Nuxi̱ʼ ajmúú mu muxná gamajkhu Jeobá
1 Náa reunión dí narígá mámbá tsiguʼ ndrígóo Watch Tower Bible and Tract Society of Pennsylvania, rí nirígá nákha 4 ñajunʼ gu̱nʼ octubre tsiguʼ 2014, nijuiʼthá dí rígá awan maxtiʼkhu̱u̱ tikhuu cántico. Ajngáa rúʼko̱ niʼni rí maʼdxulú. Ma̱ngaa nijuiʼthún xúgínʼ bi̱ kuwa awúu̱n rí ajmúú rí nduʼyamajkuíí ga̱jma̱a̱ Dios gíʼdoo wéñuʼ numuu índo̱ nuʼni mba̱a̱ (Sal. 96:2).
2 Mú, náa numuu rí ndayóoʼ maxtiʼkhu̱u̱ cántico rá. Rígá mbaʼa numuu. Timbá, rí xúgi̱ nakru̱ʼu̱lú itháan májánʼ tikhuu texto ndrígóo Biblia, ikha jngó ndayóoʼ maxtiʼkhu̱u̱ tikhuu letra ndrígóo ajmúú (Prov. 4:18). Raga̱jma̱, numuu rí náa mbaʼa ajngáa kuwa runi májáánʼ Traducción del Nuevo Mundo, mbáa ndayóoʼ maxtiʼkhu̱u̱ tikhuu ajngáa rí na̱ʼkha̱ náa cántico dí nigájnuu náa Biblia wayuu. Numuu rí mbaʼa náa gáʼyóoʼ maxtiʼkhu̱u̱ ajmúú rí kuaʼdáá, nigájnuu awan mu mato̱ʼo̱o̱ i̱ʼwáʼ nuxi̱ʼ cántico.
3 Lá mbaʼyóoʼ maguaʼthi̱i̱n asndu índo̱ gaguma imprimir mu mugíʼdi̱i̱ majmulú cántico nuxi̱ʼ rígi̱ ráʼ. Na̱nguá, numuu rí gu̱nʼ rí e̱ʼkha̱ magajnúu tikhuu náa jw.org. Nguáthá mbiʼi nda̱wa̱á rí gagájnuu mbá rí nuxi̱ʼ, muʼni ajmúú índo̱ gámbá reunión náa Najmañulúʼ xú Miʼni kudun Ñajunʼ Dios. Náa awan rí kaʼyoo xmáná rúʼko̱ makujmaa xú mbiʼyuu cántico ga̱jma̱a̱ maʼthí: “Ajmúú nuxi̱ʼ”.
4 Rí xú káʼnii majmañaaʼ ajmúú nuxi̱ʼ. Mingíjyúuʼ nindxu̱u̱ rí majmañaaʼ mbá ajmúú. Maski ajndu xúʼko̱ ikháanʼ nandulúʼ mbuʼyaridáá salmista, bi̱ niʼthí: “Mbayamajkuaʼ ga̱jma̱a̱ ajmúú xúgíʼ mbiʼi ga̱jma̱a̱ xawanúʼ wíí” (Sal. 30:12). Rí mbuʼyáá mbégu̱ʼ mambáyulúʼ majmañulúʼ ajmúú rí nuxi̱ʼ ma̱ngaa mu muʼni ajmúú ga̱jma̱a̱ xúgíʼ a̱jkiu̱lú.
Guʼdxuun mbaʼa nuthu aʼwá ndrígóo ajmúú, dí marigá náa jw.org. Rígi̱ gambáyulúʼ mu majmañulúʼ itháan nacha̱.
Guʼnigajmaa letra ma̱ngaa guʼni rí magida̱ʼ edxu̱lúʼ.
Guʼni ajmúú mbaʼa nuthu, asndu magajnúu májánʼ.
Guʼni ajmúú índo̱ Nuʼnigajmaa̱ mbá Guʼwáanʼ mu xúʼko̱ bi̱ kuwa náa guʼwúlú xámiñun índo̱ gúni ajmúú.
5 Tikhuu gu̱nʼ rí e̱ʼkha̱, índo̱ gáʼkha̱ mbá nuxi̱ʼ ajmúú rí ma̱mbá ga̱jma̱a̱ reunión náa Najmañulúʼ xú Miʼni kudun Ñajunʼ Dios, congregación maʼdxun ginii aʼwá ndrígóo ajmúú nda̱wa̱á muni ajmúú xó má eni.
6 Rí muʼni ajmúú náa reunión nindxu̱u̱ kiejunʼ wéñuʼ, numuu rí nandoo nuxná gamajkhu xúgiáanʼ náa Jeobá. Ikha jngó, gíʼmaa muʼni ajmúú ragíʼmaa majngruigulúʼ rexa̱a̱ o i̱ʼwáʼ rí gúʼni.
7 Rígá imbo̱o̱ dí ma̱ndoo muʼni mu musngajmá dí mitsúʼkháan ajmúú ndrígúlú. Náa mbaʼa asamblea, nákha xóó tsígi̱ʼdu̱u̱ mámbá sesión, nagrigu̱u̱ mbóo ajmúú. A̱ngiu̱lú bi̱ kuwa náa xúgíʼ tsu̱du̱u̱ numbaaʼ nuni mbá mba̱a̱ tsiakii mu muni grabar xúgíʼ ajmúú rí najmulú mu mbuʼyamajkuíí Jeobá. Nagún náa Patterson (Nueva York) a̱jma̱ nuthu rí mbá tsiguʼ, ga̱jma̱a̱ ikhiin má eninumáá pasaje ndrígu̱ún. Ikha jngó, índo̱ bi̱ nayéjkha̱ edxu̱u̱ náa mámbá sesión na̱ndu̱ʼu̱lú rí matrigáanʼ ga̱jma̱a̱ muʼdxawíín ajmúú rí a̱ngiu̱lú nini májáánʼ, gíʼmaa rí matrigáanʼ nacha̱. Rígi̱ gáʼni ratoo a̱jkiu̱lú mu muʼdxawíín rí e̱ʼkha̱ (Esd. 7:10).
8 Reunión rí mbiʼi xúgi̱ ma̱mbá ga̱jma̱a̱ mbá ajmúú rí nuxi̱ʼ rí nagumbiʼyuu “¡Que venga el Reino establecido por Dios!”. Ajmúú rígi̱, nixnaxi̱ náa reunión rí nirígá nákha octubre, niguma mu majmaku̱ma̱a̱ rí naʼni má 100 tsiguʼ rí xtáa raʼtá ñajunʼ Reino.
9 Ajmúú rí nuxi̱ʼ nindxu̱u̱ mbá ‹rí májánʼ wéñuʼ› rí nixnuluʼ Jeobá (Mat. 12:35a). Guʼni tsiakimijna mu magida̱ʼ edxu̱lúʼ mú xúʼko̱ muʼni ajmúú ga̱jma̱a̱ xúgíʼ a̱jkiu̱lú. Xúʼko̱ gúʼni mba̱a̱ Dios ga̱jma̱a̱ muxná gamajkhu rí kaʼyoo ikhaa (Sal. 147:1).