Xtáá gagi ga̱jma̱a̱ numuu dí najmañuʼ náa ñajuunʼ Jeobá

Índo̱ nirígá Segunda Guerra Mundial, anu̱ʼ ga̱jma̱a̱ ru̱dúʼ nigájnún náa Estonia ga̱jma̱a̱ nigún gákúwíin náa Alemania. Ikhí nixtáá ikhúún, nda̱wa̱á nigún gákúwíin náa Canadá. Timbá guʼwá náa nikúwáanʼxu gíʼ mijngii náa ottawa. Nikúwáanʼxu náa guʼwá chíʼgíiʼ miʼxá rí kaxtajmáá idiʼ ga̱jma̱a̱ kúwíin xtílá. Ra̱ʼkhá tháán migínáaʼxu, rí miʼcha̱ naphúxu i̱ndó xndúu xtílá.

Mbá mbiʼi, testigos de Jeobá niguwáʼ ga̱jma̱a̱ niraxnuu Apocalipsis 21:3, 4 mu maʼdxuun ru̱dúʼ. Asndu nimbiyaʼ niʼni rí nijmañuu, numuu rí ni̱jkha̱nú náa a̱jkiu̱u̱n. Tájyúuʼ nijmañuu rí naʼthí náa Biblia ga̱jma̱a̱ na̱nguá má ndijyúuʼ mba̱yu̱u̱ʼ niʼni rí anu̱ʼ ga̱jma̱a̱ ru̱dúʼ nijngún iyááʼ.

Maski ajndu Anu̱ʼ ga̱jma̱a̱ ru̱dúʼ tséjmañún májánʼ inglés, mú ndiyáá dí kúwá runigajmaa nindxu̱u̱ gajkhun. Ikha jngóo maski ajndu anu̱ʼ niñajunʼ xúgíʼ mbruʼun náa najuiyaʼ níquel dí rígá náa Sudbury (Ontario), xúgíʼ sábado na̱jkha̱ kañún ikhúún ga̱jma̱a̱ gi̱ʼtio̱ʼ Sylvia mu mutaráʼaxu. Ga̱jma̱a̱ xúgíʼ xmáná nagimbáanʼxu xóo familia mu munigajma̱a̱ Bi̱ Nayejngoo. Ru̱dúʼ ga̱jma̱a̱ anu̱ʼ nisnguxu má xúʼko̱ rí maʼnduxu ku̱ya̱a̱ Dios ga̱jma̱a̱ rúʼko̱ niʼni dí maxnajxíminaʼ náa Jeobá nákha tsiguʼ 1956 nákha gúʼdoo 10 tsiguʼ. Rí xóo nindoo kaʼyoo Jeobá anu̱ʼ ga̱jma̱a̱ ru̱dúʼ rúʼko̱ naxkajxu̱u̱n mu ma̱ni̱ má xúʼko̱ ñajuunʼ.

Índo̱ nirámúʼ escuela secundaria, ni̱ni̱ jngarigamínáʼ numuu rí nánguá nini rí itháán gíʼdoo numuu. Nindxa̱ʼwa̱mínáʼ rí á mu nanindxu̱ʼ precursor, nditháan xáguʼdoo mbújkha̱a̱ mu maʼgá ga̱jma̱a̱ avión náa imbríʼkhá numbaaʼ. Ikha jngóo nigíʼdu̱u̱ nigujua disco náa mbá estación de radio ga̱jma̱a̱ nanigu̱ʼ rí nani. Nañajunʼ wakíʼ ikha jngóo tséʼngo̱o̱ maʼgá reunión ga̱jma̱a̱ nambájxu̱ itháán gajmíʼ xa̱bu̱ bi̱ tséni rí nandoo Dios. Mú, nda̱wa̱á ga̱jma̱a̱ numuu rí ninigajma̱a̱ mbá chíʼgíi rí naʼthí náa Biblia nimbáyuʼ mu mariʼkuminaa.

Ni̱jkhá gáxtáá náa Oshawa, náa Ontario. Ikhí niniʼniiʼ Ray Norman, ndxájuu Lesli ga̱jma̱a̱ eʼwíinʼ precursores. Xúgíinʼ nixmiéjúúnʼ kuyoʼ. Índo̱ ndi̱yo̱o̱ rí kúwá gagi rúʼko̱ niʼni dí mariʼkhu̱u̱ metas ndrígóʼ. Ikhiin nixnuʼ tsiaki̱i̱ rí mani̱ndxu̱ʼ precursor. Ga̱jma̱a̱ xúʼko̱ má nini nákha septiembre tsiguʼ 1966. Xtáá májánʼ ga̱jma̱a̱ rí na̱ni̱ naʼni maxtáá gagi. Mú rígá mbá rí maʼni mariʼkhu̱u̱ xóo xtáá.

Á MU JEOBÁ NAʼTHÁANʼ MATANI MBÁ, ATANI̱

I̱ndó kaʼníí xóó nanigajmaa̱ náa escuela secundaria, nikuʼmá i̱yu̱ʼ rí maʼgá gáyambáá náa Betel dí rígá náa Toronto (Canadá). Nda̱wa̱á índo̱ ninindx̱uʼ precursor, nithu̱nʼ rí maʼgá gáyambáá mbá a̱jkhu̱ tsiguʼ náa Betel. Nanigiuʼ wéñuʼ Lesli, ikha jngóo dí ra̱ʼkhá tháán emíñúʼ á mu natha dí maʼgá naku̱mu̱ʼ rí nánguá matangu̱ún mba̱yo̱o̱. Mú, nda̱wa̱á rí nitajkáan mbaʼa nuthu, nitha̱ rí maʼgá náa Betel asndu najmuʼ nitangawuuʼ Lesli.

Náa lavandería niñajunʼ índo̱ nixtáá Betel ga̱jma̱a̱ nda̱wa̱á xóo secretario. Ikhú Lesli nitháán rí mani̱ndxu̱u̱ precursora especial náa Gatineau (Quebec). Nandxa̱ʼwa̱mínáʼ má xúʼko̱ ndiéjuunʼ dí xtáa raʼni ikhaa ga̱jma̱a̱ narajximínáʼ á mu ikhúún niraʼwi̱i̱ dí májánʼ ma̱ni̱. Ikhú nigruígú mbá ajngáa rí tágúʼthúun: Nitháán maʼga Ray ma̱ngaa náa Betel ndxájuu Lesli ga̱jma̱a̱ nikúwáanʼxu náa mbóó cuarto. Xúʼko̱ káʼnii niʼni rí nimbájxuʼ mbu̱júu̱ gajmuʼ Lesli. Nidamíjnaxu nákha 27 ñajunʼ gu̱nʼ febrero tsiguʼ 1971, rúʼko̱ ninindxu̱u̱ iwáá mbiʼi rí nixtáá rañambáá mbá a̱jkhu̱ tsiguʼ náa Betel.

Nixuʼmáaʼxu muʼguá náa Quebec, náa rígá mbá congregación dí nuthi ajngáa francés. Ga̱jma̱a̱ na̱nguá má mba̱yu̱u̱ʼ eʼni índo̱ nithu̱nʼ rí mani̱ndxu̱ʼ circuito. Nákha ikhú kaʼnii kuʼdoo 28 tsiguʼ ga̱jma̱a̱ naku̱mu̱ʼ rí kaʼníí nindxu̱ʼ mbáa dxáma̱á ga̱jma̱a̱ tséjmañuʼ. Mú, nixnuʼ wéñuʼ tsiaki̱i̱ ajngáa dí na̱ʼkha̱ náa Jeremías 1:7, 8. Lesli nigawúunʼ mbaʼa nuthu ga̱jma̱a̱ carro, ikha jngóo naʼniuu gakhi̱i̱ mu mi̱gu. Ga̱jma̱a̱ numuu rígi̱, naʼni maxmiéjunʼ xú káʼnii lá gándoo gúyambáá xóo circuito. Lesli niʼthu̱nʼ rígi̱: “Á mu dí Jeobá naʼthúlú muʼni, ndíjkha rí tséʼni̱mijna̱ muʼni rá.” Ikha jngóo nitaxu rí ma̱ndoo, ga̱jma̱a̱ niyambáá mbá 17 tsiguʼ xóo circuito.

Índo̱ ninindxu̱ʼ circuito, nigúʼdoo wéñuʼ ñajunʼ rí asndu tséʼngo̱o̱ mbiʼi mu maʼgúnʼ gajmuʼ Lesli. Ndiyóoʼ rí majmañuʼ mbá ikha rí gíʼdoo wéñuʼ numuu. Mbá miʼcha̱ lunes niwáán timbre ndrígóo puerta. Índo̱ nimbáʼtoo ndi̱yo̱o̱ rí nda̱wa̱a̱ nimbáa, i̱ndó mbá canasta gíʼ kúgoo mbá mantel, náa kajti xndú taun, queso, pan, mbá botella ndrígóo vino, copas ga̱jma̱a̱ mbá nota náa naʼthí: “Ayuʼ ga̱jma̱a̱ pasia a̱ʼgia̱a̱ʼ”. Ninindxu̱u̱ mbá mbiʼi mitsaanʼ numuu rí xtáa a̱jkha̱ʼ. Mú ikhúún kuʼdoo tikhu discurso dí ndayóoʼ manirataminaʼ, ikha jngóo ni̱thu̱u̱n a̱ʼgiu̱ʼ dí xáʼngo̱o̱ gáʼgá gajmuʼ. Ikhaa nikro̱ʼo̱o̱ má kaʼyoʼ, mú ndi̱yo̱o̱ rí nijmúu. Índo̱ niʼgúnʼ mu mañajunʼ, ku̱ma̱ ndrígóʼ niʼni gawúnʼ. Ikhú nirmáʼáan a̱jkiu̱nʼ dí naʼthí náa Efesios 5:25 ga̱jma̱a̱ 28. Lá Jeobá nindxu̱u̱ bi̱ xtáa raʼni marmáʼáan a̱jkiu̱nʼ dí ndayóoʼ mba̱yo̱o̱ xóo naku̱mu̱u̱ a̱ʼgiu̱ʼ ráʼ. Ikhú nitajkáan ga̱jma̱a̱ ni̱thu̱u̱n Lesli: “Guʼgualú”. Ikhaa ra̱ʼkhá tháán nidxuun, ni̱jkhua̱xu ga̱jma̱a̱ carro náa mbá mitsaanʼ kuaʼan mañu ga̱jma̱a̱ nixtrigaxu mantel ikhí... ra̱ʼkhá tháán nikúwáanʼxu gagi mbiʼi rúʼko̱. ¡Ga̱jma̱a̱ asndu nigúʼdoo mbiʼi dí manirataminaʼ xóo discurso!

Mbaʼa náa xuajin dí kaʼyoo circuito ndríguxu niyambáá, nagi̱ʼdu̱u̱ náa Columbia Británica asndu náa Terranova, ninindxu̱u̱ mitsaanʼ wéñuʼ xóo niñajunʼxu. ¡Ikha jngóo dí maʼgá imbríʼkhá ndi̱yo̱o̱ rí nimbánuu! Ni̱jkha̱nú mbá mbiʼi rí nindoʼ maʼgá náa Escuela de Galaad, mú na̱nguá eyoʼ rí manindxu̱ʼ misionero náa imbriʼkhá país. Niku̱mu̱ʼ dí misioneros nindxu̱ún xa̱bu̱ kiejuunʼ ga̱jma̱a̱ ikhúún nda̱yo̱o̱ dí xájmúún gáni̱. Ma̱ngaa namíñúʼ rí muthu̱nʼ maʼgá náa África náa mbá país náa rígá wéñuʼ nandii, guerra. Ga̱jma̱a̱ náa xtáá rañambáá xtáá gagi.

NITAXU RÍ MUÑAMBÁÁ NÁA ESTONIA GA̱JMA̱A̱ NÁA PAÍSES BÁLTICOS

Índo̱ niʼni tsiguʼ 1992, nindoo niguma mbu̱júu̱ ñajunʼ náa tikhu país rí kaʼyoo Unión Soviética. Ikha jngóo a̱ngiu̱lú nirajxu̱ʼ á mu dí kúwáanʼxu xawii mu̱ʼguáxu náa Estonia xóo misioneros. Numuu rí mbá nacha̱á nithuxu, ikhaa jngóo nitakháñíínʼxu Jeobá. Nindxa̱ʼwa̱míjna̱: “Á mu dí Jeobá naʼthúlú muʼni mbá, lá xáʼyóoʼ muʼni tsiakimíjna̱ ráʼ. Ikha jngóo nitha̱xu rí muʼguá ga̱jma̱a̱ nindxa̱ʼwa̱mínáʼ: “Míjiánʼ dí na̱nguá e̱jkua̱lú náa África”.

Tájyúuʼ má nigíʼdi̱i̱ nijmañuxuʼ ajngáa estonio. Na̱nguá má mba̱yu̱u̱ʼ eʼni rí kúwáanʼxu ikhí índo̱ nithuxu rí mani̱ndxu̱xuʼ circuito. Ndayóoʼ dí mu̱ʼguáxu gúñu̱u̱n a̱ngiu̱lú náa mbá 46 congregaciones ga̱jma̱a̱ 3 países bálticos ma̱ngaa náa Kaliningrado (Rusia). Ikha jngóo ndiyóoʼ majmañuxu ajngáa letón, lituano ga̱jma̱a̱ ruso, niʼniuxu wéñuʼ gakhi̱i̱. A̱ngiu̱lú nuxna̱a̱ wéñuʼ núma̱aʼ ga̱jma̱a̱ tsiaki̱i̱ rí nunixu, rúʼko̱ nambáyúxu wéñuʼ. Índo̱ niʼni tsiguʼ 1999 niguma i̱mba̱ nuxi̱ʼ sucursal náa Estonia ga̱jma̱a̱ ni̱giu̱u̱n xóo Comité gajmíʼ Toomas Edur, Lembit Reile ma̱ngaa Tommi Kauko.

Ninuʼwíinxu mbaʼin Testigos bi̱ nirawíin náa Siberia. A̱ngiu̱lú bugi̱ kúwá gagi maski ajndu kúwá mitsínguánʼ náa familia ndrígu̱ún ga̱jma̱a̱ niguáʼníí dí raʼkhí náa guʼwá ejua̱a̱nʼ, mú nditháan na̱nguá nindáti̱gu̱u̱n gagi dí mutaraʼa. Gi̱i̱ nindoo ndi̱ya̱a̱ rí maʼngulú ga̱jma̱a̱ rí ma̱ndoo makuwáanʼlu gagi maski ajndu kuwáanʼ náa mbiʼi mingíjyúuʼ.

Xóo má ejkha̱ ranújngoo tsiguʼ ga̱jma̱a̱ na̱nguá eriyáʼxu mbiʼi rí mbuyáaxuxuʼ, Lesli nigíʼdu̱u̱ niʼni néʼngo̱o̱ wéñuʼ, ndiyóo mbá nandii rí mbiʼyuu fibromialgia. Ikha jngóo nitaxu rí matangáanʼ xígií náa Canadá. Ikha jngóo índo̱ nithuxu rí muʼguá náa Escuela para miembros de Comités de Sucursal ga̱jma̱a̱ guʼñu̱ún náa Patterson (Nueva York) nindxa̱ʼwa̱mínáʼ rí xáʼngo̱o̱ muʼguáxu. Nitakáñíínxu wéñuʼ Jeobá ga̱jma̱a̱ ni̱jkuáxu. Índo̱ niguámbá curso rígi̱ ikhú Lesli nindoo niguma thanáá. Ga̱jma̱a̱ rúʼko̱ niyambáá rí ma̱ndoo munixuʼ má xúʼko̱ ñajunʼ Jeobá.

NAKHÁNUʼ I̱MBA̱ ÑAJUNʼ NÁA IMBO̱O̱ CONTINENTE

Mbá mbruʼun dí nákha tsiguʼ 2008, índo̱ kuwáanʼxu̱ má xígií mbu̱júu̱ náa Estonia, nigruígú mbá llamada náa guʼwá rí phú na̱ʼkha̱ ikha ga̱jma̱a̱ nirajxu̱ʼ á mu kuwáanʼxu̱ xawii mu̱ʼguáxu náa República Democrática del Congo. Ra̱ʼkhá tháán niʼniuʼ wéñuʼ tsiánguá, numuu rí nandún má dí imbo̱o̱ mbiʼi mathu̱u̱n á mu dí maʼngo̱o̱. Na̱nguá ni̱thu̱u̱n nimbá Lesli mbruʼun rúʼko̱ mu ma̱ndoo mi̱gu. Mú, ikhúún nitakáñuu xúgíʼ mbruʼun Jeobá numuu rí naxmiéjunʼ dí maʼgá náa África.

I̱mba̱ néjtsuu ni̱thu̱u̱n rígi̱ Lesli, ga̱jma̱a̱ nitaxu: “Jeobá nindxu̱u̱ bi̱ naʼthúlú mu̱ʼgua̱ náa África. Mú xú káʼnii eʼyáá dí xájmáán gúʼni á mu dí xóó tséʼgímijná rá.” Ikha jngóo nda̱wa̱á rí nijngoo má 16 tsiguʼ rí nikúwáanʼxu náa Estonia, ni̱jkuáxu náa Kinsasa, xuajin rí kayá edxu̱u̱ náa país rúʼko̱. Sucursal gíʼdoo mbá jardín mitsaanʼ ga̱jma̱a̱ tsímáá kri̱ga̱. Timbá kayuuʼ rí niʼni Lesli ninindxu̱u̱ rí nigíʼma mbá tarjeta náa guʼwá rí nigua̱nu̱xu rí ikhaa má niyéjxi̱i̱ asndu nákha ni̱jkuáxu náa Canadá. Ikhí naʼthí: “Náa má gídxúʼ gáxná riʼya̱a̱ʼ”. Índo̱ niniʼniúun itháán a̱ngiu̱lú, rí musngúnxu xa̱bu̱ ga̱jma̱a̱ Biblia ma̱ngaa rí nindxu̱xu̱ misionero, ndi̱ya̱a̱xu̱ dí rúʼko̱ niyambáá mu makuwáanʼxu gagi. Nda̱wa̱á ni̱jkuáxu gúñu̱u̱n a̱ngiu̱lú náa imbá 13 sucursal dí rígá náa África. Rúʼko̱ nimbáyúxu̱ muniʼnúuʼ eʼwíinʼ a̱ngiu̱lú ga̱jma̱a̱ xóo mitsaanʼ xuajñún. Nánguá nimíñúʼ xóo nákha ginii, ga̱jma̱a̱ nixna̱xu núma̱aʼ Jeobá numuu rí nikuʼmáanʼxu náa África.

Náa Congo-Kinsasa nuxnajxu̱ mixtiʼkhu enii xujkhú mu muphún rí nditháan na̱nguá niku̱mu̱xu rí muphúxu̱. Mú, índo̱ ndi̱ya̱a̱xu̱ rí a̱ngiu̱lú nanigu̱u̱nʼ wéñuʼ muphu̱u̱n, ikha jngóo mangáanʼxu ninduxu̱ʼ rí muphún, ninigu̱xu wéñuʼ.

Ma̱ngaa nindoo nimbáñún ga̱jma̱a̱ rí nda̱ñu̱únʼ a̱ngiu̱lú bi̱ kúwá xígií náa este ndrígóo país ga̱jma̱a̱ rí xóo ma̱ndoo mamba̱jxu̱ún itháán gajmiún Dios, náa kúwá mbá grupo xa̱bu̱ xkawiinʼ bi̱ nuni̱ gíníi gu̱ʼu̱ ga̱jma̱a̱ e̱ji̱n bi̱ kúwá náa xuajin. A̱ngiu̱lú na̱nguá kuaʼdáá wéñuʼ. Mú, rí xóo kuaʼdáá fe rí matujxi̱ín xa̱bu̱, rí nandún kuyáá Jeobá ga̱jma̱a̱ xuajñuu, naʼni rí maguanúxu tsiánguá. Xkri̱da ndrígu̱ún nimbáyúxu̱ wéñuʼ mu xúʼko̱ mbu̱ya̱a̱xu náá numuu rí kuwáanʼ runi̱ ñajuunʼ Jeobá ga̱jma̱a̱ nixnúxu tsiaki̱i̱. Tikhun a̱ngiu̱lú niguámbáa guʼwún ga̱jma̱a̱ ganitsu dí nirajxi̱i̱. Rígi̱ niʼni mba̱yo̱o̱ dí maraʼdáá mandáti̱ga̱a̱ nacha̱ mu rí matani̱ ñajuunʼ Dios gíʼdoo wéñuʼ numuu. Maski ajndu ra̱ʼkhá tháán migíná, mú a̱ngiu̱lú na̱nguá ejmúún ga̱jma̱a̱ numuu rúʼko̱. Rí xóo nindxu̱ún nimbáyúxu̱ mu maʼngu̱xu̱ muraʼníí gamiéjunʼ ga̱jma̱a̱ nandii rí naʼniuxu.

MBÁ NUXI̱ʼ ASIGNACIÓN: ASIA

Mbá nacha̱ nituxu rí muʼguá gákuwáanʼxu náa sucursal dí rígá náa Hong Kong. Nditháan túndxaʼwa̱míjnaxu rí mbooʼ mbiʼi muʼguáxu gákuwáanʼ náa Asia. Mú, numuu dí Jeobá má nimbáyuxu náa i̱ʼwáʼ asignación rí niguáʼdááxu, ikha jngóo túnixu ajma̱ a̱jkiu̱xu. Nákhá 2013, asndu kajti jyaʼ iduxu nitangáwúún mígiuxu ga̱jma̱a̱ xúgíʼ dí mitsaanʼ dí rígá náa África, rí asndu tséyaaxu dí gárígá.

Ra̱ʼkhá tháán nixtiʼkhuu ndiya̱a̱xu rí muʼguá gákuwáanʼxu náa Hong Kong, mbá xuajin náa kúwá xa̱bu̱ bi̱ naguwáʼ náa mbájndi numbaaʼ ga̱jma̱a̱ ndiyóoʼ rí majmañuxu ajngáa chino cantonés. Mú a̱ngiu̱lú nindriguáanʼxu májánʼ ga̱jma̱a̱ ra̱ʼkhá tháán niniguxu ganitsu rí na̱ʼphu̱. Nacha̱ eja̱a̱ ñajunʼ dí narígá náa sucursal, mú ga̱jma̱a̱ numuu rí nacha̱ etsimuu numuu mbaaʼ, Cuerpo Gobernante nindxaʼwóo májánʼ edxu̱u̱ dí sucursal maʼga̱a̱ imbríʼkhá ga̱jma̱a̱ maxtujua̱a̱ tikhu mbayuuʼ sucursal. Tájyúuʼ má mba̱yu̱u̱ʼ, índo̱ niʼni tsiguʼ 2015, nixuʼmáaʼxu muʼguá gákuwáanʼ náa Corea del Sur, náa kuwáanʼxu asndu rí mbiʼi xúgi̱. Ajngáa dí nuthi gi̱i̱ naʼñuxu gakhi̱i̱. Mú naxnúxu wéñuʼ tsiakii dí maski ajndu rígá mbaʼa rí ndayóoʼ majmañuxu, a̱ngiu̱lú nuthi rí mámbá mbiʼi najkuáxu rajmañuxu mu̱tha̱ itháan májánʼ ajngáa coreano.

RÍ NIJMAÑUNXU̱

Naʼni gakhi̱i̱ dí mataxkamiin bi̱ mambajxáaʼ gajmiáanʼ. Mú nijkuánuxu ndi̱ya̱a̱ dí á mu ikháan nunimíjna̱xu mbuʼñíinʼ ga̱jma̱a̱ á mu nindxu̱xu̱ májáanʼ xa̱bu̱, nambáyúxu muniʼnuuʼ eʼwíinʼ. Ni̱jkuánú ndi̱ya̱a̱xu̱ dí gíwánʼ náa a̱jkiu̱ún a̱ngiu̱lú nindxu̱u̱ mbóó ga̱jma̱a̱ dí Jeobá ra̱ʼkhá tháán mitsaan niʼniwáánlú rí ma̱ndoo mumbaʼtáá a̱jkiu̱lú dí maʼndulú kuʼyamijná ga̱jma̱a̱ mambájxulú (2 Cor. 6:11).

Nijmañuxuʼ dí gíʼmaa maʼnduxu kuñu̱u̱n xa̱bu̱ xó má kaʼniún, numuu dí xúʼko̱ eʼni Jeobá, ga̱jma̱a̱ dí munimíjna̱xu mbu̱ya̱a̱ xóo eyoo kaʼyulú Jeobá ga̱jma̱a̱ xóo exná ikhulú mu makuwáánʼ. Índo̱ nakumulú dí nakáguabáánʼ o nurajximíjna̱ á mu nanigu̱u̱nʼ eʼwíinʼ dí nuʼni, gutanga̱án muraxnuu tarjetas o cartas dí nixnulu bi̱ nambájxulú gajmiúlú. Ikháanʼxu̱ ni̱jkuánú ndi̱ya̱a̱ dí Jeobá nariʼña̱a̱ dí nuʼtájkáan, naʼni̱i̱ a̱jkiu̱lú ga̱jma̱a̱ naxnúlú tsiaki̱i̱.

Náa mba̱yu̱u̱ʼ tsiguʼ, Lesli ga̱jma̱a̱ ikhúún ni̱jkuánú ndi̱ya̱a̱xu̱ dí tséʼniuu á mu kuaʼdááxu̱ wéñuuʼ ñajunʼ ndayóoʼ tsiaki̱i̱ muríyaxu mbiʼi mu makuwáanʼxu mbóó. Ma̱ngaa nijmañuxuʼ dí gíʼdoo numuu mundu̱ʼwaxu ga̱jma̱a̱ numuu dí nu̱ni̱xu̱, xóo índo̱ nuniga̱jma̱a̱ mu̱tixu i̱mba̱ ajngáa. Mámbá wakíʼ nundxaʼwamíjna̱xu náa mbá dí niniguxu̱ʼ ga̱jma̱a̱ nuxna̱a̱xu núma̱a̱ Jeobá.

Gajkhun dí niku̱mu̱ʼ dí xájmúún gánindxu̱ʼ misionero ga̱jma̱a̱ dí maxtáá náa i̱ʼwáʼ país. Mú ni̱jkhánú ndi̱yo̱o̱ dí á mu Jeobá nambáyulú xúgíʼ ma̱ndoo muʼni, rúʼko̱ naʼni dí maxtáá gagi wéñuuʼ. Naku̱mu̱ʼ xó má niʼthí profeta Jeremías: “Nitani̱ nduwúúnʼ, Jeobá” (Jer. 20:7). Gajkhun nindxu̱u̱ ajngáa rígi̱, numuu dí ikhaa naʼni mbaʼa dí mitsaan ga̱jma̱a̱ numulú ma̱ngaa naʼni tsajkurámáánʼ. ¡Asndu nimbánuu dí nindoʼ maʼgá ga̱jma̱a̱ avión! Ni̱jkuáxu ga̱jma̱a̱ avión náa xuajin dí ikhúún nindxa̱ʼwa̱mínáʼ maʼgá nákha chíʼgiúúnʼ asndu náa xuajin dí na̱nguá nindxa̱ʼwa̱mínáʼ. Ni̱jkuáxu náa mbá witsu sucursal dí rígá náa mixtiʼkhu xuajin. Naxna̱a̱ wéñuuʼ núma̱a̱ Lesli, numuu dí ikhaa nimbáyúʼ wéñuuʼ náa mbá xúgíʼ asignación dí nindrígúxu.

Narmáʼáan má xúʼko̱ a̱jkiu̱xu̱ tsáá ñajuunʼ e̱ni̱xu ga̱jma̱a̱ náá numuu dí nu̱ni̱xu̱. Dí xóo naguma tsajkurámáánʼ xúgi̱ nindxu̱u̱ mbá chíʼgíiʼ xóo gánindxu̱u̱ índo̱ gákuwáánʼ kámuu mbiʼi, índo̱ Jeobá gámbáʼtoo ñawúunʼ maxnún xúgíʼ dí gáʼñúún xa̱bu̱ numbaaʼ (Sal. 145:16).