Gajmulú folleto Ajngáa rí májánʼ mu muʼsngáa
1. Xú káʼnii nindxu̱u̱ folleto Ajngáa rí májánʼ rá.
1 Xó má ndiʼyáá náa artículo ndrígóo Ñajunʼ rí Nuʼtáraʼa numuu Reino rí gu̱nʼ julio, mbá herramienta rí ndayóoʼ mu miʼsngáa rí gajkhun náa eʼwíínʼ nindxu̱u̱ folleto Ajngáa rí májánʼ na̱ʼkha̱ náa Dios. Náa i̱yi̱i̱ʼ rígi̱, versículos na̱nguá kiʼniriyaʼ, mu xúʼko̱ bi̱ najuiʼsngáá maguxnuu mbájmbu náa Biblia. Xúgíʼ i̱yi̱i̱ʼ rí naguma kiʼni mu mámbáa gáʼnigajmaa mu xúʼko̱ gájma̱ñuu, folleto rígi̱ niguma mu maxtáa mbáa bi̱ maʼsngááʼ. Ikha jngó, índo̱ nuxnaxu̱u̱ mbáa, gúʼgíʼ musngajmáá xú nindxu̱u̱ rí majuiʼsngáa ga̱jma̱a̱ numuu Biblia ga̱jma̱a̱ xúʼko̱ gándoo mbaʼyoo dí ra̱ʼkhá tháán májánʼ dí majmañuu ajngáa rí májánʼ (Mat. 13:44).
2. Xú káʼnii gándoo gajmulú folleto Ajngáa rí májánʼ índo̱ timbá míʼtsú ejkua gúʼyáá mbáa xa̱bu̱ rá.
2 Timbá míʼtsú rí na̱dxu̱ʼ gáta̱ya̱a̱. Ma̱ndoo maratha: “Ga̱jma̱a̱ numuu rí nuʼdxawíín náa noticias, mbaʼin xa̱bu̱ naxmiéjunʼ dí gárígá nda̱wa̱á. Lá maʼni̱i̱ itháan májánʼ tayáá ikháánʼ ráʼ. [Atatsíñaʼ rí xa̱bu̱ mariʼña̱a̱.] Lá natayáá ikháánʼ dí Biblia naʼni dí marigá mbá dí muguaʼthi̱i̱n nda̱wa̱á ráʼ. Folleto rígi̱ nasngájmulúʼ tikhuu graxe̱ dí nariʼña̱a̱ Biblia”. Araxnáá folleto ga̱jma̱a̱ aratháán maraʼwíí mbóo graxe̱ dí na̱ʼkha̱ náa námbá ináa. Atasngájmáá xú káʼnii nindxu̱u̱ dí miʼsngáá ga̱jma̱a̱ numuu Biblia índo̱ gáta̱ya̱a̱ timbá kutriga̱ dí na̱ʼkha̱ náa kíxnuu dí nariʼña̱a̱ graxe̱. Imbo̱o̱ dí ma̱ndoo matani nindxu̱u̱ dí matasnga̱jmáá xú káʼnii folleto nambáyúu mbaʼyoo xú eriʼña̱a̱ Biblia graxe̱ dí na̱ʼkha̱ náa mbá kíxnuu dí ikháánʼ má nitraʼwíí. Á mu náa jw.org rígá mbá video dí nambánii ga̱jma̱a̱ kíxnuu rúʼko̱, ma̱ndoo majmaʼ náa presentación ndrígáʼ.
3. Arathá xú káʼnii gándoo marasngáa ga̱jma̱a̱ numuu Biblia índo̱ gájma̱ʼ folleto Ajngáa rí májánʼ.
3 Xú káʼnii gájmulúʼ mu muʼsngáa ga̱jma̱a̱ numuu Biblia. 1) Atraxnuu graxe̱ dí skuniʼ dí na̱ʼkha̱ náa tsu̱du̱u̱ kutriga̱ mu xa̱bu̱ magíʼ mbaʼyoo dí itháan gíʼdoo numuu. 2) Nda̱wa̱á atraxnuu kutriga̱. 3) Atraxnuu textos rí cursiva ga̱jma̱a̱ mu ma̱ndoo matambáyii xa̱bu̱ mariʼña̱a̱ ga̱jma̱a̱ Biblia graxe̱ dí skuniʼ, atatsaʼwáminaʼ májánʼ i̱ʼwáʼ graxe̱ dí ma̱ndoo matani̱i̱. 4) Á mu rígá itháan dí mbá kutriga̱ dí nariʼña̱a̱ ikháá má graxe̱, atani mbu̱júu̱ xó má eʼthí náa 2 ga̱jma̱a̱ 3. Á mu dí rígá mbá video dí nariʼña̱a̱ graxe̱ rúʼko̱, ga̱jma̱a̱ xóó tsétasngájmáá, ma̱ndoo majmaʼ índo̱ garasngáá. 5) Nda̱wa̱á kayuʼ, atanda̱ʼa̱a̱ xa̱bu̱ mariʼña̱a̱ graxe̱, xúʼko̱ gáta̱ya̱a̱ á mu nikro̱ʼo̱o̱ dí naʼthí náa i̱yi̱i̱ʼ.
4. Ndiéjunʼ gambáyuluʼ muʼni itháan májánʼ á mu najmulú folleto rígi̱ rá.
4 Gajmañaaʼ majmaʼ índo̱ gándoo folleto rígi̱ dí ra̱ʼkhá tháán gíʼdoo numuu. Nákha xóó tsétagíʼdi̱i̱ matanigajmaa ga̱jma̱ʼ xa̱bu̱, atatsaʼwáminaʼ ga̱jma̱a̱ numuu bi̱ narasngáá ga̱jma̱a̱ xú káʼnii gándoo majmaʼ versículos dí tima náa kíxnuu mu matani̱i̱ mandxa̱ʼóo edxu̱u̱ xa̱bu̱ (Prov. 15:28; Hech. 17:2, 3). Índo̱ gájmañaaʼ majmaʼ itháan májánʼ folleto rígi̱, maʼni dí manigua̱ʼ majmaʼ itháan mu marasngúún eʼwíínʼ dí gajkhun.