RÍ MAMBÁYULÚ MU XÁWIYULÚ KUʼÑÚÚN EʼWÍINʼ

1 | Xátraʼwíin xa̱bu̱

Náa Biblia naʼthí:

“Dios tséraʼwíin xa̱bu̱, ikhaa nagruiguíin xúgíinʼ bi̱ namíñúún kuyáá, bi̱ nuni̱ rí májánʼ, tséʼniuu má náá xuajen eguwáʼ” (HECHOS 10:34, 35).

Ndiéjunʼ eyoo gáʼthúu̱n rá.

Jeobáa Dios tséraʼwíin xa̱bu̱ ga̱jma̱a̱ numuu náa eguwáʼ, raza ndrígu̱ún, xóo kiejxu̱u̱n o xóo kúwíin. Rí phú itháán ndaʼyoo, ikhaa nindxu̱u̱ dí endxaʼwamíjna̱lú ga̱jma̱a̱ xóo kumulú. Náa Biblia naʼthí: “Xa̱bu̱ i̱ndó ndaʼyoo rí inuu, mú Jeobá ndaʼyoo a̱jkiu̱u̱n” (1 Samuel 16:7).

Ataniminaʼ matani̱ rígi̱:

Maski ajndu xándoo mbuʼyáá dí rígá náa a̱jkiu̱u̱n mbáa xa̱bu̱, mú ma̱ndoo mu̱ʼni̱ xó má eʼni Jeobá dí xúraʼwíinlú xa̱bu̱. Xátatsaʼwamínáʼ dí xúʼko̱ nindxu̱ún xúgíinʼ xa̱bu̱. Á mu natayáá dí raʼkhí tatsaʼwáminaʼ ga̱jma̱a̱ numuu mbáa xa̱bu̱, i̱ndó ga̱jma̱a̱ numuu dí na̱ʼkha̱ náa imbo̱o̱ʼ xuajen o ga̱jma̱a̱ numuu raza ndrígóo, atanda̱ʼa̱a̱ Dios dí maxnáaʼ tsiakii mu xátraʼwíin xa̱bu̱ ga̱jma̱a̱ mu xátatsaʼwamínáʼ xúʼko̱ kaʼnii (Salmo 139:23, 24). Xátani̱ a̱jma̱ a̱jkia̱a̱nʼ dí ikhaa ma̱ndoo mambáyáaʼ (1 Pedro 3:12).

a Jeobá mbiʼyuu Dios (Salmo 83:18).

“Nimbá miʼtsú táxtáá ga̱jmu̱ʼ mbáa xa̱bu̱ miʼxáa tsímáá […]. Rí xúgi̱ xtáá náa majñu̱únʼ a̱ngiu̱lú bi̱ kúwíin náa xúgíʼ numbaaʼ” (TITUS).

Xkri̱da ndrígu̱ún xa̱bu̱ bi̱ kúwíin rí mbiʼi xúgi̱: TITUS

Niʼnikriyaminaʼ náa rí xa̱bu̱ nawiñu̱u̱nʼ kuyamijná

Titus nixtáa gajmíi̱n xa̱bu̱ tsénigu̱u̱nʼ xtángoo dí naʼni gíníi xa̱bu̱ bi̱ mixtiʼkuun color. Ikhaa naʼthí: “Na̱jkuájxu̱ náa tséndrigúun májánʼ xa̱bu̱ bi̱ nindxu̱ún skuniúnʼ i̱ndó mu magiʼdu gajmiúxu, xóo náa hotel ga̱jma̱a̱ náa naʼwa̱a̱n iya najnga̱a̱”. Titus naʼthí dí ra̱ʼkhá tháán wi̱yu̱u̱ʼ kaʼñúún xa̱bu̱, rígi̱ naʼni dí majmangu̱u̱ʼ. Ikhaa naʼthí: “Mámbá rí tsénigu̱ʼ índo̱ natamíjná ga̱jmu̱ʼ mbáa, tséʼñuu á mu nindxu̱u̱ xa̱biya̱ o a̱ʼgu̱, ikhúún ginu̱ún egíʼdu̱u̱ exnu̱u̱”.

Índo̱ Titus nigíʼdu̱u̱ niʼnigajma̱a̱ Biblia gajmíi̱n Testigos de Jeobá nixtiʼkhuu xóo nixtáa. Dí maguxnuu Biblia ra̱ʼkhá tháán nimbáyúu. Mbá dí itháán ni̱jkha̱nú asndu náa a̱jkiu̱u̱n nindxu̱u̱ ga̱jma̱a̱ numuu dí marigá náa tsu̱du̱u̱ Ku̱ba̱ʼ, náa naʼthí rí: “Ni xákháñún itháan, ni xárígá itháan tsingíná ni má xtambi̱ya̱ʼ ni má ga̱ʼkhu̱” (Apocalipsis 21:3, 4).

Nákha ginii niʼñuu gakhi̱i̱ mu maniñuuʼ dí nawiyu̱u̱ʼ kaʼñúún eʼwíinʼ. Ikhaa naʼthí: “Dí mariʼkhu̱u̱ xóo endxaʼwamínáʼ ga̱jma̱a̱ rí na̱ni̱ ninindxu̱u̱ gakhi̱i̱”. Mú nimbáyúu wéñuʼ dí nijmañuu náa Hechos 10:34, 35, náa naʼthí rí Dios tséraʼwíin xa̱bu̱.

Ndiéjunʼ nigíʼnuu nda̱wa̱á xá. Titus naʼthí: “Índo̱ ndi̱yo̱o̱ xú káʼnii Testigos de Jeobá nusngajma dí nandún kuyamijná tséʼñuu á mu ni̱ndxu̱ún imbo̱o̱ʼ raza o color ndrígu̱ún, ni̱jkhánú ndi̱yo̱o̱ rí kúwíin náa religión rí gajkhun. Nákha ikhúún xóó tséjngúnʼ iyááʼ, mbáa Testigos de Jeobá bi̱ nindxu̱u̱ miʼxáa niʼthúnʼ dí maʼgá náa goʼwóo mu makuíʼtsu ga̱jmu̱ʼ, niku̱mu̱ʼ rí asndu xóo xtáá ragúndaa, numuu rí nimbá miʼtsú táxtáá ga̱jmu̱ʼ mbáa xa̱bu̱ miʼxáa tsímáá ni má dí makuíʼtsu ga̱jmu̱ʼ náa goʼwóo. Rí xúgi̱ xtáá náa majñu̱únʼ a̱ngiu̱lú bi̱ kúwíin náa xúgíʼ numbaaʼ”.