KÍXNUU 23
Rí majnguáanʼ iyááʼ nindxu̱u̱ mbá dí gíʼdoo numuu mataʼgíʼ matani
Jesús niʼsngáa, mu ma̱nindxa̱a̱ʼ cristiano ndayóoʼ rí majnguáanʼ iyááʼ (atraxnuu Mateo 28:19, 20). Mu ndiéjunʼ eyoo gáʼthúu̱n rí majnguáanʼ iyááʼ rá. Ga̱jma̱a̱ ndiéjunʼ eyóoʼ maʼni mbáa xa̱bu̱ mu majngúun iyááʼ rá.
1. Ndiéjunʼ eyoo gáʼthúu̱n rí majnguáanʼ iyááʼ rá.
Ajngáa majnguáanʼ iyááʼ na̱ʼkha̱ náa ajngáa griego rí nandoo gáʼthúu̱n “majnguáanʼ mbá kayuʼ” náa iyaʼ. Índo̱ Jesús nijngún iyááʼ, nixuma̱a̱ʼ náa mañu Jordán nda̱wa̱á “nigájna̱a̱ náa iyaʼ” (Marcos 1:9, 10). Índo̱ cristianos bi̱ gajkhun najngún iyááʼ nuxumi̱i̱n mbájkhu náa iyaʼ.
2. Ndiéjunʼ esngájma mbáa xa̱bu̱ índo̱ najngúun iyááʼ rá.
Índo̱ mbáa najngúun iyááʼ, nasngájma rí nixnáximinaʼ má náa Jeobá. Ndiéjunʼ gándoo muʼni mú muxnaxíminaʼ náa Jeobá rá. Ndayóoʼ rí muʼtákáñii ga̱jma̱a̱ gúʼthán dí nandulúʼ muʼni ñajuunʼ kámuu mbiʼi. Nuʼni rígi̱ nákha xóo tséjngulú iyááʼ. Ikhú xa̱bu̱ bi̱ naxnájximinaʼ majngúun iyááʼ naʼthúu̱n rí mbaʼyamajkuu i̱ndó ikhaa ga̱jma̱a̱ dí maraʼwíí maʼni rí nandoo Jeobá magiʼdoo itháán numuu náa vida ndrígóo. Ma̱ngaa naraʼwíí mbaʼyaridoo ga̱jma̱a̱ rí xóo niʼsngáa Jesús, bi̱ niʼthí ajngáa rígi̱: “Á mu mbáa nandoo mani̱ndxu̱u̱ xa̱bi̱ʼ, ganiñuuʼ raʼni rí nandoo ikhaa [...] ga̱jma̱a̱ xániñuuʼ ra̱ʼkha̱ kidxuʼ” (Mateo 16:24). Ga̱jma̱a̱ numuu rí mbáa naxnájximinaʼ majngúun iyááʼ ma̱ndoo mambaxúu májánʼ ga̱jma̱a̱ Jeobá ma̱ngaa gajmii eʼwíínʼ bi̱ nduyamajkuíí.
3. Ndiéjunʼ eyóoʼ matani mu majnguáanʼ iyááʼ rá.
Á mu ikháán nandaaʼ majnguáanʼ iyááʼ, ginii ndayóoʼ majmañaaʼ ga̱jma̱a̱ numuu Jeobá ma̱ngaa maraʼdáá fe náa ikhaa (atraxnuu Hebreos 11:6). Índo̱ gáʼga rakruaʼa̱a̱ʼ itháán ma̱ngaa índo̱ gaʼni itháán gújkhúʼ fe ndrígáaʼ rúʼko̱ gaʼni rí maʼndaaʼ xtayáá itháán Jeobá. Ga̱jma̱a̱ rúʼko̱ gaʼni rí maʼndaaʼ marataráʼa ma̱ngaa rí maraxtaa xó má eʼsngáa náa Biblia (2 Timoteo 4:2; 1 Juan 5:3). Índo̱ mbáa xa̱bu̱ naxtáa “xó má eyoo Jeobá”, ikhú ma̱ndoo maraʼwíí maxnáximinaʼ náa Dios ga̱jma̱a̱ majngúun iyááʼ (Colosenses 1:9, 10).a
GAJMAÑAA’ ITHÁAN
Atayáá ndiéjunʼ eʼsngúlúʼ xóo nijngúun iyááʼ Jesús ga̱jma̱a̱ xóo gándoo maʼnirataminaʼ mbáa mu majngúun iyááʼ.
4. Rí naʼsngúlú índo̱ nijngúun iyááʼ Jesús
Mu mbuʼyáá itháan xóo nijngúun iyááʼ Jesús, guraxnuu Mateo 3:13-17. Nda̱wa̱á gutamíjnála rígi̱:
Lá káʼníí nindxu̱u̱ mbáa a̱ʼdá cháñaʼ Jesús índo̱ nijngúun iyááʼ rá.
Xú káʼnii nijngúun iyááʼ xá. Káaʼ nixtra̱ma̱ʼ chíʼgíiʼ iyaʼ náa edxu̱u̱ xáʼ.
Nda̱wa̱á rí Jesús nijngúun iyááʼ nigíʼdu̱u̱ niʼni ñajunʼ kiejunʼ rí Dios má niʼthúu̱n maʼni. Guraxnuu Lucas 3:21-23 ma̱ngaa Juan 6:38 ga̱jma̱a̱ gutamíjnála rígi̱:
Nda̱wa̱á dí Jesús nijngúun iyááʼ, xkáʼnii ñajunʼ rí itháán gíʼdoo numuu maʼni ndiʼyoo xá.
5. Rí majnguáanʼ iyááʼ nindxu̱u̱ mbá rí maʼngo̱o̱ matani
Mbáa nákhá ginii namíñaʼ matatsaʼwamínáʼ dí maraxnaxíminaʼ ga̱jma̱a̱ rí majnguáanʼ iyááʼ. Á mu ikháánʼ na̱jkhá rakruaʼa̱a̱ʼ itháán májánʼ ga̱jma̱a̱ numuu Jeobá, ma̱ndoo makumaaʼ rí nitraʼwíí mbá rí gíʼdoo wéñuuʼ numuu matani. Mu matatsiʼnúunʼ tikhun bi̱ niʼngu̱u̱n nini rígi̱, gu̱ya̱a̱ VIDEO.
Guraxnuu Juan 17:3 ma̱ngaa Santiago 1:5 ga̱jma̱a̱ gutamíjnála rígi̱:
Ndiéjunʼ gámbáyúu mbáa xa̱bu̱ mu maxtáa xawii majngúun iyááʼ rá.
Nuxnaxímíjná náa Jeobá índo̱ nuʼtháán rí nandulúʼ muʼni ñajuunʼ asndu kámuu mbiʼi.
Índo̱ najngúlú iyááʼ, nusngajmá pa̱jnu̱ náa inún xúgíinʼ rí nixnaxímíjná náa Dios.
6. Índo̱ mbáa najngúun iyááʼ na̱jkha̱nú nanindxu̱u̱ bi̱ kúwi̱i̱n náa xuajñuu Jeobá
Índo̱ najngúlú iyááʼ, nugíʼdi̱i̱ nakuwáanʼ mbá kambáxulú gajmiúlú a̱ngiu̱lú bi̱ kúwi̱i̱n náa xúgíʼ tsu̱du̱u̱ numbaaʼ, tséʼniuu má náa eguwáʼ ga̱jma̱a̱ xóo nikuwáánʼlu nákha ginii, mbóo rí eʼnimbulúʼ xúgiáanʼ ga̱jma̱a̱ nuʼnimbánii ikha rí na̱ʼkhá náa Biblia. Guraxnuu Salmo 25:14 ma̱ngaa 1 Pedro 2:17 ga̱jma̱a̱ gutamíjnála rígi̱:
Xóo ma eʼthí náa versículos rígi̱, xú káʼnii embáyuluʼ rí majngúlú iyááʼ rá.
RÍ NUTHI TIKHUN: “Na̱nguá xóó xtáá xawii majngúnʼ iyááʼ”.
Maski ajndu ikháánʼ natatsaʼwáminaʼ xúʼko̱, lá naku̱ma̱a̱ʼ rí májánʼ gáʼni rí mataʼgímináʼ majnguáanʼ iyááʼ ráʼ.
RÍ NAGÁJNURIYO̱O̱ʼ
Jesús niʼthí, mu ma̱nindxa̱a̱ʼ cristiano ndayóoʼ majnguáanʼ iyááʼ. Mu matraʼwíí matani rígi̱, ndayóoʼ rí makumaaʼ xtayáá wéñuuʼ Jeobá ga̱jma̱a̱ matanimbánii ikha ndrígóo ma̱ngaa rí maraxnaxíminaʼ náa ikhaa.
Rí nijmañaaʼ
Ndiéjunʼ eyoo gáʼthúu̱n rí majnguáanʼ iyááʼ ga̱jma̱a̱ ndíjkha rí gíʼdoo wéñuuʼ numuu rá.
Xóo káʼnii embánii rí maraxnaxíminaʼ ga̱jma̱a̱ rí majnguáanʼ iyááʼ rá.
Ndiéjunʼ eyóoʼ maʼni mbáa nákha xóó tsexnáximinaʼ ga̱jma̱a̱ xóó tséjngúun iyááʼ rá.
ATAYÁÁ ITHÁAN
Atayáá tikhu dí ra̱májánʼ rí naku̱mu̱ún xa̱bu̱ dí majnguáanʼ iyááʼ ga̱jma̱a̱ ndiéjunʼ rí phú eyoo gáʼthúu̱n.
“Ndiéjunʼ eyoo gáʼthúu̱n rí majnguáanʼ iyááʼ rá.” (Artículo dí rígá náa jw.org)
Atanga̱án ma̱ta̱ya̱a̱ mbu̱júu̱ʼ tikhu rí mambáyaaʼ midxu̱ʼnúʼ majnguáanʼ iyááʼ.
“Rí nandulú kuʼyáá Jeobá na̱jkha̱ kaguáanʼ majngúlú iyááʼ” (Bi̱ Nayejngoo, marzo tsiguʼ 2020)
Atraxnuu ga̱jma̱a̱ numuu mbáa xa̱bu̱ bi̱ niraʼwíí majngúun iyááʼ.
“Nindúún dí ikhúún má gaxkamaa rí gajkhun” (Bi̱ Nayejngoo, 1 ñajunʼ gu̱nʼ febrero tsiguʼ 2013)
Atayáá ndíjkha dí gíʼdoo numuu rí matraʼwíí majnguáanʼ iyááʼ ga̱jma̱a̱ xóo gándoo matani rataminaʼ.
a Á mu mbáa nijngúun má iyááʼ náa imbo̱ʼ religión, ndayóoʼ mata̱nga̱a̱ majngúun iyááʼ mbu̱júu̱. Náá numuu rá. Numuu dí náa religión rúʼko̱ tusngáá dí gajkhun rí na̱ʼkha̱ náa Biblia (atayáá Hechos 19:1-5 ga̱jma̱a̱ náa kíxnuu 13).