Guʼni rí májánʼ xóo enigu̱u̱ Jeobá

Jeobá Dios nindxu̱u̱ bi̱ naxná ikha. Mbá xkri̱da, ikha niʼthí rí xa̱bu̱ gajmii ni̱ndxu̱ún mbáa xa̱biya̱ ga̱jma̱a̱ mbáa a̱ʼgu̱ (Mt 19:4-6, 9). Ma̱ngaa naguiyuuʼ kaʼyoo xúgíʼ aʼkhá rí mubúúnʼ gajmiún eʼwíínʼ (1Co 6:9, 10). Ma̱ngaa naxná ikha xú káʼnii xtiin mugíʼ ga̱jma̱a̱ xóo muʼniratamijná bi̱ ni̱ndxu̱lú xa̱bi̱i̱ rí nakujmaa mixtiʼkuan náa eʼwíínʼ xa̱bu̱ (Dt 22:5; 1Ti 2:9, 10).

Rí mbiʼi xúgi̱, mbaʼin xa̱bu̱ nunigaʼduunʼ ikha ndrígóo Jeobá (Ro 1:18-32). Nuniñaaʼ rí modas maʼni xú káʼnii xtiin gúgíʼ, muniratamijná ga̱jma̱a̱ rí muni. Asndu nuni mbaʼumíjna̱ ga̱jma̱a̱ rí nuni ma̱ngaa nutanumún bi̱ tseni xóo ikhiin (1Pe 4:3, 4).

Bi̱ ni̱ndxu̱lú xa̱bi̱i̱ Jeobá gíʼmaa rí xamiñulú muʼthá xú káʼnii nindxu̱u̱ ikha ndrígóo Dios (Ro 12:9). Nuʼni índo̱ nusngajma ga̱jma̱a̱ gamajkhu rí nanigu̱u̱ Dios ga̱jma̱a̱ rí nakuwáanʼ xóo má ikha ndrígóo. Mbá xkri̱da, índo̱ nuraʼwíí xú káʼnii mugíʼ xtíñulu ga̱jma̱a̱ muʼniratamijná, gíʼma muraximíjna̱: “Tsáa ikha ndrígóo enimbánu, ndrígóo Jeobá o ndrígóo numbaaʼ rá. Lá nakujmaa dí nindxu̱u̱ xa̱bi̱i̱ Dios rá.” O índo̱ nuraʼwíí mbá programa o película dí mbuʼyáá, májánʼ gaʼni dí mundxaʼwáá e̱dxu̱lu á mu Jeobá maniguuʼ dí mbuʼyáa, o ndiéjunʼ exkáxiin matani ga̱jma̱a̱ á mu rí guʼyáá maʼni dí makáguabáanʼ (Sl 101:3). Lá majngrádiinʼ bi̱ kuwa náa guʼwúlú o eʼwíínʼ ga̱jma̱a̱ rí guraʼwíí muʼni ráʼ. (1Co 10:31-33).

Ndíjkha rí gíʼdoo wéñuʼ numuu muʼni rí naniguu Jeobá rá. Numuu rí Jesucristo inu maʼni gámbáa dí ra̱májánʼ, ga̱jma̱a̱ i̱ndó makáwíin bi̱ gúnimbu̱ún kuyáá Dios (Eze 9:4-7; 1Jn 2:15-17). Ikha jngó, xámiñulu muʼthá ikha ndrígóo Dios mu xa̱bu̱ bi̱ guyáá rí májánʼ eʼni muxná gamajkhu Dios (1Pe 2:11, 12).

NDA̱WA̱Á RÍ NDIʼYÁÁ VIDEO GAMBAXÁʼ GA̱JMA̱ʼ JEOBÁ: MBÁA XA̱BIYA̱ GA̱JMA̱A̱ MBÁA A̱ʼGU̱, GURIʼÑA̱A̱ GRAXE̱ RÍGI̱:

• Ndíjkha rí muʼnimbulúʼ ikha ndrígóo Jeobá rá.

• Náa numuu rí xa̱bu̱ gíʼmaa musngúún e̱jñún ikha ndrígóo Jeobá asndu nakha majkhinʼ rá.

• Xú káʼnii gándoo jiáma gajmiún xa̱bu̱ guanii mumbáñún xa̱bu̱ mu mbuyáá rí májánʼ naʼni Dios rá.