Lá nandaaʼ mi̱dxu̱ʼnú mani̱ndxa̱a̱ʼ anciano ráʼ.

1, 2. Ndiéjunʼ nindxu̱u̱ “ñajunʼ májánʼ” dí nuni̱ anciano rá.

Á MU mba̱yu̱u̱ʼ má nindxa̱a̱ʼ siervo ministerial, mbáa xtaa ratanimbaníí má dí mambáyáaʼ mi̱ʼdxu̱nú mani̱ndxa̱a̱ʼ anciano. Lá ma̱ndoo mataniminaʼ mu matani̱ itháan “ñajunʼ májánʼ” rúʼko̱ ráʼ. (1 Tim. 3:1.)

² Ndiéjunʼ phú eʼni mbáa anciano rá. Ikhaa ndayá edxu̱u̱ náa miʼtáraʼa, nañewu̱u̱n májánʼ mugiu̱u̱, naʼsngúún a̱ngiu̱lú, ma̱ngaa naxnún tsiaki̱i̱ bi̱ kúwá náa congregación ga̱jma̱a̱ dí xóo naʼthí ma̱ngaa dí xóo naʼni. Ikhaa jngóo náa Biblia naʼthí dí ancianos nindxu̱ún “xóo regalo” (Efes. 4:8).

3. Ndiéjunʼ eyóoʼ maʼni mbáa ndxájulú mu maʼga̱nú mani̱ndxu̱u̱ anciano rá. (1 Timoteo 3:​1-7; Tito 1:​5-9.)

³ Raʼkháa i̱ndó ndayóoʼ matani̱ xóo eʼni mbáa anciano mu ma̱ndoo mani̱ndxa̱a̱ʼ anciano. Na̱nguá nindxu̱u̱ xóo dí mataʼyáʼ mbá ñajunʼ. Mu ma̱ndoo matani̱ mbá ñajunʼ i̱ndó má ndayóoʼ majmañaaʼ matani̱ dí gunda̱ʼa̱a̱ matani̱. Mú mixtiʼkhu nindxu̱u̱ dí mani̱ndxa̱a̱ʼ anciano. Raʼkháa i̱ndó marataráʼa ga̱jma̱a̱ marasngáa, rígá i̱ʼwáʼ dí na̱ʼkha̱ náa Biblia dí gíʼmaa matani̱ xó má eʼthí náa 1 Timoteo 3:​1-7 ga̱jma̱a̱ náa Tito 1:​5-9 (atraxnuu). Náa artículo rígi̱ mbuʼyáá dí gíʼmaa maʼni mbáa anciano náa mbá ajtsú enii rígi̱: Ndayóoʼ dí majuiʼthá rí májánʼ ga̱jma̱a̱ numuu, mayéʼga májánʼ edxu̱u̱ náa goʼwóoʼ, ma̱ngaa dí maxtáa xawii mambáñún bi̱ kúwá náa congregación.

GAJMAʼNÍÍ DÍ NINDXA̱A̱ʼ MÁJÁANʼ XA̱BU̱

4. Ndiéjunʼ eyoo gáʼthúu̱n dí “ragíʼmaa magiʼdoo aʼkhúun mu xútanúmáá” xá.

⁴ Mu mbáa maʼga̱nú mani̱ndxu̱u̱ anciano “ragíʼmaa magiʼdoo aʼkhúun mu xútanúmáá”. Xóo muʼthá, mu nimbáa ndxájulú xáʼthí dí raʼkhí ga̱jma̱a̱ numuu. Ma̱ngaa, “gíʼmaa majmaʼniiʼ rí nindxu̱u̱ mbáa májáanʼ xa̱bu̱ náa inún bi̱ na̱nguá ni̱ndxu̱ún xa̱bi̱i̱ Jesús”. Xa̱bu̱ bi̱ tséniga̱jma̱a̱ ma̱ndoo mutanumáá ga̱jma̱a̱ numuu dí xtáa rajmañuu, mú ragíʼmaa mawán ga̱jma̱a̱ numuu dí ikhaa naʼni nduwaʼ o dí na̱nguá nindxu̱u̱ mbáa májáanʼ xa̱bu̱ (Dan. 6:​4, 5). Atrajxi̱mínáʼ: “Lá najmaʼniún dí nindxu̱ʼ májáanʼ xa̱bu̱ náa awúu̱n congregación ga̱jma̱a̱ náa eʼwíinʼ xa̱bu̱ bi̱ tséniga̱jma̱a̱ ráʼ.”

5. Ndiéjunʼ eʼni mbáa “bi̱ nandoo kaʼyoo rí májánʼ” rá.

⁵ “Bi̱ nandoo kaʼyoo rí májánʼ”, rígi̱ nandoo gáʼthí rí mbaʼyoo dí májánʼ rí nuni̱ eʼwíinʼ ga̱jma̱a̱ dí maʼthúún dí nindxu̱ún míjíinʼ xa̱bu̱. Ma̱ngaa naxtáa gagi índo̱ naʼni dí májánʼ ga̱jma̱a̱ numún eʼwíinʼ, maski ajndu naʼni dí eʼwíinʼ tséguáʼthi̱i̱n maʼni (1 Tes. 2:8). Ancianos ndayóoʼ mani̱ndxu̱ún xúʼko̱ kaʼnii, numuu dí ndayóoʼ muri̱ya̱ʼ mba̱yu̱u̱ʼ mbiʼi muñewu̱u̱n a̱ngiu̱lú bi̱ kúwá náa congregación, ma̱ngaa dí muni̱ i̱ʼwáʼ ñajunʼ dí guáʼdáá (1 Ped. 5:​1-3). Ikhiin kúwá gagi índo̱ nuni̱ dí májánʼ ga̱jma̱a̱ numún eʼwíinʼ (Hech. 20:35).

6. Xú káʼnii esngájma mbáa dí nagruiguíin májánʼ eʼwíinʼ rá. (Hebreos 13:​2, 16; ma̱ngaa atayáá xtiʼkhuu.)

⁶ Xa̱bu̱ bi̱ “bi̱ nagruiguíin májánʼ eʼwíinʼ” raʼkháa i̱ndó naʼni dí májánʼ ga̱jma̱a̱ numún xa̱bu̱ bi̱ nambájxu̱u̱ gajmíi̱n (1 Ped. 4:9). Xó má eʼthí náa mbá diccionario, “bi̱ nagruiguíin májánʼ eʼwíinʼ nindxu̱u̱ májáanʼ xa̱bu̱ gajmíi̱n asndu bi̱ na̱nguá eʼniniún ga̱jma̱a̱ asndu nadxuu índo̱ naʼthúún dí eʼwíinʼ magún náa goʼwóoʼ”. Atrajxi̱mínáʼ: “Lá nuniʼniún eʼwíinʼ dí naniu̱u̱n rí májánʼ bi̱ naguwáʼ náa congregación ráʼ.” (Atraxnuu Hebreos 13:​2, 16.) Xa̱bu̱ bi̱ nagruiguíin májánʼ eʼwíinʼ naxnún dí gíʼdoo bi̱ nagún gúyáá, bi̱ na̱nguá guáʼdáá wéñuuʼ mangiin bi̱ nuñejunʼ gakhi̱i̱ ga̱jma̱a̱ numún a̱ngiu̱lú, xóo a̱ngiu̱lú bi̱ nindxu̱ún circuito ga̱jma̱a̱ bi̱ nagún ruxna discurso (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. Xú káʼnii esngájma mbáa anciano dí tséyáʼ magiʼdoo mbújkha̱a̱ rá.

⁷ “Xáʼyóoʼ mani̱ndxu̱u̱ mbáa xa̱bu̱ […] bi̱ nanigu̱u̱ʼ mbújkha̱a̱”. Mú rígi̱ tsíyoo gáʼthúu̱n dí ragíʼmaa mataʼyáʼ mbújkha̱a̱. Tséʼniuu á mu xtaʼdáá mbújkha̱a̱ o na̱nguá, mú dí itháan gíʼdoo numuu nindxu̱u̱ dí matani̱ ginii ñajuunʼ Jeobá (Mat. 6:33). Gíʼmaa majmaaʼ tsiaki̱i̱, mbiʼi ga̱jma̱a̱ i̱ʼwáʼ dí xtaʼdáá mu matani̱ ñajuunʼ Jeobá, mu matie̱wu̱u̱n bi̱ kúwíin náa guʼwáaʼ ga̱jma̱a̱ mu matambáñún bi̱ kúwá náa congregación (Mat. 6:24; 1 Juan 2:​15-17). Atrajxi̱mínáʼ: “Lá gíʼdoo wéñuuʼ numuu mbújkha̱a̱ eyoo ráʼ. Lá nadxuʼ má ga̱jma̱a̱ dí gúʼdoo mu maxtáá ga̱jma̱a̱ ráʼ. O ndaʼyáʼ mbújkha̱a̱ mu magúʼdoo itháan ráʼ.” (1 Tim. 6:​6, 17-19.)

8. Ndiéjunʼ eyoo gáʼthúu̱n dí mbáa “mañewu̱u̱n dí naʼni” rá.

⁸ Índo̱ mbáa ‹nañewu̱u̱n dí naʼni› nansgájma dí ‹naraʼwíí májánʼ dí naʼni› náa vida ndrígóo. Mbá xkri̱da, tsékuiʼtsu mbaʼ makuiʼtsuú ga̱jma̱a̱ tséʼga̱a̱n wéñuuʼ, ma̱ngaa nañewu̱u̱n xóo eguwúu̱n xtíñuu, xóo eʼni tsiʼyáminaʼ, ma̱ngaa naraʼwíí májánʼ dí maʼni gagimina̱ʼ ga̱jma̱a̱. Tséʼni xóo eni̱ bi̱ tséyamajkuíí Jeobá (Luc. 21:34; Sant. 4:4). Ma̱ngaa tsékiʼnáa maski ajndu eʼwíinʼ nuni̱ dí ra̱májánʼ. Anciano “xáʼyóoʼ mani̱ndxu̱u̱ mbáa xa̱bu̱ najnga̱a̱” ni má ragíʼmaa majmaʼniiʼ xóo mbáa bi̱ naʼga̱a̱n wéñuuʼ. Atrajxi̱mínáʼ: “Lá xóo xtáá nasngájma dí nañewu̱u̱n dí na̱ni̱ ráʼ.”

9. Ndiéjunʼ eyoo gáʼthúu̱n dí anciano gíʼmaa “mandxaʼwáminaʼ májánʼ” ga̱jma̱a̱ mani̱ndxu̱u̱ “gamajkhuii” o ordenado rá.

⁹ Mbáa anciano nasngájma dí “nandxaʼwáminaʼ májánʼ” índo̱ najmuu ikha dí na̱ʼkha̱ náa Biblia mu maraʼwíí dí maʼni. Índo̱ nandxa̱ʼwáminaʼ xóo gágíʼ maʼnimbánuu dí naʼthí náa Biblia, nakro̱ʼo̱o̱ itháan májánʼ ga̱jma̱a̱ naraʼwíí májánʼ dí maʼni, tséraʼwíí mbá nacha̱ dí maʼni. Ginii ndaʼyoo ndiéjunʼ dí phú itháan májánʼ maʼni (Prov. 18:13). Xúʼko̱ na̱jkha̱nú nakujmaa dí naraʼwíí maʼni nindxu̱u̱ xóo endxa̱ʼwáminaʼ Jeobá. Ma̱ngaa nindxu̱u̱ “gamajkhuii” o ordenado. Xóo muʼthá, nindxu̱u̱ bi̱ naríyaʼ májánʼ awan ga̱jma̱a̱ na̱jkha̱nú wapháá náa nutháán maʼga. Xúgíinʼ nduyáá dí ikhaa nindxu̱u̱ bi̱ kaʼnii maku̱ma̱a̱ʼ xtayáá ga̱jma̱a̱ bi̱ naʼnimbánuu ikha dí nagruigú. Á mu xígi̱ eʼni, majmaʼniiʼ dí nindxu̱u̱ mbáa májáanʼ xa̱bu̱. Dí xúgi̱ rá, guʼyáá ndiéjunʼ eyóoʼ maʼni mbáa mu mayéʼga májánʼ edxu̱u̱ náa goʼwóoʼ xó má eʼthí náa Biblia.

GANINDXA̱A̱ʼ BI̱ NAYÉJKHA̱ MÁJÁNʼ EDXU̱U̱ NÁA GUʼWÁAʼ

10. Ndiéjunʼ eyoo gáʼthúu̱n dí mbáa xa̱bu̱ maxná “ikhúún májánʼ bi̱ kúwá náa goʼwóo” rá.

¹⁰ Á mu mbáa ndxájulú nandoo mani̱ndxu̱u̱ anciano, ndayóoʼ dí bi̱ kúwíin náa goʼwóoʼ mani̱ndxu̱ún mbá májánʼ xkri̱da. Ikha jngóo najuiʼtháán dí ndyóoʼ maxná “ikhúún májánʼ bi̱ kúwá náa goʼwóo”. Rígi̱ nandoo gáʼthúu̱n dí ndayóoʼ mañewu̱u̱n bi̱ kúwá náa goʼwóoʼ ga̱jma̱a̱ ngajua, ma̱ngaa dí maraʼwíí májánʼ rí maʼni ga̱jma̱a̱ numún ikhiin, xóo dí maríya̱ʼ awan maʼniga̱jma̱a̱ gajmíi̱n, dí xándátígu̱u̱n nimbá reunión ga̱jma̱a̱ dí mbaʼyóoʼ mambáñún mutaraʼa má xúʼko̱. Gíʼdoo wéñuuʼ numuu rígi̱, numuu dí Pablo niʼthí, “á mu mbáa xa̱bu̱ tséjmaa gáxná ikhúún májánʼ bi̱ kúwíin náa goʼwóo, xú káʼnii gándoo gáñewu̱u̱n bi̱ nuni̱ ñajuunʼ Dios xá.” (1 Tim. 3:5.)

11, 12. Náá numuu dí ndayóoʼ muñewa̱a̱n dí nuni̱ e̱ji̱i̱n mbáa ndxájulú á mu nandoo mani̱ndxu̱u̱ anciano rá. (Atayáá ma̱ngaa xtiʼkhuu.)

¹¹ Á mu mbáa ndxájulú gíʼdiin e̱ji̱i̱n majkhiinʼ, ndayóoʼ dí “e̱ji̱i̱n munimbu̱ún kuyáá ga̱jma̱a̱ gamajkhu”. Gíʼmaa maʼsngúún ma̱ngaa maxprígún ga̱jma̱a̱ ngajua. Gajkhun má dí xúgíinʼ e̱ji̱n nanigu̱u̱nʼ mundu̱ʼwa̱ ga̱jma̱a̱ mutsíin. Mú, á mu najuiʼsngún májánʼ, munimbu̱ún, mani̱ndxu̱ún gamajkuiin ga̱jma̱a̱ muni̱ dí májánʼ. Ma̱ngaa xa̱bu̱ nikhi̱i̱ gíʼmaa mambáñún e̱ji̱i̱n mambajxúún májánʼ gajmiún Jeobá, ma̱ngaa dí makuwíin xó má eʼthí náa ikha dí na̱ʼkha̱ náa Biblia, mu xúʼko̱ ikhiin mugími̱jna̱ majngún iyááʼ.

¹² “Xa̱biya̱ [...] bi̱ gíʼdiin e̱ji̱i̱n bi̱ guáʼdáá fe, bi̱ tséwán rigo̱o̱ numún rí nuni̱ dí raʼkhí, ni má bi̱ tsénimbu̱ún”. Mú, ndiéjunʼ gárígá á mu a̱ʼdióo bi̱ xtáa náa goʼwóoʼ gákudaminaʼ aʼkhá xá. Á mu xa̱bu̱ nikhi̱i̱ nánguá eʼsngóo ni má na̱nguá exprígúu a̱ʼdióo, mbáa ikhaa ni xánindxu̱u̱ anciano (atayáá La Atalaya 15 ñajunʼ gu̱nʼ octubre tsiguʼ 1996, ináa 21, kutriga̱ 6, 7).

ATAMBÁÑÚN BI̱ KÚWÁ NÁA CONGREGACIÓN

13. Xú káʼnii esngájma mbáa dí “nakro̱ʼo̱o̱ dí maratha̱a̱n” ga̱jma̱a̱ dí na̱nguá nindxu̱u̱ mbáa “xa̱bu̱ bi̱ tségíʼ edxu̱u̱ maratha̱a̱n” rá.

¹³ A̱ngiu̱lú bi̱ nindxu̱ún míjíinʼ xa̱bu̱, ra̱ʼkhá tháán eyambáá náa congregación. Mbá xkri̱da, ndxájulú bi̱ nindxu̱u̱ “mbáa xa̱bu̱ bi̱ nakro̱ʼo̱o̱ maratha̱a̱n” naʼni marigá dí tsímáá. Á mu ikháán nandaaʼ majmaʼníí xóo mbáa bi̱ nakro̱ʼo̱o̱ dí maratha̱a̱n, gíʼmaa dí matadxawíín dí gúthi eʼwíinʼ ga̱jma̱a̱ dí makrua̱ʼa̱a̱ʼ xóo ethi ikhiin. Náa mbá reunión náa nagimbíi̱n anciano, lá ikháán ma̱ndoo matraʼwíí matani̱ xó má ethi eʼwíinʼ á mu tsénújngurámuuʼ má nimbá ikha o xtángoo dí na̱ʼkha̱ náa Biblia ráʼ. Mbáa anciano “ragíʼmaa mani̱ndxu̱u̱ mbáa xa̱bu̱ bi̱ tségíʼ edxu̱u̱ maratha̱a̱n”. Xóo muʼthá, tséʼni xóo eyoo ikhaa. Numuu rí ndaʼyoo dí gíʼdoo numuu maʼdxawuun dí nuthi eʼwíinʼ (Gén. 13:​8, 9; Prov. 15:22). Mbáa anciano ragíʼmaa mani̱ndxu̱u̱ “bi̱ naʼni marigá xkujndu” ni má “ragíʼmaa makiʼnáa nacha̱”. Ndaʼyamajkhún eʼwíinʼ ga̱jma̱a̱ tségi̱ʼdu̱u̱ gajmíi̱n. Numuu dí naʼni marigá dí tsímáá asndu mbiʼi dí naʼni mingíjyúuʼ (Sant. 3:​17, 18). Najmuu ajngáa wa̱ba̱ʼ mu maʼtámíjná gajmíi̱n eʼwíinʼ, mu xúʼko̱ muriʼkhu̱u̱ xóo eni̱ (Juec. 8:​1-3; Prov. 20:3; 25:15; Mat. 5:​23, 24).

14. Ndíjkha dí mbáa anciano “xándoo mani̱ndxu̱u̱ mbáa xa̱bu̱ bi̱ ndiʼkhú egíʼdu̱u̱ mani̱ndxu̱u̱ xa̱bi̱i̱ Jesús”, ga̱jma̱a̱ xú káʼnii esngájma dí “nawi̱ji̱ jmbu” xá.

¹⁴ Bi̱ nandoo mani̱ndxu̱u̱ anciano “xándoo mani̱ndxu̱u̱ mbáa xa̱bu̱ bi̱ ndiʼkhú egíʼdu̱u̱ mani̱ndxu̱u̱ xa̱bi̱i̱ Jesús”. Maski ajndu xóó má tséʼni mba̱yu̱u̱ʼ dí nijngúun iyááʼ, ndayóoʼ mba̱yu̱u̱ʼ mbiʼi mu mambajxúu májánʼ ga̱jma̱a̱ Jeobá. Nákha xóó tséjkha̱nú mani̱ndxu̱u̱ anciano, gíʼmaa masngájma rí naʼni xó má niʼni Jesús, dí mani̱ndxu̱u̱ xa̱bu̱ guabaaʼ, ma̱ngaa dí maxtáa xawii maʼni ñajuunʼ Jeobá xó má ikhaa eyoo ga̱jma̱a̱ asndu náa má ikhaa eyoo (Mat. 20:23; Filip. 2:​5-8). Ma̱ngaa gíʼmaa masngájma dí “nawi̱ji̱ jmbu” índo̱ nambáyuminaʼ náa Jeobá ga̱jma̱a̱ gíʼma maʼnimbánuu xtángoo ndrígóo ga̱jma̱a̱ ikha dí naxnáʼ náa xuajñuu (1 Tim. 4:15).

15. Lá tsiaki̱i̱ ndayóoʼ dí mbáa anciano majmañuu maxná mbá májánʼ discurso ráʼ.

¹⁵ Náa Biblia naʼthí dí mbáa anciano gíʼmaa “majmañuu maʼsngáa” májánʼ. Lá rígi̱ eyoo gáʼthí dí gíʼmaa maxná mbá májánʼ discurso xáʼ. Na̱nguá má. Raʼkháa xúgíinʼ anciano nuxna mbá májánʼ discurso, mú índo̱ nagún gútaraʼa ga̱jma̱a̱ índo̱ nagún gúñún a̱ngiu̱lú mu muxnún tsiaki̱i̱, ikhiin ndayóoʼ dí majmúún májánʼ Biblia (atanimbríguii ga̱jma̱a̱ 1 Corintios 12:​28, 29 ga̱jma̱a̱ Efesios 4:11). Maski ajndu xúʼko̱, ndxájulú bi̱ nandoo mani̱ndxu̱u̱ anciano ndayóoʼ maʼni tsiakimínáʼ mu majmañuu maʼsngáa májánʼ. Xú káʼnii gáʼni xá.

16. Xú káʼnii gándoo gájma̱ñuu mbáa ndxájulú maʼsngáa májánʼ rá. (Atayáá ma̱ngaa xtiʼkhuu.)

¹⁶ “Gíʼmaa maguajtuminaʼ náa ajngáa rí gajkhun”. Mu mbáa anciano majmañuu maʼsngáa májánʼ gíʼmaa majmuu Ajngá rawuunʼ Dios índo̱ naʼsngáa náa inún mbaʼin xa̱bu̱ ga̱jma̱a̱ índo̱ naxnún consejo a̱ngiu̱lú. Ikha jngóo gíʼmaa maʼniga̱jma̱a̱ májánʼ Biblia ga̱jma̱a̱ i̱yi̱i̱ʼ ndrígulú (Prov. 15:28; 16:23). Índo̱ gáʼniga̱jma̱a̱, gíʼmaa mbaʼyoo májánʼ xóo gándoo gáʼnimbánuu versículo ndrígóo Biblia. Ga̱jma̱a̱ índo̱ gáʼsngún eʼwíinʼ gíʼmaa maʼniminaʼ dí maʼga̱nú asndu náa a̱jkiu̱ún bi̱ kúwá rudxawíín. Mbá rí ma̱ndoo mambáyúu, nindxu̱u̱ dí manda̱ʼa̱ tikhu ikha náa a̱ngiu̱lú anciano bi̱ kúwá má mba̱yu̱u̱ʼ, bi̱ nuni̱ xó má kaʼyoo, ga̱jma̱a̱ nda̱wa̱á ndayóoʼ magíʼ maʼni dí nitháán (1 Tim. 5:17). Ancianos gíʼmaa majmañún “muxnún tsiaki̱i̱” a̱ngiu̱lú, maski ajndu nguáná mbaʼyóoʼ muxnún consejo o “muxprigún” tikhuun. Mú gíʼmaa muguáʼdáá gamajkhún. Á mu nuni̱ ga̱jma̱a̱ gamajkhu ga̱jma̱a̱ ngajua, ma̱ngaa najmún Ajngá rawuunʼ Dios mu musngáa, mani̱ndxu̱ún mbáa bi̱ naʼsngáa májánʼ numuu dí makuwá ruyaridáá Jesús bi̱ najmañuu naʼsngáa (Mat. 11:​28-30; 2 Tim. 2:24).

ATANI̱ TSIAKIMÍNÁʼ MÁ XÚʼKO̱

17. a) Ndiéjunʼ gámbáñún siervos ministeriales muni̱ tsiakimíjna̱ mani̱ndxu̱ún anciano rá. b) Ndiéjunʼ gíʼmaa mbuyáá anciano á mu mbáa ndxájulú ma̱ndoo mani̱ndxu̱u̱ anciano rá. (Atayáá kúgumaʼá “Ancianos, ganindxa̱la xa̱bu̱ guabiinʼ índo̱ gúya̱a̱ á mu eʼwíinʼ ma̱ndoo mani̱ndxu̱ún ancianos”.)

¹⁷ Mbáa tikhuun siervos ministeriales maku̱mu̱ún rí nditháan xáʼngu̱u̱n gáguánú mani̱ndxu̱ún ancianos, numuu dí rígá mbaʼa cualidades dí ndayóoʼ maguáʼdáá. Mú gíʼmaa marmáʼáan a̱jkiu̱ún dí ni má Jeobá ni má xuajñuu tséguáʼthi̱i̱n dí musngajma cualidades rígi̱ xóo phú gíʼmaa (1 Ped. 2:21). Ma̱ngaa guaʼdáá xi̱ʼ kaʼwu ndrígóo Jeobá dí ma̱ndoo mambáñún mu maguánú maguáʼdáá cualidades rígi̱ (Filip. 2:13). Ikháán rá, lá rígá mbá cualidad dí nandaaʼ matasnga̱jmá itháan májánʼ ráʼ. Á mu dí xúʼko̱, aratakáñíí Jeobá ga̱jma̱a̱ atayáʼ ma̱ta̱ya̱a̱ itháan ga̱jma̱a̱ numuu cualidad rígi̱, ma̱ngaa atandu̱ʼu̱u̱n ancianos tikhuu ikha dí mambáyáaʼ mani̱ndxa̱a̱ʼ itháan májáanʼ xa̱bu̱.

18. Ndiéjunʼ gíʼmaa muni̱ xúgíinʼ siervos ministeriales rá.

¹⁸ Xúgíinʼ a̱ngiu̱lú, asndu bi̱ nindxu̱ún má ancianos, májánʼ gáʼni dí munimíjna̱ muguaʼdáá cualidades dí ndiʼyáá náa artículo rígi̱ (Filip. 3:16). Á mu ikháán nindxa̱a̱ʼ má siervo ministerial, atani̱ tsiakimínáʼ má xúʼko̱ mu mi̱dxu̱ʼnú mani̱ndxa̱a̱ʼ anciano. Atanda̱ʼa̱a̱ Jeobá dí maʼsngáaʼ ga̱jma̱a̱ dí maʼniratáánʼ mu matani̱ ñajuunʼ ikhaa ga̱jma̱a̱ mu matiambáá náa congregación (Is. 64:8). Jeobá gajkhun maʼni tsajkurámuuʼ xúgíʼ tsiaki̱i̱ dí gátani̱ mu mi̱dxu̱ʼnú mani̱ndxa̱a̱ʼ anciano.