Lá naku̱ma̱ʼ dí namíñaʼ ga̱jma̱a̱ xtaa mbáwiin ráʼ.

Atayáá ada̱ bi̱ kamaa náa xtiʼkhu. Mbáwíi kamaa ga̱jma̱a̱ xóo namiñuu kujmaa. Lá nimíñaʼ mbá miʼtsú ikháánʼ ráʼ... Xúgiáanʼ má nigíʼnulu xúʼko̱. Náa Biblia naʼthí ga̱jma̱a̱ numún xa̱bi̱i̱ Dios bi̱, maski ajndu nindúún kuyáá Jeobá, mangiin má nimiñun ga̱jma̱a̱ asndu niku̱mu̱ún rí ndajkuíin. Mbáa dí ikhaa ninindxu̱u̱ Elías. Guʼyáá rí nigíʼnuu.

Elías nixtáa náa xuajin Israel nákha wajyúúʼ, mba̱yu̱ʼ tsiguʼ nákha xóó tséxtáa Jesús. Nákha ikhú, rey bi̱ naʼtáñajunʼ náa xuajin Israel ga̱jma̱a̱ a̱ʼgiu̱u̱ tsíñún gúyáá Jeobá, bi̱ nindxu̱u̱ Dios gajkuwin. Ikhiin nigumbiʼñún Acab ga̱jma̱a̱ Jezabel ma̱ngoo ndiyamajkuíí Baal, ikha jngó, mbaʼin xa̱bu̱ Israel mangiin ndiyamajkuíí Baal, bi̱ nindxu̱u̱ mbáa dios bi̱ ragájkhun. Reina Jezabel phú xkawiʼ a̱jkiu̱u̱n ga̱jma̱a̱ nindoo magudíin xúgínʼ bi̱ nunimbu̱ún dí naʼthí Jeobá. Numuu dí Elías naʼni ñajunʼ Jeobá, ¡nindoo maxíyáa ma̱ngaa! Ndiéjunʼ gándoo gáʼni Elías rá. Ndiéjunʼ gátani á mu ikháánʼ jnu rá...

¡Ikha nigájnuu ni̱jkha̱ mitsínguánʼ! Ni̱jkha̱ náa mbaaʼ gíná ikhí nirkaʼuminaʼ náa tsíñu. Ndiéjunʼ jngó nirkaʼuminaʼ xá... Numuu rí nimiñuu. Mú ragíʼmaa mamiñúu. Ndiéjunʼ jngó rá. Numuu rí ikhaa ndaʼyoo má rí Dios ma̱ndoo mambáyúu. Nákha ginii nimbáyúu má. Mbá xkri̱da, mbá miʼtsú Elías niʼtákáñuu, ikhú Dios niriʼña ga̱jma̱a̱ aguʼ dí nikruígu asndu mekhuíí. Lá ragájkhun dí Jeobá gíʼdoo wéñuʼ tsiakii ráʼ. Gajkhun rí xúʼko̱. ¡Elías ma̱ndoo maku̱mu̱u̱ kaʼyoo ikhaa!

Índo̱ Elías gídáʼ náa tsíñu, Jeobá niraxu̱u̱: “Náa numuu rí xtaa gi̱jyooʼ rá.” Elías niríʼña̱a̱: “Nákha ginii kuwa eʼwíínʼ xa̱bu̱ bi̱ nunimbu̱u̱n dí narathúún, mú rí xúgi̱ mbawún ikhúúnʼ guanúʼ. Ga̱jma̱a̱ namíñúʼ dí muxiñún mangúún”. Ikhaa niku̱mu̱u̱ dí niradíin xúgínʼ bi̱ nuni ñajunʼ Dios. Mu Jeobá niʼthúu̱n: “Na̱nguá, raʼkháa i̱ndó ikháánʼ guanáʼ. Kuwa mbá siete mil xa̱bu̱ bi̱ xóó nuxnuʼ gamajkhu. Xámiñaʼ, numuu rí gúʼdoo mbóo ñajunʼ matani”. Índo̱ Dios niʼthúu̱n rúʼko̱, xú káʼnii niku̱mu̱u̱ Elías rá... ¡Mbáa nidxuu wéñuʼ!

Rí xúgi̱ atatsaʼwáminaʼ rí nigíʼnuu Elías. Ndiéjunʼ ejmañuluʼ rá... Dí mbáa nguáná maku̱ma̱ʼ rí i̱ndó ikháánʼ o rí namíñaʼ. Mu índo̱ gáku̱ma̱ʼ xúʼko̱ kaʼnii, lá natayáá ndiéjunʼ gándoo gátandxa̱ʼwa̱a̱ edxa̱ʼ ráʼ. Ma̱ndoo matatsaʼwamínáʼ rí na̱nguá xtaa mbáwiin, numuu rí xtaʼdiin bi̱ nambáxa̱ʼ gajmiáanʼ bi̱ nandún kuyáá Jeobá ga̱jma̱a̱ nandún kuyaʼ mangáán. Ga̱jma̱a̱ xágumaaʼ rí Jeobá gíʼdoo wéñuʼ tsiakii ga̱jma̱a̱ rí mambáyaʼ má xúʼko̱. Lá na̱nguá májánʼ wéñuʼ rúʼko̱ ráʼ...