Jeobá nagruiguíi xa̱bo̱ tsí natanga̱a̱ a̱jkiu̱u̱n

David niʼnirámáʼ Salmo 51 nda̱wa̱á rí Natán niríyúu ga̱jma̱a̱ numuu aʼkhá rí nikudaminaʼ ga̱jma̱a̱ Batseba. Conciencia ndrígóo David niʼni gawúunʼ, ga̱jma̱a̱ niʼni guabaminaʼ niʼthí aʼkhá rí nikudaminaʼ (2Sa 12:1-14).

Maski ajndu David nikudaminaʼ aʼkhá, ma̱ndoo mambaxúu ga̱jma̱a̱ Dios mbu̱júu̱

51:3, 4, 8-12, 17

• Nákha xóó tsétanga̱a̱ a̱jkiu̱u̱n ga̱jma̱a̱ xóó tséʼthi aʼkhúun, conciencia ndrígóo naʼni gawúunʼ wéñuʼ ga̱jma̱a̱ nixtáa gíná wéñuʼ.

• Ra̱ʼkhá tháán nigawúunʼ numuu rí niʼni mbá rí tsínigu̱ʼ Dios rí nikumu̱u̱ rí asndu xóo nagawúunʼ asndu náa itsu̱u̱.

• Ra̱ʼkhá tháán nindoo rí muni mba̱a̱ a̱jkiu̱u̱n kuyáá, rí mambaxúu ga̱jma̱a̱ Dios mbu̱júu̱ ga̱jma̱a̱ rí maxtáa gagi xó má nákha ginii.

• Niʼtákáñuu Jeobá rí mambáyúu maʼnimbo̱o̱ ga̱jma̱a̱ xúgíʼ a̱jkiu̱u̱n.

• Nikumu̱u̱ má rí Jeobá maʼni mba̱a̱ a̱jkiu̱u̱n kaʼyoo.