Jeobá naxnúu tsiakii Elías

Jezabel niʼdxuun rí niguáʼniin gaʼyee ndrígóo Baal ga̱jma̱a̱ nikasngañuʼ wéñuʼ. Ikha jngó nikuʼmaa mbáa bi̱ maʼga̱ kayóo ajngáa náa Elías: “Gájtsii makhañáaʼ, xó má nikháñun gaʼyee ndrígóo Baal”. Elías nimiñuu wéñuʼ ga̱jma̱a̱ nigáyúu ni̱jkha̱ náa ku̱ba̱ʼ mixooʼ. Ikhí niʼtájkáan: “Jeobá nánguá eʼngoʼ itháan. Nandoʼ makhañúʼ”. Elías néʼngo̱o̱ wéñuʼ ga̱jma̱a̱ niʼgu náa agoo mbá ixi̱.

Mú mbáa ángel nixkajui̱i̱ Elías ga̱jma̱a̱ mañúú niʼthúu̱n: “Araxu̱nʼ ga̱jma̱a̱ atsiʼtsu”. Elías ndiʼyoo pan nijndi náa inuu itsí mijkha, ga̱jma̱a̱ mbá rayaʼ rí kajnu̱ʼ iyaʼ. Nikuiʼtsu ga̱jma̱a̱ niʼga̱a̱n, ga̱jma̱a̱ nda̱wa̱á nitanga̱a̱ niʼgu. Ángel nixkajui̱i̱ mbu̱júu̱ ga̱jma̱a̱ niʼthúu̱n: “Atsiʼtsu. Ndayóoʼ tsiakii mu mi̱dxu̱ʼ mitsínguánʼ”. Ikha jngó Elías nikuiʼtsu itháan. Nda̱wa̱á ni̱jkha̱ mbá 40 mbiʼi ga̱jma̱a̱ mbá 40 mbruʼun asndu índo̱ ni̱jkha̱nú náa kúbá Horeb. Ikhí nito̱ʼo̱o̱ náa mbá tsíñu mu migu. Ikhú Jeobá niʼthúu̱n: “Elías, ndiéjunʼ xtaa ratani̱ gi̱i̱ rá.” Elías niriʼña: “Israelitas túnimbaníí rí nithi. Nini gámbáa altar ndrígáʼ ga̱jma̱a̱ niradíin gaʼyee ndrígáʼ ga̱jma̱a̱ rí xúgi̱ mangúún nandún muxiñún”.

Jeobá niʼthúu̱n Elías: “Agajnáʼ ma̱ngaa añejún náa kúbá”. Ikhú nixnúu mbá giñánʼ gakhi̱i̱, nda̱wa̱á niʼxma ga̱jma̱a̱ nda̱wa̱á aguʼ. Nda̱wa̱á kayuʼ, Elías niʼdxaun mbá aʼwá wabaʼ ga̱jma̱a̱ mañúú. Ikha jngó nirúgoo inuu ga̱jma̱a̱ xtíñuu ma̱ngaa niwi̱ji̱ náa rawunʼ tsíñu. Jeobá niraxu̱u̱ náa numuu nigáyúu. Ga̱jma̱a̱ Elías niriʼñuu: “Ikhúúnʼ ni̱ndxu̱ʼ imbawíí gaʼyee bi̱ naguanúu”. Mú Jeobá niʼthúu̱n: “Na̱nguá xtaa mbáwiin. Xóó kuwa mbá 7,000 xa̱bu̱ náa Israel bi̱ nduyamajkhuʼ. Ayuʼ ga̱jma̱a̱ aratháán Eliseo bi̱ niraʼwíí mu mani̱ndxu̱u̱ gaʼyee nda̱wa̱á rí ikháánʼ”. Núkhu Elías ni̱jkha̱ gáʼni rí niʼthúu̱n Jeobá maʼni. Lá naku̱ma̱ʼ rí Jeobá mambáyaʼ mangáanʼ á mu natanimbaʼ xtayáá ráʼ. Xúʼko̱. Rí xúgi̱ mbuʼyáá rí nirígá nákha táxnúu ruʼwa.