Náá ekumu̱ún xa̱bu̱ rí ma̱ndoo mbuyáá xóo gákúwíin nda̱wa̱á rá.

DÍ MBAʼIIN NUNIMBU̱ÚN

ASTROLOGÍA. Mbaʼiin xa̱bu̱ nakumu̱ún rí xóo tri̱gi̱i̱n a̱ʼgua̱a̱n índo̱ nagumiin naʼthí xóo gákúwíin nda̱wa̱á. Ikha jngóo nuraxnuu horóscopo mu mbuyáá ndiéjunʼ e̱ʼkha̱ maguáʼníí, ikhú nduyáʼ rí muni̱ mu xúʼko̱ xáguáʼdáá xkujndu ga̱jma̱a̱ muraʼwi̱i̱ májánʼ rí muni̱.

FENG SHUI. Mbaʼiin nakumu̱ún rí a mu nuniratáá guʼwún, ikhú mbá tsiakii dí tsékujmaa maʼni rí makuwíin májánʼ. Mbáa xa̱bu̱ bi̱ xtáa náa Hong Kong bi̱ mbiʼyuu Wing,a naʼthí: “Mbáa bi̱ naʼsngáa ga̱jma̱a̱ numuu feng shui niʼthúnʼ dí á mu nagrígú mbóo niwanʼ kiejuunʼ náa nagujua̱, maʼni rí maguwáʼ itháan xa̱bu̱ mu mutsi”.

DÍ NDUYAMAJKHÚÚN WAJIN XIʼÑÚÚNʼ. Mbaʼiin nakumu̱ún dí gíʼmaa mbuyamajkún wajin xiʼñúúnʼ ga̱jma̱a̱ mbaʼiin dios mu xúʼko̱ maxtiewu̱u̱n ga̱jma̱a̱ maguma tsajkurámíinʼ. Mbáa a̱ʼgu̱ bi̱ xtáa náa Vietnam bi̱ mbiʼyuu Van naʼthí: “Niku̱mu̱ʼ rí á mu ndayamajkúún wajin xiʼñúnʼ maʼni dí ikhúún gajmíʼ e̱ji̱nʼ maxtáá májánʼ xúgi̱ ga̱jma̱a̱ nda̱wa̱á”.

REENCARNACIÓN. Mbaʼiin nakumu̱ún rí índo̱ nakháñulú natanga̱án nakuwáánʼ mbu̱júu̱ʼ ga̱jma̱a̱ dí rígi̱ narígá má xúʼko̱. Ma̱ngaa nakumu̱ún dí xóo niraʼwi̱i̱ muni̱ nákha nikúwi̱i̱n ginii, naʼni rí mbiʼi xúgíʼ makuwíin tsímáá o mumíniiʼ.

Maski asndu mbaʼiin nakumu̱ún dí ragájkhun nindxu̱u̱ xúgíʼ rúʼko̱, mú nagún gúrajxi̱ ga̱jma̱a̱ numún náa horóscopo, tabla ouija^® ga̱jma̱a̱ cartas ndrígóo tarot ma̱ngaa nagún mu muraxnuu ñawúúnʼ o i̱ʼwáʼ. Numuu dí nakumu̱ún dí mbáa rúʼko̱ mambáñún mu mbuyáá xóo kaʼnii gákúwíin nda̱wa̱á.

DÍ NAJKHANÚ NARÍGÁ

Lá nakúwíin májánʼ bi̱ nunimbu̱ún xúgíʼ rúʼko̱ ráʼ.

Guʼyáá dí nigíʼnuu Hào, bi̱ xtáa náa Vietnam. Ikhaa niniñaminaʼ dí vida ndrígóo maxná ikhoo náa astrología, feng shui ga̱jma̱a̱ rí mbaʼyamajkún wajin xiʼñúuʼ. Lá nimbáyúu rúʼko̱ xáʼ. Hào naʼthí: “Niguambári̱ga̱a̱ ñajunʼ dí gúʼdoo, nikuʼdáminaʼ wéñuuʼ gidxóó, nigúʼdoo xkujndu gajmíʼ bi̱ ka̱ñu̱u̱n ga̱jma̱a̱ rúʼko̱ niʼni rí maxtáá gíná wéñuuʼ”.

Qiuming bi̱ xtáá náa Taiwán, niʼnimbo̱o̱ náa rí wíji̱ magíʼnuu, xóo náa astrología, náa reencarnación, náa feng shui ga̱jma̱a̱ rí mbaʼyamajkún wajin xiʼñúuʼ. Mú nda̱wa̱á rí ndiyáʼ mbaʼyoo itháan ga̱jma̱a̱ numuu rígi̱, niʼthí: “Ni̱jkhánú ndi̱yo̱o̱ dí xúgíʼ ku̱ma̱ rígi̱ tsembáníí ga̱jma̱a̱ naʼni mingíjyúuʼ makrua̱ʼa̱a̱ʼ. Astrología najngawa̱a̱n, á mu na̱nguá ermáʼáan a̱jkia̱a̱nʼ xóo niraxtaa nákhá ginii ga̱jma̱a̱ natatsimbaaʼ náa reencarnación. Xú káʼnii lá gátaʼgíʼ matriʼkhu̱u̱ mu maraxtaa májánʼ nda̱wa̱á rá.”

Xó má Hào, Qiuming ga̱jma̱a̱ eʼwíinʼ xa̱bu̱ niguánú ndiyáá rí tséñambáá dí ma̱ta̱ya̱a̱ xóo kaʼnii gáraxtaa nda̱wa̱á, náa wíji̱ matagíʼníí, náa astrología, xóo rí matayamajkhún wajin xiʼñáanʼ ga̱jma̱a̱ náa reencarnación. Lá rúʼko̱ eyoo gáʼthúu̱n dí nda̱a̱ dí matani̱ mu maraxtaa májánʼ nda̱wa̱á ráʼ.

Mbaʼiin nakumu̱ún dí makuwíin májánʼ nda̱wa̱á á mu nagún náa mbá escuela mitsídánʼ ga̱jma̱a̱ rí muguaʼdáá wéñuuʼ mbújkha̱a̱. Mú, xú káʼnii kúwíin bi̱ niraʼwi̱i̱ muni̱ rígi̱ rá.