Gambaxáʼ májánʼ gajmiáanʼ bi̱ xtañún

Índo̱ nudamijná xa̱bu̱ nugíʼdi̱i̱ nakuwa wájíʼ. Maski ajndu xátatsiʼñáʼ má ranʼdaʼ xtáyáá ga̱jma̱a̱ ratayamajkuíí ana̱ʼ ga̱jma̱a̱ ru̱dáʼ, mu bi̱ itháan gíʼmaa magiʼdoo numuu náa ikháánʼ ikhaa nindxu̱u̱ bi̱ ndiyáa. Mbáa tikuiin bi̱ xtañún xánigunʼ rígi̱. Mú mambáyaʼ ikha dí na̱ʼkha̱ náa Biblia mu xúʼko̱ maraxtaa tsímáá gajmiáanʼ, xúʼko̱ má ga̱jma̱ʼ bi̱ ndiyáa.

1 AWAAN GÁTA̱YA̱A̱ XÓO GÁTANI GAJMIÁANʼ BI̱ XTAÑÚN

RÍ E̱ʼKHA̱ RAʼTHÍ NÁA BIBLIA: “Atiamacui anaʼ jma rudaʼ” (Efesios 6:2). Tséʼniuu má nguáthá tsiguaʼ xtaʼdáá, mbaʼyóoʼ rí matiamajkuíí má xúʼko̱ ana̱ʼ ga̱jma̱a̱ rudáʼ. Mú xágumaaʼ rí ma̱ngaa bi̱ ndiyáa ndayóoʼ maʼga̱ raʼyoo anu̱u̱ ga̱jma̱a ru̱dúu̱. “Rí maʼndulúʼ kuʼñúún eʼwíínʼ maʼni rí xaxígulúʼ”, ikha jngó xámiñaʼ rí maniñuʼ raʼndoo kaʼyaʼ numuu rí nambáxu̱u̱ májánʼ gajmíi̱n bi̱ kaʼñúún (1 Corintios 13:4; Gálatas 5:26).

RÍ MA̱NDOO MATANI:

• Xárata: “A̱ngia̱nʼ nutanumuʼ má xúʼko̱” o “Rudáʼ tsiniguʼ nditháan rí nani”

• Atagíʼ ma̱ta̱ya̱a̱ xóo endxa̱ʼwóo edxu̱u̱ bi̱ ndiyáa

2 ARATHÁ MBÁJMBAʼ ÍNDO̱ NDAYÓOʼ

RÍ E̱ʼKHA̱ RAʼTHÍ NÁA BIBLIA: “Ikha jngó xa̱biya̱ maniñuʼ anu̱u̱ ga̱jma̱a̱ rudúu gíʼdo rí maxtáa ga̱jma̱a̱ a̱ʼgiu̱u̱ ma̱ngoo maguanu mani̱ndxu̱ún mbó xuwiʼ” (Génesis 2:24). Nda̱wa̱á rí ikháánʼ nitanújunʼ o nitatsigúnʼ, mbáa ana̱ʼ ga̱jma̱a̱ ru̱dáʼ xóó maxmiéjunʼ kuyaʼ ga̱jma̱a̱ maʼndún muxudami̱jna̱ wéñuʼ náa ikháanʼla.

Nájmáanʼ gutamíjná asndu náa guniʼñúnʼ muxudami̱jna̱, ga̱jma̱a májánʼ gúthu̱u̱n. Ma̱ndoo muthu̱u̱n mbájmbala mú ga̱jma̱a̱ gamajkhu (Proverbios 15:1). Rí xunimbaʼumijna, ga̱jma̱a̱ dí manindxala xa̱bu̱ guabáanʼ ga̱jma̱a̱ rí á mu naʼngo̱o̱ a̱jkia̱la mambáyalaʼ mambaxáláʼ májánʼ gajmiála bi̱ ku̱ñu̱u̱n ga̱jma̱a̱ “uni mbaʼ acunʼla cuyamijna” numuu rí nandala kuyamíjna̱ (Efesios 4:2).

RÍ MA̱NDOO MATANI:

• Á mu naxmiéjuanʼ wéñuʼ xóo eni ga̱jma̱a̱ numala bi̱ ku̱ñu̱u̱n, aratámíjná ga̱jma̱ʼ bi̱ ndiyáa índo̱ na̱nguá kiʼnáanʼ

• Gambánala xú káʼnii gunimbánii índo̱ gúraʼníí ajngáa rígi̱