Rí najuiʼthún bi̱ makuwá

ACOMODADORES. Acomodadores kúwá mu mumbayáaʼ. Atanimba̱a̱ʼ rí gútha̱nʼ ga̱jma̱a̱ numuu estacionamiento, rí mi̱dxu̱ʼ náa pasillo, rí matani apartar xílí ga̱jma̱a̱ numuu má i̱ʼwáʼ.

BAUTISMO. Maguanúu xílí rí tri̱ga̱ asndu inuu plataforma mu mutrigi̱i̱n bi̱ majngún iyááʼ. Gíʼmaa mutrigi̱i̱n náa xílí rúʼko̱ nákha xóó tsígi̱ʼdu̱u̱ discurso ndrígóo bautismo rí miʼcha̱ sábado. Xúgínʼ ndayóoʼ mbu̱ya̱ mbóo toalla ga̱jma̱a̱ mbá xtíin rí naʼkuriyo̱o̱ʼ mu muguwúúnʼ.

MBÚJKHA̱A̱ RÍ NAJUIXNÁ. Nijmaa mba̱a̱ mbújkha̱a̱ mu marigá xílí, sonido ga̱jma̱a̱ video ga̱jma̱a̱ i̱ʼwáʼ rí ndayóoʼ mu makuwáanʼ májánʼ náa asamblea rígi̱ ga̱jma̱a̱ ma̱ndoo muxuʼmamijná náa Jeobá. Mbújkha̱a̱ rí nuxnala nañambáá mu ma̱ndoo majmaa xúgíʼ rígi̱ ga̱jma̱a̱ nayambáá náa ñajunʼ rí nagumaa xúgíʼ numbaaʼ. Tri̱ga̱ caja náa xúgíʼ local mu ikháánʼ ma̱ndoo matrajkuáa mbújkha̱a̱. Ma̱ngaa ma̱ndoo maraxna mbújkha̱a̱ náa internet náa donate.jw.org. Nuxna̱a̱la núma̱aʼ numuu rí nurajkuáa mbújkha̱a̱. Cuerpo Gobernante nandoo maxnáa núma̱aʼ numuu rí nuñambáá mu maguma ñajuun Reino.

GUʼWÁ THANA. Garmáʼáan a̱jkia̱a̱nʼ rí gi̱i̱ i̱ndó ma̱ndoo mi̱dxa̱ʼ á mu gi̱i̱ ndiyáaʼ nandii.

NÁA NAXTAGIXI̱I̱ RÍ NANDÁTI̱GA̱. Xúgííʼ rí nindátiga mbaʼyóoʼ mixnájxi̱i̱ náa Departamento rígi̱. Á mu rígá rí nindáti̱ga̱a̱ʼ ayuʼ gátaʼyáaʼ ikhí. Ma̱ngaa ma̱ndoo mi̱dxu̱ʼ xtiin e̱ji̱n bi̱ nindáti̱gi̱i̱n. Itháan májánʼ gáʼni dí matiewu̱u̱n ejña̱a̱nʼ mu xúʼko̱ nimbáa xájngruigo̱o̱ maxmiéjuunʼ.

XÍLÍ. Nutha̱nʼxu rí gani̱ndxa̱ʼ májánʼ a̱jkia̱nʼ gajmiáanʼ eʼwíínʼ. Garmáʼáan a̱jkia̱nʼ rí ma̱ndoo matani apartar xílí náa mutrigi̱i̱n bi̱ kuwa náa guʼwáaʼ, bi̱ nadxuʼ gajmiáanʼ náa carro o bi̱ narasngúún. Xátatsiʼñáʼ rí xta̱ náa xílí rí ma̱ndoo matrigi̱i̱n eʼwíínʼ.

NÁA MA̱NDOO MATIAMBÁÁ. Á mu nandaʼ matiambáá náa asamblea ayuʼ náa Departamento náa majuiʼtháanʼ xóo matani ga̱jma̱a̱ náa ma̱ndoo matiambáá.