Guñambáá índo̱ narígá gamiéjunʼ

Mámbá mbiʼi narígá itháán gamiéjunʼ. Ikhaa jngóo a̱ngiu̱lú bi̱ nuñambáá ndayóoʼ makuwá mbá kambájxu̱u̱n ga̱jma̱a̱ mbuyáá ndiéjuunʼ gúni̱. Ikhaa numuu rúʼko̱ dí Cuerpo Gobernante nixná ikha mú xúʼko̱ marigá mbá Departamento rí ndaʼyoo xóo mixtambañúún bi̱ nuraʼníí gamiéjunʼ náa sucursal dí rígá náa xúgííʼ numbaaʼ.

Índo̱ a̱ngiu̱lú bi̱ kúwi̱i̱n náa departamento rígi̱ nduyáá dí nirígá mbá gamiéjunʼ, mbá nacha̱ nuthúún a̱ngiu̱lú bi̱ kuda edxu̱u̱ náa xuajin rúʼko̱ mu mbuyáá ndiéjuunʼ eñúu̱nʼ a̱ngiu̱lú. Á mu a̱ngiu̱lú bi̱ kúwi̱i̱n náa xuajen rúʼko̱ xáʼngu̱u̱n ndajkuíín gumbañúún eʼwíinʼ mu muni̱ májáanʼ dí nichúu, sucursal maraʼwíin tikhu a̱ngiu̱lú bi̱ nijuiʼsngúún mu muñambáá náa gamiéjunʼ dí nirígá. Mbáa a̱ngiu̱lú bigi̱ mundi̱ʼi̱i̱n bi̱ nandún muñambáá o munda̱ʼa̱ dí mixnún mbáa dí ndayóoʼ itháán o mbáa mutsi ga̱jma̱a̱ muxphiʼtaruʼuún dí nda̱ñúunʼ a̱ngiu̱lú.

Rígá mbaʼa dí nañambáá índo̱ mámbáa tsáa exnáán ñajunʼ maʼni. Mbá xkri̱da nañambáá mu xáguma kikháá ñajunʼ dí niguma má, mbuyáá ndiéjuunʼ gúni̱ ga̱jma̱a̱ dí xutsijmúnʼ mbaʼ mutsijmúnʼ mbújkha̱a̱ ma̱ngaa dí majmaa ikhí, xájmiin gúni̱ xúgííʼ rúʼko̱ á mu nuni̱ xó má e̱ʼkha̱ edxu̱ún ikhiin.

A̱ngiu̱lú bi̱ nigruigi̱i̱n sucursal mu muñambáá ma̱ndoo muthi nguáthá mbújkha̱a̱ gáʼyóoʼ ga̱jma̱a̱ nguáthi̱i̱n a̱ngiu̱lú gáʼñúuʼ. Ma̱ngaa ma̱ndoo muthúún xa̱bu̱ ñajunʼ bi̱ kúwíin náa xuajen rúʼko̱, numuu dí rígá mbaʼa nuthu dí ikhiin numbayúlúʼ mu xáʼni gakhi̱i̱ ñajunʼ dí maguma. Á mu nimbáa tsekuʼmaaʼla muni̱, mbá péñu, xáʼyóoʼ mugimbóó ikháanʼla mbújkha̱a̱, ní má xuxuʼma dí gáʼñúun ga̱jma̱a̱ muʼgula náa dí nirígá gamiéjunʼ.

Gajkhun ma dí nandulú kuʼñúún wéñuuʼ a̱ngiu̱lú ikhaa jngóo índo̱ narígá mbá gamiéjunʼ nandulú mubaʼñúún (Heb 13:16). Ndiéjuunʼ gándoo gúʼni rá. Dí itháán gíʼdoo numuu muʼni nindxu̱u̱ dí muʼtájkáan numún a̱ngiu̱lú buʼko̱ xúʼko̱ ma ga̱jma̱a̱ numún a̱ngiu̱lú bi̱ nixnaxímíjná mumbañún. Ma̱ngaa ma̱ndoo murajkuáa mbújkha̱a̱ náa obra mundial. A̱ngiu̱lú bi̱ kúwíin náa sucursal bi̱ nundrigú ikhaa dí nuxna Cuerpo Gobernante, nduyáá itháán májánʼ xú káʼnii, ga̱jma̱a̱ náá mina̱a̱ʼ gájmúún mbújkha̱a̱. Á mu dí ikháánʼlú ma̱ngaa nandulú muʼguá guñambáá ma̱ndoo muʼnimajthíí Solicitud mu matiambáá náa naguma guʼwá (DC-50).

NDA̱WA̱Á RÍ NITAYÁÁ VIDEO NIJNÚÚ’ IYA’ NÁA BRASIL, ATRIʼÑA̱A̱ GRAXE̱ RÍGI̱:

Ndiéjuunʼ dí itháán ninigua̱a̱ʼ náa ñajunʼ dí nini̱ testigo de Jeobá náa Brasil nda̱wa̱á dí nijnúúʼ iyaʼ rá.