Gumbáñuun bi̱ tsíkruigu̱u̱n majmañún numuu Jeobá
1. Xú káʼnii nisngájma Jesús dí naxmiéjunʼ kaʼñúún xa̱bu̱ bi̱ tsíkruigu̱u̱n rá.
1 Inu magajnúu Jesús náa Jericó. Ikhú, a̱jmi̱i̱n bi̱ tsíkruigu̱u̱n bi̱ nunda̱ʼa̱ mbújkha̱a̱ nitháán gakhii: “¡Señor, [...] añahuin akianʼ-xtayaʼxoʼ [!]”. Mbáa Jesús naxmiéjunʼ wéñuʼ numuu rí ndiʼyoo dí nánguá mba̱yu̱ʼ makhañúu. Maski ajndu xúʼko̱, ikhaa niwi̱ji̱, nindxaʼwún ga̱jma̱a̱ niʼni thanún (Mat. 20:29-34). Xú káʼnii gándoo guʼyaridáá xkridoo Jesús rí nigáwiinʼ a̱jkiu̱u̱n rá.
2. Xú káʼnii gándoo gúʼtaruʼun xa̱bu̱ bi̱ tsíkruigu̱u̱n bi̱ nuxkamin náa kamba̱a̱ rá.
2 Gumbáñuun. Á mu nuxkamaa mbáa xa̱bu̱ bi̱ tsíkruigo̱o̱ náa kamba̱a̱, guʼtháán dí mbiʼyulú ga̱jma̱a̱ gumbáyii. Mbáa ginii xándoo gáʼthulúʼ májánʼ, numuu rí kuwa bi̱ nuniu̱u̱n dí ra̱májánʼ. Mú á mu májánʼ a̱jkiu̱lú ga̱jma̱a̱ naxmiéjunlú gajkhun kuʼyáá, mbáa xámiñuu. Ma̱ngaa garmáʼáan a̱jkiu̱lú dí rígá mixtiʼkhu dí xú káʼnii tsíkruigu̱u̱n, ga̱jma̱a̱ xúʼko̱ gúʼyáá xú káʼnii gándoo gúmbayíí xa̱bu̱. Índo̱ guámbulúʼ nimbayíí, ma̱ndoo muʼthán dí kuwáanʼ ruñambáá mu miʼsngáa numuu Biblia. Guraxnuu mbóo texto ndrígóo Biblia, xóo Salmo 146:8 o Isaías 35:5, 6. Ma̱ngaa ma̱ndoo musngajmáá xú káʼnii gagruigú aʼwá ndrígóo i̱yi̱i̱ʼ náa ináa ndrígóo Internet jw.org. Á mu rí xa̱bu̱ najmañuu naguxnuu braille, gura̱xi̱i̱ á mu nandoo mbóo i̱yi̱i̱ʼ dí naʼthí ga̱jma̱a̱ numuu Biblia dí kiʼniraʼmáʼ braille. Á mu xa̱bu̱ gíʼdoo mbá computadora dí gíʼdoo mbá programa dí naguxnuu texto dí nakujmaa náa pantalla, mbáa ma̱ndoo mambáyúu tikhuu dí rígá náa jw.org ga̱jma̱a̱ i̱yi̱i̱ʼ dí ma̱ndoo magruigú xóo formato de texto enriquecido (RTF). Nájma̱ formatos rígi̱ i̱ndó rígá náa ajngáa xtílo̱o̱ ga̱jma̱a̱ i̱ʼwáʼ ajngáa rí itháan nuthi náa numbaaʼ. (Atayáá náa kúgumaʼá “Índo̱ gátambáyii mbáa xa̱bu̱ bi̱ tsíkruigo̱o̱...”.)
3. Xú káʼnii gándoo gúxkamiin xa̱bu̱ bi̱ tsíkruigu̱u̱n náa territorio ndrígúlú rá.
3 Guxkamiin xa̱bu̱ bi̱ tsíkruigu̱u̱n. Mbáa nimbá miʼtsu xóó tséxkamiin xa̱bu̱ bi̱ tsíkruigu̱u̱n índo̱ nuʼtáraʼa náa mámbá guʼwá, ikhiin na̱nguá eñún mutamijná gajmiún xa̱bu̱ bi̱ tséniʼnuuʼ. Ikha jngó, gíʼmaa muʼnimi̱jna̱ dí muxkamiin ga̱jma̱a̱ dí muʼtáruʼun (Mat. 10:11). Lá kuwa bi̱ tsíkruigu̱u̱n náa nuñajunʼ o náa nuʼnigajmaa ráʼ. Guʼthúún ga̱jma̱a̱ numuu dí gajkhun. Á mu náa nuʼtáraʼa rígá escuela dí nunigajmaa bi̱ tsíkruigu̱u̱n, guraxi̱i̱ director á mu nandoo mudéʼgua̱ i̱yi̱i̱ʼ dí rígá náa braille mu magiʼdoo náa biblioteca ndrígóo. Lá nuniʼníiʼ xa̱bu̱ bi̱ kaʼyoo mbáa bi̱ tsíkruigo̱o̱ ráʼ. Lá rígá náa territorio ndrígúlú náa numbañún xa̱bu̱ bi̱ tsíkruigu̱u̱n o guʼwá náa kuwa xa̱bu̱ bi̱ guáʼdáá i̱ʼwáʼ nandii náa kuwa mangiin xa̱bu̱ bi̱ tsíkruigu̱u̱n ráʼ. Arathún bi̱ kuñún xa̱bu̱ bi̱ tsíkruigu̱u̱n, recepcionista ndrígóo guʼwá o director ndrígóo escuela dí ikháanʼlu bi̱ nuʼtáraʼa numuu Jeobá nandulúʼ mumbáñuun xa̱bu̱ bi̱ tsíkruigu̱u̱n, ga̱jma̱a̱ dí kuaʼdáá i̱yi̱i̱ʼ náa braille ga̱jma̱a̱ aʼwá ndrígóo i̱yi̱i̱ʼ dí mambáñun. Gusngajmúún ga̱jma̱a̱ Biblia rí Dios naʼthí maʼni thanún xa̱bu̱ bi̱ tsíkruigu̱u̱n. Ma̱ngaa ma̱ndoo musngajmúún video dí nagumbiʼyuu “No sé qué haría sin ella”, dí na̱ʼkha̱ náa jw.org. Náa video rígi̱ naʼthí experiencia ndrígóo mbáa ndxájulú bi̱ tsíkruigo̱o̱ bi̱ nambáyúu magiʼdoo Biblia náa braille. Á mu nuʼthúún mbájmbu náa numuu dí na̱jkua̱, mbáa xáʼniulu mingíjyúuʼ muxkamiin bi̱ tsíkruigu̱u̱n.
4. Ndiéjunʼ eʼsngúlúʼ dí nigíʼnuu mbáa ndxájulú bi̱ mbiʼyuu Janet rá.
4 Mbáa ndxájulú bi̱ tsíkruigo̱o̱ bi̱ mbiʼyuu Janet ni̱jkha̱ náa mbá guʼwá dí kuwa xa̱bu̱ bi̱ tsíkruigu̱u̱n, ga̱jma̱a̱ nigíʼdu̱u̱ niʼtámíjná ga̱jma̱a̱ mbáa ndxáʼgú. Janet niʼthúu̱n: “Índo̱ Jesús nixtáa náa tsu̱du̱u̱ ku̱ba̱ʼ, niʼni thanún tikhun xa̱bu̱ bi̱ tsíkruigu̱u̱n mu masngájma dí maʼni nda̱wa̱á ga̱jma̱a̱ numún xúgínʼ xa̱bu̱ bi̱ tsíkruigu̱u̱n”. Ikhú ndiyáá dí naʼthí náa Revelación 21:3, 4, ga̱jma̱a̱ Janet niʼthúu̱n xú káʼnii Reino ndrígóo Dios gáʼnimbánuu dí ekudaminaʼ maʼni. Nda̱wa̱á rí niguanúu wíí ndxáʼgú, niʼthí: “Timbá miʼtsu dí mbáa bi̱ tsíkruigo̱o̱ eʼthúnʼ rígi̱. Mbaʼin xa̱bu̱ bi̱ nuyexi nundxaʼwamíjná rí ikháanʼ bi̱ tsíkruigu̱lú nuraʼníí mbóo castigo ga̱jma̱a̱ numuu mbóo rí ni̱ʼni̱ o dí nini xiʼñúlú”. Janet nikunguanʼ mbóo correo dí na̱jkha̱ kayáa náa libro Enseña, dí xúgi̱ nunigajmaa Biblia a̱jma̱ nutu dí mbá xmáná.
5. Maski ajndu xándoo gúʼni thanún bi̱ tsíkruigu̱u̱n, xú káʼnii gambáñun á mu naxmiéjunlú kuʼñúún xá.
5 Gajkhun má rí ikháanʼ xándoo gúʼni thanún xa̱bu̱ bi̱ tsíkruigu̱u̱n xó má niʼni Jesús. Mú rígá mbá dí muʼni, dios bi̱ naʼtáñajunʼ náa numbaaʼ rígi̱ narugoo edxu̱ún mbaʼin xa̱bu̱, asndu tikhun bi̱ tsíkruigu̱u̱n. Ma̱ndoo mumbáñuun xúgínʼ makru̱ʼu̱u̱n rí gajkhun dí na̱ʼkha̱ náa Ajngá rawunʼ Dios (2 Cor. 4:4). Jesús niʼni thanún a̱jmi̱i̱n xa̱bu̱ bi̱ tsíkruigu̱u̱n náa mijngii Jericó numuu dí nigáwiinʼ a̱jkiu̱u̱n kaʼñúún (Mat. 20:34). Á mu ikháanʼ naxmiéjunlú kuʼñúún xa̱bu̱ bi̱ tsíkruigu̱u̱n, ma̱ndoo mumbáñuun muniʼniiʼ Jeobá, bi̱ maʼni rí mambaʼta̱a̱ idún ga̱jma̱a̱ maʼni dí makuwá kámuu mbiʼi.