Lá rígá mbá ikha dí ma̱ndoo mambáyáaʼ mu maraxtaa májánʼ nda̱wa̱á ráʼ.

Xó má ni̱jkua̱nú ndiʼyáá asndu xúgi̱, rí xa̱bu̱ nakumu̱ún rí makuwá májánʼ nda̱wa̱á á mu nunigajma̱a̱ itháan, nduyáʼ mbújkha̱a̱ ga̱jma̱a̱ á mu nanindxuún míjíinʼ xa̱bu̱. Mú dí matani xúgíʼ rígi̱ nindxu̱u̱ xóo majmaaʼ mbá mapa dí na̱nguá ki̱ʼni̱ májánʼ. Lá rúʼko̱ eyoo gáʼthúu̱n dí nda̱a̱ mbóoʼ ikha rí ma̱ndoo mambáyulú mu makuwáánʼ májánʼ nda̱wa̱á ráʼ.

IKHA NDRÍGÓO MBÁA BI̱ NAJMAÑUU ITHÁAN

Índo̱ nandulú muraʼwíí mbá rí mu̱ʼni̱, ginii rí nuʼni nindxu̱u̱ dí nurajxi̱i̱ mbáa bi̱ itháán nikhi̱i̱ o bi̱ nakro̱ʼo̱o̱ itháán májánʼ ki xóo ikháanʼ. Á mu nandulú makuwáánʼ májánʼ nda̱wa̱á gíʼmaa muʼnimbulú kuʼyáá bi̱ nakro̱ʼo̱o̱ májánʼ ga̱jma̱a̱ bi̱ najmañuu itháán ki xóo ikháanʼ. Ikha rígi̱ nindxu̱u̱ Biblia, dí nigumaraʼmáʼ nákhá 3,500 tsiguʼ.

Ndíjkha rí ma̱ndoo muʼnimbulú dí na̱ʼkha̱ raʼthí náa Biblia rá. Numuu dí bi̱ ajngóo nindxu̱u̱ bi̱ itháan nakro̱ʼo̱o̱ bi̱ xtáa náa xúgíʼ numbaaʼ. Ikhaa bi̱ ‹Niʼníí tsiguʼ má xtáa› ga̱jma̱a̱ ‹maxtáa kámuu› (Daniel 7:9; Salmo 90:2). Ikhaa nindxu̱u̱ ‹Dios bi̱ gajkuwiin bi̱ niʼni mekhu ga̱jma̱a̱ ku̱ba̱ʼ› (Isaías 45:18). Ikhaa naʼthúlú dí mbiʼyuu nindxu̱u̱ Jeobá (Salmo 83:18).

Numuu dí Biblia na̱ʼkha̱ náa bi̱ niʼniáánʼ, ikhí naʼsngúlú dí xúgiáánʼ ni̱ndxu̱lú mbríguáánʼ. Consejo dí na̱ʼkha̱ ikhí nambáñún xúgíinʼ xa̱bu̱ bi̱ kúwíin náa xúgíʼ numbaaʼ. Libro rígi̱ nijuiʼtájuíi náa itháan ajngáa ga̱jma̱a̱ nijuixnáraʼa náa xúgíʼ tsu̱du̱u̱ ku̱ba̱ʼ.a Asndu tsáá xa̱bu̱ ma̱ndoo makro̱ʼo̱o̱ ga̱jma̱a̱ ma̱ndoo maxná ikhoo, numuu dí náa Biblia naʼthí:

“Dios tséraʼwíin xa̱bu̱, ikhaa nagruiguíin xúgíinʼ bi̱ namíñúún kuyáá, bi̱ nuni̱ rí májánʼ, tséʼniuu má náá xuajin eguwáʼ” (HECHOS 10:34, 35).

Xó má eʼni mbáa xa̱bu̱ nikhi̱i̱ nandoo kaʼñún ga̱jma̱a̱ nambáñún e̱ji̱i̱n, xúʼko̱ má kayuuʼ eʼni Jeobá Dios ma̱ngaa. Ikhaa nandoo kaʼyulú ga̱jma̱a̱ najmuu Ajngá rawuunʼ mu mambáyulú (2 Timoteo 3:16). Ikháán ma̱ndoo ma̱ta̱ya̱a̱ dí gajkhun nindxu̱u̱ dí na̱ʼkha̱ raʼthí náa Ajngá rawuunʼ Dios, numuu dí ikhaa niʼniáánʼlú ga̱jma̱a̱ ndaʼyoo ndiéjunʼ rí itháan májánʼ dí ma̱ndoo muʼnilú.

MBÁ IKHA DÍ GAJKHUN MAMBÁYÁAʼ

Ma̱ndoo mbuʼyáá dí gajkhun nindxu̱u̱ dí na̱ʼkha̱ raʼthí náa Biblia. Numuu dí asndu nákhá 2,000 tsiguʼ kidííʼ nigumaraʼmáʼ ndiéjunʼ dí garigá náa numbaaʼ dí kuwáánʼ ga̱jma̱a̱ xú káʼnii gánindxu̱ún xa̱bu̱ bi̱ gákuwá dí mbiʼi xúgi̱.

DÍ NARÍGÁ.

“Xuajen mba̱ʼu̱ magi̱ʼdu̱u̱n gajmiún i̱ʼwáʼ xuajen mba̱ʼu̱, xa̱bu̱ ñajunʼ magi̱ʼdu̱u̱n gajmiún eʼwíinʼ xa̱bu̱ ñajunʼ. Marigá gaʼxma, ma̱ngaa marigá ewiʼ ga̱jma̱a̱ nandii asndu náá” (LUCAS 21:10, 11).

XÓO NINDXU̱ÚN XA̱BU̱.

“Índo̱ gáʼni iwáá mbiʼi, maʼni gakhi̱i̱ ga̱jma̱a̱ maʼni mingíjyúuʼ rí maʼngulú. Numuu rí xa̱bu̱ maʼndún kuyamíjna̱ i̱ndó ikhiin, maʼndún kuyáá wéñuuʼ mbújkha̱a̱, majñekún, muxujximíjna̱, mutha tsrigú, xúnimbu̱ún kuñún anún, xúxnáa núma̱aʼ ga̱jma̱a̱ muniñu̱u̱nʼ eʼwíinʼ, xáʼndúún kuñún a̱ngiu̱ún, xámbánún mu makuwá tsímáá, muni nduwaʼ, xúñewa̱a̱n rí muni, mani̱ndxu̱u̱n xóo xujkhú xáná bi̱ najmangu̱u̱nʼ, xáʼndúún kuyáá rí májánʼ, muniu̱u̱n dí ra̱májánʼ bi̱ nambájxu̱u̱n gajmiún, xúdxun dí marathu̱u̱n, ra̱ʼkhá tháán gúni mbaʼumíjna̱, i̱ndó maʼndún muni̱ rí nanigu̱u̱nʼ ikhiin ki xóo rí maʼndún kuyáá Dios” (2 TIMOTEO 3:1-4).

Índo̱ nduʼyáá dí nambánuu xó má kaʼyoo dí kiʼniraʼmáʼ náa Biblia dí niʼníí má tsiguʼ nijuiʼniraʼmáʼ, ndiéjunʼ eʼni matatsaʼwamínáʼ rá. Mbáa natatsaʼwáminaʼ ikha̱á má xó endxa̱ʼwáminaʼ Leung, bi̱ xtáa náa Hong Kong, ikhaa niʼthí: “Profecías dí na̱ʼkha̱ náa Biblia nijuiʼniraʼmáʼ mba̱yu̱u̱ʼ tsiguʼ kidííʼ ga̱jma̱a̱ xájmaa dí mbáa xa̱bu̱ú xóo ikháanʼlu maʼtáriyaʼ kaʼwu xóo gáxtáa rarígá nda̱wa̱á. Ikha jngóo Biblia na̱ʼkha̱ náa mbáa bi̱ najmañuu itháan ki xóo ikháánʼ”.

Náa Biblia nuxkamaa mbaʼa wéñuuʼ profecía dí nimbánuu má,b rúʼko̱ nasngájma kaʼwu dí Biblia nindxu̱u̱ Ajngá rawuunʼ Dios. Jeobá naʼthí: ‹Ikhúún nindxu̱ʼ Dios, nda̱wa̱a̱ imba̱a̱ xóo ikhúún. Asndu nákha ginii, ikhúúnʼ natha dí marigá nda̱wa̱á› (Isaías 46:9, 10). Rígi̱ naʼni muʼnimbulú dí gajkhun mambanúu dí na̱ʼkha̱ raʼthí náa Biblia dí marigá nda̱wa̱á.

MBÁ IKHA RÍ MAMBÁYÁAʼ XÚGI̱ GA̱JMA̱A̱ ASNDU KÁMUU MBIʼI

Á mu natanimbaníí ikha dí na̱ʼkha̱ raʼthí náa Biblia, maraxtaa májánʼ. Atatsaʼwáminaʼ náa xkri̱da rígi̱.

MBÚJKHA̱A̱ GA̱JMA̱A̱ ÑAJUNʼ

“Itháan májánʼ mbá ñawáanʼ rí mbi̱ya̱a̱ xa̱a̱ʼ ki xóo a̱jma̱ ñawáanʼ rí matiejunʼ gakhi̱i̱ ga̱jma̱a̱ rí matagayáaʼ raxkáá giñánʼ” (ECLESIASTÉS 4:6).

XÓO MARAXTAA GAJMIÁANʼ BI̱ KÚWÍIN NÁA GUʼWÁAʼ

“Mámbáa rí ikháanʼ gíʼmaa maʼndoo kaʼyoo a̱ʼgiu̱u̱ xó má eyoo kaʼyaminaʼ ikhaa. Ma̱ngaa a̱ʼgu̱ gíʼmaa mbaʼyamajkuu wéñuuʼ ajmbio̱o̱” (EFESIOS 5:33).

XÓO MATANIU̱U̱N EʼWÍINʼ

“Atatsíñáánʼ rajmanguaaʼ ga̱jma̱a̱ rí nakásngañaaʼ; xákiʼnán i̱ndó mu matani dí raʼkhí” (SALMO 37:8).

Dí mataʼgíʼ matanimbáníí consejo rí na̱ʼkha̱ náa Biblia mambáyáaʼ xúgi̱ ga̱jma̱a̱ nda̱wa̱á. Náa Biblia naʼthúlú xú káʼnii gánindxu̱u̱ nda̱wa̱á náa dí Dios nakudaminaʼ maxnúlú.

MARIGÁ DÍ TSÍMÁÁ GA̱JMA̱A̱ NÁNDÁA GAMÍI

“Makuwá tsímáá wéñuuʼ” (SALMO 37:11).

XÚGÍINʼ MAGUÁʼDÁÁ GUʼWÚN GA̱JMA̱A̱ DÍ MU̱PHU̱

“Muni guʼwá, ga̱jma̱a̱ makuwáanʼ ikhí; mudula ixi̱ uva ga̱jma̱a̱ muphula xndúu” (ISAÍAS 65:21).

NIMBÁA XÁʼÑUU NANDII GA̱JMA̱A̱ MAKHAÑÚU

“Xákháñún itháan, ni xárígá itháan tsingíná ni má xtambiyaʼ ni má ga̱ʼkhu̱” (APOCALIPSIS 21:4).

Ndiéjunʼ gáʼyoo matani mu maraxtaa ikhí rá. Rúʼko̱ ma̱ta̱ya̱a̱ náa imbo̱o̱ artículo.

a Náa libro “¡Araxtaa gagi kámuu mbiʼi!” náa capítulo 5, ikhí mataxkamaa tikhuu i̱yi̱i̱ʼ ga̱jma̱a̱ video náa naʼthí xú káʼnii nijuiʼtájuíi ga̱jma̱a̱ nijuixnáraʼa Biblia. Ayuʼ náa www.jw.org araxnáá clic náa BIBLIOTECA > MBAʼA LIBRO GA̱JMA̱A̱ FOLLETO.

b Á mu nandaaʼ ma̱ta̱ya̱a̱ itháán, atayáá náa Libro La Biblia... ¿la Palabra de Dios, o palabra del hombre? náa capítulo 9, rí nini̱ testigos de Jeobá dí rígá náa www.jw.org. Atani clic náa BIBLIOTECA > OTRAS PUBLICACIONES.