Atayaridáá xkri̱da ndrígu̱ún gaʼyee: Sofonías
1. Xú káʼnii ninindxu̱u̱ mbiʼi rí nixtáa gaʼyee̱ Sofonías ga̱jma̱a̱ ndíjkha rí nindxu̱u̱ mbá xkri̱da májánʼ náa ikháanʼlu rá.
1 Tikuapa siglo 7 nákha xóó tséʼkha̱ Jesús mbaʼin xa̱bu̱ nduyamajkuíí dios Baal náa xuajen Judá. Rey Amón bi̱ ra̱májánʼ nixiyáa nguáthá mbiʼi kidíiʼ ga̱jma̱a̱ ikhú ndxámá Josías nigi̱ʼi̱ xóo rey (2 Crón. 33:21–34:1). Ikhú má tsiguʼ rúʼko̱ Jeobá nigíiʼ Sofonías mu maʼtáriyaʼ mbiʼi ndrígóo rí wíji̱ ma̱ʼkha̱. Mbáa Sofonías ni̱ʼkha̱ náa guʼwún reyes bi̱ nikuwa náa Judá, ikhaa niʼtáriyaʼ xó má ajngáa rí niʼthí Jeobá maʼni gajmíi̱n xa̱bu̱ ede̱ bi̱ nikuwa náa Judá (Sof. 1:1; 3:1-4). Xúʼko̱ má mangáanʼ, nuʼni mbá tsiakii mu xámiñulu xó má gaʼyee Sofonías ga̱jma̱a̱ xúniʼñáanʼ rí bi̱ kuwa náa guʼwúlú murikhulú rí mbuʼyamajkuíí Jeobá (Mat. 10:34-37). Xú káʼnii nindxu̱u̱ ajngáa rí niʼtáriyaʼ gaʼyee Sofonías ga̱jma̱a̱ ndiéjunʼ nirígá rá.
2. Ndiéjunʼ gíʼmaa muʼni mu ma̱ndoo maguma káwáanʼ índo̱ gáʼkha̱nú mbiʼi ndrígóo Jeobá rá.
2 Guʼyáaʼ Jeobá. I̱ndó Jeobá ma̱ndoo mani káwíin xa̱bu̱ índo̱ gáʼkha̱nú mbiʼi ndrígóo. Ikha jngó, Sofonías niʼthún xa̱bu̱ bi̱ kuwa náa xuajen Judá rí mbuyáaʼ Jeobá ga̱jma̱a̱ mbuyáaʼ rí jmbu ma̱ngaa rí muni wabamijná nákha xóó rígá mbiʼi (Sof. 2:2, 3). Xúʼko̱ má káʼnii kuwáanʼ rí mbiʼi xúgi̱. Xó má niʼni Sofonías, guʼthúún xa̱bu̱ rí mbuyáaʼ Dios, mú ikháanʼ mangáanʼ gíʼmaa rí muʼnilú, mu muʼni má xúʼko̱ rí nandoo Jeobá (Sof. 1:6). Nduʼyáaʼ Jeobá índo̱ nuraxnuu májánʼ wéñuʼ Ajngáa rawunʼ ga̱jma̱a̱ índo̱ nunda̱ʼa̱a̱ rí maxnulú ikha. Nduʼyáaʼ rí jmbu índo̱ nakuwáanʼ kaʼwu. Nduʼyáaʼ rí manindxu̱lúʼ xa̱bu̱ wabaʼ índo̱ nusngajma rí nuʼnimbulúʼ ga̱jma̱a̱ xúgíʼ a̱jkiu̱lú ikha rí naxnúlú organización ndrígóo Jeobá.
3. Ndíjkha rí ndayóoʼ muʼtáraʼa ga̱jma̱a̱ gagi rá.
3 Narígá rí májánʼ. Ajngáa rí niʼtáriyaʼ Sofonías nimbáñun májánʼ wéñuʼ tikhun xa̱bu̱ bi̱ nikuwa náa xuajen Judá, mú itháan nimbáyúu Josías, bi̱ nigíʼdu̱u̱ ndiyáaʼ Jeobá nákha ikhaa ninindxu̱u̱ mbáa ndxámá. Nda̱wa̱á, Josías niʼni gámbíin xúgínʼ xándú bi̱ kuwa náa Judá (2 Crón. 34:2-5). Rí mbiʼi xúgi̱, maski ajndu tikhuu tsígáʼ ndrígóo Reino najngutígu náa xúgíʼ kamba̱a̱, náa rígá itsí o náa tsuwanʼ, i̱ʼwáʼ najngutígu náa ku̱ba̱ʼ rí májánʼ ga̱jma̱a̱ naxná xndúu (Mat. 13:18-23). Nduʼyáá gajkhun rí Jeobá gáʼni tsajkurámááʼ tsiakii rí gúʼni mu muʼgua̱ kuʼyúlú má xúʼko̱ tsígáʼ ndrígóo Reino (Sal. 126:6).
4. Ndíjkha rí ndayóoʼ muguaʼthi̱i̱n ‹mbiʼi ndrígóo Jeobá› rá.
4 Tikhun xa̱bu̱ bi̱ kuwa náa Judá nindxa̱ʼwa̱míjna̱ rí Jeobá xáʼni gámbóo xuajen. Mú Jeobá niʼthí gajkhun rí mbiʼi ndrígóo na̱ʼkha̱ mijngii (Sof. 1:12, 14). I̱ndó makáwíin bi̱ numbayumíjná náa Jeobá (Sof. 3:12, 17). Nákha xóó kuwáanʼ raguaʼthi̱i̱n ‹mbiʼi ndrígóo Jeobá›, gúʼni má xúʼko̱ ñajunʼ gajmiúlú iʼwíínʼ xa̱bi̱i̱ Jeobá (Sof. 3:8, 9).