Lá nandaaʼ maraxnajxí vida ndrígáaʼ náa Jeobá ráʼ.

1, 2. Ndiéjunʼ gáʼyóoʼ muʼni ginii nákha xóó tsénjgúlú iyááʼ rá.

NÁA mbá witsu tsiguʼ, itháan rí mbá millón xa̱bu̱ nijngún iyááʼ. Mbaʼin nijmañún dí gajkhun asndu nákha majkhiinʼ, xó má Timoteo (2 Tim. 3:​14, 15). Ga̱jma̱a̱ eʼwíinʼ wanii má o nindxu̱ún má xabuanii índo̱ nigíʼdi̱i̱ ninigajma̱a̱ Biblia. Nákha ginii mbáa a̱ʼgu̱ bi̱ naʼnigajma̱a̱ Biblia gajmíi̱nʼ testigos de Jeobá, nijngúun iyááʼ índo̱ gíʼdoo má 97 tsiguu’.

² Lá xtáa ratanigajma̱a̱ Biblia ráʼ. O ana̱a̱ʼ ga̱jma̱a̱ ru̱dáaʼ nindxu̱ún testigos de Jeobá ga̱jma̱a̱ kúwá rusngáaʼ dí naʼthí náa Biblia xáʼ. Tséʼniuu asndu xkáʼnii má, mbáa xtáa ratríyaʼ awan mu majnguáanʼ iyááʼ. ¡Ra̱ʼkhá tháán májánʼ etani̱! Mú rígá mbá dí ndayóoʼ matani̱ nákha xóo tséjnguáanʼ iyááʼ, mbaʼyóoʼ maraxnajximinaʼ náa Jeobá. Rúʼko̱ nindxu̱u̱ dí muʼthá náa artículo rígi̱, mbuʼyáá ndiéjuunʼ nindxu̱u̱ rí maraxnaxíminaʼ náa Dios. Ma̱ngaa maʼthí náá numuu dí ikháánʼ ragíʼmaa mamiñáʼ rí maraxnaxíminaʼ ga̱jma̱a̱ rí majnguáanʼ iyááʼ á mu xtaa xawii.

NDIÉJUUNʼ NINDXU̱U̱ RÍ MARAXNAXÍMINAʼ RÁ.

3. Aratá ga̱jma̱a̱ numún xa̱bu̱ bi̱ nixnaximíjna nákha wajyúuʼ náa Dios bi̱ naʼthí náa Biblia.

³ Índo̱ na̱ʼkha̱ ajngáa rígi̱ náa Biblia, nandoo gáʼthúu̱n rí maxtaʼwíínʼ mu matani̱ rí mitsuʼkáanʼ xóo muʼthá ñajuunʼ Dios. Israel ninindxu̱u̱ xuajin kiejuunʼ ndrígóo Jeobá. Mú tikhuun israelitas niguáʼdáá ñajunʼ kiejuunʼ, mbá xkri̱da Jeobá niraʼwíi Aarón mu mbayá edxu̱u̱ náa ndxajkun. Ikha jngóo, nigíʼma̱ mbá placa dí oro mixngiyaʼ, rí nindxu̱u̱ mbá “tsinaʼ náa nasngájma rí nixnáximinaʼ” (Lev. 8:9). Nazareo mangiin nixnaximíjna̱ náa Jeobá. Ajngáa nazareo na̱ʼkha̱ náa ajngáa hebreo nazir, rí nandoo gáʼthúu̱n “wajíiʼ” o “nixnáximinaʼ”. Náa xtángoo dí niʼnirámáʼ Moisés naʼthí rí ikhiin gíʼmaa munimbáníí tikhuʼ xtángoo (Núm. 6:​2-8).

4. a) Ndiéjunʼ eyoo gáʼthúu̱n dí muxnaximíjna̱ náa Jeobá rá. b) Ndiéjuunʼ eyoo gáʼthúu̱n dí nánguá matani rí nandaaʼ ikháánʼ rá. (Atayáá ma̱ngaa xtiʼkhuu.)

⁴ Náa ikháanʼlú, rí muxnaxímíjná náa Dios nandoo gáʼthúu̱n dí muraʼwíí manindxu̱lú xa̱bi̱i̱ Jesús ga̱jma̱a̱ rí muʼgíʼ ginii muʼni ñajuunʼ Dios. Ndiéjuunʼ eyoo gáʼthúu̱n rúʼko̱ rá. Jesús niʼthí: “Á mu mbáa nandoo mani̱ndxu̱u̱ xa̱bi̱ʼ, ganiñuuʼ raʼni rí nandoo ikhaa” (Mat. 16:24). Ajngáa “ganiñuuʼ raʼni rí nandoo ikhaa” náa ajngáa griego nandoo gáʼthúu̱n dí nánguá maxtáa xó má nandoo ikhaa. Índo̱ ikháánʼ gáraxnajxí vida ndrígáaʼ náa Jeobá, nánguá matani̱ dí tsénigu̱u̱ʼ Dios (2 Cor. 5:​14, 15). Ma̱ngaa nandoo gáʼthúu̱n dí matatsiʼñáánʼ ratani̱ dí ‹naguaʼa xuyaaʼ› xóo rí mataba̱a̱ʼ xkawiʼ kayuuʼ ga̱jma̱a̱ʼ mbáa (Gál. 5:​19-21; 1 Cor. 6:18). Lá maʼni gakhi̱i̱ dí matanimbáníí rígi̱ ráʼ. Na̱nguá, rí mambáyáaʼ nindxu̱u̱ dí maʼndaaʼ xtayáá Jeobá ga̱jma̱a̱ ma̱ta̱ya̱a̱ dí xtángoo ndrígóo mambáyáaʼ má ikháán (Sal. 119:97; Is. 48:​17, 18). Mbáa ndxájulú bi̱ mbiʼyuu Nicholas naʼthí: “Ma̱ndoo ma̱ta̱ya̱a̱ xtángoo ndrígóo Jeobá xóo mbá gúla̱a̱, dí tséniñaaʼ matani̱ rí nandaaʼ ikháánʼ o xóo mbá gúla̱a̱ náa zoológico náa ka̱jma̱a̱ león mu xíkhuaaʼ”.

5. a) Xú káʼnii exnájximinaʼ mbáa náa Jeobá rá. b) Xú káʼnii mixtiʼkhu nindxu̱u̱ dí maraxnaxíminaʼ ga̱jma̱a̱ dí majnguáanʼ iyááʼ rá. (Atayáá ma̱ngaa xtiʼkhuu.)

⁵ Xú káʼnii exnájximinaʼ mbáa náa Jeobá rá. Naʼni mbá oración mbawíí náa Jeobá náa naʼthúu̱n dí mbáwíí ikhaa gáʼyamajkuu ga̱jma̱a̱ naʼthúu̱n dí náa vida ndrígóo magiʼdoo itháán numuu dí maʼni ñajuunʼ ikhaa. Xóo muʼthá, naʼthúu̱n Jeobá dí maʼndoo kaʼyoo ga̱jma̱a̱ xúgíʼ a̱jkiu̱u̱n, xóo nindxu̱u̱ ga̱jma̱a̱ xúgíʼ ku̱ma̱ ma̱ngaa tsiaki̱i̱ ndrígóo xúgíʼ mbiʼi (Mar. 12:30) Rí maraxnaxíminaʼ nindxu̱u̱ rí natani̱ mbáwíín; ikháánʼ ga̱jma̱a̱ʼ Jeobá. Mú, rí majnguáanʼ iyááʼ, nindxu̱u̱ rí natani̱ náa inún mbaʼin a̱ngiu̱lú; xúʼko̱ nduyáá mangiin dí ikháánʼ niraxnáximinaʼ náa Jeobá. Dí niraxná ajngáaʼ, na̱nguá nindxu̱u̱ mbá gitsíin. Phú gajkhun dí ikháánʼ maʼndaaʼ matanimbánii ga̱jma̱a̱ rígi̱ rí nandoo Jeobá matani̱ (Ecl. 5:​4, 5).

NDIÉJUNʼ GÁXKAJXI̱I̱N MARAXNAXÍMINAʼ NÁA JEOBÁ RÁ.

6. Ndiéjunʼ exkajxi̱i̱ mbáa mu maxnáximinaʼ náa Jeobá rá.

⁶ Naraxnájximinaʼ náa Jeobá numuu rí nandaaʼ xtayáá. Ngajua rí xtaʼdáá náa ikhaa na̱nguá nindxu̱u̱ káaʼ mbáxngaa, nindxu̱u̱ dí ni̱jkha̱ ra̱ja̱a̱ mañu mañúú náa ikháánʼ índo̱ nidxu̱ʼ rajmañaaʼ ga̱jma̱a̱ numuu Jeobá ma̱ngaa “mbá ku̱ma̱ jmbu rí nandoo Dios” ga̱jma̱a̱ “nakrua̱ʼa̱a̱ʼ dí naxná espíritu” (Col. 1:9). Índo̱ nidxu̱ʼ rajmañaaʼ dí naʼthí náa Kiʼniraʼmáʼ nitayáá dí 1) Jeobá gajkhun xtáa, 2) nigumaraʼmáʼ Biblia ga̱jma̱a̱ espíritu ndrígóo, 3) dí gíʼdoo xuajñuu ga̱jma̱a̱ najmuu mu maʼnimbánuu rí nandoo.

7. Ndiéjunʼ gíʼmaa maʼni mbáa bi̱ maxnáximinaʼ náa Jeobá rá.

⁷ Índo̱ mbáa naxnájximinaʼ náa Jeobá, numuu rí naninuuʼ má kiʼsngáa rí na̱ʼkha̱ náa Biblia ga̱jma̱a̱ dí naʼnimbánuu xtángoo ndrígóo Dios, ga̱jma̱a̱ naʼthúún má eʼwíinʼ asndu xó má naʼngo̱o̱ dí xtáa rajmañuu (Mat. 28:​19, 20). Ra̱ʼkhá tháán nandoo kaʼyoo Jeobá ga̱jma̱a̱ nandoo asndu xúgíʼ a̱jkiu̱u̱n dí mbayamajkuu i̱ndó ikhaa. Lá ma̱ndoo muʼthá xúʼko̱ ga̱jma̱a̱ numaaʼ ikháánʼ ráʼ. Á mu nandaaʼ xtayáá Jeobá ga̱jma̱a̱ xúgíʼ tsiaki̱i̱ ndrígáaʼ, dí maraxnaxíminaʼ náa Dios ga̱jma̱a̱ rí majnguáanʼ iyááʼ, xátani̱ numuu rí nandaaʼ maʼdxuu bi̱ naʼsngáa. Ga̱jma̱a̱ á mu nindxa̱a̱ʼ dxámá o dxáʼgú, xátani̱ rígi̱ numuu dí nandaaʼ maʼdxuu ana̱a̱ʼ o ru̱dáaʼ o numuu rí mígiaaʼ najngún iyááʼ.

8. Mu maraxna̱a̱ núma̱aʼ, ndíjkha dí nandaaʼ maraxnáximinaʼ náa Jeobá rá. (Salmo 116:​12-14.)

⁸ Á mu natatsaʼwáminaʼ xúgíʼ rí niʼni Jeobá ga̱jma̱á nindxa̱a̱ʼ, xáʼniaaʼ gakhi̱i̱ maraxna̱a̱ núma̱aʼ (atraxnuu Salmo 116:​12-14).a Náa Biblia naʼthí “xúgíʼ dí nakánulú rí na̱ʼkha̱ rijma̱a̱ nindxu̱u̱ májánʼ” numuu dí na̱ʼkha̱ náa Jeobá (Sant. 1:17). Rí itháán mba̱a̱ rí nimínáanʼ Dios, ikhaa nindxu̱u̱ A̱ʼdióo. Núma̱aʼ má ga̱jma̱a̱ numuu rígi̱, ikháán ma̱ndoo mambajxáaʼ ga̱jma̱a̱ Dios ma̱ngaa ma̱ndoo maraxtaa kámuu mbiʼi (1 Juan 4:​9, 10, 19). Mbá xóo ma̱ndoo muxnáa núma̱aʼ rí niʼni ga̱jma̱á nindxu̱lú, ga̱jma̱a̱ dí nandoo kaʼyulú, dí muxnaxímíjná náa ikhaa (Deut. 16:17; 2 Cor. 5:15). Rúʼko̱ naʼthí náa libro ¡Araxtaa gagi kámuu mbiʼi!, náa kixnuu 46, punto 4 náa ma̱ngaa na̱ʼkha̱ mbá video dí ndajyúuʼ 3 minutos, rí mbiʼyuu: Rí ma̱ndoo muxnáá Dios.

XTAA XAWII MARAXNAXÍMINAʼ GA̱JMA̱A̱ MAJNGUÁANʼ IYÁÁʼ RÁʼ.

9. Ndíjkha dí ragíʼmaa matsudaaʼ mbáa mu maxnáximinaʼ náa Jeobá rá.

⁹ Mbáa ikháánʼ ma̱ndoo makumaaʼ dí xóó na̱nguá xtáa xawii maraxnaxíminaʼ ga̱jma̱a̱ majnguáanʼ iyááʼ. Mbáa ndayóoʼ matriʼkuminaaʼ xóó mu matatsimbaʼ xtayáá Jeobá o ndayáaʼ itháán mbiʼi mu maʼni gujkhuʼ fe ndrígáaʼ (Col. 2:​6, 7). Gármáʼáanʼ a̱jkia̱a̱nʼ dí mixtiʼkhu xóo ejkha̱ rajmañuu mámbáa. Raʼkháa xúgíinʼ jiámá o wa̱ʼxa̱ʼ najmañún ikháá ga̱jma̱a̱ numuu Dios. Ikha jngóo, atayáá xú káʼnii xtaa ga̱jma̱a̱ xátani mbríguminaʼ gajmiáanʼ eʼwíinʼ (Gál. 6:​4, 5).

10. Ndiéjunʼ dí ma̱ndoo matani̱ á mu natayáá dí na̱nguá xtaa xawii maraxnaxíminaʼ ga̱jma̱a̱ majnguáanʼ iyááʼ rá. (Atayáá kúgumaʼá “Á mu ana̱a̱ʼ o ru̱dáaʼ nindxu̱ún testigos rá.”)

¹⁰ Á mu natayáá dí xóó na̱nguá xtaa xawii maraxnajximinaʼ náa Jeobá, atani̱ tsiakimínáʼ má xúʼko̱ mu mataxkamaa meta ndrígáaʼ. Atanda̱ʼa̱a̱ Jeobá rí mambáyáaʼ matriʼkuminaʼ náa rí xóó ndayóoʼ (Filip. 2:13; 3:16). Ma̱ndoo ma̱ta̱ya̱a̱ gajkhun dí Jeobá maʼdxawuun dí maratajkáan ga̱jma̱a̱ ikhaa mariʼña̱a̱ (1 Juan 5:14).

NÁÁ NUMUU RÍ TIKHUUN TSÉGIMIJNA̱ MUNI̱ RÁ.

11. Ndiéjunʼ eʼni Jeobá mu mambáyulú muguajún jmbu rá.

¹¹ Tikhuun, kúwá má xawii muxnaximíjna náa Dios ga̱jma̱a̱ majngún iyááʼ, mú tséraʼwi̱i̱ muni̱ rígi̱. Mbáa namíñúún dí muni̱ mbá aʼkhá mbi̱i̱ʼ ga̱jma̱a̱ magumiin expulsar. Mú, náa Biblia naʼthí dí Jeobá má gáxnúún rí mbaʼñúuʼ xa̱bi̱i̱ mu majngruigu̱u̱n “xó má nanigu̱u̱ʼ Jeobá” ga̱jma̱a̱ ‹muni̱ maʼdxuun a̱jkiu̱u̱n náa xúgíʼ dí gúni̱› (Col. 1:10). Á mu ikháánʼ xtaʼdáá gamíi rígi̱, ma̱ndoo ma̱ta̱ya̱a̱ gajkhun dí Jeobá maxnáaʼ tsiaki̱i̱ mu matani̱ rí májánʼ. Numuu rí xúʼko̱ má niʼni gajmíi̱n eʼwíinʼ (1 Cor. 10:13). Ikha jngóo dí na̱nguá má mbaʼin egumiin expulsar, numuu rí Jeobá má nambáñúún mu maguajún jmbu.

12. Ndiéjunʼ gámbáyulú mu xúʼni̱ mbá aʼkhá mbiiʼ rá.

¹² Numuu rí nindxu̱lú xa̱bu̱ aʼkhá xúgiáanʼ nagua̱ʼa̱ muʼni dí raʼkhí (Sant. 1:14). Ndayóoʼ muraʼwíí májánʼ ndiéjuunʼ gíʼmaa muʼni, índo̱ gáʼkha̱nú mbá tsáʼkhá náa inulú, numuu dí ikháanʼ má kaʼyulú. Tikhuun xa̱bu̱ nuthi, dí naʼni gakhi̱i̱ rí xátani̱ dí nagua̱ʼa̱ xuyaaʼ. Ragájkhun nindxu̱u̱ rígi̱, ma̱ndoo muñewa̱a̱n xóo nakumulú ga̱jma̱a̱ rí nuʼni. Rígá mbaʼa rí ma̱ndoo mambáyulú: Muʼtákáñii Jeobá xúgíʼ mbiʼi, muríyaʼ mbiʼi muʼnigajma̱a̱ Biblia, mu̱ʼgua̱ reunión ga̱jma̱a̱ muʼtáraʼa. Á mu nagu̱ʼu̱nlú muʼni rígi̱, xúʼko̱ maguaʼdáá tsiaki̱i̱ muʼnimbáníí ajngúlú. Jeobá xtáa ga̱jma̱á nindxu̱lú, ikhaa mambáyulú (Gál. 5:16).

13. Ndiéjunʼ májánʼ xkri̱da niniñuuʼ José rá.

¹³ Á mu wapháá e̱ndxa̱ʼwa̱míjna̱ ndiéjuunʼ gúʼni índo̱ gáʼkha̱nú mbá tsáʼkhá, xáʼniulú gakhi̱i̱ muʼni gaʼduunʼ. Náa Biblia nuxkamaa xkridún xa̱bu̱ bi̱ nini̱ xúʼko̱, mangiin ninindxu̱ún xa̱bu̱ aʼkhá xó má ikháanʼ. Mbáa dí ikhaa ninindxu̱u̱ José, a̱ʼgiu̱u̱ Potifar nángi eʼni etsudaaʼ rí mabóoʼ ga̱jma̱a̱. Mú, José niʼnirataminaʼ má wapháá xóo gáriʼñuu. Náa Biblia naʼthí dí ikhaa naʼni gaʼduunʼ ga̱jma̱a̱ naʼthúu̱n “Xú káʼnii gándoo gáni̱ mbá dí raʼkhí kayuuʼ ga̱jma̱a̱ makuʼdáminaʼ aʼkhá náa inuu Dios rá.” (Gén. 39:​8-10.) Gi̱i̱ nakujmaa kaʼwu xú káʼnii gáʼthí ikhaa, rí asndu nákha xóo tséʼthúu̱n a̱ʼgiu̱u̱ Potifar rí mabóoʼ ga̱jma̱a̱. Ikha jngóo, índo̱ niraʼnuu tsáʼkhá na̱nguá niʼniuu gakhi̱i̱ rí maʼni gaʼduunʼ.

14. Xú káʼnii gándoo gajmañulú muniʼñááʼ ru̱ʼni̱ dí Jeobá tsénigu̱u̱ʼ rá.

¹⁴ Xú káʼnii gándoo guʼyaridáá José ga̱jma̱a̱ muguajún jmbu rá. Gundxaʼwamíjna̱ asndu nákha xúgi̱, ndiéjuunʼ gúʼthá índo̱ gúraʼníí mbá tsáʼkhá. Ndayóoʼ muʼni gaʼduunʼ xúgíʼ dí Jeobá nawiyuuʼ kaʼyoo, rí asndu xundxa̱ʼwa̱míjna̱ mbáxngaa (Sal. 97:10; 119:165). Rúʼko̱ gámbáyulú mu xúʼni̱ mbá aʼkhá mbiiʼ. Ma̱ngaa índo̱ gúraʼníí mbá tsáʼkhá, mbuʼyáá ndiéjuunʼ muʼthá.

15. Xú káʼnii gándoo gatasngajmá dí nindxa̱a̱ʼ mbáa bi̱ “nduyáaʼ ga̱jma̱a̱ xúgíʼ a̱jkiu̱ún” Jeobá rá. (Hebreos 11:6.)

¹⁵ Mbáa ikháanʼ nitayáá dí nitaxkamaa kamba̱a̱ rí gajkhun ga̱jma̱a̱ nandaaʼ matani̱ ñajuunʼ Jeobá ga̱jma̱a̱ xúgíʼ a̱jkia̱a̱nʼ. Lá rígá mbá dí narikhaaʼ mu xáraxnaxíminaʼ náa Dios ga̱jma̱a̱ majnguáanʼ iyááʼ ráʼ. Ma̱ndoo matani̱ xó má niʼni David ga̱jma̱a̱ maratakáñíí Jeobá: “Atayáaʼ náa ikhúúnʼ, oh Dios, ga̱jma̱a̱ atayáá xú káʼnii nindxu̱u̱ a̱jkiu̱nʼ. Atayáaʼ náa ikhúúnʼ ga̱jma̱a̱ atayáá xú káʼnii endxa̱ʼwáminaʼ ma̱ngaa rí naʼni maxmiéjunʼ, ga̱jma̱a̱ atayáá á mu rígá náa ikhúúnʼ mbá dí ra̱májánʼ. Ga̱jma̱a̱ araxnúʼ ikha náa kamba̱a̱ rí maxtáá kámuu mbiʼi” (Sal. 139:​23, 24). Índo̱ natani̱ tsiakimínáʼ rí maraxnaxíminaʼ ga̱jma̱a̱ majnguáanʼ iyááʼ, xúʼko̱ natasngájma rí gajkhun natayáaʼ Jeobá. Náa Biblia naʼthí dí ikhaa naʼni tsajkurámiinʼ bi̱ nuni̱ xúʼko̱ (atraxnuu Hebreos 11:6).

AYUUʼ KANUUʼ ITHÁÁN NÁA JEOBÁ

16, 17. Xú káʼnii e̱ʼkha̱ kagui̱i̱n e̱jñu̱ún testigos Jeobá bi̱ kúwá náa congregación rá. (Juan 6:44.)

¹⁶ Jesús niʼthí dí Jeobá nindxu̱u̱ bi̱ na̱ʼkha̱ kagui̱i̱n xa̱bu̱ náa xuajñuu (atraxnuu Juan 6:44). ¡Ra̱ʼkhá tháán mitsaanʼ nindxu̱u̱! Lá nitatsaʼwáminaʼ má nguáthá xtaʼdáá numaaʼ eʼyoo ikhaa xáʼ. Jeobá ndaʼyoo rí májánʼ náa mambáa xa̱bi̱i̱ bi̱ na̱ʼkha̱ kayáa náa xuajñuu. Mambáa xa̱bu̱ nindxu̱u̱ “xuajñuu kiejuun” o “rí gíʼdoo numuu” (Deut. 7:6; nota). Bugi̱ nindxa̱a̱ʼ mangáánʼ.

¹⁷ Dxámá o dxáʼgú, á mu ana̱a̱ʼ o ru̱dáaʼ nusngáaʼ dí gajkhun, mbáa makumaaʼ dí raʼkháa Jeobá ni̱ʼkha̱ kañáán náa xuajñuu, numuu dí ana̱a̱ʼ nagún ku̱ña̱a̱n. Náa Biblia naʼthí: “Aʼgua kanuu náa Dios ga̱jma̱a̱ ikhaa ma̱ʼkha̱ kanuu náa ikháanʼla” (Sant. 4:8; 1 Crón. 28:9). Rígi̱ nandoo gáʼthí, á mu ikháánʼ ginii nadxuʼ kanuu náa ikhaa, ga̱jma̱a̱ ikhaa ma̱ʼkha̱ kanuu náa ikháánʼ. Jeobá na̱nguá eʼyaaʼ xóo mbáa bi̱ ra̱ʼkhá tháán mbaʼin. Xúgíinʼ xa̱bu̱ bi̱ kúwá náa xuajñuu, kúwá ikhí numuu rí Jeobá ni̱ʼkha̱ kayáa mambáa dí ikhaa. Bugi̱ mangiin ma̱ndoo mani̱ndxu̱ún e̱jñu̱ún Testigos. Índo̱ mbáa dí ikhiin naʼniminaʼ maʼni ñajuunʼ Dios ga̱jma̱a̱ na̱jkha̱ kanuu náa Jeobá, ikhaa naʼni rí kaʼyoo xó má naʼthí náa Santiago 4:8 (atayáá ma̱ngaa 2 Tesalonicenses 2:13).

18. Ndiéjunʼ gúʼnigajma̱a̱ náa i̱mba̱ artículo rá. (Salmo 40:8.)

¹⁸ Índo̱ Jesús nijngúun iyááʼ, ikhaa nixnáximinaʼ ga̱jma̱a̱ xúgíʼ a̱jkiu̱u̱n mu maʼni xúgíʼ rí Anu̱u̱ gándo̱ʼo̱o̱ (atraxnuu Salmo 40:8;b Heb. 10:7). Índo̱ ikháánʼ gáraxnajxí vida ndrígáaʼ náa Jeobá ga̱jma̱a̱ majnguáanʼ iyááʼ, xtaa ratayaridáá Jesús. Náa i̱mba̱ artículo mbuʼyáá rí mambáyáaʼ matani̱ ma xúʼko̱ ñajuunʼ Jeobá nda̱wa̱á rí nijnguáanʼ má iyááʼ.