A̱ʼdióo mbáa a̱ʼgú xuáʼa̱ ndaʼya mbu̱júu̱

Nákha xóó tséxnúu ruʼwa, Jeobá niʼthúu̱n Elías: “Ayuʼ náa xuajen Sarepta. Ikhí ma̱ta̱ya̱a̱ mbáa a̱ʼgú xuáʼa̱ bi̱ maxnáʼ ganitsu”. Náa xkrugua ndrígóo xuajen, Elías ndiʼyoo mbáa a̱ʼgú xuáʼa̱ gínáa bi̱ naguxi̱i̱ ixi̱ ga̱jma̱a̱ nindo̱ʼo̱o̱ mbá vaso iyaʼ. Índo̱ ikhaa ni̱jkha̱ gáyáaʼ, Elías niʼthúu̱n: “Mbá péñu, araxnúʼ mbá xíʼtóo pan”. Mú a̱ʼgú xuáʼa̱ niriʼña̱a̱: “Ragúʼdoo pan, xándoo maxnáʼ nditháan. I̱ndó gúʼdoo harina ga̱jma̱a̱ aceite mu mani mújúnʼ miʼkhu ikhúúnʼ ga̱jmu̱ʼ a̱ʼdióoʼ”. Elías niʼthúu̱n: “Jeobá niʼthúunʼ rí á mu ikháánʼ natani mbá pan chíʼgíʼ mu miʼkhu, maraʼdáá aceite ga̱jma̱a̱ harina asndu índo̱ gáxnáa ruʼwa”.

Ikha jngó a̱ʼgú xuáʼa̱ ni̱jkha̱a̱ náa goʼwóo ga̱jma̱a̱ nini mújúnʼ pan mu mikhu gaʼyee ndrígóo Jeobá. A̱ʼgú xuáʼa̱ ga̱jma̱a̱ a̱ʼdióo niguáʼdáá ganitsu xúgíʼ mbiʼi rí táxnúu ruʼwa, xó má Jeobá niʼthí. Rayaʼ náa gajkuáa harina ga̱jma̱a̱ rayaʼ náa kajnu̱ʼ aceite taguámbá.

Nda̱wa̱á nirígá mbá gamiéjunʼ mba̱a̱. A̱ʼdióo a̱ʼgú xuáʼa̱ niʼniuu nandii asndu nikháñu, ga̱jma̱a̱ ikhaa niʼthá kháñuu Elías mu mambáyúu. Ikhú Elías ndiyáa ada̱. Ni̱jkha̱ kayáa náa mbá cuarto dí rígá náa tsu̱du̱u̱ guʼwá. Nda̱wa̱á nitámáʼ náa xiyoo ga̱jma̱a̱ niʼtájkáan: “Jeobá, mbá péñu araxnáa vida ndrígóo ada̱ bugi̱”. Lá natayáá náa numuu maʼni májánʼ wéñuʼ Jeobá á mu naʼni rígi̱ rá. Numuu rí ikhú nimbáa bi̱ nikháñuu xóó tátuxi̱i̱. Ga̱jma̱a̱, ma̱ngaa, numuu rí a̱ʼgú xuáʼa̱ ga̱jma̱a̱ a̱ʼdióo na̱nguá ni̱ndxu̱ún israelitas.

Ikhú ada̱ nigíʼdu̱u̱ ndiyáa xi̱ʼ ga̱jma̱a̱ ndiʼya mbu̱júu̱. Elías niʼthúu̱n a̱ʼgú xuáʼa̱: “¡Atayáá! A̱ʼdiáaʼ ndaʼya”. Ikhaa nixtáa gagi wéñuʼ ga̱jma̱a̱ niʼthúu̱n Elías: “Rí xúgi̱ nda̱yo̱o̱ rí ikháánʼ ni̱ndxa̱ʼ mbáa xa̱bi̱i̱ Dios. Rí naratá na̱ʼkha̱ náa Jeobá ikha jngó nambánuu má xúʼko̱”.