XÓO KUWÁANʼ BI̱ NI̱NDXU̱LÚ CRISTIANOS
Ñajunʼ rí nuni̱ bi̱ kuya̱ edxu̱u̱ nambáyúu xuajñuu Jeobá
Mbaʼin na̱nguá eñún májánʼ xa̱bu̱ bi̱ guáʼdáá mbá ñajunʼ. Numuu rúʼko̱ jngóo dí mbaʼin xa̱bu̱ ñajunʼ tsétañajunʼ májánʼ, mu xúʼko̱ ma̱ndoo makánún mbá chíʼgíiʼ mangiin. Gajkhun nindxu̱u̱ rígi̱, numuu rí xúʼko̱ niguwáʼ runi̱ mbaʼin índo̱ nitañajunʼ (Miq 7:3). ¡Xuajñuu Jeobá nindxu̱u̱ mixtiʼkhu kayuuʼ! Jeobá niʼsngúún bi̱ kuya̱ edxu̱u̱ rí majmúún májánʼ ñajunʼ rí guaʼdáá mu xúʼko̱ mumbañún a̱ngiu̱lú bi̱ kúwíin náa congregación (Est 10:3; Mt 20:25, 26).
Bi̱ kuya̱ edxu̱u̱ na̱nguá nindxu̱ún xóo xa̱bu̱ ñajunʼ bi̱ kúwá náa numbaaʼ rígi̱. Ikhiin nuni̱ ñajunʼ ndrígu̱ún numuu rí nandún kuyáá Jeobá ga̱jma̱a̱ a̱ngiu̱lú (Jn 21:16; 1Pe 5:1-3). Bi̱ kuya̱ edxu̱u̱ nunimbu̱u̱n ikha rí naxná Jesús ga̱jma̱a̱ numbañún mbá xúgíinʼ publicadores mu makuwá májánʼ náa xuajñuu Jeobá ma̱ngaa rí makuwá mijngii náa ikhaa. Kúwá xawii mu muxnún tsiaki̱i̱ mugiu̱u̱ Jeobá. Ma̱ngaa índo̱ narígá mbá gamiéjunʼ o ndayóoʼ maguma thanáá nacha̱ mbáa, ikhiin kúwá xawii mu mumbañún a̱ngiu̱lú. Ikhaa jngóo á mu ikháán ndayáaʼ rí mixtambáyáaʼ, xátani a̱jma̱ a̱jkia̱a̱nʼ dí marathu̱u̱n a̱ngiu̱lú bi̱ kuya̱ edxu̱u̱ (Snt 5:14).
NDA̱WA̱Á RÍ NITAYÁÁ VIDEO BAXTÚU BI̱ NUÑEWU̱U̱N MUGU̱, ATRIʼÑA̱A̱ GRAXE̱ RÍGI:
Índo̱ nimbayíí a̱ngiu̱lú bi̱ kuya̱ edxu̱u̱ Mariana, xú káʼnii nimbáyúu rúʼko̱ xá.
Índo̱ nimbayíí a̱ngiu̱lú bi̱ kuya̱ edxu̱u̱ Elías, xú káʼnii nimbáyúu rúʼko̱ xá.
Nda̱wa̱á rí nitayáá video rígi̱, xú káʼnii tayáá ñajunʼ dí nuni̱ bi̱ kuya̱ edxu̱u̱ rá.