Ndiéjunʼ gáʼni Dios rá.

Mbáa bi̱ nambáxulúʼ májánʼ gajmiúlú ikhaa nindxu̱u̱ bi̱ ma̱ndoo mambáyulúʼ índo̱ guguaʼdáá xkujndu. Ikha jngó kuwa bi̱ nuthi rí Dios na̱nguá nindxu̱u̱ bi̱ nambáxulúʼ gajmiúlú, ikhiin nundxaʼwamíjná rí nda̱a̱ dí eʼni ga̱jma̱a̱ numulúʼ. Mú ikhaa, mbaʼa má rí niʼni ga̱jma̱a̱ numulúʼ ga̱jma̱a̱ inu má maʼnimbánuu xkujndu rí naguaʼnii ga̱jma̱a̱ maʼnimbáti̱ga̱a̱ tsingíná. Ndiéjunʼ gáʼni Dios rá.

MAʼNI GÁMBÁA DÍ RA̱MÁJÁNʼ

Dios maʼni gámbáa náa phú e̱ʼkha̱ dí ra̱májánʼ. Náa Biblia nasngájma kaʼwu índo̱ naʼthí: “Mú náa xúgíʼ numbaaʼ rígá tsiakii ndrígóo Gixa̱a̱” (1 Juan 5:19). Bi̱ “xkawiiʼ” nindxu̱u̱ Satanás bi̱ Jesús má nixná mbiʼyuu “bi̱ naʼtáñajunʼ náa numbaaʼ” (Juan 12:31). Rí naʼni Gixa̱a̱ ikhí phú naku̱mu̱u̱ xkujndu rí numíniiʼ xa̱bu̱. Ndiéjunʼ gáʼni Dios ga̱jma̱a̱ numuu xúgíʼ rúʼko̱ rá.

Inuu má, Jeobá majmiuu A̱ʼdióo mu maʼni gámbáa “bi̱ naʼni rí makhañúlúʼ bi̱ nindxu̱u̱ Gixa̱a̱” (Hebreos 2:14; 1 Juan 3:8). Náa Biblia nasngájma rí Gixa̱a̱ ndaʼyoo “rí na̱jkha̱ ratumuu mbiʼi rí nikhánúu maxtáa” mu maguma gámbáa (Revelación 12:12). Dios ma̱ngaa maʼni gámbíin xa̱bu̱ bi̱ ra̱míjínʼ (Salmo 37:9; Proverbios 2:22).

MAʼNI̱I̱ MBÁ KU̱BA̱ʼ MITSAAN

Nda̱wa̱á rí maʼnimbáti̱ga̱a̱ dí ra̱májánʼ, bi̱ niʼniwáanʼ maʼnimbánuu rí nikudaminaʼ maxnún xa̱bu̱ makuwa kámuu mbiʼi náa tsu̱du̱u̱ Ku̱ba̱ʼ. Mú xú káʼnii gakuwáanʼ ikhú rá.

Tsímáá ga̱jma̱a̱ ní xárígá gamíi. “Mú xa̱bu̱ bi̱ májánʼ a̱jkiu̱ún makuwá náa tsu̱du̱u̱ ku̱ba̱ʼ, ga̱jma̱a̱ makuwá tsímáá wéñuʼ” (Salmo 37:11).

Ganitsu rí májánʼ ga̱jma̱a̱ marigá wéñuʼ. “Maʼga̱nú marigá wéñuʼ ganitsu náa tsu̱du̱u̱ ku̱ba̱ʼ; ra̱ʼkhá tháán garigá ganitsu náa inu kúbá” (Salmo 72:16).

Guʼwá májánʼ ga̱jma̱a̱ ñajunʼ xúʼkhiín. “Munila guʼwá, ga̱jma̱a̱ makuwáanʼla ikhí; mudula ixi̱ uva ga̱jma̱a̱ muphula xndúu. Ma̱ngaa dí muni ga̱jma̱a̱ ñawúunʼ bi̱ niraʼwíin manigu̱nʼ wéñuʼ” (Isaías 65:21, 22).

Lá nanigua̱ʼ maraxtaa náa mbá numbaaʼ xúʼko̱ kaʼnii rá. Inu má maʼga̱nú mambanúu xúgi̱ rígi̱.

MAʼNIMBÁTI̱GA̱A̱ NANDII GA̱JMA̱A̱ RÍ NAKHÁÑULÚ

Rí mbiʼi xúgi̱, xúgiáanʼ naʼniulú nandii ga̱jma̱a̱ nakháñulú, mú xákuwáanʼ má mba̱yu̱ʼ xúʼko̱ kaʼnii. Ga̱jma̱a̱ tsigijñaʼ rí nixná Jesús, Jeobá maʼni rí “xúgínʼ bi̱ gaguaʼdáá fe xákhañun, makuwá kámuu mbiʼi” (Juan 3:16). Xú káʼnii gakuwáanʼ ikhú rá.

Maʼnimbáti̱ga̱a̱ nandii. “Ga̱jma̱a̱ nimbáa xa̱bu̱ xáʼthi: ‹Nandoo káñú’›. Jeobá maʼni mba̱a̱ a̱jkiu̱u̱n kaʼñúún xa̱bu̱ bi̱ gakuwa náa tsu̱du̱u̱ ku̱ba̱ʼ” (Isaías 33:24).

Ní xákhañun itháan. “Tátá Jeobá bi̱ naʼtáñajunʼ xúgíʼ numbaaʼ maʼni gámbáa kámuu mbiʼi rí nakháñulú, ga̱jma̱a̱ maʼni rí ní xámbiyaʼ nimbáa xa̱bu̱” (Isaías 25:8).

Xa̱bu̱ makuwá kámuu mbiʼi. “Dios namináanʼ dí makuwáanʼlu kámuu mbiʼi ga̱jma̱a̱ numuu Cristo Jesús bi̱ nindxu̱u̱ Señor ndrígiulúʼ” (Romanos 6:23).

Bi̱ nikháñun matangi̱i̱n makuwá. “Maguaxu̱ún xa̱bu̱ bi̱ nikháñun bi̱ nini rí jmbu xúʼko̱ má bi̱ túni rí jmbu” (Hechos 24:15). Rí niʼtsiwáanʼ Dios nayambáá asndu náa bi̱ nikháñun.

Ndiéjunʼ gáʼni Dios mú maʼnimbánuu xúgíʼ rígi̱ rá.

MAGÍʼ MBÁ XA̱BU̱ ÑAJUNʼ JMBI

Dios majmiuu Xa̱bu̱ Ñajunʼ bi̱ xtáa mekhuíí mu maʼnimbánuu rí nikudaminaʼ maʼni náa xa̱bu̱ ga̱jma̱a̱ náa ku̱ba̱ʼ (Salmo 110:1, 2). Ikha má Xa̱bu̱ Ñajunʼ buʼko̱ bi̱ niʼthí ga̱jma̱a̱ numuu Jesús índo̱ nisngúún xa̱bi̱i̱ rí munda̱ʼa̱ ajngáa rígi̱: “Anu̱xu bi̱ xtaa mekhuíí, [...] ga̱ʼkha̱ reino ndrígáʼ” (Mateo 6:9, 10).

Xa̱bu̱ Ñajunʼ ndrígóo Dios maʼtáñajunʼ náa tsu̱du̱u̱ Ku̱ba̱ʼ ga̱jma̱a̱ maʼnimbáti̱ga̱a̱ xúgíʼ gaʼkhu ga̱jma̱a̱ tsingíná. Ikhaa nindxu̱u̱ mbáa Xa̱bu̱ bi̱ maʼtáñajunʼ májánʼ. Ikha jngó, Jesús niʼni mbá tsiakii mu maʼthúún xa̱bu̱ “ajngáa rí májánʼ ndrígóo reino” índo̱ ikha nixtáa náa tsu̱du̱u̱ Ku̱ba̱ʼ ga̱jma̱a̱ nikuʼmiin xa̱bi̱i̱ rí muni ikháá má kayuʼ (Mateo 4:23; 24:14).

Jeobá nikudaminaʼ maʼni rígi̱ numuu rí nandoo kaʼyulú wéñuʼ. Lá tséxkaxáanʼ dí rígi̱ maʼni rí muniʼnííʼ itháan ga̱jma̱a̱ mambaxúlúʼ gajmiúlú xáʼ. Ndiéjunʼ rí gakhánulú á mu nuʼni rá. Mbuʼyáá náa imbo̱o̱ artículo.