Jeobá nañewu̱u̱n xa̱bi̱i̱

1. Náá numuu rí Jesús nindo̱ʼo̱o̱ Jeobá rí mañewu̱u̱n xa̱bi̱i̱ rá.

MBRUʼUN nákhi inuu makhañúu Jesús, nindo̱ʼo̱o̱ Anu̱u̱ mbá rí gíʼdoo wéñuuʼ numuu: Ikhaa nindxu̱u̱ dí mañewu̱u̱n xa̱bi̱i̱ (Juan 17:15, 20). Gajkhun má dí Jeobá nañewu̱u̱n xa̱bi̱i̱, mú Jesús ndiʼyoo dí Gixa̱a̱ maʼni gíníi itháan xa̱bi̱i̱, ikha jngóo ndíyóoʼ dí Jeobá mambáñún.

2. Xó má eʼthí náa Salmo 33:18-20, náá numuu dí ragíʼmaa mamiñulúʼ gáʼni xkujndu rá.

² Numbaaʼ ndrígóo Gixa̱a̱ naʼni gíníi xa̱bi̱i̱ Jeobá. Xkujndu dí nuraʼníí migamíi maʼni dí makáguabáánʼ ma̱ngaa dí xáguajúnlú jmbu náa Jeobá. Náa artículo rígi̱ mbuʼyáá dí nda̱a̱ mbá numuu dí mamiñulú, numuu dí Jeobá xtáa ga̱jma̱a̱ nindxu̱lú. Ikhaa ndaʼyoo xúgíʼ rí kuwáánʼ ruguáʼníí ma̱ngaa xtáa xawii mambáyulú. Mbuʼyáá a̱jma̱ relatos dí na̱ʼkha̱ náa Biblia dí nasngájma dí “iduu Jeobá nayejxi̱ má xúʼko̱ náa bi̱ namíñúún kuyáá” (atraxnuu Salmo 33:18-20).b

ÍNDO̱ NAKUMULÚ DÍ KUWÁANʼ NDAJKUÁANʼ

3. Nguáná gamíi makumulúʼ dí kuwáanʼ ndajkuáanʼ rá.

³ Maski ajndu kúwáanʼ náa kúwá mbaʼin wéñuʼ a̱ngiu̱lú, mbáa nguáná makumulúʼ dí kuwáanʼ ndajkuáanʼ, mbá xkri̱da, mbáa kúwá jiámá bi̱ nagún náa escuela bi̱ nakumu̱ún dí ndawa̱a̱ tsáa mambáñun, índo̱ ndayóoʼ muthún bi̱ nunigajma̱a̱ gajmiún ndiéjunʼ junʼ dí ikhiin nunimbu̱ún o índo̱ nuriʼkhu̱u̱ congregación ndrígu̱ún, mbáa tikuáanʼ dí ikháanʼ nakúwáanʼlu ngíná índo̱ nakumulú dí nánguá guáʼdáá numulúʼ o nakumulú dí ndawa̱a̱ tsáa mambáyulúʼ mu maʼngulú muraʼníí rígi̱, mbáa tséʼkha̱ a̱jkiu̱lú rí muʼthúún eʼwíínʼ xú káʼnii kumulú numuu rí namíñulú dí xákru̱ʼu̱u̱n kuyulúʼ. Ga̱jma̱a̱ rí asndu maʼga̱nú makumulúʼ dí ndawa̱a̱ tsáa xmiéjunʼ kaʼyulúʼ. Tséʼñuu má xú káʼnii nindxu̱u̱, dí maraxtaa mbáwiin maʼni dí makáguabáanʼ ga̱jma̱a̱ maraxtaa ngíná. Mú Jeobá tsíyoo dí makumulúʼ xúʼko̱. Náá numuu rá.

4. Náá numuu dí profeta Elías niʼthí “mbáwun ikhúún xóó eguanúʼ” rá.

⁴ Guʼyáá ga̱jma̱a̱ numuu profeta Elías, ikha nixtáa ragáyúu mbá 40 mbiʼi, numuu dí reina Jezabel ndiyáaʼ maxíyáa (1 Rey. 19:1-9). Ni̱jkha̱nú náa mbá tsíñu, ikhí niʼthúu̱n Jeobá “mbáwun ikhúún xóó eguanúʼ” (1 Rey. 19:10). Nikumu̱u̱ dí mbáwíi ikhaa xóó xtáa, mú na̱nguá, numuu dí Abdías niʼngo̱o̱ niʼnikáwíin mbá 100 profetas náa ñawúunʼ Jezabel (1 Rey. 18:7, 13). Náá numuu xúʼko̱ nikumu̱u̱ Elías rá. O mbáa nikumu̱u̱ dí xtáa mbáwíi numuu dí nimbáa táʼthí ga̱jma̱a̱ numuu Jeobá nda̱wa̱á dí nikháñúún profetas ndrígio̱o̱ Baal náa kúbá Carmelo o mbáa nindxa̱ʼwáminaʼ dí nimbáa tséʼyoo dí ikhaa xtáa gamíi ga̱jma̱a̱ dí nimbáa tsixmiéjunʼ kaʼyoo, náa Biblia tséʼtulu xúgíʼ, mú nduʼyáalu dí Jeobá nikro̱ʼo̱o̱ náá numuu dí Elías nikumu̱u̱ dí xtáa mbáwíi ga̱jma̱a̱ ndiyáʼ xu káʼnii nimbáyúu.

5. Ndiéjunʼ niʼni Jeobá mu masngájmuu Elías dí na̱nguá xtáa mbáwíí rá.

⁵ Mbaʼa rí xóo Jeobá niʼni mu mambáyuu Elías. Mbá xkri̱da, nimbáyúu mú maʼthí xóo ku̱mu̱u̱, a̱jma̱ nuthu nirajxu̱u̱ “dí táʼni gi̱i̱ Elías” (1 Rey. 19:9, 13). Jeobá niʼdxawuun dí niʼthí Elías náa a̱jma̱ nuthu rígi̱, nda̱wa̱á niʼthúu̱n dí xtáa ikhí mu mambáyúu ga̱jma̱a̱ dí ikhaa nindxu̱u̱ Dios bi̱ gíʼdoo tsiakii, ma̱ngaa niʼthúu̱n dí náa Israel xóó kúwi̱i̱n mbaʼin bi̱ na̱nguá ndiyamajkhún xándú (1 Rey. 19:11, 12, 18). Elías niʼni̱i̱ a̱jkiu̱u̱n nda̱wa̱á dí niʼthúu̱n Jeobá xúgíʼ dí naku̱mu̱u̱ ma̱ngaa dí niʼdxawuun xóo niriʼña̱a̱. Jeobá nixnúu mbaʼa ñajunʼ dí gíʼdoo wéñuʼ numuu maʼni, niʼthúu̱n dí maraʼwíí Hazael mu mani̱ndxu̱u̱ rey náa Siria, Jehú mu mani̱ndxu̱u̱ rey náa Israel ga̱jma̱a̱ Eliseo bi̱ mani̱ndxu̱u̱ profeta (1 Rey. 19:15, 16). Índo̱ Jeobá nixnúu ñajunʼ rígi̱ maʼni Elías ndiyáa tsiakii, ma̱ngaa nixniuu mbáa bi̱ mambáyúu, Eliseo. Ndiéjunʼ gándoo gúʼni̱ índo̱ nakumulú dí kúwáanʼ ndájkuáanʼ, ga̱jma̱a̱ índo̱ ndayúlú dí Jeobá mambáyulúʼ rá.

6. Ndiéjunʼ gándoo gúʼtháán Jeobá índo̱ nakumulú dí kuwáanʼ ndajkuáanʼ rá. (Salmo 62:8.)

⁶ Jeobá naʼthúlú rí muʼthán xóo e̱ku̱mulúʼ índo̱ nutajkháan. Ikhaa ndaʼyoo xóo ekumulú ga̱jma̱a̱ ma̱ndoo munda̱ʼa̱a̱ dí mambáyulúʼ asndu náá mbiʼi dí gáʼndulúʼ, ikhaa maʼdxawunlú (1 Tes. 5:17). Ikhaa ra̱ʼkhá tháán nadxuu rí maʼdxawún xa̱bi̱i̱ (Prov. 15:8). Ndiéjunʼ gándoo gúʼthán Jeobá índo̱ nakumulú dí kuwáanʼ ndakuáanʼ rá. Ma̱ndoo muʼthán xúgíʼ rí nakumulú xó má niʼni Elías (atraxnuu Salmo 62:8).c Gúʼthán rí naʼni maxmiéjunʼlú ma̱ngaa dí nakumulú, gunda̱ʼa̱a̱ rí mambáyulúʼ mu mbuʼyáá ndiéjunʼ gúʼni̱, mbá xkri̱da, a mú ikháán nindxa̱a̱ʼ dxámá ga̱jma̱a̱ dxáʼgú, ndiéjunʼ gátani̱ á mu naku̱ma̱a̱ʼ dí xtáa mbáwíín ga̱jma̱a̱ namíñaaʼ gáratha̱ ga̱jma̱a̱ numuu Jeobá náa escuela rá. Ma̱ndoo matanda̱ʼa̱a̱ dí maxnáaʼ tsiakii ma̱ngaa dí maxnáaʼ ku̱ma̱, mu xúʼko̱ marathu̱u̱n ga̱jma̱a̱ gamajkhu dí najmañaaʼ bi̱ natanigajma̱a̱ gajmiáanʼ (Luc. 21:14, 15). Ndiéjunʼ gátani̱ ikháánʼ á mu naku̱ma̱a̱ʼ dí na̱nguá xtaʼdáá numaaʼ rá. Atanda̱ʼa̱a̱ Jeobá dí mambáyaaʼ mu maratamíjná ga̱jma̱a̱ʼ mbáa ndxájulú ma̱ngaa dí mambáyúu ndxájulú buʼko̱ mu makro̱ʼo̱o̱ kaʼyaaʼ. Á mu naratháán Jeobá xúgíʼ rí naku̱ma̱a̱ʼ rúʼko̱ gámbáyaaʼ mú xákuma̱a̱ʼ rí nanguá xtáa mbáwíín ma̱ngaa á mu xtaa xawii mu ma̱ta̱ya̱a̱ xú káʼnii Jeobá nariʼña̱a̱ rí naratájkháan ga̱jma̱a̱ atasiñaminaʼ rí eʼwíinʼ mumbayaaʼ.

7. Ndiéjunʼ eʼsngáaʼ xkri̱doo Mauricio rá.

⁷ Xúgiáánʼ naxnúlú ñajunʼ rí gíʼdoo numuu mu̱ʼni̱ Jeobá. Ikhaa ndayamajkhuu xúgíʼ rí nu̱ʼni̱ náa congregación ga̱jma̱a̱ náa nuʼtáraʼa (Sal. 110:3). Rí mu̱ʼni̱ ñajunʼ Jeobá nambáyulúʼ mu xákumulú rí kuwáanʼ ndajkuáanʼ, náá numuu rá. Guʼyáá xóo nigíʼnuu mbáa ndxájulú dxámá bi̱ mbiʼyuu Mauricio.d Tséʼni má mba̱yu̱u̱ʼ rí ikhaa nijngúun iyááʼ, mbáa bi̱ nambájxu̱u̱ ga̱jma̱a̱ ni̱jkha̱ rarájñuuʼ mañu mañúú náa Jeobá, ikhaa naʼthí: “Índo̱ ndi̱yo̱o̱ dí mígiúʼ ni̱jkha̱ rarájñuuʼ náa dí gajkhun niraximínáʼ, lá maʼngo̱ʼ manimbánuu dí nikuʼdáminaʼ náa Jeobá rá. Ga̱jma̱a̱ dí maxtáá má xúʼko̱ náa xuajñu xá. Niku̱mu̱ʼ dí xtáá mbáwun ga̱jma̱a̱ rí nimbáa xákro̱ʼo̱o̱ kaʼyoʼ”. Ndiéjunʼ nimbáyúu mu xákaguabaaʼ xá. Ikhaa naʼthí: “Dí mataráʼa itháan nimbáyúʼ mu xáxmiéjunʼ kayamínáʼ i̱ndó ikhúún ma̱ngaa dí xándxaʼwamínáʼ dí raʼkhí, índo̱ nataráʼa gajmíʼ a̱ngiu̱lú naxtáá gagi ga̱jma̱a̱ nánguá ku̱mu̱ʼ dí xtáá mbáwún”. Ma̱ndoo marigá rígi̱ maski ajndu na̱nguá egájnulú muʼtáraʼa mijngii gajmiúlú a̱ngiu̱lú índo̱ nu̱ʼni̱ gajmiúlú carta ga̱jma̱a̱ nuʼtáraʼa ga̱jma̱a̱ teléfono naxnúlu wéñuʼ tsiakii. Ndiéjunʼ xóó nimbáyúu Mauricio rá. Ikhaa naʼthí: “Nigíʼdu̱u̱ niñambá itháan náa congregación ni̱ni̱ tsiakimínáʼ maʼniratoo itháan májánʼ dí maxnajxí náa reunión, rúʼko̱ nimbáyúʼ mu mba̱yo̱o̱ dí Jeobá nandoo kaʼyoʼ ga̱jma̱a̱ a̱ngiu̱lú”.

ÍNDO̱ NURAʼNÍÍ XKUJNDU GAKHI̱I̱ RÍ NAʼNI MAXMIÉJUNLÚ

8. Xú káʼnii kuwáánʼ índo̱ nuraʼníí xkujndu rí gakhi̱i̱ rá.

⁸ Nduʼyáá má rí xúgiáánʼ muraʼníí ga̱ʼkhu̱ náa iwáá mbiʼi (2 Tim. 3:1). Mbáa muraʼníílú mbiʼi dí tséguaʼthi̱i̱n, xóo índo̱ nánguá kuaʼdáá mbújkha̱a̱, índo̱ nuthulú rí kuaʼdáá mbá nandii mbi̱i̱ʼ o índo̱ nakháñuu mbáa bi̱ kuʼyáálú. Mbiʼi rúʼko̱ naʼni dí makuwáánʼlú ngíná ga̱jma̱a̱ naxmiéjunlú, itháán índo̱ na̱ʼkha̱nú má xúʼko̱ ga̱ʼkhu̱ o índo̱ nuguaʼdáá mbaʼa xkujndu. Mú garmáʼáan a̱jkiu̱lú dí Jeobá xtáa ga̱jma̱á nindxu̱lú. Ikhaa ma̱ndoo mambáyulúʼ mu maʼngulú muraʼníí xúgíʼ ga̱ʼkhu̱ rígi̱.

9. Ndiéjunʼ ga̱ʼkhu̱ niraʼnuu Job rá.

⁹ Guʼyáá xú kaʼnii Jeobá nimbáyúu Job. Índo̱ ni̱ʼkha̱nú mbaʼa ga̱ʼkhu̱ náa inuu rí niʼni mamínuuʼ wéñuʼ. Káaʼ mbá mbiʼi xígií nikháñúún xúgíinʼ xujkiúu, bi̱ numbayíí ga̱jma̱a̱ e̱ji̱i̱n (Job 1:13-19). Índo̱ kaʼníí xóó xtáa ramínuuʼ, ikhaa ndiyóo mbá nandii mbi̱i̱ʼ (Job 2:7). Numuu rí xtáa ramínuuʼ wéñuʼ ikha jngóo niʼthí: “Nawi̱yu̱ʼ kayamínáʼ, nánguá eyoʼ maxtáá” (Job 7:16).

10. Xú káʼnii Jeobá nimbáyúu Job mu maʼngo̱o̱ maraʼnuu ga̱ʼkhu̱ rá. (Atayáá xtiʼkhu rí na̱ʼkha̱ náa timbá ináa.)

¹⁰ Jeobá ndiʼyoo xúgíʼ rí xtáa ramínuuʼ Job ga̱jma̱a̱ numuu dí nandoo kaʼyoo, ikha jngóo nimbáyúu mu maʼngo̱o̱ maraʼnuu xúgíʼ rígi̱ ma̱ngaa dí mawiji̱ jmbu. Jeobá niʼtámijná ga̱jma̱a̱ Job, niʼthúu̱n nguáthá mba̱a̱ ku̱ma̱ gíʼdoo, ma̱ngaa xú káʼnii ikhaa nañewu̱u̱n bi̱ niʼniwíín. Niʼthí ga̱jma̱a̱ numún mbaʼin xujkhúʼ (Job 38:1, 2; 39:9, 13, 19, 27; 40:15; 41:1, 2). Jeobá nikuʼmaa Elihú mu maxnuu tsiakii ga̱jma̱a̱ maʼni̱i̱ a̱jkiu̱u̱n Job. dxámá bugi̱ niʼni marmáʼáan a̱jkiu̱u̱n rí Dios naʼni tsakurámiinʼ bi̱ tsíniña̱a̱ʼ runi̱ ñajunʼ. Ma̱ngaa Jeobá nixkajxi̱i̱ Elihú mu maxnúu consejo Job. Elihú nimbáyúu Job mu makro̱ʼo̱o̱ májánʼ, nimbáyúu mbaʼyoo dí Jeobá bi̱ niʼniwíi xúgíʼ dí rígá nindxu̱u̱ itháan mba̱a̱ ki xóo xa̱bu̱ numbaaʼ (Job 37:14). Jeobá nixnúu mbá ñajunʼ maʼni Job, dí maʼtájkháan ga̱jma̱a̱ numún mbá nájtsíin mígiu̱u̱ bi̱ nikiéʼkhún (Job 42:8-10). Xú káʼnii embáyulu Jeobá dí mbiʼi xúgi̱ mu maʼngulú muraʼníí ga̱ʼkhu̱ rá.

11. Xú káʼnii embáyuluʼ Biblia índo̱ nuraʼníí xkujndu rá.

¹¹ Jeobá tséʼthulu mbájmbu ikháánʼ xúgíʼ xóo niʼni ga̱jma̱a̱ Job. Mú ikhaa najmuu ajngá rawuunʼ mu maʼthúlú (Rom. 15:4). Ikhaa naxnúlu tsiakii ga̱jma̱a̱ numuu rí wíji̱ maʼni nda̱wa̱á. Guʼyáá tikhu rí na̱ʼkha̱ náa Bi̱blia dí naʼni̱i̱ a̱jkiu̱lú índo̱ nuraʼníí xkujndu. Náa Biblia eʼthí rí Jeobá naʼthúlúʼ, dí nimbá xándoo “matsíngúlú náa ngajua rí gíʼdáánʼ Dios” maski ajndu nindxu̱u̱ mbá xkujndu gakhi̱i̱ (Rom. 8:38, 39). Ma̱ngaa naʼthúlúʼ dí “xtáa mijngii náa xúgínʼ xa̱bu̱ bi̱ nutakáñii” xóo muʼthá, naʼdxawunlú (Sal. 145:18). Jeobá naʼthúlúʼ á mu nakumulú kuʼyáá maʼngulú muraʼníí asndu xú káʼníí xkujndu rí na̱ʼkha̱nú náa inulú ga̱jma̱a̱ makuwáánʼ gagi índo̱ numíniiʼlú (1 Cor. 10:13; Sant. 1:2, 12). Náa ajngá rawuunʼ Dios naʼni marmáʼáan a̱jkiu̱lú dí xkujndu rí kuaʼdáá nindxu̱u̱ mbá xnga̱á, índo̱ nuʼnimbrígui̱i̱ ga̱jma̱a̱ rí makuwáánʼ kámuu mbiʼi. Rí Jeobá ekudaminaʼ maxnúlúʼ (2 Cor. 4:16-18). Jeobá nakudaminaʼ rí maʼni gámbóo náa egi̱ʼdu̱u̱ xkujndu, Gixa̱a̱ ga̱jma̱a̱ bi̱ ni̱ndxu̱ún xóo ikhaa (Sal. 37:10). Lá nindra̱ʼa̱ náa edxa̱a̱ʼ versículo ndrígóo Biblia rí maxnáaʼ tsiakii mu maʼnga̱a̱ʼ matraʼníí xkujndu rí gáʼkha nda̱wa̱á ráʼ.

12. Ndiéjunʼ gíʼmaa mu̱ʼni̱ mu mambáyulúʼ dí naxnúlú Jeobá rá.

¹² Mu mambáyulú dí Jeobá naxnúlú náa ajngóo, ikhaa gíʼthúu̱n rí maguʼwunlú rí muʼnigajma̱a̱ Biblia, ma̱ngaa rí mundxaʼwamíjná ga̱jma̱a̱ numuu rí naʼthí ikhí. Á mu nuʼgíʼ nuʼnilú rí ejmañulú, fe ndrígúlú maʼni gújkhúʼ ga̱jma̱a̱ mambajxulú májánʼ gajmiúlú, rúʼko̱ gáxnulú tsiakii mu maʼngulú muraʼníí xkujndu. Ga̱jma̱a̱ á mu nakumulú kuʼyáá ajngá rawuunʼ, Jeobá má gáxnulú espíritu santo ndrígóo. Rúʼko̱ gámbáyuluʼ mu muguaʼdáá “tsiakii dí itháan mba̱a̱ ki xóo dí gíʼdoo mbáa xa̱bu̱” mu muraʼníí asndu ndiéjúúnʼ má xkujndu rí gáʼkha̱ (2 Cor. 4:7-10).

13. Xú káʼnii embáyuluʼ ganitsu dí naguwíi “ñumbáá jmbii bi̱ májánʼ endxa̱ʼwáminaʼ” rá.

¹³ Jeobá najmiuu “ñumbáá jmbii bi̱ májánʼ endxa̱ʼwáminaʼ” mu maxnúlúʼ mbaʼa i̱yi̱i̱ʼ, video ga̱jma̱a̱ ajmúú mu xúʼko̱ maʼni gújkhúʼ fe ndrígúlú ga̱jma̱a̱ makuwáánʼ mijngii náa Jeobá (Mat. 24:45). Ndayóoʼ majmulú májánʼ xúgíʼ rí naxnúlú Jeobá náa mbiʼi rí kaʼyoo. Xíjkhoó má eʼni dí mbáa ndxájulú a̱ʼgu̱ bi̱ xtáa náa Estados Unidos niʼthí dí ra̱ʼkhá tháán exnáa núma̱aʼ Jeobá ga̱jma̱a̱ numuu ganitsu rí naguwíi xuajñuu. Niʼthí: “Náa mbá 40 tsiguʼ rí xtáá ra̱ni̱ ñajunʼ Jeobá mbaʼa tsáʼkhá rí ndíyóoʼ maraʼnuu”. Ndxájulú bugi̱ niraʼnuu xkujndu rí gakhi̱i̱ wéñuʼ. Mbáa xa̱bu̱ najnga̱a̱ bi̱ na̱jkha̱ kayóo carro nixiyáa xiʼñúuʼ, anu̱u̱ ga̱jma̱a̱ ru̱dúu̱ nikháñúún ga̱jma̱a̱ nandii rí mbi̱i̱ʼ wéñuʼ ga̱jma̱a̱ ikhaa nigiʼdoo cáncer mbá a̱jma̱ nutu. Ndiéjunʼ nimbáyúu mu maʼngo̱o̱ xá. Ikhaa naʼthí: “Jeobá niñewu̱nʼ má xúʼko̱ ga̱jma̱a̱ ganitsu rí naguwíi ñumbáá jmbii bi̱ májánʼ endxa̱ʼwáminaʼ, nimbáyuʼ mu maʼngo̱o̱ maraʼnuu ga̱jma̱a̱ numuu rúʼko̱ ma̱ndoo ma̱tha̱ xó má niʼthí Job ‹asndu índo̱ gákháñuʼ kájxi̱ má xúʼko̱ a̱jkiu̱nʼ gáni̱›” (Job 27:5).

14. Xú káʼnii ejmiuu a̱ngiu̱lú Jeobá mu mumbáyulúʼ índo̱ nuraʼníí xkujndu rá. (1 Tesalonicenses 4:9.)

¹⁴ Jeobá naʼsngúún xa̱bi̱i̱ rí gíʼmaa maʼndún kuyamijná ga̱jma̱a̱ muni̱i̱ a̱jkiu̱u̱n eʼwíinʼ índo̱ kúwá ngíná (2 Cor. 1:3, 4; atraxnuu 1 Tesalonicenses 4:9). A̱ngiu̱lú nindxu̱ún xóo Elihú nandún mumbayulúʼ mu muguajún gújkhúʼ índo̱ nuraʼníí xkujndu (Hech. 14:22). Xúʼko̱ ndiʼyoo ndxájulú Diana índo̱ ajmbio̱o̱ nindoo káñuu gakhi̱i̱, a̱ngiu̱lú bi̱ kúwá náa congregación nixnáá tsiakii ga̱jma̱a̱ nimbayíí mu xániñuuʼ Jeobá. Ikhaa naʼthí: “Gu̱nʼ rúʼko̱ ninindxu̱u̱ gakhi̱i̱ wéñuʼ mú xúgíʼ mbiʼi rúʼko̱ ndi̱yo̱o̱ xú káʼnii Jeobá niñewu̱nʼ ga̱jma̱a̱ nimbayúʼ a̱ngiu̱lú bi̱ kúwá náa congregación nimbayúxuʼ wéñuʼ nijxnuxuʼ xúgíʼ rí ndíyúxu, niguwáʼ gúyuxu, nitaruʼuxuʼ, nidaraʼanxuʼ. Numuu dí ikhúún tséjmañuʼ gáʼgá ka̱yo̱ʼ carro ikha jngóo nuriya̱ʼ májánʼ awan mu xúʼko̱ maʼgá reunión ga̱jma̱a̱ maʼgá gátaráʼa mámbá índo̱ ikhúún naʼngo̱o̱”. Nadxulú wéñuʼ rí kuwáanʼlú náa xuajñuu Jeobá numuu rí ikhí kuaʼdíin a̱ngiu̱lú bi̱ nandún kuyulú.

NUXNÁA NÚMA̱Aʼ JEOBÁ NUMUU RÍ NAÑEWU̱NLÚ

15. Náá numuu nduʼyáá gajkhun dí maʼngulú muraʼníí xkujndu rá.

¹⁵ Xúgiáanʼlú muraʼníí xkujndu. Mú ndiʼyáá rí na̱nguá má kuwáanʼ i̱ndó ikháanʼlu. Xóo má mbáa xa̱bu̱ nijkii xúʼko̱ Jeobá xtáa xawii mú mambáyulúʼ. Ikhaa xtáa níjñúlú, xawii mu maʼdxawunlú índo̱ nuʼtákáñii rí mambáyulúʼ (Is. 43:2). Nduʼyáá gajkhun rí maʼngulú muraʼníí xkujndu numuu dí Jeobá naxnúlu xúgíʼ rí mambáyulúʼ mu maʼngulú muraʼníí: Xóo rí muʼtájkháan, Bi̱blia, ganitsu rí naguwíi xuajñuu ga̱jma̱a̱ a̱ngiu̱lú bi̱ nandún kuyulúʼ.

16. Ndiéjunʼ gándoo mu̱ʼni̱ mu Jeobá mañewu̱nlú má xúʼko̱ rá.

¹⁶ Nadxulú wéñuʼ rí kuaʼdaa anu̱lú bi̱ xtáa xawii mu mambáyulúʼ. “Ikhaa nindxu̱u̱ bi̱ naʼni rí maʼdxuu a̱jkiu̱lú” (Sal. 33:21). Xú káʼnii gúsngajmá rí nuxnáa núma̱aʼ Jeobá ga̱jma̱a̱ numuu rí nañewu̱nlú rá. Mbá rí xóo ma̱ndoo mu̱ʼni̱ nindxu̱u̱ rí majmuluʼ xúgíʼ rí ikhaa naxnúlú. Mu Jeobá mañewu̱nlú má xúʼko̱, ndayóoʼ mu̱ʼni̱ tsiakimijna muʼnimbulúʼ kuʼyáá ga̱jma̱a̱ mu̱ʼni̱ rí nindxu̱u̱ májánʼ. Á mu nu̱ʼni̱ xúʼko̱ ikhaa maxtáa xawii mu mambáyulúʼ xúgíʼ mbiʼi (1 Ped. 3:12).