Jesús niʼniga̱bi̱i̱ Lázaro

Jesús nigiʼdiin ajtsíin bi̱ nambáxu̱u̱ májánʼ gajmíi̱n bi̱ nikuwa náa Betania. Nigumbiʼñún Lázaro, María ga̱jma̱a̱ Marta, ga̱jma̱a̱ ikhiin ni̱ndxu̱ún mbá yáʼdíin. Mbóo mbiʼi, Jesús nixtáa náa imbo̱o̱ ridoo mañu Jordán, ga̱jma̱a̱ María ma̱ngaa Marta nixuʼma mbá ajngáa rí ndayóoʼ maʼdxun nacha̱: “Lázaro naʼniuu wéñuʼ nandii. Mbá péñu, ayi̱ nacha̱”. Mú Jesús táʼga núkhu. Nigi̱ʼthu̱u̱n a̱jma̱ mbiʼi ga̱jma̱a̱ nda̱wa̱á niʼthún discípulos ndrígóo: “Guʼgua̱ náa Betania. Lázaro naʼgu, ga̱jma̱a̱ maʼgá gaxkajui̱i̱”. Apóstoles nitháán: “Á mu Lázaro xtáa raʼgu, maʼni̱i̱ a̱jkiu̱u̱n”. Ikha jngó Jesús niʼthún kaʼwu: “Lázaro nikháñuu”.

Índo̱ Jesús ni̱jkha̱nú náa Betania, Lázaro xtáa má a̱jkhu̱ mbiʼi náa nijuaʼdi̱i̱. Mbaʼin xa̱bu̱ nigún gúni a̱jkiu̱u̱n Marta ga̱jma̱a̱ María. Marta niʼdxun rí Jesús ni̱ʼkha̱nú ga̱jma̱a̱ nigájnuu ragáyúu mu maʼtámíjná ga̱jma̱a̱. Niʼthúu̱n: “Señor, á mu niraxtaa gi̱i̱, ndxájuʼ xákhañuu”. Jesús niriʼña̱a̱: “Ndxájuaʼ matanga̱a̱ maxtáa mbu̱júu̱. Marta, lá natatsimbaaʼ rí etha̱nʼ ráʼ.” Ikhaa niriʼña̱a̱: “Ikhúúnʼ nanimbooʼ rí maʼga̱nú matuxi̱i̱”. Ikhú Jesús niʼthúu̱n: “Ikhúúnʼ ni̱ndxu̱ʼ bi̱ maʼnigabiín ga̱jma̱a̱ bi̱ maʼni rí mbuya”.

Nda̱wa̱á Marta ni̱jkha̱ gáʼthúu̱n María: “Gi̱i̱ xtáa Jesús”. María ni̱jkha̱ ragáyúu náa xtáa Jesús, ga̱jma̱a̱ xa̱bu̱ nigún kidxuuʼ. Índo̱ María ni̱jkha̱nú náa inuu ikhaa, nismbatigo̱o̱ náa rajkúu ga̱jma̱a̱ nimbiyaaʼ má xúʼko̱. Niʼthúu̱n: “Señor, á mu niraxtaa gi̱i̱, ndxájuxu xákhañuu”. Jesús ndiʼyoo rí ikhaa xtáa ramínuuʼ wéñuʼ ga̱jma̱a̱ ma̱ngaa nimbiyaʼ. Bi̱ nikuwa ikhí ndiyáá rí Jesús nimbiyaʼ ga̱jma̱a̱ nithi: “Gajkhun rí Jesús nindoo kaʼyoo wéñuʼ Lázaro”. Mú tikhun niraximíjna̱: “Náa numuu rí táʼni kríyaaʼ bi̱ nimbáxu̱u̱ ga̱jma̱a̱ xá.” Ndiéjunʼ gáʼni Jesús xúgi̱ rá.

Jesús ni̱jkha̱ náa nijuaʼdi̱i̱, rí nindxu̱u̱ mbá tsíñu, ma̱ngaa niruguáá ga̱jma̱a̱ mbá itsí. Ikhaa niʼthí: “Guyéngaa itsí”. Marta niʼthúu̱n: “Mbáa ndajtsúunʼ má numuu rí niʼni má a̱jkhu̱ mbiʼi”. Maski ajndu xúʼko̱, niyengaa itsí, ga̱jma̱a̱ Jesús niʼtájkáan: “Anu̱ʼ, naxna̱ʼla núma̱aʼ ga̱jma̱a̱ numuu rí natadxawunʼ. Ikhúúnʼ nda̱yo̱o̱ rí natadxawunʼ má xúʼko̱, mú natha̱nʼ gakhii mu xa̱bu̱ munimbu̱ún rí ikháánʼ nitaxúngunʼ”. Ikhú niʼthí gakhi̱i̱: “¡Lázaro, agajnáʼ!”. Núkhu, nirígá mbá rí mitsaan wéñuʼ: Lázaro nigájna̱a̱ náa nijuaʼdi̱i̱, asndu xóó kambráʼaa xtíin. Jesús niʼthí: “Gumbríyaʼ xtíin rí kambráʼaa ga̱jma̱a̱ guniʼñáanʼ maʼga̱a̱”.

Mbaʼin ndiyáá rí nirígá ga̱jma̱a̱ niguáʼdáá fe náa Jesús, mú tikhun nigún gúthun fariseos. Asndu mbiʼi rúʼko̱, fariseos niriyaʼ awan muxiyáa Lázaro ga̱jma̱a̱ Jesús. Mbáa rí 12 apóstoles, Judas Iscariote, ni̱ʼkha̱ ngu̱ʼwa̱ gáraxu̱ún fariseos: “Nguáthá guni numuʼ á mu mambáyala muxkamaa Jesús rá”. Nixnaraʼa 30 mbújkha̱a̱ ndrígóo plata ga̱jma̱a̱ Judas nigruigú ma̱ngaa ndiyáaʼ mbiʼi rí maxnáxi̱i̱ Jesús.