Gajmañaaʼ marataráʼa májánʼ: Araxná libro Dí naʼsngáa náa Biblia

Ndíjkha rí gíʼdoo wéñuʼ numuu. Libro Dí naʼsngáa náa Biblia nindxu̱u̱ mbá dí itháan najmulú náa nuʼtáraʼa. Á mu nandulúʼ majmulúʼ mu muʼsngáa ga̱jma̱a̱ numuu Biblia, ginii gíʼmaa muxná libro xa̱bu̱. Ikha jngó, guʼnimi̱jna̱ majmañulúʼ muxnaxí májánʼ índo̱ gúʼtaraʼa (Prov. 22:29). Rígá mbaʼa ikhoo rí xóo ma̱ndoo muʼni, ikha jngó ma̱ndoo muraʼwíí dí itháan mayambáá náa territorio ndrígúlú.

Xú káʼnii gúʼni:

Atani̱i̱ mbá graxe̱ xa̱bu̱ mu maʼndoo mbaʼyoo itháan mbá capítulo ndrígóo libro. Mbáa ma̱ndoo maraʼwíí mbá graxe̱ dí na̱ʼkha̱ náa nagi̱ʼdu̱u̱ mámbá capítulo. Nda̱wa̱á dí nitadxuun xóo niriʼña xa̱bu̱, atraxnuu mbóo texto ndrígóo Biblia, ga̱jma̱a̱ xanújngoo mbaʼa minutos, gu̱ya̱a̱ mbóo kutriga̱ ndrígóo libro náa na̱ʼkha̱ raʼthí numuu tema rúʼko̱.
I̱mba̱ rí ma̱ndoo muʼni nindxu̱u̱ rí majmulúʼ ináa náa nagi̱ʼdu̱u̱ mu xa̱bu̱ manigu̱ʼ majmañuu itháan ma̱ngaa musngajmáá náa libro rí eʼthí Biblia ga̱jma̱a̱ numuu tema rúʼko̱. Mbá xkri̱da, nda̱wa̱á dí niguámbá niratháán mbá dí ra̱májánʼ dí nigájnuu náa noticia, ma̱ndoo maratha̱a̱n rí mbaʼin xa̱bu̱ nuni graxe̱ dí na̱ʼkha̱ náa ináa 3. O ma̱ndoo maratha̱a̱n dí na̱dxu̱ʼ gátañu̱u̱n bi̱ kuwa mijngii ikhí mu maratamíjná gajmiáanʼ dí kuaʼti̱i̱n makuwáanʼ májánʼ nda̱wa̱á. Atasngájmáá dibujo dí na̱ʼkha̱ náa ináa 4 ga̱jma̱a̱ 5, ma̱ngaa atraxi̱i̱: “Ndiéjunʼ dí natayáá gi̱jyooʼ manigua̱ʼ mambanúu rá.” Ma̱ngaa ma̱ndoo marata̱ dí nadxuʼ gátañu̱u̱n mbégu̱ʼ mu marathu̱u̱n ga̱jma̱a̱ numuu tikhuu graxe̱ dí ra̱ʼkhá tháán gíʼdoo numuu rí nuʼnilú. Atasngájmáá graxe̱ dí na̱ʼkha̱ náa ináa 6 ga̱jma̱a̱ atanda̱ʼa̱a̱ maʼtháanʼ náa guaʼyaa eniguʼ mbaʼyoo itháan.
Aratháán mbájmbaʼ xa̱bu̱ á mu nandoo marasngáá ga̱jma̱a̱ numuu Biblia. Ma̱ndoo maratha̱a̱n xígi̱ kaʼnii: “Kuwáanʼxu ruxnuxu xa̱bu̱ libro rígi̱ dí mambáñun munigajmaa Biblia. Lá natatsiʼnuʼ rá. [Atatsíñaʼ rí xa̱bu̱ mariʼña̱a̱.] Á mu naguapháán, manigu̱ʼ masngajmáʼ xú káʼnii gándoo majmaʼ mu matanigajmaa ga̱jma̱a̱ Biblia ndrígáʼ”.

Atagíʼ matani rígi̱ rí mbá gu̱nʼ:

Atagíʼ matani rígi̱ índo̱ gunigajmaa mbá guʼwáanʼ.
Índo̱ gárataráʼa gajmiáanʼ eʼwíínʼ publicador, arathún xú káʼnii etatsaʼwáminaʼ matagíʼdi̱i̱ marathu̱u̱n xa̱bu̱ (Prov. 27:17). Á mu natayáá dí tsegájnuu májánʼ, atriʼkhu̱u̱.