KÍXNUU 12
Ndiéjunʼ gámbáyaaʼ mu xátatsiʼñáánʼ ratanigajmaa Biblia rá.
Rí matanigajmaa̱ Biblia mambáyaaʼ wéñuuʼ mú nguáná maʼni miʼskhoo. Mbáa nguáná ikháán matraximínaʼ á mu rí maʼngaaʼ matanigajmaa̱ má xúʼko̱ Biblia. Ndíjkha rí na̱nguá nindxu̱u̱ ndíí tsiakii rí gátani rá. Ndiéjunʼ gámbáyaaʼ matanigajmaa̱ má xúʼko̱ maski asndu narígá xkujndu rá.
1. Ndíjkha rí na̱nguá nindxu̱u̱ ndíí rí matanigajmaa̱ Biblia rá.
“Ajngá rawuunʼ Dios ndaʼya ga̱jma̱a̱ gíʼdoo tsiakii” (Hebreos 4:12). Biblia nindxu̱u̱ mbá libro rí gíʼdoo wéñuʼ numuu, ikhí naʼthí ndiéjunʼ endxa̱ʼwáminaʼ Dios ma̱ngaa rí eku̱mu̱u̱ ga̱jma̱a̱ numaaʼ ikháán. Raʼkháa i̱ndó mambáyaaʼ mu majmañaaʼ itháán ma̱ngaa majmañaaʼ matraʼwíí májánʼ dí matani ga̱jma̱a̱ maraʼti̱i̱n rí marigá nda̱wa̱á. Mú rí itháán gíʼdoo numuu matanigajmaa̱ Biblia nindxu̱u̱ rí mambáyaaʼ mambajxáaʼ ga̱jma̱a̱ Jeobá. Índo̱ ikháán nadxuʼ ratanigajmaa Biblia natatsiñaminaʼ dí tsiakii ndrígóo Jeobá maʼni dí maraxtaa májánʼ.
2. Ndíjkha rí májánʼ mbuʼyáá nguáthá gíʼdoo numuu gajkhun dí na̱ʼkha̱ náa Biblia rá.
Gajkhun rí na̱ʼkha̱ náa Biblia nindxu̱u̱ xóo mbá dí gíʼdoo wéñuuʼ numuu. Ikha jngóo, ikhaa naʼtulúʼ rígi̱: “Aratsi̱ rí gajkhun ga̱jma̱a̱ nditháan xátagujua̱” (Proverbios 23:23). Á mu nduʼyáá nguáthá gíʼdoo numuu gajkhun rí na̱ʼkha̱ náa Biblia, mu̱ʼni̱ tsiakimíjnalu rí muʼnigajmaa má xúʼko̱ maski narígá mbaʼa rí naʼniulú gakhii (atraxnuu Proverbios 2:4, 5).
3. Ndiéjunʼ gaʼni Jeobá ga̱jma̱a̱ numaaʼ mu xátatsiʼñáʼ ratanigajmaa rá.
Numuu rí Jeobá nindxu̱u̱ bi̱ niʼniáanlu bi̱ gíʼdoo xúgíʼ tsiakii ga̱jma̱a̱ nindxu̱u̱ bi̱ nambájxáaʼ gajmaaʼ, naninínʼ májánʼ ma̱ngaa nandoo mambáyaaʼ mu majmañaaʼ itháán ga̱jma̱a̱ numuu ikhaa. Dios ma̱ndoo maʼni rí “maʼndaaʼ matani ga̱jma̱a̱ naxnáʼ tsiakii mu matani” (atraxnuu Filipenses 2:13). Ikha jngóo, á mu nguáná nakumaaʼ rí naʼniaaʼ gakhii mu matanigajmaa̱ o naʼniaaʼ gakhii mu matagíʼ matani rí xtaa rajmañaaʼ, ikhaa ma̱ndoo mambáyaaʼ. Ga̱jma̱a̱ á mu nda̱yáaʼ tsiakii mu maʼnga̱a̱ʼ matraʼníí xkujndu o rí tsíñún gúyáaʼ eʼwíinʼ, ikhaa ma̱ndoo maxnáaʼ tsiakii. Atanda̱ʼa̱a̱ má xúʼko̱ Jeobá rí mambáyaaʼ mu xátatsiʼñánʼ ratanigajmaa Biblia (1 Tesalonicenses 5:17).
GAJMAÑAAʼ ITHÁAN
Guʼyáá ndiéjunʼ gándoo matani mu xátatsiʼñánʼ ratanigajmaa Biblia, maski ajndu eʼwíinʼ maʼndún rí ikháán matatsíʼñánʼ o á mu rí tsiguapán kayuuʼ. Ga̱jma̱a̱ nda̱wa̱á mbuʼyáá ndiéjunʼ gaʼni Jeobá mu mambáyaaʼ mu ikháán xátatsiʼñánʼ ratanigajmaa.
4. Atayáá rí gíʼdoo numuu matanigajmaa̱ Biblia
Nguáná rígá mbaʼa rí naʼni dí xáguapánlu mu muʼnigajmaa Biblia. Ndiéjunʼ gándoo muʼni rá. Guraxnuu Filipenses 1:10 ga̱jma̱a̱ gutamíjnála rígi̱:
Ndiéjunʼ “rí gíʼdoo itháan numuu ku̱ma̱a̱ʼ ikháán rá”.
Ndiéjunʼ gándoo matani ku̱ma̱a̱ʼ ikháán mu ma̱ta̱ya̱a̱ rí gíʼdoo numuu matanigajmaa̱ Biblia rá.
Á mu natrajkuáa jui̱ʼi̱ náa mbá bote ga̱jma̱a̱ nda̱wa̱á natagíʼ madriyaʼ mbaʼa itsí ni xáraʼnuu majthi̱ itsí.
Á mu ginii natandriyáʼ itsí maʼngo̱o̱ má náa majkuáa jui̱ʼi̱ ma̱ngaa. Ikháá má kayuuʼ á mu natagíʼ natani ginii “rí gíʼdoo numuu” maʼnga̱a̱ʼ matani ga̱jma̱a̱ asndu mapidún mbiʼi matani i̱ʼwáʼ.
Rí muʼnigajmaa Biblia nambáyulú mamajñulú itháan ga̱jma̱a̱ numuu Dios, xóo muʼthá rí muniʼnílu ga̱jma̱a̱ rí mbuyamajkuíí. Guraxnuu Mateo 5:3 ga̱jma̱a̱ gutamíjnála rígi̱:
Á mu nduʼyáá rí gíʼdoo numuu muʼnigajmaa Biblia, xú káʼnii gándoo gámbáyulú rá.
5. Xátatsiʼñánʼ ratanigajmaa maski ajndu eʼwíinʼ nakiʼníin
Nguáná makuwá tikhun bi̱ maʼndún murikhaaʼ rí matatsiʼñáánʼ ratanigajmaa Biblia. Atayáá xkridoo Francesco. Guya̱a̱ VIDEO ga̱jma̱a̱ gutamíjnála rígi̱:
Xú káʼnii nini bi̱ kúwá náa goʼwóo ma̱ngaa bi̱ nambájxuu gajmíi̱n Francesco índo̱ niʼthún rí xtáa rajmañuu rá.
Ndíjkha rí táʼni ndíí rí tániñuuʼ raʼnigajmaa xá.
Guraxnuu 2 Timoteo 2:24, 25 ga̱jma̱a̱ gutamíjnála rígi̱:
Ndiéjunʼ endxaʼwamíjna̱ bi̱ xtañún ga̱jma̱a̱ bi̱ nambájxáaʼ gajmiáanʼ rí ikháán xtaa rajmañaʼ rá.
Xó má na̱ʼkha̱ raʼthí náa versículo rígi̱, xú káʼnii gíʼma matani ikháán índo̱ mbáa gágíʼ marikhaaʼ rí xátanigajma̱a̱ Biblia rá. Náa numuu rá.
6. Atayáá rí Jeobá má gámbáyaaʼ
Índo̱ na̱jkua̱nú nambájxulu itháan májánʼ gajmiúlú Dios, itháan nandulú muʼni rí maʼdxuu a̱jkiu̱u̱n. Mú, maski ajndu xúʼko̱ mbáa marigá rí maʼniuluʼ miʼskhoo mu muriʼkui̱i̱ xóo káʼnii eʼnilu mu makuwáanʼ xóo nigu̱u̱ Jeobá. Á mu rí ikháán naku̱ma̱a̱ʼ xígi̱ káʼnii xákhanájkhaaʼ Jeobá má gámbáyaaʼ. Guya̱a̱ VIDEO ga̱jma̱a̱ gutamíjnála rígi̱:
Xó má ndiʼyáá náa video, ndiéjunʼ rí ndiyóoʼ mariʼkumina̱a̱ʼ Jim mu maʼni rí naniguuʼ Jeobá rá.
Ndiéjunʼ rí itháan nanigua̱a̱ʼ ikháán dí xóo niʼni xá.
Guraxnuu Hebreos 11:6 ga̱jma̱a̱ gutamíjnála rígi̱:
Ndiéjunʼ gáʼni Jeobá ga̱jma̱a̱ numún xúgíinʼ “bi̱ nduyáaʼ má xúʼko̱”, xóo muʼthá xúgíinʼ bi̱ nuni̱ tsiakimijna mu muniʼniiʼ ga̱jma̱a̱ nuni̱ rí naniguuʼ rá.
Xú káʼnii eku̱mu̱u̱ Jeobá ku̱ma̱a̱ʼ ikháán índo̱ ndaʼyoo tsiakii rí natani mu matanigajmaa̱ Biblia rá.
RÍ NURAJXI THIKHUN: “Asndu ndíí má tanigajmaa Biblia”.
Ndiéjunʼ gatriʼña̱a̱ rá.
RÍ NAGÁJNURIYO̱O̱ʼ
Maski ajndu nguáná naʼni gakhii, mu rí matanigajmaa̱ Biblia mambáyaaʼ mu maraxtaa gagi kámuu mbiʼi. Á mu naku̱ma̱a̱ʼ xtayáá má xúʼko̱ Jeobá ikhaa maʼni numa̱a̱ʼ.
Rí nijmañaaʼ
Náá numuu nangajua̱a̱ʼ rí gajkhun dí na̱ʼkha̱ raʼsngáa náa Biblia rá.
Índo̱ gídxúʼnú ma̱ta̱ya̱a̱ ndiéjunʼ “rí itháan gíʼdoo numuu”, ndiéjunʼ gáʼyóoʼ matani rá.
Ndíjkha rí ndayóoʼ matanda̱ʼa̱a̱ Jeobá dí mambáyaaʼ mu matanigajmaa̱ má xúʼko̱ Biblia rá.
ATAYÁÁ ITHÁAN
Atayáá mbá nájkhu̱ rí nimbáñun wéñuuʼ mbaʼin xa̱bu̱ mu majmañún majmúún májánʼ mbiʼi ndrígu̱ún.
“Xú káʼnii gájmañaaʼ majmaaʼ májánʼ mbiʼi” (¡Awaxunʼ!, febrero tsiguʼ 2014)
Guʼyáá xú káʼnii Jeobá nimbáyuʼ mbáa a̱ʼgu̱. Bi̱ ajmbio̱o̱ na̱nguá ekro̱ʼo̱o̱ xúgíʼ tsiakii rí ikhaa naʼni mu maʼni rí naniguuʼ Dios.
Atayáá rí tákanájkooʼ mbáa a̱ʼgu̱, rúʼko̱ nimbáyuʼ wéñuʼ ajmbio̱o̱.
Nguáná naxruigi̱i̱n testigos de Jeobá numuu rí nuni wájíi̱n bi̱ kúwi̱i̱n mbá guʼwíin. Lá gajkhun rúʼko̱ rá.