Tsesmbatigu̱u̱n náa inuu xándú

Nda̱wa̱á dí rey Nabucodonosor nigundajmaa estatua, ikhú nikuʼma maguma mbáa xándú mba̱a̱ wéñuʼ rí miʼni ga̱jma̱a̱ oro. Nitsijii náa xkua̱ ndrígóo Dura ga̱jma̱a̱ nigimbíin náa ikhaa xúgínʼ xa̱bu̱ bi̱ guáʼdáá numuu náa xuajen, ma̱ngaa Sadrac, Mesac ga̱jma̱a̱ Abednego. Ikhú rey niʼthí: “Índo̱ gudxawíín aʼwóo trompetas, arpas ga̱jma̱a̱ gaitas, ikhú gíʼmaa musmbati̱ga̱la náa inuu xándú. Asndu tsáa bi̱ xáʼni, majngún náa horno rí nakha”. Ndiéjunʼ ku̱ma̱ʼ ikháánʼ rá. Lá musmbati̱gu̱u̱n ajtsíin hebreos bugi̱ náa inuu xándú o i̱ndó mbuyamajkuíí Jeobá dxe̱ʼ.

Ikhú rey niʼthí rí mudi̱i̱ ajmúú. Xúgínʼ nismbati̱gu̱u̱n ga̱jma̱a̱ ndiyamajkuíí xándú. Mú Sadrac, Mesac ga̱jma̱a̱ Abednego nánguá ndiyamajkuíí. Tikuiinʼ xa̱bu̱ ndiyáá ga̱jma̱a̱ nitháán rey: “Ajtsíin hebreos buʼko̱ na̱nguá eyamajkuíí xándú ndrígá”. Nabucodonosor nindxaʼwún ajtsíin jiáma bugi̱ ga̱jma̱a̱ niʼthún: “Ma̱ndoo mbuyamajkuíí mbu̱júu̱ xándú. Á mu tsenila, magruiñaʼla náa horno rí nakha. Nimbáa dios xáʼngo̱o̱ gáʼni káwáanʼla náa ikhúúnʼ”. Ikhiin niriʼña̱a̱n: “Xáʼyóoʼ má munixu. Dios ndrígúxu̱ maʼngo̱o̱ maʼni káwáanʼxu. Maski asndu xáʼni káwáanʼxu, oh, rey, xuyamajkuííxu xándú”.

Nabucodonosor nikiʼnáa wéñuʼ. Niʼthún xa̱bi̱i̱: “¡Gutsikaráʼaa horno juwan nuthu itháan ki xóo nákha ginii!”. Nda̱wa̱á niʼthúún soldados ndrígóo: “Guruʼwu̱u̱n xa̱bu̱ bugi̱ ga̱jma̱a̱ gudami̱ʼi̱i̱n ikhí”. Horno mijkha wéñuʼ rí asndu índo̱ soldado nigún kanuu, nikháñun. Bi̱ ajtsíin hebreos nijtiin náa aguʼ. Nda̱wa̱á Nabucodonosor niyexi náa horno, ndiʼyoo rí a̱jkhui̱i̱n xa̱bu̱ kuwa ragún náa awúu̱n horno, raʼkháa ajtsíin. Nimiñun wéñuʼ ga̱jma̱a̱ niraxu̱u̱n bi̱ numbayíí: “Lá raʼkháa ajtsíin xa̱bu̱ nidríñiinʼ náa aguʼ ráʼ. A̱jkhui̱i̱n xtáá rañu̱u̱n, ¡ga̱jma̱a̱ mbáa nakujmaa xóo ángel”.

Nabucodonosor ni̱jkha̱ kanuu itháan náa horno ga̱jma̱a̱ niʼthí: “¡Agajnála, xa̱bi̱i̱ Dios bi̱ phú mba̱a̱!”. Xúgínʼ niguanún tsiánguá índo̱ ndiyáá Sadrac, Mesac ga̱jma̱a̱ Abednego nagájna̱a̱ náa aguʼ ga̱jma̱a̱ rí nda̱a̱ rí niguáʼnii nditháan. Na̱nguá nikha xuñúnʼ xtátsúun edxu̱ún ni má xtíñún, ma̱ngaa na̱nguá ndajtsíinʼ gúní.

Nabucodonosor niʼthí: “¡Dios ndrígóo Sadrac, Mesac ga̱jma̱a̱ Abednego nda̱a̱ ajngáa muʼthá xóo nindxu̱u̱! Nikuʼmaa ángel ndrígóo mú maʼni káwíin. Nda̱wa̱a̱ imba̱a̱ dios xóo ndrígu̱ún ikhiin”.

Bi̱ ajtsíin hebreos niraʼwíí maguajún jmbu náa Jeobá garigá má dí garigá. Lá nandaʼ manindxa̱ʼ xóo ikhiin xáʼ.