Consejo rí ma̱ndoo mambáyaaʼ índo̱ nagimbíi̱n mu magajnún gutaraʼa

Xúgíʼ reunión dí narígá náa Guʼwá nagimbáanʼ, xó má índo̱ nagimbíi̱n mu magajnún gutaraʼa nindxu̱u̱ mbá regalo dí naxnúlú Jeobá mu musngajmá rí nandulú kuʼyamijná ga̱jma̱a̱ mu muʼni rí májánʼ (Heb 10:24, 25). Bi̱ naguwíin a̱ngiu̱lú mu magajnún gutaraʼa gíʼmaa mbajyúuʼ 5 o 7 minutos. Á mu guaʼdáá awan dí mutaraʼa índo̱ naguámbá reunión gíʼmaa maʼni mbáxngaa kayuuʼ. Bi̱ kaʼyoo maguwíin a̱ngiu̱lú gíʼmaa maʼniratoo mbá rí ma̱ndoo mambáñún bi̱ magajnún gutaraʼa. Mbá xkri̱da, índo̱ naʼni sábado nakúwi̱i̱n itháán a̱ngiu̱lú bi̱ na̱nguá niʼngo̱o̱ gágajnún náa i̱ʼwáʼ mbiʼi, i̱ndó ma̱ndoo maʼthí ndiéjuunʼ gúthi náa magún gutaraʼa. Ndiéjunʼ imbo̱o̱ʼ rí ma̱ndoo mayambáá rá.

• Xkri̱da xóo marataráʼa rí na̱ʼkha̱ náa I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos.

• Xú gándoo marata̱a̱n i̱mba̱a̱ ga̱jma̱a̱ mbá rí ndiʼkhún nirígá o mbá noticias rí nitadxawíín.

• Xóo gáratha̱a̱n bi̱ ndayáʼ rí maʼthí mu xáʼdxuun.

• Xóo guriʼñáá mbáa bi̱ nindxu̱u̱ ateo, bi̱ naʼnimbo̱o̱ náa evolución, mbáa bi̱ naʼthí imbo̱o̱ʼ ajngáa o mbáa bi̱ xtáa náa imbo̱o̱ʼ religión dí na̱nguá ejmaʼnuunʼ náa nuʼtáraʼa.

• Xóo gajmulú ináa ndrígóo Internet jw.org, aplicación JW Library^® o Biblia.

• Xóo gajmulú caja ndrígóo “herramientas” mu muʼsngáa.

• Muʼgíʼ muʼtáraʼa itháán ga̱jma̱a̱ teléfono, carta, náa nanujgún mbaʼin xa̱bu̱, xóo muʼni revisita o dí muʼsngáa ga̱jma̱a̱ numuu Biblia.

• Xóo muñeumíjna̱, maguʼwún, maguaʼdáá gamajkhún, mbuʼyáá náá rí májánʼ o i̱ʼwáʼ.

• Mbá kíxnuu o video dí na̱ʼkha̱ náa folleto Gajmañaaʼ matraxnuu ga̱jma̱a̱ marasngáa májánʼ.

• Xú káʼnii guxnáá tsiakii ga̱jma̱a̱ mumbayíí bi̱ najkua guʼtáraʼa gajmiúlú.

• Mbáa texto rí ma̱ndoo mayambáá náa miʼtáraʼa o mbá experiencia rí maxnún tsiakii.