KÍXNUU 56
Atiémbáá mu makuwá mbá kambájxu̱u̱n náa congregación
Índo̱ kúwáanʼ gajmiúlú a̱ngiu̱lú, nakumulú xóo rey David bi̱ niʼthí: “¡Gu̱ya̱a̱, ra̱ʼkhá tháán májánʼ ga̱jma̱a̱ mitsaanʼ rí a̱ngiu̱lú makuwá mbá kambáxu̱u̱n!” (Salmo 133:1). Rí kuwáanʼ mbá kambáxulú, na̱nguá nindxu̱u̱ mbá dí nirígá mbáa xúʼkhíin; xúgiáanʼ ndayóoʼ rí muni tsiakimíjna̱ mu xándatigu̱lú.
1. Ndiéjunʼ dí narígá náa xuajñuu Dios rí nanigua̱a̱ʼ ikháán rá.
Á mu ikháán nadxuʼ náa congregación dí rígá náa imbo̱ʼ país, mbáa gajkhun má dí xákrua̱ʼa̱a̱ʼ ajngáa rí gúthi, mu maku̱ma̱a̱ʼ xóo xtáa náa guʼwáaʼ. Ndíjkha rá. Numuu rí ma̱ta̱ya̱a̱ rí Testigos nunigajma̱a̱ ikháá má Biblia ga̱jma̱a̱ i̱yi̱i̱ʼ ndrígúlú. Ma̱ngaa tséʼniuu má náa kúwáanʼxu, xúgiáanʼ nunimíjnáxu rí manduxu kuyamijná, numuu rí nanduxu “mugríga̱a̱ mbiʼyuu Jeobá” ga̱jma̱a̱ mbuyamajkuíí “mbá kambáxu̱u̱n’” (Sofonías 3:9; nota).
2. Xóo gándoo gátiembáá mu makuwíin mbá kambájxu̱u̱n náa congregación rá.
“Gaʼnda̱la kuyamíjna̱ ga̱jma̱a̱ xúgíʼ a̱jkia̱la” (1 Pedro 1:22). Xú káʼnii gándoo gataʼgíʼ matanimbáníí consejo rígi̱ rá. Atayáá rí májánʼ dí nuni eʼwíinʼ xataya̱a̱ náa dí nanjngawi̱i̱n. Xambájxáaʼ i̱ndó gajmiáanʼ bi̱ nanigu̱u̱nʼ xó má rí nanigua̱a̱ʼ ikháán; ataniminaʼ matatsiʼniiʼ xa̱bu̱ bi̱ mixtiʼkhu xóo kúwi̱i̱n o náa eguwáʼ. Ma̱ngaa ataniminaʼ matriyáa náa a̱jkia̱a̱nʼ á mu gíwánʼ rí ma̱ndoo maʼni matraʼwíin xa̱bu̱ (atraxnuu 1 Pedro 2:17).a
3. Ndiéjunʼ gátani índo̱ xtaʼdáá xkujndu ga̱jma̱a̱ʼ mbáa ndxájuaaʼ rá.
Gajkhun má rí kuwáanʼ mbá kambáxulú; mú ni̱ndxu̱lú xa̱bu̱ aʼkhá ikha jngóo nguáná nuʼni gawumijnalú. Mú, náa Ajngá rawuunʼ Dios naʼthí: “Gu̱ni̱ [ . . . ] mba̱a̱ a̱jkia̱la kuyamíjna̱ má xúʼko̱”. Naʼthí xóo: “Jeobá niʼni mba̱a̱ a̱jkiu̱u̱n kaʼyala má xúʼko̱, ikha jngóo xúʼko̱ gíʼmáanʼla mu̱ni̱ mangáanʼ” (atraxnuu Colosenses 3:13). Jeobá nu̱ʼni̱ gawíín itháán, maski ajndu xúʼko̱ ikhaa naʼni mba̱a̱ a̱jkiu̱u̱n kaʼyulú. Ikha jngóo ikhaa nandoo rí muʼni mba̱a̱ a̱jkiu̱lú kuʼyáá ndxájulú. Á mu ikháán natayáá rí nitani̱ gawíín mbáa, ikháán gíʼmaa matagíʼdi̱i̱ matanimbánii xkujndu (atraxnuu Mateo 5:23, 24).b
GAJMAÑAAʼ ITHÁAN
Atatsaʼwáminaʼ xú káʼnii gándoo matani mu makuwá tsímáá ga̱jma̱a̱ mbá kambáxu̱u̱n náa congregación.
Ndiéjunʼ gíʼmaa matani ikháán mu matanimbánii xkujndu rá.
4. Xatraʼwíin xa̱bu̱
Nandulú musngájma rí nandulú kuʼñúún xúgíinʼ a̱ngiu̱lú. Mú mbáa nguáná maʼniulú gakhii, mbáa ga̱jma̱a̱ numuu rí nindxu̱ún mixtiʼkuiin ki xóo ikháanʼ. Ndiéjunʼ ma̱ndoo mambáyulú rá. Guraxnuu Hechos 10:34, 35 ga̱jma̱a̱ gutamíjnála rígi̱:
Jeobá nagruiguíin xúgíinʼ enii xa̱bu̱ mu mani̱ndxu̱ún testigos. Índo̱ nduʼyáá xúʼko̱, xóo gíʼmáanʼ mbuʼñún bi̱ mixtiʼkuiin ki xóo ikháanʼ rá.
Bi̱ kúwá náa xuajñaanʼ, ndiéjunʼ dí tsénigu̱u̱n náa eʼwíinʼ xa̱bu̱ xá. Náá numuu dí ragíʼmaa matani xúʼko̱ ikháán rá.
Guraxnuu 2 Corintios 6:11-13 ga̱jma̱a̱ gutamíjnála rígi̱:
Ndiéjunʼ ma̱ndoo matani mu maʼndaaʼ xtañúún xúgíinʼ a̱ngiu̱lú rá.
5. Atani mba̱a̱ a̱jkia̱a̱nʼ ga̱jma̱a̱ arathún muni mba̱a̱ a̱jkiu̱ún kuyaaʼ
Jeobá naʼni mba̱a̱ a̱jkiu̱u̱n kaʼyulú má xúʼko̱, maski ikhaa nditháan xáʼyóoʼ rí maʼni mba̱a̱ a̱jkiu̱lú kuʼyáá. Guraxnuu Salmo 86:5 ga̱jma̱a̱ gutamíjnála rígi̱:
Xú káʼnii eʼsngúlú náa versículo rígi̱ xóo naʼni mba̱a̱ a̱jkiu̱u̱n kaʼyulú Jeobá rá.
Lá nadxu̱u̱ a̱jkia̱a̱nʼ ikháán numuu dí naʼni mba̱a̱ a̱jkiu̱u̱n kaʼyaaʼ Jeobá rá. Náá numuu rá.
Nguáná gamíi maʼni rí xambáxulú májánʼ gajmiúlú eʼwíinʼ rá.
Ndiéjunʼ gíʼmaa muʼni mu mbuʼyaridáá Jeobá mú xúʼko̱ ma̱ndoo makuwáánʼ mbá kambáxulú gajmiúlú a̱ngiu̱lú rá. Guraxnuu Proverbios 19:11 ga̱jma̱a̱ gutamíjnála rígi̱:
Índo̱ mbáa naʼni gawáanʼ, ndiéjunʼ gándoo matani mu mambajxi̱i̱ ga̱jma̱a̱ʼ xá.
Nguáná ikháanʼ nuʼni gawúúnʼ eʼwíinʼ. Ndiéjunʼ gíʼmaa muʼni á mu narígá xúʼko̱ rá. Gu̱ya̱a̱ VIDEO ga̱jma̱a̱ gutamíjnála rígi̱:
Xó má ni̱ʼkha̱ náa video, xú káʼnii niʼni ndxájulú mu mambáxíinʼ xá.
6. Atayáá náa rí májánʼ nuni a̱ngia̱a̱nʼ
Índo̱ nuniʼnúnʼ itháan májánʼ a̱ngiu̱lú, raʼkháa i̱ndó nduʼyáá náa rí najmiin nuni ma̱ngaa náa najngawi̱i̱n. Mú, xóo gándoo mbuʼyáá i̱ndó náa rí nuni dí májánʼ xá. Gu̱ya̱a̱ VIDEO ga̱jma̱a̱ gutamíjnála rígi̱:
Ndiéjunʼ gándoo gámbáyáaʼ mu ma̱ta̱ya̱a̱ náa rí májánʼ dí nuni a̱ngiu̱lú rá.
Jeobá ndaʼyoo xóo xa̱bu̱ ni̱ndxu̱lú. Guraxnuu 2 Crónicas 16:9a ga̱jma̱a̱ gutamíjnála rígi̱:
Xú káʼnii eʼni a̱jkia̱a̱nʼ índo̱ natayáá rí Jeobá ndaʼyoo náa májánʼ natani ikháán rá.
Asndu mbá diamante nguáná na̱nguá kujmaa májánʼ, maski ajndu xúʼko̱ minumuu. Xúʼko̱ má a̱ngiu̱lú mangiin, nindxu̱ún xa̱bu̱ aʼkhá, mú Jeobá ndaʼñún rí xúgíinʼ guaʼdáá numún.
RÍ NUTHI TIKHUN: “Mu mani mba̱a̱ a̱jkiu̱nʼ ka̱yo̱o̱, ginii gíʼmaa masngájmuʼ dí nagáwi̱i̱nʼ a̱jkiu̱u̱n”.
Náá numuu rí gíʼmáanʼ muʼni mba̱a̱ a̱jkiu̱lú má xúʼko̱ rá.
RÍ NAGÁJNURIYO̱O̱ʼ
Á mu natani mba̱a̱ a̱jkia̱a̱nʼ xtañún a̱ngia̱a̱nʼ ga̱jma̱a̱ nandaaʼ xtañún xúgíinʼ, rúʼko̱ gáʼni rí makuwáanʼ mbá jnduʼ náa congregación.
Rí nijmañaaʼ
Xú káʼnii gátatsiñáánʼ rí natraʼwíin xa̱bu̱ rá.
Ndiéjunʼ gíʼmaa matani á mu naraʼdáá xkujndu ga̱jma̱a̱ mbáa ndxájulú rá.
Lá nanigua̱a̱ʼ matani mba̱a̱ a̱jkia̱a̱nʼ xtañún eʼwíinʼ xó má eʼni Jeobá ráʼ. Náá numuu rá.
ATAYÁÁ ITHÁAN
Jesús nijmuu mbá xkri̱da mu maʼsngúlú rí xúʼthá numún eʼwíinʼ. Atayáá náá numuu.
Lá gíʼmaa muʼthán dí maʼni mba̱a̱ a̱jkiu̱u̱n ndxájulú á mu nakumulú rí na̱nguá kuaʼdáá aʼkhúlú ráʼ.
Atayáá xú káʼnii tikhun a̱ngiu̱lú nijmañún rí xúyáá i̱ndó xóo kiexu̱u̱n eʼwíinʼ.
Atayáá xú káʼnii matanimbánii xkujndu ga̱jma̱a̱ʼ wapháá mbáa, mu xaʼganú maʼni wajíin asndu náa congregación.
“Guʼnimbánii xkujndu ga̱jma̱a̱ májánʼ” (Bi̱ Nayejngoo, mayo tsiguʼ 2016)