Lá nixtiʼkhuu rí naʼthí náa Biblia ráʼ.

Tikhun xa̱bu̱ nuraximíjna̱ á mu nixtiʼkhuu ajngáa tsúʼkháan rí naʼthí náa Biblia. Gaʼyee Isaías niʼthí rí Ajngá rawunʼ Dios ndajyúuʼ “asndu kámuu mbiʼi” (Isaías 40:8). Xú káʼnii gándoo gúʼyáá rí táxtiʼkhuu mbá kayuʼ rí nikudaminaʼ maʼni Dios rá.

Dios gíʼdoo tsiakii mu mayéxi̱i̱ Ajngóo ga̱jma̱a̱ xániñuʼ rí nimbáa mariʼkhu̱u̱. Nákha wajyúúʼ índo̱ nuniriyaaʼ ga̱jma̱a̱ ñawúnʼ libro rí mitsúʼkháan, bi̱ nuniriyaʼ nuraxnuu ga̱jma̱a̱ tsumáá mámbá letra mu mbuyáá rí na̱nguá fróʼoo na̱nguá xtiʼkhuu ga̱jma̱a̱ tsíjngudi̱i̱ nimbá letra. Mú ga̱jma̱a̱ numuu rí ni̱ndxu̱lú xa̱bu̱ aʼkhá, tikhun bi̱ niniriyaaʼ nirígá náa nijngawi̱i̱n mú túriʼkhuíí rí eyoo gáʼthi.

XÚ KÁʼNII GÁNDOO GÚʼYÁÁ RÍ BIBLIA NINDXU̱U̱ AJNGÓO DIOS RÁ.

Rígá mbaʼa copia rí nigumariyaaʼ ga̱jma̱a̱ ñawúnʼ nákha wajyúúʼ rí nigájnuu náa Biblia, á mu náa mbá copia rígá rí naxtiʼkhuu ma̱ndoo maguma mbríguii ga̱jma̱a̱ i̱ʼwáʼ copia mu mbiʼyáá á mu nijngawi̱i̱n (á mu nandaʼ ma̱ta̱ya̱a̱ itháan ayuʼ náa jw.org o atraxnuu artículo “¿Se ha cambiado o manipulado la Biblia?”).

Gundxaʼwamíjna̱ ga̱jma̱a̱ numuu rollo rí nikujma̱a̱ náa mar Muerto, rí nikujma̱a̱ nákha tsigu’ 1947 náa mbá tsíñu dí rígá mijngii náa mar Muerto rí nixka̱ma̱a̱ beduinos (árabes bi̱ nagún náa ku̱ba̱ʼ mixooʼ). Náa i̱yi̱i̱ʼ wayuu rígi̱ na̱ʼkha̱ raʼthí Ajngóo Dios ga̱jma̱a̱ nigumaraʼmáʼ nákha naʼni itháan rí a̱jma̱ míi tsiguʼ. Bi̱ najmañún nini mbríguii rollos rígi̱ ga̱jma̱a̱ rí na̱ʼkha̱ raʼthí náa Biblia rí kuaʼdáá mbiʼi xúgi̱. Ndiéjunʼ nixkamaa xá.

Xa̱bu̱ bi̱ najmañún bugi̱ niguánu ndiyáá rí Ajngá rawunʼ Dios rí kuaʼdáálu mbiʼi xúgi̱ ikháá kayuʼ eʼthí xóo náa i̱yi̱i̱ʼ rí nigumaraʼmáʼ nákha ginii.a Rí nini̱ mbríguii tsumáá i̱yi̱i̱ʼ dí nirígá nákha wajyúúʼ ga̱jma̱a̱ Biblia dí rígá xúgi̱ niguánu ndiyáá rí nindxu̱u̱ rí phú Ajngóo Dios rí nigumaraʼmáʼ nákha ginii. Nakujmaa kaʼwu rí Dios niʼni rí Ajngóo xáxtiʼkhuu mbá kayuuʼ asndu mbiʼi xúgi̱.

Ikha jngó ndu’yáá májánʼ rí nuraxnuu náa Ajngá rawunʼ Dios nindxu̱u̱ gajkhun, ga̱jma̱a̱ rí nduʼyáá rígi̱ guʼyáá ndiéjunʼ esngúlú gaʼyee ga̱jma̱a̱ numuu Dios.