KÍXNUU 46
Ndíjkha nuxnaxímíjná náa Dios ga̱jma̱a̱ najngúlú iyááʼ rá.
Índo̱ mbáa naxnájximinaʼ náa Dios, naʼtákáñuu ga̱jma̱a̱ naxná ajngóo rí mbaʼyamajkuu i̱ndó ikhaa ma̱ngaa rí maʼni ginii rí nandoo Dios náa vida ndrígóo (Salmo 40:8). Ga̱jma̱a̱ índo̱ najngúun iyááʼ, nasngájmúún eʼwíinʼ rí nixnáximinaʼ náa Dios. Rí muxnaxímíjná náa Jeobá nindxu̱u̱ mbá rí gíʼdoo wéñuʼ numuu dí ma̱ndoo muʼni. Ra̱ʼkhá tháán gíʼdoo numuu dí asndu naxtiʼkhu̱u̱ xóo nakuwáánʼ. Ndiéjunʼ gáxkajxi̱i̱n ikháán rí maraxnaxíminaʼ náa Dios rá.
1. Ndiéjunʼ exkajxáánʼ muxnaxímíjná náa Jeobá rá.
Rí nandulú kuʼyáá Jeobá rúʼko̱ naxkaxáanʼ muxnaxímíjná náa ikhaa (1 Juan 4:10, 19). Náa Biblia naʼthúlú: “Gaʼndaaʼ xtayáá Jeobá Dios ndrígáaʼ ga̱jma̱a̱ xúgíʼ a̱jkia̱nʼ, ga̱jma̱a̱ xúgíʼ xóo nindxa̱a̱ʼ ga̱jma̱a̱ xúgíʼ ku̱ma̱ ndrígáaʼ ga̱jma̱a̱ xúgíʼ tsiakii ndrígáaʼ” (Marcos 12:30). Nusngajmá rí nandulú kuʼyáá Jeobá ga̱jma̱a̱ xóo nuʼthá ma̱ngaa xóo nuʼni. Xó má a̱jmi̱i̱n xa̱bu̱ bi̱ nandún kuyamijná naguánu asndu nudamijná, xúʼko̱ má kayuuʼ índo̱ nandulú kuʼyáá Jeobá nuxnaximi̱jna̱ náa ikhaa ga̱jma̱a̱ najngúlú iyááʼ.
2. Xú káʼnii eʼni tsajkurámiinʼ xa̱bi̱i̱ Jeobá bi̱ nijngún má iyááʼ rá.
Índo̱ ikháán gajnguáanʼ iyááʼ, mi̱dxu̱ʼnú maraxtaa gajmiáanʼ eʼwíinʼ a̱ngiu̱lú bi̱ nuni ñajuunʼ Jeobá. Ikhú ma̱ta̱ya̱a̱ mbaʼa enii xóo eyoo kaʼyaaʼ Jeobá ga̱jma̱a̱ maraxtaa itháan mijngii náa ikhaa (atraxnuu Malaquías 3:16-18). Raʼkháa i̱ndó ma̱ta̱ya̱a̱ Jeobá xóo Ana̱ʼ ma̱ngaa maraʼdiin a̱ngia̱a̱nʼ náa xúgíʼ numbaaʼ bi̱ nandún kuyáá Dios ga̱jma̱a̱ nandún kuyaaʼ ikháán (atraxnuu Marcos 10:29, 30). Gajkhun má, ikháán rígá mbaʼa dí eyóoʼ matani nákhá xóó tséjnguáanʼ iyááʼ. Gíʼmaa matatsiʼniiʼ májánʼ Jeobá ga̱jma̱a̱ maʼndaaʼ xtayáá ma̱ngaa matasnga̱jmá dí xtaʼdáá fe náa A̱ʼdióo. Nda̱wa̱á gíʼmaa maraxna ajngáaʼ náa Jeobá dí maraxnaxíminaʼ matani ñajuunʼ ikhaa xúgíʼ mbiʼi dí gáraxtaa. Á mu natani xúgíʼ rígi̱ ga̱jma̱a̱ nda̱wa̱á najnguáanʼ iyááʼ, ikháán ma̱ndoo maraxtaa kámuu mbiʼi. Náa Ajngá rawuunʼ Dios naʼthí: “Rí najnguála iyááʼ [ . . . ] naʼni káwáanʼla” (1 Pedro 3:21).
GAJMAÑAAʼ ITHÁAN
Guʼyáá ndíjkha rí gíʼdoo wéñuʼ numuu dí maraxnaxíminaʼ náa Jeobá ga̱jma̱a̱ rí majnguáanʼ iyááʼ.
3. Xúgiáánʼ gíʼmaa muraʼwíi tsáa guʼni ñajuunʼ
Nákhá wájyúuʼ, tikhun israelitas nikumu̱ún dí ma̱ndoo mbuyamajkuíí Jeobá ga̱jma̱a̱ Baal bi̱ nindxu̱u̱ mbáa dios ragájkhun. Raʼkhí xóo nindxaʼwamíjna̱, ikha jngóo Jeobá nikuʼmaa profeta Elías mu maxprígún. Guraxnuu 1 Reyes 18:21 ga̱jma̱a̱ gutamíjnála rígi̱:
Ndiéjunʼ ndiyóoʼ muraʼwíí muni israelitas rá.
Ikháanʼlu ma̱ngaa gíʼmaa muraʼwíí tsáa gíʼmaa muʼni ñajuunʼ xó má nini israelitas. Guraxnuu Lucas 16:13 ga̱jma̱a̱ gutamíjnála rígi̱:
Ndíjkha dí xándoo mbuʼyamajkuíí Jeobá ga̱jma̱a̱ ikhú má mbuʼyamajkuíí imba̱a̱ rá.
Xú káʼnii esngajmá Jeobá dí niraʼwíí muʼni ñajuunʼ ikhaa xá.
4. Atatsaʼwáminaʼ xú káʼnii eyoo kaʼyaaʼ Jeobá
Jeobá nixnúlú mbaʼa wéñuʼ regalo dí gíʼdoo numuu. Ndiéjunʼ gándoo muxnáá ikháánʼ xá. Gu̱ya̱a̱ VIDEO.
Xkáʼnii nindxu̱u̱ tikhu dí Jeobá nisngájma rí nandoo kaʼyaaʼ rá. Guraxnuu Salmo 104:14, 15 ga̱jma̱a̱ 1 Juan 4:9, 10 ga̱jma̱a̱ gutamíjnála rígi̱:
Ndíjkha dí naraxnáa núma̱aʼ Jeobá ga̱jma̱a̱ numuu xúgíʼ regalo dí nixnúlú xá.
Índo̱ natatsaʼwáminaʼ ga̱jma̱a̱ numuu regalo rúʼko̱, ndiéjunʼ ku̱ma̱a̱ ga̱jma̱a̱ numuu ikhaa xá.
Índo̱ mbáa naxnúlú mbá regalo dí nanigulúʼ wéñuʼ, nandulúʼ mbaʼyoo gajkhun dí nuxnáa núma̱aʼ. Guraxnuu Deuteronomio 16:17 ga̱jma̱a̱ gutamíjnála rígi̱:
Índo̱ natatsaʼwáminaʼ xúgíʼ dí Jeobá nixnáa, naku̱ma̱a̱ʼ dí ndayóoʼ maraxna̱a̱ mbá mangáán xáʼ. Ndiéjunʼ gáraxna̱a̱ xá.
5. Rí maraxnaxíminaʼ náa Jeobá naʼni rí maguma tsajkurámaaʼ wéñuʼ
Mbaʼin xa̱bu̱ nakumu̱ún dí makuwá gagi á mu najmaʼniún náa mbaʼin xa̱bu̱, á mu nunigajmaa escuela rí mitsídánʼ ga̱jma̱a̱ á mu guáʼdáá wéñuʼ mbújkha̱a̱. Lá gajkhun rúʼko̱ ráʼ. Gu̱ya̱a̱ VIDEO ga̱jma̱a̱ gutamíjnála rígi̱:
Maski ajndu xa̱bu̱ bi̱ na̱ʼkha̱ náa video ninigu̱u̱ʼ wéñuʼ maʼtsíin fútbol, ndíjkha niniñuuʼ xá.
Ikhaa nindoo maxnáximinaʼ maʼni ñajuunʼ Jeobá xúgíʼ mbiʼi dí gáxtaa raʼkháa dí maʼtsíin fútbol. Lá naku̱ma̱a̱ʼ ikháán dí niraʼwíí maʼni nindxu̱u̱ májánʼ ráʼ. Ndíjkha rá.
Nákha xóó tsénindxu̱u̱ cristiano apóstol Pablo niʼnigajmaa escuela rí mitsídánʼ dí maʼga̱ kayáa magiʼdoo. Bi̱ niʼsngóo ninindxu̱u̱ mbáa bi̱ najmañuu xtángoo ndrígu̱ún judío. Índo̱ ninindxu̱u̱ cristiano, niniñuuʼ xúgíʼ rúʼko̱. Lá nitanga̱a̱ a̱jkiu̱u̱n nda̱wa̱á xáʼ. Guraxnuu Filipenses 3:8 ga̱jma̱a̱ gutamíjnála rígi̱:
Ndíjkha niʼthí Pablo dí xúgíʼ rí niʼni nákha xóó tsénindxu̱u̱ cristiano nindxu̱u̱ “xóo mbá rutsuu náskha” rá.
Ndiéjunʼ nidaaʼ ga̱jma̱a̱ numuu xúgíʼ rí niniñuuʼ xá.
Lá naku̱ma̱a̱ʼ dí maraxtaa itháan májánʼ á mu natraʼwíí matani ñajuunʼ Jeobá ráʼ. Ndíjkha ku̱ma̱a̱ʼ xúʼko̱ rá.
Índo̱ Pablo ninindxu̱u̱ cristiano, nikhánáá itháan mbaʼa dí májánʼ ki xóo dí niniñuuʼ.
RÍ NUTHI TIKHUN: “Na̱nguá gíʼdoo numuu maraxnaxíminaʼ matani ñajuunʼ Dios”.
Lá magiʼdoo numuu dí maraxnaxíminaʼ matani ñajuunʼ Jeobá ku̱ma̱a̱ʼ ikháán ráʼ. Ndíjkha rá.
RÍ NAGÁJNURIYO̱O̱ʼ
Rí nandulú kuʼyáá Jeobá naxkajxáánʼ muxnaxímíjná náa ikhaa ga̱jma̱a̱ rí majngúlú iyááʼ.
Rí nijmañaaʼ
Ndíjkha rí kaʼyoo mbuʼyamajkuíí ga̱jma̱a̱ maʼndulú kuʼyáá Jeobá ga̱jma̱a̱ xúgíʼ a̱jkiu̱lú rá.
Xkáʼnii regalo exnún Jeobá, Testigos bi̱ nijngún má iyááʼ rá.
Lá nanigua̱a̱ʼ maraxnaxíminaʼ náa Jeobá ráʼ.
ATAYÁÁ ITHÁAN
Atayáá ndíjkha dí mbáa bi̱ niʼni ajmúú ga̱jma̱a̱ mbáa bi̱ niʼtsíin niraʼwi̱i̱ muxnaximi̱jna̱ náa Jeobá.
Atayáá i̱ʼwáʼ numuu mu maraxnaxíminaʼ náa Jeobá.
“Ndíjkha rí ndayóoʼ maraxnaxíminaʼ náa Jeobá rá.” (Bi̱ Nayejngoo, 15 ñajunʼ gu̱nʼ enero tsiguʼ 2010)
Atayáá náa video dí gíʼdoo ajmúú náa nasngájma rí kúwá gagi bi̱ nuxnaximi̱jna̱ náa Jeobá.
Náa kayá edxu̱u̱ “Mba̱yu̱u̱ tsiguʼ nirajximinaʼ, náá numuu kúwáan gi̱i̱ rá.” Ma̱ta̱ya̱a̱ historia ndrígóo mbáa a̱ʼgu̱ rí nixkaxi̱i̱ mariʼkhu̱u̱ xóo xtáa.
“Biblia niriʼkhu̱u̱ rí xóo makuwá” (Bi̱ Nayejngoo, 1 ñajunʼ gu̱nʼ noviembre tsiguʼ 2012)