Xú káʼnii gájmulúʼ folleto nuxi̱ʼ Ajngáa rí májánʼ na̱ʼkhá náa Dios rá.

Niguma májánʼ mu mambáyulúʼ muʼni revisitas ga̱jma̱a̱ mugíʼdi̱i̱ muʼsngáa ga̱jma̱a̱ numuu Biblia

1. Xú káʼnii nindxu̱u̱ folleto rí nindrígu náa Asamblea rí niguma májáánʼ mu mambáyulúʼ muʼni revisitas ga̱jma̱a̱ mugíʼdi̱i̱ estudios rá.

¹ ¡Ra̱ʼkhá tháán nidxulú índo̱ nindrígu mbá folleto náa Asamblea dí ajtsú mbiʼi rí niyéjkha̱ edxu̱u̱ “Guñewa̱a̱n a̱jkiu̱luʼ” folleto rígi̱ mambáyulúʼ muʼni revisitas ga̱jma̱a̱ mugíʼdi̱i̱ estudio! Folleto Ajngáa rí májánʼ na̱ʼkha̱ náa Dios rí nariʼkuriya̱ʼ folleto Exige, kíxnuu rí na̱ʼkha̱ ikhí mbríguu nindxu̱u̱ ga̱jma̱a̱ ra̱mingíjyúuʼ, ma̱ngaa nambáyulúʼ mugíʼdi̱i̱ estudio asndu náa riejuun xa̱bu̱. Mú, folleto Exige naʼthí xú káʼnii gíʼmaa makuwá xa̱bi̱i̱ Jeobá, rígi̱ naʼniún mingíjyúuʼ makru̱ʼu̱u̱n xa̱bu̱ bi̱ nuxu̱nʼ. Mixtiʼkhu nindxu̱u̱ folleto nuxi̱ʼ numuu rí ikhí na̱ʼkha̱ raʼthí ajngáa májánʼ rí na̱ʼkha̱ náa Biblia (Hech. 15:35).

2. Náa numuu rí niguma májáánʼ folleto Ajngáa rí májánʼ na̱ʼkha̱ náa Dios rá.

² Náa numuu rí niguma májáánʼ folleto nuxi̱ʼ rá. A̱ngiu̱lú bi̱ kuwa náa xúgíʼ numbaaʼ ninda̱ʼa̱ mbá i̱yi̱i̱ʼ dí ra̱mingíjyúuʼ rí maʼniún xa̱bu̱ mudxawíín ga̱jma̱a̱ maxkaxi̱i̱n munigajmaa libro Enseña, rí phú najmulúʼ mu muʼsngáa ga̱jma̱a̱ numuu Biblia. Kúwi̱i̱n xa̱bu̱ bi̱ na̱nguá eñún miʼsngúún ga̱jma̱a̱ mbá libro, mú nanigu̱nʼ munigajmaa ga̱jma̱a̱ mbá i̱yi̱i̱ʼ lájuíin. Ma̱ngaa, mbá folleto ma̱ndoo miʼtájuíi mbaʼa wéñuʼ ajngáa.

3. Xú káʼnii rí nindxu̱u̱ mixtiʼkhu folleto rígi̱ ga̱jma̱a̱ i̱ʼwáʼ i̱yi̱i̱ʼ rí nuʼsngáa ga̱jma̱a̱ rá.

³ Rí xú káʼnii niguma folleto. Mbaʼa i̱yi̱i̱ʼ ndrígúlú rí nuxná ga̱jma̱a̱ estudio niguma mu xa̱bu̱ ma̱ndoo muraxnuu ga̱jma̱a̱ makru̱ʼu̱u̱n rí phú e̱ʼkha̱ raʼthí náa Biblia asndu ma̱ndoo munigajmaa i̱ndó ikhiin. Mú folleto rígi̱ nindxu̱u̱ mixtiʼkhu: Numuu rí nindxu̱u̱ mbá ikha rí xú káʼnii miʼnigajmaa ikha jngó ndayóoʼ mbáa bi̱ mambáyúu mu makro̱ʼo̱o̱. Índo̱ garaxnaxí, ndayóoʼ rí ma̱ta̱ya̱a̱ ga̱jma̱ʼ xa̱bu̱ mbá o a̱jma̱ párrafo. Numuu rí ma̱jkha̱ʼ párrafo, ma̱ndoo marasngáá asndu náa riejuun xa̱bu̱ o náa xtáa rañajunʼ. Maski ajndu timbá kíxnuu nindxu̱u̱ májánʼ rí xú káʼnii mugíʼdi̱i̱ muʼnigajmaa, mú xúgíʼ najmaa mu mugíʼdi̱i̱ mbá estudio.

4. Xú káʼnii gambáyuluʼ folleto rígi̱ mu muʼsngúún xa̱bu̱ rí phú e̱ʼkha̱ raʼthí náa Biblia rá.

⁴ Náa mbaʼa i̱yi̱i̱ʼ, na̱ʼkha̱ graxe̱ rí maxtiʼña̱a̱ náa agoo párrafos rí kaʼyoo. Mú náa folleto rígi̱, graxe̱ naxtiʼña̱a̱ ga̱jma̱a̱ texto ndrígóo Biblia, numuu rí xa̱bu̱ nandún majmañún rí phú eʼsngáa náa Escrituras ga̱jma̱a̱ raʼkháa rí e̱ʼkha̱ raʼthí náa mbaʼa i̱yi̱i̱ʼ ndrígúlú. Ikha jngó nimbá texto ndrígóo Biblia na̱nguá kiʼniriyaʼ. Itháan májánʼ rí magixnuu náa Biblia. Xúʼko̱ xa̱bu̱ bi̱ kuwáanʼ ruʼsngúún mbuyáá rí ikhiin kuwa rajmañún dí na̱ʼkha̱ náa Dios (Is. 54:13).

5. Ndíjkha rí gíʼdoo wéñuʼ numuu munigajmaa májánʼ xa̱bu̱ bi̱ guáʼdáá estudio rá.

⁵ Folleto rígi̱ na̱nguá eʼni explicar xúgíʼ texto ndrígóo Biblia. Rí phú naʼni folleto rígi̱ rí naxkaxi̱i̱n bi̱ nuʼsngúún muni graxe̱ ga̱jma̱a̱ naʼni rí publicadores muriʼña̱a̱ rí ikhiin ejmañún ga̱jma̱a̱ numuu Biblia. Ikha jngó gíʼdoo wéñuʼ numuu muʼnigajmaa mámbá kíxnuu rí muʼsngáa. Mú, ragíʼmaa muʼthá wéñuʼ. Maski ajndu ikháanʼ nanigulúʼ muʼni explicar texto ndrígóo Biblia, itháan májánʼ gáʼni rí muniʼñáaʼ rí xa̱bu̱ bi̱ nuʼsngáá mariʼña̱a̱ xó má ekro̱ʼo̱o̱ ikhaa. Ga̱jma̱a̱ gamajkhu gíʼdoo mundxaʼwáá edxu̱lúʼ káʼnii graxe̱ gúʼni mu xúʼko̱ xa̱bu̱ maʼga̱ rakro̱ʼo̱o̱ mañúú rí phú e̱ʼkha̱ raʼthí náa texto (Hech. 17:2).

6. Xú káʼnii gándoo gájmulúʼ folleto rígi̱ a) náa xuajen rí xa̱bu̱ tsénimbu̱ún náa Dios ga̱jma̱a̱ náa Biblia rá. b) índo̱ nuʼtáraʼa náa mámbá guʼwá rá. c) índo̱ nugíʼdi̱i̱ estudio náa riejuun xa̱bu̱ rá. d) índo̱ nuʼni revisitas rá.

⁶ Xó má i̱ʼwáʼ i̱yi̱i̱ʼ rí nuxná ga̱jma̱a̱ estudio, folleto rígi̱ ma̱ndoo mixná asndu náa má mbi̱ʼi̱i̱, maski ajndu na̱nguá kaʼyoo muxná gu̱nʼ rúʼko̱. Mbaʼin manigu̱nʼ majmúún folleto rígi̱ índo̱ naguanu náa riejuun mbáa xa̱bu̱ mu mugi̱ʼdi̱i̱ mbá estudio. Ma̱ngaa, xó má nijuiʼthá náa asamblea rí ajtsú mbiʼi, “folleto rígi̱ rí phú gajkhun mambáyaʼ matani revisitas” (Atayáá náa kúgumaʼá rí na̱ʼkha̱ náa ináa rígi̱ ga̱jma̱a̱ ináa a̱jkhu̱).

7. Xú káʼnii gándoo guxna estudio ga̱jma̱a̱ folleto rígi̱ rá.

⁷ Xú káʼnii gájmulúʼ mu muxná estudios rá. Ma̱ndoo mugíʼdi̱i̱ muraxnuu graxe̱ rí na̱ʼkha̱ náa número dí tima náa letra rí itháan skuniʼ ga̱jma̱a̱ párrafo rí na̱ʼkha̱ agoo. Nda̱wa̱á, guʼyáaʼ náa Biblia texto rí na̱ʼkha̱ cursivas ga̱jma̱a̱ graxe̱ rí gúʼni, gumbáyii xa̱bu̱ mu makro̱ʼo̱o̱ májánʼ. Nákha xóó tsíkrujngulú náa i̱mba̱ graxe̱ gatangaánʼ muraxi̱i̱ mbu̱júu̱ náa má kuwáanʼ ruʼnigajmaa mu mbuʼyáá á mu nikro̱ʼo̱o̱ májánʼ. Índo̱ ndiʼkhún etagíʼdi̱i̱ mi̱dxu̱ʼ gáta̱ya̱a̱, mbáa itháan májánʼ matanigajmaa ga̱jma̱ʼ mbóó o a̱jma̱ graxe̱. Índo̱ gáʼga ranújngoo mbiʼi, ma̱ndoo muʼgua̱ ruʼyáá mbaʼa párrafo o asndu mbá kíxnuu kañiʼ.

8. Ndiéjunʼ gíʼmaa magiwa̱nʼ a̱jkiu̱lú índo̱ guraxnuu mbá texto ndrígóo Biblia, ga̱jma̱a̱ náa numuu rá.

⁸ Texto ndrígóo Biblia rí naʼthí atraxnuu nindxu̱u̱ rí nariʼña̱a̱ mbájmbu graxe̱ rí na̱ʼkha̱ itháan skuniʼ. Índo̱ guraxnuu mbá texto ndrígóo Biblia, ragíʼmaa muʼthá xóo “apóstol Pablo niʼnirámáʼ” o “atayáá rí niʼtáriyaʼ Jeremías”, mbáa ajngáa rígi̱ maʼni makro̱ʼo̱o̱ xa̱bu̱ rí kuwáanʼ ruraxnuu ajngáa rí nuthi xa̱bu̱ numbaaʼ. Itháan májánʼ muʼthá “náa Ajngá rawunʼ Dios naʼthí” o “atayáá rí niʼtáriyaʼ náa Biblia”.

9. Lá gíʼmaa magixnuu xúgíʼ texto rí na̱ʼkha̱ náa párrafos ráʼ.

⁹ Lá ndayóoʼ muraxnuu xúgíʼ texto ndrígóo Biblia, o i̱ndó rí naʼthí “atraxnuu” ráʼ. Rígi̱ maʼthí bi̱ naʼsngáa. Gajkhun má rí texto rí na̱ʼkha̱ náa awúu̱n párrafo raʼkháa i̱ndó nambáyúu rí e̱ʼkha̱ raʼthí ikhí; mámbá texto gíʼdoo wéñuʼ numuu. Mú, á mu xa̱bu̱ bi̱ nuʼsngáá tsíguaphaa, na̱nguá exná tíʼña maʼdxun rí kuwáanʼ ruʼtháán o tsíguxnuu májánʼ, mbáa itháan májánʼ gáʼni rí mataʼyááʼ texto rí na̱ʼkha̱ raʼthí “atraxnuu”.

10. Nguáná gándoo makrújngaʼ náa libro Enseña rá.

¹⁰ Nguáná gakrújngaʼ matanigajmaa libro Enseña rá. Índo̱ mbáa xa̱bu̱ xtáa raʼnigajmaa má xúʼko̱, ma̱ndoo makrújngulú náa libro Enseña o muʼnigajmaa má xúʼko̱ folleto asndu mambulúʼ. Publicadores má gúthi nguáná gunigajmaa imbo̱o̱ i̱yi̱i̱ʼ. Rí xúgi̱, lá gíʼmaa mugíʼdi̱i̱ náa timbá capítulo ndrígóo libro ráʼ. Gajkhun má rí nda̱a̱ mbá xtángoo, numuu rí mámbáa xa̱bu̱ nindxu̱u̱ mixtiʼkuii. Mbáa májánʼ má gáʼni rí xa̱bu̱ bi̱ najuiʼsngáá mata̱nga̱a̱ mbaʼyoo tikhuu tema ga̱jma̱a̱ majmuu libro Enseña mu maʼnigajmaa itháan májánʼ.

11. Náa numuu rí ndayóoʼ majmulú folleto rí nuxi̱ʼ rígi̱ rá.

¹¹ Náa numbaaʼ dí rígá mbaʼa noticias dí ra̱májánʼ, ikháanʼ kuaʼdáá mbá ñajunʼ rí gíʼdoo wéñuʼ numuu rí muʼgua̱ kuʼyúlú ajngáa rí itháan májánʼ náa nuʼthá rí Reino ndrígóo Dios naʼtáñajunʼ ga̱jma̱a̱ dí nacha̱ má gáʼni̱i̱ mbá nuxi̱ʼ numbaaʼ (Mat. 24:14; 2 Ped. 3:13). Bi̱ gudxawíín ajngáa rígi̱ maguánu muthi ajngáa rí niʼthí Dios: “¡Ra̱ʼkhá tháán mitsaan kujmaa náa kúbá rajkúu bi̱ na̱ʼkha̱ kayóo ajngáa rí májánʼ, bi̱ naʼthí marigá rí tsímáá, bi̱ na̱ʼkha̱ kayóo ajngáa májánʼ dí marigá nda̱wa̱á, bi̱ naʼthí rí maguma káwáanʼ, bi̱ naʼthúu̱n Sión: ‹¡Dios ndrígáʼ ni̱jkha̱nú ninindxu̱u̱ rey!›” (Is. 52:7). Gajmulúʼ folleto rí nuxi̱ʼ rígi̱ mu muʼgua̱ kuʼyúlú ajngáa rí májánʼ rí mambáñún xúgínʼ xa̱bu̱ bi̱ nandún majmañún ga̱jma̱a̱ numuu Dios.

Mu majmulú náa xuajen rí kuwa xa̱bu̱ bi̱ tsénimbu̱ún rí xtáa Dios ga̱jma̱a̱ náa Biblia

● Nakujmaa rí náa tikhuu xuajin xa̱bu̱ tsénimbu̱ún náa ajngáa Dios ga̱jma̱a̱ Biblia. Náa xuajen rígi̱, ma̱ndoo muʼthá xkujndu dí rígá ikhí, xó má rí maguaʼdaa mbáa Xa̱bu̱ Ñajunʼ bi̱ májánʼ, náa gándoo guxkamaa consejo rí mambáñún bi̱ kuwa náa mbá guʼwíin ga̱jma̱a̱ ndiéjunʼ rí kuaʼthi̱i̱n marigá nda̱wa̱á. Nda̱wa̱á rí niʼtámijna gajmiuluʼ mbaʼa nutu xa̱bu̱ ga̱jma̱a̱ nisngajmáálú rí xtáa Dios ma̱ngaa rí Biblia naʼthí rí gajkhun, ma̱ndoo musngajmáá folleto Ajngáa rí májánʼ.

[Kúgumaʼá rí na̱ʼkha̱ náa ináa 3]

Mu majmulú náa mámbá guʼwá rí nuʼtáraʼa

● “Mbaʼin xa̱bu̱ nuraximi̱jna̱ ndiéjunʼ edxa̱ʼwáminaʼ maʼni Dios náa xa̱bu̱ numbaaʼ, ga̱jma̱a̱ naniguʼ masngajmáʼ dí ra̱mingíjyúuʼ maxtiʼña̱a̱ rígi̱. Mbá xkri̱da, lá naku̱ma̱ʼ rí Dios nandoo maʼni gámbóo tsingíná ráʼ. [Atatsíñaʼ rí xa̱bu̱ mariʼña̱a̱.] Náa folleto rígi̱ mambáyaʼ maxtiʼña̱a̱ náa Biblia ndrígáʼ graxe̱ rúʼko̱. [Araxnáá folleto, atraxnuu timbá párrafo rí na̱ʼkha̱ náa timbá kíxnuu ga̱jma̱a̱ atraxnuu Jeremías 29:11.] Xó má eʼthí gi̱jyooʼ, lá ragájkhun rí Dios nandoo rí makuwáanʼ itháan májánʼ nda̱wa̱á ráʼ. [Atatsíñaʼ mariʼña̱a̱.] Ma̱ndoo maguanáʼ ga̱jma̱a̱ folleto, ga̱jma̱a̱ índo̱ gáʼkhá nda̱wa̱á muʼnigajmaa raga̱jma̱ párrafo mu mbuʼyáá xú káʼnii Dios gáʼni gámbáa rí tsingíná.” Á mu xa̱bu̱ naguaphaa, ma̱ndoo muraxnuu ga̱jma̱a̱ mbu̱ya̱a̱ raga̱jma̱ párrafo ma̱ngaa ajtsú texto ndrígóo Biblia. Aratháán matangaán mu matanigajmaa̱ ga̱jma̱ʼ rí na̱ʼkha̱ raʼthí náa i̱mba̱ graxe̱.

● “Mbaʼa nutu nuʼtájkáan náa Dios, ga̱jma̱a̱ itháan índo̱ kuaʼdáá mbá xkujndu, lá ragájkhun ráʼ. [Atatsíñaʼ rí xa̱bu̱ mariʼña̱a̱.] Lá naku̱ma̱ʼ rí Dios naʼdxun xúgíʼ rí nutajkháan xa̱bu̱, o rígá tikhuu rí tsínigu̱ʼ xáʼ. [Atatsíñaʼ rí mariʼña̱a̱.] Ka̱ya̱ mbá folleto náa naʼtulúʼ náa ináa ndrígóo Biblia gándoo guxkamaa rí maxtiʼña̱a̱ graxe̱ rúʼko̱. [Araxnáá, ga̱jma̱a̱ atayáá ga̱jma̱ʼ timbá párrafo dí na̱ʼkha̱ náa kíxnuu 12, xúʼko̱ má texto rí naʼthí “atraxnuu”.] Nadxulú índo̱ nduʼyáá rí Dios naʼthúlúʼ rí muʼgua̱ kanuu náa ikhaa á mu nuʼtákáñii; mu ma̱ndoo muʼthámijna gajmiúlú ikhaa, gíʼmaa rí muniʼnííʼ májánʼ. [Ayuʼ náa kíxnuu 2 ga̱jma̱a̱ atasngájmáá subtítulos.] Á mu nandaʼ ma̱ndoo maniʼñúʼ folleto ga̱jma̱a̱ matangu̱ún imbo̱o̱ mbiʼi mu mbuʼyáá ndiéjunʼ eriʼña̱a̱ náa Biblia ga̱jma̱a̱ numuu mbaʼa graxe̱ rígi̱ rí gíʼdoo numuu.”

● “Ngruiguxu ruraxiwíin xa̱bu̱ náa mámbá guʼwá numuu rí ndu̱ya̱a̱xu rí xa̱bu̱ naxmiéjunʼ dí marigá nda̱wa̱á. Lá naku̱ma̱ʼ ikháánʼ rí maʼni̱i̱ itháan májánʼ ráʼ. [Atatsíñaʼ rí xa̱bu̱ mariʼña̱a̱.] Lá natayáá rí náa Biblia na̱ʼkha̱ ajngáa rí májánʼ rí naʼni marigá mbá rí muguaʼthi̱i̱n nda̱wa̱á ráʼ. Atayáá gi̱jyooʼ tikhuu graxe̱ rí na̱ʼkha̱ raʼthí náa Biblia.” Araxnáá folleto ga̱jma̱a̱ aratháán rí maraʼwíí mbá graxe̱ rí na̱ʼkha̱ náa ki̱dxu̱ʼ folleto. Ikhú, ayuʼ náa kíxnuu rí niraʼwíí xa̱bu̱ ga̱jma̱a̱ atasngájmáá xú káʼnii gíʼnigajmaa folleto. Aratháán rí matangaán nda̱wa̱á mu ma̱ta̱ya̱a̱ i̱mba̱ graxe̱ ndrígóo kíxnuu.

[Kúgumaʼá rí na̱ʼkha̱ náa ináa 4]

Mu matagíʼdi̱i̱ mbá estudio náa riejuun xa̱bu̱

● “Kuwáanʼxu ruraxi̱i̱n mbéguʼ xa̱bu̱ mu masngajmún dí rígá imbo̱o̱ nuxi̱ʼ rí xú káʼnii muʼnigajmaa Biblia. Náa folleto rígi̱ na̱ʼkha̱ 15 kíxnuu náa naʼsngáa xú káʼnii ináa ndrígóo Biblia e̱ʼkha̱ raxtiʼña̱a̱ graxe̱ rí gíʼdoo wéñuʼ numuu. [Atasngájmaa xa̱bu̱ timbá ináa ga̱jma̱a̱ náa námbáa ináa ndrígóo folleto.] Lá nitagíminaʼ mbá miʼtsú makruaʼaʼ rí e̱ʼkha̱ raʼthí náa Biblia ráʼ. [Atatsíñaʼ rí mariʼña̱a̱.] Atatsíñuʼ masngajmáʼ dí ra̱mingíjyúuʼ nindxu̱u̱ mámbá kíxnuu. [Atayááʼ kíxnuu 3 ga̱jma̱a̱ atayáá timbá párrafo ndrígóo graxe̱ 3. Nda̱wa̱á, atraxnuu Revelación 21:4, 5. Á mu natayáá rí ma̱ndoo matani, atraxnuu imbo̱o̱ párrafo ga̱jma̱a̱ xúʼko̱ má texto ndrígóo Biblia.] Ma̱ndoo maguanáʼ ga̱jma̱a̱ folleto. Nutha̱a̱nʼxu rí matanigajmaa̱ mbá kíxnuu. Á mu nanigua̱ʼ, ma̱ndoo musngáaʼxu má xúʼko̱. Nda̱wa̱á índo̱ gáʼkhá, ma̱ndoo mbuʼyáá ginii rí gíʼdoo timbá ináa.”

[Kúgumaʼá rí na̱ʼkha̱ náa ináa 4]

Mu majmulú índo̱ gúʼni revisitas

● “Nadxuʼ rí nixkamán mbu̱júu̱. Kayeʼkhá folleto rígi̱ náa nariʼña̱a̱ ga̱jma̱a̱ texto ndrígóo Biblia mbaʼa graxe̱ dí gíʼdoo numuu. [Araxnáá ga̱jma̱a̱ aratháán rí mbaʼyoo ki̱dxu̱ʼ folleto.] Xúgíʼ edxu̱u̱ dí tima gi̱jyooʼ, ndiéjunʼ rí phú nandaʼ ma̱ta̱ya̱a̱ itháan rá. [Atatsíñaʼ rí xa̱bu̱ mariʼña̱a̱ ga̱jma̱a̱ ayuʼ náa kíxnuu rí niraʼwíí ikhaa.] Atatsíñuʼ masngajmáʼ xú káʼnii gándoo gájmaa folleto rígi̱ mu maxtiʼña̱a̱ ga̱jma̱a̱ Biblia graxe̱ rúʼko̱.” Atasngájmáá xú káʼnii eguma mbá estudio índo̱ gáta̱ya̱a̱ mbá o a̱jma̱ párrafo ga̱jma̱a̱ texto ndrígóo Biblia rí magixnuu. Rí matagíʼdi̱i̱ mbá estudio xúgi̱ kaʼnii na̱nguá nindxu̱u̱ mingíjyúuʼ. Índo̱ gátatsiʼñáaʼ folleto náa xa̱bu̱, aratháán rí matangaán. Índo̱ gámbáʼ mbá kíxnuu, ma̱ndoo ma̱ta̱ya̱a̱ náa imbo̱o̱ kíxnuu rí garaʼwíí xa̱bu̱ o ma̱ndoo má manújngáa náa timbá kíxnuu.