Reunión dí narígá mu magajnúlu gúʼtaraʼa nambáyulúʼ wéñuʼ
1. Náa numuu dí narígá reunión mu magajnulúʼ gúʼtaraʼa rá.
1 Mbá miʼtsu, Jesús nigimbíin gajmíi̱n mbá 70 discípulos ndrígóo nákha xóó tsíkunguiinʼ magún gútaraʼa (Luc. 10:1-11). Nixnúún tsiakii índo̱ niʼthún dí na̱nguá kuwa ndajkuíín ga̱jma̱a̱ rí Jeobá maxnún ikha. Ma̱ngaa, niʼthún xú káʼnii gúni mu mambáñun munimbánii ñajunʼ rí nikhánún ga̱jma̱a̱ niʼni rí magún “ajmi jame ajmi”. Rí mbiʼi xúgi̱, náa reunión dí narígá mu magajnúlu gúʼtaraʼa nindxu̱u̱ xúʼko̱ kaʼnii ma̱ngaa: Maxnulú tsiakii, maxnulú ikha ga̱jma̱a̱ mutulú awan rí nigájnuu.
2. Nguáthá mba̱yu̱ʼ gájyúuʼ reunión dí narígá mu magajnúlu gúʼtaraʼa rá.
2 Asndu xúgi̱, reunión dí narígá mu magajnulúʼ gúʼtaraʼa ndajyúuʼ 10 o 15 minutos. Minutos rúʼko̱ nakhánun awan grupos, náa najuixnún territorios ga̱jma̱a̱ nutajkháan. Mú índo̱ gáʼni gu̱nʼ abril, reunión rígi̱ mbajyúuʼ 5 o 7 minutos. Á mu narígá nda̱wa̱á dí i̱mba̱ reunión ndrígóo congregación, gíʼmaa rí mbajyúuʼ menos dí 5 minutos, numuu rí bi̱ makuwíin nidxawíín má dí nijuiʼsngúún ga̱jma̱a̱ numuu Biblia. Á mu reunión dí narígá mu magajnúlu gúʼtaraʼa tséjyúuʼ mba̱yu̱ʼ maʼni rí publicadores mbajñúnʼ itháan náa mutaraʼa. Ma̱ngaa, á mu precursores ga̱jma̱a̱ publicadores nigi̱ʼdi̱i̱ má nitaraʼa nákha xóó tsírígá reunión nandoo gáʼthi rí mbégu̱ʼ má gúniñaʼ rutaraʼa.
3. Xú káʼnii gíʼmaa magajnúu awan náa reunión dí narígá mu magajnúlu gúʼtaraʼa rá.
3 Reunión dí narígá mu magajnúlu gúʼtaraʼa gíʼmaa magajnúu awan dí xáʼniun mingíjyúuʼ publicadores. Mbaʼa congregación nduyáá dí májánʼ eguma índo̱ mámbá grupo bi̱ nutaraʼa nawi̱i̱n náa mixtiʼkhu guʼwá, ga̱jma̱a̱ xúʼko̱ má reunión dí narígá mu magajnúlu gúʼtaraʼa ma̱ngaa mbáa asndu maʼniún mijngii territorio xúgínʼ bi̱ gágajnun. Xúʼko̱ xáʼniun mingíjyúuʼ wéñuʼ muriyaʼ awan a̱ngiu̱lú ga̱jma̱a̱ superintendentes ndrígóo grupo mbaʼyoo dí eñúnʼ. Xúgínʼ bi̱ kuya̱ edxu̱u̱ náa mbá congregación muthi ndiéjunʼ dí itháan mambáyúu congregación á mu nduyáá dí eyóoʼ náa nutaraʼa. Nákha xóó tsétajkháan mu ma̱mbá reunión, xúgínʼ gíʼmaa mbuyáá náa minaʼ gágun gútaraʼa ma̱ngaa tsáa gágun gajmiún.
4. Ndíjkha rí gíʼdoo wéñuʼ numuu reunión dí narígá mu magajnúlu gúʼtaraʼa xó má eʼwáʼ reunión rá.
4 Gíʼdoo wéñuʼ numuu xó má eʼwáʼ reunión dí narígá náa congregación. Náa reunión rígi̱ i̱ndó nagún publicadores bi̱ magajnún gútaraʼa, na̱nguá má eyóoʼ maʼga̱ xúgíʼ congregación. Mú rúʼko̱ na̱nguá eyoo gáʼthi rí nda̱a̱ numuu ki xóo eʼwáʼ reunión. Xó má xúgíʼ, nindxu̱u̱ mbóo rí nimínáanʼ Jeobá rí naxkaxáanʼ maʼndulú kuʼyamijná ga̱jma̱a̱ muʼni xúgíʼ rí májánʼ (Heb. 10:24, 25). Ikha jngó bi̱ naguwíin grupo gíʼmaa maʼnirataminaʼ májánʼ mu reunión rígi̱ maxnúu gamajkhu Jeobá ga̱jma̱a̱ mu mambáñún bi̱ nakúwi̱i̱n. Bi̱ magajnún gútaraʼa gíʼmaa muni mbá tsiakii mu makuwá náa reunión rígi̱.
Reunión dí narígá mu magajnúlu gúʼtaraʼa ragíʼmaa mbiʼyáá rí nda̱a̱ numuu ki xóo eʼwáʼ reunión
5. a) Ndiéjunʼ ñajunʼ eʼni superintendente bi̱ naríyaʼ awan xú káʼnii miʼtáraʼa rá. b) Xú káʼnii gíʼmaa muni a̱ngiu̱lú gu̱ʼu̱ náa reunión dí narígá mu magajnúlu gúʼtaraʼa rá.
5 Xú káʼnii gátani rataminaʼ mu matrawíin a̱ngiu̱lú. Mu mbáa maʼni ratoo májánʼ rí kaʼyoo, gíʼmaa rí mixná wapháá. Xúʼko̱ má kaʼnii náa reunión dí narígá mu magajnúlu gúʼtaraʼa. Índo̱ grupos bi̱ magajnún gútaraʼa nawi̱i̱n náa mixtiʼkhu guʼwá, superintendentes ndrígóo grupo ga̱jma̱a̱ bi̱ numbañún gíʼmaa rí muyégun edxu̱u̱. Xí mbóó náa gágajnun xúgínʼ bi̱ kuwa náa congregación, ikhú superintendente bi̱ nuriyaʼ awan xú káʼnii miʼtáraʼa mbayáaʼ mbáa bi̱ maguwíin. Tikhun superintendentes bi̱ nuriyaʼ awan xú káʼnii miʼtáraʼa nuxnún programa xúgínʼ a̱ngiu̱lú bi̱ kaʼñúún murawíin ga̱jma̱a̱ nugiʼma náa tablero. Mu majngoo májánʼ reunión, a̱ngiu̱lú bi̱ muyégun edxu̱u̱ gíʼmaa rí musngáa májánʼ ga̱jma̱a̱ muriyaʼ májánʼ awan. Superintendente bi̱ naríyaʼ awan xú káʼnii miʼtáraʼa mbañíínʼ bi̱ najmañún musngáa, mu murawíin a̱ngiu̱lú mutaraʼa. Á mu rígá tikhuu mbiʼi rí nda̱wa̱a̱ nimbáa bi̱ kayá edxu̱u̱, ni má siervo ministerial o ndxájulú bi̱ nijngúun iyááʼ bi̱ najmañuu maguwíin a̱ngiu̱lú, superintendente bi̱ naríyaʼ awan xú káʼnii miʼtáraʼa gíʼmaa mbayáaʼ mbáa ndxájulú a̱ʼgu̱ bi̱ niʼni má nijngúun iyááʼ. (Atayáá náa naʼthí “Xí mbáa ndxájulú a̱ʼgu̱ gáguwíin bi̱ magún gútaraʼa”.)
6. Náa numuu rí gíʼmaa maʼnirataminaʼ májánʼ bi̱ mayéʼga edxu̱u̱ náa reunión rá.
6 Índo̱ nakhánulú mbóo asignación náa Najuiʼsngáa xú Mi̱ʼtháraʼa Májánʼ o náa Najmañulúʼ xú Miʼni kudun Ñajunʼ Dios, nduʼyáá rí gíʼdoo numuu ga̱jma̱a̱ nuʼni ratamijná májánʼ. Mú, ragíʼmaa makuwa a̱ngiu̱lú bi̱ magún rundxaʼwa̱a̱ edxu̱ún kamba̱a̱ rí guthi náa reunión. Á mu nuthuluʼ muyéʼgua edxu̱u̱ náa reunión dí narígá mu magajnúlu gúʼtaraʼa, gíʼmaa mbuʼyáá dí gíʼdoo numuu xó má eʼwáʼ reunión. Xúgi̱ rí ní xájyúuʼ itháan, gíʼdoo numuu rí muʼniratamijná májánʼ mu mambáñún a̱ngiu̱lú ga̱jma̱a̱ dí ma̱mbá wapháá. Dí matanirataminaʼ májánʼ ma̱ngaa nandoo gáʼthi rí ma̱ta̱ya̱a̱ náa gágun gútaraʼa nákha xóó tsírígá reunión.
7. Ndiéjunʼ gándoo gíʼthá náa reunión dí narígá mu magajnúlu gúʼtaraʼa rá.
7 Dí ma̱ndoo maratha. Mixtiʼkhu xóo miʼtáraʼa náa mámbá xuajen, ikha jngó ñumba tsi jmbi na̱nguá eʼni mújúnʼ bosquejo mu majmaa náa mámbá reunión rígi̱. Náa kúgumaʼá “Dí ma̱ndoo muʼthá náa reunión dí narígá mu magajnúlu gúʼtaraʼa” na̱ʼkha̱ tikhuu dí mambáyaʼ. Índo̱ narígá reunión rígi̱, naxtandu̱ʼu̱u̱n muthi mangiin bi̱ kuwa ikhí. Nguáná, ma̱ndoo marigá demostración o mbá video dí rígá náa jw.org dí mayambáá mu miʼtáraʼa. Índo̱ gáʼnirataminaʼ bi̱ mayéʼga edxu̱u̱ náa reunión mu magajnún gútaraʼa gíʼmaa mandxaʼwáminaʼ dí maxnún tsiakii ga̱jma̱a̱ maʼsngúún a̱ngiu̱lú bi̱ magajnún gútaraʼa mbiʼi rúʼko̱.
Índo̱ gáʼnirataminaʼ, bi̱ nayéjkha̱ edxu̱u̱ náa reunión mu miʼtáraʼa gíʼmaa mandxaʼwáminaʼ dí gándoo gáxnun tsiakii ga̱jma̱a̱ mambáñun maxnún ikha a̱ngiu̱lú bi̱ magajnún gútaraʼa mbiʼi rúʼko̱
8. Ndiéjunʼ gándoo gúʼthá náa reunión dí narígá mu magajnúlu gúʼtaraʼa sábado ga̱jma̱a̱ domingo rá.
8 Mámbá sábado, mbaʼin publicadores nuxna revistas Bi̱ Nayejngoo ga̱jma̱a̱ ¡Despertad! á mu rígá náa ajngún. Mbaʼin bi̱ nagájnún gútaraʼa mámbá sábado na̱nguá xóo magajnún lunes asndu viernes, ikha jngó mbáa naʼniún mingíjyúuʼ marmáʼáan a̱jkiu̱ún presentación dí ndiyáá nákha Ninigajmaa mbá Guʼwíin mu Mbuyamajkuíí Jeobá. Ikha jngó, májánʼ gáʼni dí ndxájulú bi̱ nayéjkha̱ edxu̱u̱ náa reunión mbaʼyoo tikhuu presentación dí na̱ʼkha̱ náa námbáa ináa ndrígóo Ñajunʼ rí Nuʼtáraʼa numuu Reino. Imbo̱o̱ dí ma̱ndoo miʼni nindxu̱u̱ rí mbiʼyáá xú káʼnii gúxuʼdáaʼ náa presentación ndrígóo revista mbá noticia o ndxa̱a̱ dí narígá náa xuajen. Ma̱ngaa, ma̱ndoo miʼtá xú káʼnii gúʼniratáá a̱jkiu̱u̱n xa̱bu̱ bi̱ niguanúu ga̱jma̱a̱ revista mu matangáanʼ gúʼyáá. Á mu xtáa ikhí mbáa publicador bi̱ nixtáa raxná revista rí kaʼyoo gu̱nʼ, ma̱ndoo mixtanda̱ʼa̱a̱ maʼthí dí nimbáyúu ikhaa o maʼthí mbá experiencia májánʼ rí nigiʼdoo. Mámbá domingo ma̱ndoo miʼni xúʼko̱ ga̱jma̱a̱ revista rí najuixnáá gu̱nʼ rúʼko̱. Náa reunión dí narígá mu magajnúlu gúʼtaraʼa ma̱ndoo miʼtá xú káʼnii mixnáxi tikhuu i̱yi̱i̱ʼ, mbá xkri̱da xó má folletos Ajngáa rí májánʼ ga̱jma̱a̱ Atadxawíín Diúu̱ o libro Enseña, rí nuxnáxi̱ asndu kaʼnii má mbi̱ʼi̱i̱ ga̱jma̱a̱ rí najmulú mu muʼsngáa numuu Biblia.
9. Índo̱ congregación xtáa náa mbá campaña kiejunʼ, ndiéjunʼ gándoo gíʼthá sábado ga̱jma̱a̱ domingo náa reunión dí narígá mu magajnúlu gúʼtaraʼa rá.
9 Índo̱ congregación xtáa náa mbá campaña kiejunʼ, sábado ga̱jma̱a̱ domingo ma̱ndoo miʼtá xú káʼnii gúxnaxí revistas ga̱jma̱a̱ invitación o tratado, o ndiéjunʼ gúʼni índo̱ mbáa xa̱bu̱ nandoo maʼdxun ajngáa rí na̱jkua̱ kuʼyuluʼ. Imbo̱o̱ dí ma̱ndoo maguma nindxu̱u̱ rí miʼtá experiencia dí nasngájma dí gíʼdoo numuu campaña rí kuwáanʼ ruʼni.
10, 11. Ndíjkha rí gíʼdoo numuu muniratamijná májánʼ publicadores mu makuwá náa reunión rá.
10 Xú káʼnii gándoo gúniratamijná publicadores. Mu magajnúu májánʼ reunión ndayóoʼ muyambáá publicadores bi̱ gakúwi̱i̱n. Á mu nuniratamijná wapháá mu mutaraʼa —mbáa índo̱ nunigajmaa mbá guʼwíin—, muthi dí mambáñun eʼwíínʼ náa reunión. Mu makuwáanʼ xawii, gíʼmaa maguaʼdáá i̱yi̱i̱ʼ rí ndayulúʼ nákha xóó tsírígá reunión. Mu xúʼko̱ muʼguanú nacha̱ náa muʼtáraʼa.
11 Ma̱ngaa gíʼdoo numuu rí muʼni tsiakimijna muʼguanú nákha xóó tsígi̱ʼdu̱u̱, xó má eʼni náa eʼwáʼ reunión dí narígá náa congregación. Á mu na̱jkua̱nú wakhaʼ, nuʼnijngi̱i̱n ga̱jma̱a̱ mbáa asndu muʼni gachíí awan dí nigájnuu. Náa guaʼyaa awan rí muʼni gachíí rá. Mbaʼa dí endxaʼwámina ndxájulú nákha xóó tsiguwíin grupo. Mbá xkri̱da, á mu na̱nguá mbaʼin náa reunión, mbáa makunguiinʼ xúgínʼ náa territorio rí taguámba rajuiʼtáraʼa. Á mu mitsinguánʼ guanúu territorio, mbáa makunguiinʼ bi̱ raguáʼdáá carro gajmiún bi̱ guáʼdáá. Ga̱jma̱a̱ á mu nagún gútaraʼa náa mbá territorio rí migamíi, mbáa mandu̱ʼu̱u̱n tikhun a̱ngiu̱lú xa̱bekha mu mutaraʼa náa mijngii etaraʼa a̱ngiu̱lú gu̱ʼu̱ o mutaraʼa gajmiún. Á mu mbáa publicador naʼniuu nandii, mbáa muxuʼmaa náa mbá calle rí na̱nguá aʼwán o guʼwá rí na̱nguá gíʼdoo wéñuʼ escaleras. O ma̱ndoo mandu̱ʼu̱u̱n publicadores bi̱ mba̱yu̱ʼ má nijngún iyááʼ mu magajnún gajmiún bi̱ nuxinʼ. Mú, á mu na̱jkua̱nú wakhaʼ, mbáa mbaʼyóoʼ dí ndxájulú mariʼkhu̱u̱n mbu̱júu̱ bi̱ niʼthún má magajnún ga̱jma̱a̱ awan rí niríyaʼ. Gajkhun má, nguáná xúgiáanʼ má naʼniulú wakhaʼ ga̱jma̱a̱ mbá rí tsíguaʼthi̱i̱n mugíʼnin. Mú, á mu naguʼunlú má rí xúʼko̱ eʼni, mbáa ndayóoʼ mundxaʼwamíjna̱ rí á mu nánguá gíʼdoo numuu eʼyáá reunión dí narígá mu magajnúlu gúʼtaraʼa o ndayóoʼ rí muríyaʼ májánʼ awan.
12. Á mu ikháanʼ nagájnulú gajmiúlú kiki̱ín a̱ngiu̱lú, ndiéjunʼ gúʼgiʼ muʼni rá.
12 Publicadores ma̱ndoo muriyaʼ wapháá awan tsíin gagájnún gajmiún o ma̱ndoo muguaʼthi̱i̱n rí ndxájulú bi̱ naguwíin a̱ngiu̱lú maʼthúún tsíin gágun gajmiún. Mú á mu naguʼunlu nagájnulú gajmiúlú kiki̱ín a̱ngiu̱lú, lá ma̱ndoo magajnúlú gúʼtaraʼa gajmiúlú eʼwíínʼ publicadores ráʼ. (2 Cor. 6:11-13.) Lá ma̱ndoo magajnúlu gúʼtaraʼa nguánáa gajmiúlú mbáa publicador nuxi̱ʼ ga̱jma̱a̱ mumbáyii maʼtáraʼa itháan májánʼ xáʼ. (1 Cor. 10:24; 1 Tim. 4:13, 15.) Índo̱ xtáa rarígá reunión, guʼgíʼ guʼdxawíín xúgíʼ dí gútulú ikhí, xó má náa minaʼ gugíʼdi̱i̱ muʼtáraʼa. Índo̱ gámbá, xúʼgíʼ muriʼkhuii awan rí nigájnuu ga̱jma̱a̱ guʼgua̱ nacha̱ náa muʼtáraʼa.
13. Á mu xúgiáanʼ guyambáá, xú káʼnii gambáyuluʼ reunión dí narígá mu magajnúlu gúʼtaraʼa rá.
13 Jesús niʼni dí mbá 70 discípulos magún gútaraʼa “aʼkue pu-gagui niguhuanʼ” (Luc. 10:17). Rí Jesús niwi̱i̱n gajmíi̱n ikhiin nákha xóó tségun gútaraʼa nimbáñun mu muni májánʼ ñajunʼ. Náa reunión dí narígá mu magajnúlu gúʼtaraʼa nindxu̱u̱ xúʼko̱ kaʼnii. Á mu xúgiáanʼ nuyambáá, reunión rígi̱ maxnúlúʼ tsiakii, maxnúlúʼ ikha ga̱jma̱a̱ mambáyulúʼ muríyaʼ májánʼ awan mu muʼnimbánii májánʼ ñajunʼ rí nikhánulú ‹rí muʼtáraʼa náa xúgínʼ xa̱bu̱› (Mat. 24:14).