KÍXNUU 59
Ikháán maʼnga̱a̱ʼ índo̱ nuni gínáa
Xúgiáánʼ bi̱ ni̱ndxu̱lú cristianos, tsíñún gúyulú o asndu nuxkulú. Lá gíʼmaa maʼnimíñulu rúʼko̱ ráʼ.
1. Ndíjkha rí na̱nguá eʼniúlú tsiánguá á mu nuni gínáanʼlu xá.
Náa Biblia naʼthí: “Xúgíinʼ bi̱ nandún makuwá ruyamajkuíí Dios gajmiún Cristo Jesús, mangiin mumíniiʼ” (2 Timoteo 3:12). Jesús nini gínáa numuu rí táʼni xó má numbaaʼ ndrígóo Gixa̱a̱. Xúʼko̱ má mangáanʼ na̱nguá eʼni xóo numbaaʼ rígi̱, ikha jngóo xáʼniulú tsiánguá rí Xa̱bu̱ ñajunʼ ga̱jma̱a̱ bi̱ kúwá náa i̱ʼwáʼ religión gúni gínáanʼlu (Juan 15:18, 19).
2. Á mu nuni gínáanʼlu nda̱wa̱á xú káʼnii gándoo gúʼniratamijná xúgi̱ rá.
Ndayóoʼ rí asndu nákha xúgi̱ makumulúʼ kuʼyáá itháan Jeobá. Xú káʼnii gándoo guʼni rá. Guríyáʼ mbiʼi mu mutajkháanʼ ga̱jma̱a̱ muraxnuu Ajngá rawuunʼ. Ma̱ngaa rí mu̱ʼgua̱ má xúʼko̱ reunión dí narígá náa congregación. Á mu natani xúgíʼ rígi̱, maxnáaʼ tsiakii mu maʼnga̱a̱ʼ matraʼníí asndu xkáʼnii má xkujndu, maski ajndu bi̱ kúwá má náa guʼwáaʼ tsíñún gúyáaʼ. Apóstol Pablo niʼnirámáʼ rígi̱, bi̱ nángi eʼni nini gínáa: “Jeobá nindxu̱u̱ bi̱ nambáyuʼ. Xámiñuʼ” (Hebreos 13:6).
Ma̱ngaa rí mambáyulú wéñuuʼ nindxu̱u̱ rí muʼtáraʼa má xúʼko̱. Numuu rí índo̱ nuʼtáraʼa naʼsngúlú rí makumulú kuʼyáá Jeobá ma̱ngaa rí xámiñúlú kuʼñúún xa̱bu̱ numbaaʼ (Proverbios 29:25). Á mu ikháán xúgi̱ naraʼdáá tsiakii, maraxtaa xawii marataráʼa má xúʼko̱ índo̱ Xa̱bu̱ ñajunʼ gáʼndún muniʼñáá ruʼtáraʼa.
3. Lá nambáyulú rí maʼngulú índo̱ nuni gínáanʼlu xáʼ.
Gajkhun má rí tsínigu̱lú rí muni gínáaʼlu. Mú, á mu naʼngulú índo̱ nuni gínáaʼlú, fe ndrígúlú naʼni itháán gújkhúʼ. Ma̱ngaa nakumulú rí kúwáanʼ itháán mijngii náa Jeobá, numuu rí nduʼyáá dí nambáyulú índo̱ nakumulú rí nánguá eʼngulú ga̱jma̱a̱ i̱ndó tsiakii ndrígúlú ikháanʼ (atraxnuu Santiago 1:2-4). Jeobá nagawúunʼ wéñuʼ índo̱ ikháanʼ numíniiʼ, ikha jngóo nadxuu índo̱ ikháanʼ tsekawabaaʼ a̱jkiu̱lú. Náa Biblia naʼthí: “Mú Dios nanigu̱u̱ʼ wéñuuʼ índo̱ ikháanʼla naʼngala numíniiʼ numuu rí nu̱ni̱ dí májánʼ” (1 Pedro 2:20). Xúgíinʼ bi̱ gaʼngu̱u̱n ga̱jma̱a̱ bi̱ guguajún jmbu, Jeobá maʼni tsajkurámíinʼ maʼni rí makuwá kámuu mbiʼi náa numbaaʼ náa nánguá makuwi̱i̱n xa̱bu̱ sia̱nʼ ndrígóo Dios (Mateo 24:13).
GAJMAÑAAʼ ITHÁAN
Guʼyáá tikhu náa nasngájma rí ma̱ndoo maguajún jmbu náa Jeobá maski ajndu nuxkulú o nuni gínáanʼlú. Ma̱ngaa guʼyáá xú káʼnii gáʼni tsajkurámáánʼ ga̱jma̱a̱ numuu rí naʼngulú.
4. Maʼngaaʼ matraʼníí índo̱ tsíñún gúyáaʼ bi̱ kúwi̱i̱n náa guʼwáaʼ
Mínaaʼ má Jesús niʼthí rí asndu bi̱ kúwi̱i̱n náa guʼwúlú xáʼndúún dí muʼni ñajuunʼ Jeobá. Guraxnuu Mateo 10:34-36 ga̱jma̱a̱ gutamíjnála rígi̱:
Índo̱ mbáa naraʼwíí maʼni ñajuunʼ Jeobá, xú káʼnii gakumu̱ún bi̱ kúwá náa goʼwóo xá.
Mu matatsiʼniún tikhuun xa̱bu̱ bi̱ nigíʼniin rígi̱, gu̱ya̱a̱ VIDEO. Nda̱wa̱á gutamíjnála rígi̱:
Ndiéjunʼ gátani ikháán á mu mbáa bi̱ xtayáá o mbáa bi̱ nambájxáaʼ ga̱jma̱a̱ naʼtháanʼ rí matatsiʼñáánʼ ratani̱ ñajuunʼ Jeobá rá.
Guraxnuu Salmo 27:10 ga̱jma̱a̱ Marcos 10:29, 30. Nda̱wa̱á índo̱ guraxnuu mambá texto, gutamíjnála rígi̱:
Xú káʼnii gándoo gámbáyáaʼ texto rígi̱, índo̱ nakiʼníin kuyaaʼ bi̱ kúwá náa guʼwáaʼ o bi̱ nambájxáaʼ gajmiáanʼ rá.
5. Xátatsiʼñáá rí nuni gínáanʼ marikhaaʼ matani ñajuunʼ Jeobá
Ndayóoʼ rí xámiñulu mu muʼni ñajuunʼ Jeobá, índo̱ eʼwíinʼ gáʼndún murikulú. Gu̱ya̱a̱ VIDEO ga̱jma̱a̱ gutamíjnála rígi̱:
Ndiéjunʼ rí ni̱ʼkha̱ náa video naxnáa tsiakii mu xámiñaaʼ rá.
Guraxnuu Hechos 5:27-29 ga̱jma̱a̱ Hebreos 10:24, 25. Nda̱wa̱á índo̱ guraxnuu mambá texto, gutamíjnála rígi̱:
Ndíjkha rí gíʼdoo wéñuʼ numuu rí muʼni má xúʼko̱ ñajuunʼ Jeobá maski ajndu Xa̱bu̱ ñajunʼ nánguá muniñulú muʼtáraʼa o muʼgua reunión rá.
6. Jeobá má gámbáyáaʼ mu maʼngaaʼ
Testigos de Jeobá bi̱ mixtiʼkhu tsigu̱ún ga̱jma̱a̱ bi̱ kúwá náa mixtiʼkhu país niʼngu̱u̱n niguájun jmbu náa Jeobá maski ajndu nini gíníi. Mu ma̱ta̱ya̱a̱ xóo ni̱ni̱, gu̱ya̱a̱ VIDEO. Nda̱wa̱á gutamíjnála rígi̱:
Ndiéjuunʼ nimbáñun Testigos bugi̱ mu maʼngu̱u̱n dí niguma gíníi rá.
Guraxnuu Romanos 8:35 ga̱jma̱a̱ 37-39 ma̱ngaa Filipenses 4:13. Nda̱wa̱á índo̱ guraxnuu mambá texto, gutamíjnála rígi̱:
Xú káʼnii eʼni ma̱ta̱ya̱a̱ textos rígi̱ rí maʼnga̱a̱ʼ matraʼníí asndu káʼnii má xkujndu rá.
Guraxnuu Mateo 5:10-12 ga̱jma̱a̱ gutamíjnála rígi̱:
Náá numuu rí ma̱ndoo maraxtaa gagi maski ajndu nuni gínáa xá.
Mbaʼin wéñuuʼ xa̱bi̱i̱ Jeobá niʼngu̱u̱n niraʼníí rí tsíñún gúñún. ¡Xúʼko̱ má majmáán mangáán!
RÍ NUTHI TIKHUN: “Xáʼngo̱ʼ rí muni gínún xa̱bu̱ ikhúún”.
Xkáʼnii texto gándoo gátambáyii ga̱jma̱a̱ bi̱ nandxa̱ʼwáminaʼ xúʼko̱ káʼnii rá.
RÍ NAGÁJNURIYO̱O̱ʼ
Jeobá ndaʼyoo rí gíʼdoo wéñuʼ numuu tsiakii rí nuʼni mu muʼni ñajuunʼ ikhaa maski ajndu nuni gínáanʼlú. ¡Ga̱jma̱a̱ tsiakii ndrígóo ikhaa maʼngulú!
Rí nijmañaaʼ
Náá numuu dí ragíʼmaa maʼniulú tsiánguá bi̱ ni̱ndxu̱lú cristianos á mu nuni gínáanʼlú xá.
Xú káʼnii gándoo gátani rataminaʼ asndu nákha xúgi̱ índo̱ gúni gínáanʼlú xá.
Ndiéjunʼ eʼniaaʼ ma̱ta̱ya̱a̱ ikháán rí matani má xúʼko̱ ñajuunʼ Jeobá, garigá má dí gárígá rá.
ATAYÁÁ ITHÁAN
Atayáá xú káʼnii nimbáyúu Jeobá mbáa ndxájulú dxámá índo̱ nixtáa náa guʼwá ñajunʼ ga̱jma̱a̱ numuu rí na̱nguá nindoo mani̱ndxu̱u̱ soldado.
Atayáá ndiéjunʼ nimbáñún xa̱bu̱ gajmii rí muni má xúʼko̱ ñajuunʼ Jeobá náa mbayuuʼ tsiguʼ maski ajndu taʼndún gúñún.
Nunixu má xúʼko̱ ñajuunʼ Jeobá maski ajndu naxtiʼkhuu xóo kúwáanʼ (7:14)
Gajmañaaʼ matayaa xóo gátani mu xámiñaʼ índo̱ gúni gínáa.
“Guʼniratamijná mu majuixkulú” (Bi̱ Nayejngoo, julio tsiguʼ 2019)
Xú káʼnii gíʼmaa mbuʼyáá índo̱ tsíñún gúyulú bi̱ kúwá náa guʼwúlú rá. Ga̱jma̱a̱ xóo guʼni mu makuwáánʼ gagi má xúʼko̱ ma̱ngaa rí maguajunʼ jmbu náa Jeobá rá.