KÍXNUU 14

Xámbumaʼ maratha rí itháan gíʼdoo numuu

Hebreos 8:1

RÍ NAGÁJNURIYOʼ: Atambáñun bi̱ kuwa rudxawanʼ mu mbuyáá xúgíʼ rí e̱ʼkha̱ raʼthí náa discurso rí naraxná, ga̱jma̱a̱ mu mbuyáá kaʼwu xóo embánii mámbá rí gíʼdoo numuu ga̱jma̱a̱ ndiéjunʼ rí eyoo gaʼthí discurso.

XÚ KÁʼNII GÁTANI:

Atayáá náá numuu. Atayáá á mu náa discurso naʼthí rí i̱ndó marathu̱u̱n, muniʼnuʼ o mataxkaxi̱i̱n bi̱ kuwa rudxawanʼ ga̱jma̱a̱ xúʼko̱ gátaniratáá. Atayáá májánʼ dí xúgíʼ rí itháan gíʼdoo numuu rí e̱ʼkha̱ raʼthí mambáñún muxkamaa rí eñún muni.

Atraximínaʼ: “Ndiéjunʼ endxaʼwamíjna̱ bi̱ kuwa rudxawunʼ rá. Xú káʼnii gándoo gájmuʼ graxe̱ rá”. Ga̱jma̱a̱ nda̱wa̱á atayáá májánʼ xóo gídxúʼ raratá mámbá graxe̱ mu bi̱ kuwa rudxawanʼ mbuyáá xóo edxu̱ʼ, ga̱jma̱a̱ mu ma̱ndoo makru̱ʼu̱u̱n rí e̱ʼkha̱ raʼthí náa discurso.
Arathá rí kayá edxu̱u̱ rí itháan gíʼdoo numuu. Atanga̱án maratha mbaʼa nuthu rí kayá edxu̱u̱, mú arathá ga̱jma̱a̱ ajngáa rí itháan gíʼdoo numuu o gajmaaʼ i̱ʼwáʼ ajngáa rí nambánii ga̱jma̱a̱.
Atayáá rí gárata mani̱ndxu̱u̱ kaʼwu ga̱jma̱a̱ ra̱mingíjyúuʼ. Atraʼwíí nguáthá ajngáa rí itháan gíʼdoo numuu rí nambánii ga̱jma̱a̱ rí kayá edxu̱u̱ discurso ndrígáʼ, mu xanújngaaʼ rí kaʼyaʼ. Xárata mbaʼa wéñuʼ. Atani rí magajnúu kaʼwu mámbá, añajún mbégu̱ʼ, ga̱jma̱a̱ xanújngaaʼ mbá nacha̱ náa i̱mba̱.

Ma̱ndoo maratha rí itháan gíʼdoo numuu índo̱ natagíʼdi̱i̱, mu mambáñún bi̱ kuwa rudxawanʼ mbuyáá náa xtaa raratá o ma̱ndoo matangáan maratha índo̱ gámbáʼ kayuʼ, mu ma̱ndoo marmáʼáan a̱jkiu̱ún.