa naxnáxoʼ tsiakii, ga̱jma̱a̱ índo̱ ikhiin numbañún bi̱ kuya̱ edxu̱u̱ naʼni rí makuwáanʼxo gagi ma̱ngaa makuwáanʼ mbá kambáxaxoʼ (Efesios 4:16). Nda̱wa̱á, mangiin ma̱ndoo manindxu̱ún bi̱ muyegun edxu̱u̱ náa guʼwá nagimbáanʼ.

• Xú káʼnii xa̱bu̱ ni̱ndxu̱ún siervos ministeriales rá.

• Xú káʼnii eruguambáá siervos ministeriales mu magajnúu májánʼ ñajunʼ rí naguma náa congregación rá.