Bi̱ nidamijná gíʼmaa muxuʼmamijná náa Dios mu makuwíin gagi

Jeobáa Dios niʼni rí munigu̱nʼ timbíin xa̱bu̱. Náa Biblia naʼthí rí ikhaa niʼnii timbáa a̱ʼgu̱ ga̱jma̱a̱ “ni̱ʼkha̱ kayáa náa xa̱biya̱”. Adán nidxuu wéñuʼ rí asndu niʼthí: “Asndu xúgi̱ rá itsu rígi̱ ñajunʼ itsuʼ, xuwiʼ rígi̱ xuyuʼ” (Génesis 2:22, 23). Jeobá nandoo má xúʼko̱ dí makuwíin gagi xa̱bu̱ bi̱ nidamijná.

Índo̱ xa̱bu̱ nudamijná, mbáa nutajkiún dí xúgíʼ maʼni májánʼ wéñuʼ. Mú dí phú gajkhun rí asndu bi̱ ra̱ʼkhá tháán eñún kuyamijná ga̱jma̱a̱ xúgíʼ a̱jkiu̱ún maguaʼdáá tikhu xkujndu (1 Corintios 7:28). Náa folleto rígi̱ gátaxkamaa mbaʼa ikha rí tsixtiʼkhuu rí na̱ʼkha̱ náa Biblia, rí á mu natanimbaníí, ma̱ndoo mambáyaʼ mu maraxtaa gagi ga̱jma̱ʼ a̱jmbia̱ʼ o a̱ʼgia̱ʼ ga̱jma̱a̱ bi̱ kúwi̱i̱n náa guʼwáaʼ (Salmo 19:8-11).

1 ATANIMBÁNII ÑAJUNʼ RÍ JEOBÁ NIXNÁʼ MATANI

RÍ NAʼTHÍ NÁA BIBLIA: Xa̱biya̱ kayá edxu̱u̱ náa goʼwóo (Efesios 5:23).

Á mu ikháánʼ xtaʼdaa a̱ʼgia̱ʼ, Jeobá nandoo rí mangajuaʼ xtayáá (1 Pedro 3:7). Ikhaa niʼnii mu maraxtaa ga̱jma̱ʼ ma̱ngaa nandoo rí maʼnda̱ʼ xtayáá ga̱jma̱a̱ ma̱ta̱ya̱a̱ xóo mbáa bi̱ ra̱ʼkhá tháán gíʼdoo numuu (Génesis 2:18). Gíʼmaa maʼndaʼ xtayáá wéñuʼ rí asndu mataʼgíiʼ ma̱ta̱ya̱a̱ ndiéjunʼ eyóoʼ ikhaa ki xóo rí eyáaʼ ikháánʼ (Efesios 5:25-29).

Á mu ikháánʼ xtaʼdaa a̱jmbia̱ʼ, Jeobá gíʼthu̱u̱n rí matiamajkuíí wéñuʼ ga̱jma̱a̱ matambáyii maʼnimbánuu rí kaʼyoo maʼni (1 Corintios 11:3; Efesios 5:33). Atambáyii rí naʼthí maʼni ga̱jma̱a̱ xúgíʼ a̱jkia̱nʼ (Colosenses 3:18). Á mu xúʼko̱ tani, a̱jmbia̱ʼ ga̱jma̱a̱ Jeobá mbuyáá dí ra̱ʼkhá tháán gíʼdoo numaʼ (1 Pedro 3:1-6).

RÍ GÁNDOO MATANI:

• Atraxi̱i̱ a̱ʼgia̱ʼ o a̱jmbia̱ʼ ndiéjunʼ gándoo gátani mu manindxa̱ʼ mbáa xa̱bu̱ bi̱ májánʼ a̱jkiu̱u̱n náa ikhaa. Atagíʼ matadxun rí eʼthí ga̱jma̱a̱ atani mbá tsiakii mu matani rí niʼtháanʼ.

• Xáʼgáanʼ. Mbajyúuʼ rí majmañalaʼ xú káʼnii muni mu makuwáanʼ gagi

2 ATASNGÁJMA RÍ GAJKHUN NAXMIÉJUANʼ RÍ XÚ KÁʼNII KU̱MU̱U̱

RÍ NAʼTHÍ NÁA BIBLIA: Gíʼdoo numuu ma̱ta̱ya̱a̱ ndiéjunʼ phú eyóoʼ xa̱bu̱ bi̱ xtaa ga̱jma̱ʼ (Filipenses 2:3, 4). Gangajuaʼ xtayáá, garmáʼáan a̱jkia̱nʼ rí Jeobá nandoo rí xa̱bi̱i̱ maguaʼdáá gamajkhún (2 Timoteo 2:24). Atatsaʼwáá májánʼ edxa̱ʼ dí marata, náa Biblia xtáa raʼthí: “Xtáa bi̱ tsindxaʼwóo edxu̱u̱ rí maʼthí, naʼnigaúnlú xóo índo̱ narujtáanʼ chídí rí a̱jma̱ inuu, mú, rí nuthi xa̱bu̱ bi̱ najmañún wéñuʼ nindxu̱u̱ xóo rí naʼni thana” (Proverbios 12:18). Xi̱ʼ kaʼwu ndrígóo Jeobá gambáyaʼ mu marata ga̱jma̱a̱ májánʼ ga̱jma̱a̱ gamajkhu (Gálatas 5:22, 23; Colosenses 4:6).

RÍ GÁNDOO MATANI:

• Índo̱ gutamíjna̱ mbá rí gíʼdoo wéñuʼ numuu, aratháán ginii Dios mambáyaʼ mu xákiʼnán ga̱jma̱a̱ rí matatsaʼwamínáʼ májánʼ

• Atatsaʼwáá májánʼ edxa̱ʼ ndiéjunʼ gárata ga̱jma̱a̱ xú káʼnii gárata

3 XÁGUMALA RÍ GÍʼMAA MUMBAYUMÍJNÁ

RÍ NAʼTHÍ NÁA BIBLIA: Índo̱ nudamijna “maʼnila imbahui xabo ñajunʼ-ranʼ” (Mateo 19:5). Mú kaʼnííʼ má nindxa̱la a̱jmi̱i̱n xa̱bu̱ bi̱ mixtiʼkhuin ga̱jma̱a̱ marigá mbiʼi rí mundxaʼwamíjna̱ mixtiʼkhu. Ikha jngó ikháanʼ gíʼmaa majmañala mundxa̱ʼwa̱míjna̱ mbóó ga̱jma̱a̱ mbóó rí gakumalaʼ (Filipenses 2:2). Gíʼdoo numuu rí nájmi̱i̱n gundxa̱ʼwa̱a̱ e̱dxu̱ún rí káʼnii eñún muni. Xú káʼnii gándoo gíʼni̱ rígi̱ rá. Náa Biblia naʼthí: “Á mu natraxu̱u̱n eʼwíínʼ, xúgíʼ awan dí natríyaʼ magajnúu májánʼ” (Proverbios 20:18). Atatsíñaʼ rí ikha dí tsixtiʼkhuu rí na̱ʼkha̱ náa Biblia mbayá ikhala índo̱ rígá mbá rí nandalá muni (Proverbios 8:32, 33).

RÍ GÁNDOO MATANI:

• Aratháán xúgíʼ bi̱ ndiyáa; asndu rí gíwanʼ náa awúu̱n a̱jkia̱nʼ

• Nákha xóó tsitaxúdaminaʼ matani mbá rí eyaaʼ, ginii atraxi̱i̱ xa̱bu̱ bi̱ ndiyáa