Nda̱a̱ rí erikhúún

Mbáa xa̱biya̱ bi̱ tséjmaa gáʼga nagi̱ʼi̱ mu manda̱ʼa̱ limosna xúgíʼ mbiʼi náa rexo̱o̱ templo. Mbá wakhííʼ, ndiʼyoo Pedro ga̱jma̱a̱ Juan ga̱jma̱a̱ niʼthún: “Guni péñu, guxnuʼ mbújkha̱a̱”. Pedro niriʼñuu: “Ma̱ndoo maxna̱ʼ mbá rí itháan májánʼ ki xóo mbújkha̱a̱. Ga̱jma̱a̱ mbiʼyuu Jesús, ¡atuxaʼ ga̱jma̱a̱ ayuʼ!”. Ikhú Pedro nimbáyúu mu matuxu̱u̱ ga̱jma̱a̱ xa̱bu̱ nigíʼdu̱u̱ ni̱jkha̱. Xa̱bu̱ nidxún wéñuʼ índo̱ ndiyáá milagro rígi̱ rí mbaʼin niguánu ninimbu̱ún.

Mú ndxajkun ga̱jma̱a̱ saduceos nikiʼníin wéñuʼ. Nirajtuun apóstoles, nigún kudiin náa nunimbaníí xkujndu xa̱bu̱ ede̱ bi̱ kuwa náa mbaʼa guʼwá ndxajkun, rí nixna mbiʼí Sanedrín, ga̱jma̱a̱ niraxu̱u̱n: “Tsáa nixnála tsiakii mu muni thanáá xa̱bu̱ bugi̱ rá.” Pedro niriʼñúún: “Tsiakii nixnúxu Jesucristo, xa̱bu̱ bi̱ ikháanʼ nixíyáa”. Xa̱bu̱ ede̱ nithúún gakhi̱i̱: “¡Guniʼñáʼ ruthala ga̱jma̱a̱ numuu mbiʼyuu Jesús!”. Apóstoles nithi: “Ndayóoʼ mutaxu ga̱jma̱a̱ numuu ikhaa, xáguanúxu wíí”.

Ikhú niniñaaʼ magajnún Pedro ga̱jma̱a̱ Juan, ga̱jma̱a̱ ikhiin núkhu nigún gúthuun eʼwíínʼ discípulos rí nirígá. Xúgínʼ nitakháñii mbóó nduʼ Jeobá: “Mbá péñu, atambáyuxuʼ mu xámiñuxu rí muta má xúʼko̱ ga̱jma̱a̱ numaʼ”. Jeobá nixnúún xi̱ʼ kaʼwu, ga̱jma̱a̱ xúʼko̱ nindoo nitaraʼa ga̱jma̱a̱ nini thanún xa̱bu̱. Mbaʼin xa̱bu̱ ninimbu̱ún itháan. Saduceos nixígu̱u̱n rí asndu nixudiinʼ apóstoles náa guʼwá e̱jua̱nʼ. Mú mbruʼun rúʼko̱, Jeobá nikuʼmaa mbáa ángel mu mambáʼtoo xkrugua ndrígóo guʼwá e̱jua̱nʼ ga̱jma̱a̱ niʼthún apóstoles: “Guʼguala mbu̱júu̱ náa templo ga̱jma̱a̱ gutaráʼa mbu̱júu̱ ikhí”.

I̱mba̱ néjtsuu, ni̱jkha̱ mbáa gáʼthi náa Sanedrín: “¡Guʼwá e̱jua̱nʼ kúgoo xa̱ʼ, mú xa̱bu̱ bi̱ ikháanʼ nirajtuunxu ní nda̱wi̱i̱n ikhí. ¡Kuwa náa templo rutaraʼa!”. Ikha jngó nirajtuun mbu̱júu̱ apóstoles ga̱jma̱a̱ nigún kudiin náa Sanedrín. Bi̱ kayá edxu̱u̱ náa ndxajkun niʼthí: “¡Nitala má rí ní xútha itháan ga̱jma̱a̱ numuu Jesús!”. Pedro niriʼña̱a̱: “Gíʼmaa munimbuxu ku̱ya̱a̱ Dios xóo Xa̱bu̱ Ñajunʼ raʼkháa náa xa̱bu̱”.

Xa̱bu̱ ede̱ bi̱ kuwa náa mbaʼa guʼwá ndxajkun nikiʼníin wéñuʼ rí asndu nindúún muradíin apóstoles. Ikhú mbáa fariseo bi̱ nigumbiʼyuu Gamaliel niwi̱ji̱ ga̱jma̱a̱ niʼthí: “¡Guñeumíjna̱la! Mbáa Dios xtáa gajmíi̱n xa̱bu̱ bugi̱. Lá nandala muxmíjnala gajmiála Dios ráʼ.” Ikhiin ninimbu̱ún. Niniñuʼ magúun, mú ginii nixnúún ga̱jma̱a̱ xkuiya ga̱jma̱a̱ nithúún mbu̱júu̱ rí muniñaʼ rutaraʼa. Mú rúʼko̱ tarikhún apóstoles. Nitaraʼa má xúʼko̱ náa templo ga̱jma̱a̱ náa mámbá guʼwá.