Náa xúgíʼ mbiʼi nijmañuxuʼ náa bi̱ Najmañuu Naʼsngáa

XKRIDOO ANU̱ʼ GA̱JMA̱A̱ RU̱DÚʼ

Nákha tsiguʼ 1957, anu̱ʼ ga̱jma̱a̱ ru̱dúʼ nigájnún náa Italia ga̱jma̱a̱ nigún gákuwá náa Canadá, náa mbá xuajin chíʼgíiʼ dí mbiʼyuu Kindersley, xuajin rí naʼtáñajunʼ Saskatchewan. Nda̱wa̱á ikhiin niguánú nijmañún dí gajkhun ga̱jma̱a̱ rígi̱ nijkha̱nú nigiʼdoo numuu náa ikháanʼxu̱. Narmáʼáan a̱jkiu̱nʼ dí nákha chíʼgiúúnʼ nagájnuʼ mbayuʼ gátaraʼa gajmíʼ familioʼ, ikha jngóo nguáná índo̱ natsíjma natha rí asndu nákhá nigúʼdoo 8 tsiguʼ nindxu̱ʼ má precursor auxiliar.

Anu̱ʼ ga̱jma̱a̱ ru̱dúʼ na̱nguá guáʼdáá wéñuuʼ mbújkha̱a̱, mú nini̱ xó má eʼngo̱o̱ mu muni̱ ñajuunʼ Jeobá. Mbá xkri̱da, nákhá 1963 nirígá mbá asamblea internacional náa Pasadena (California, Estados Unidos). Ikhiin nindúún magún, ikha jngóo nigujua̱a̱ mbaʼa rí kuaʼdáá mu makánún mbújkha̱a̱. Tsiguʼ 1972 ni̱jkuáxu gákuwáanʼ náa mbá xuajin chíʼgíiʼ dí mbiʼyuu Trail, mu mutarúʼún xa̱bu̱ bi̱ nuthi ajngáa italiano, xuajin rígi̱ naguánúu mitsínguánʼ náa kuwáanʼxu̱, xuajin rí naʼtáñajunʼ Columbia Británica (Canadá). Anu̱ʼ nañajunʼ náa naguma májáanʼ guʼwá ga̱jma̱a̱ náa naguma kaʼwi̱i̱. Tágruigú maʼni ñajunʼ náa madaaʼ itháan mba̱a̱ mbújkha̱a̱ mu xúʼko̱ maʼni ginii ñajuunʼ Jeobá.

Naxnáa núma̱aʼ anu̱ʼ ga̱jma̱a̱ ru̱dúʼ numuu dí ikhiin nigíʼ mbá májánʼ xkri̱da náa ikhúún ga̱jma̱a̱ náa ajtsíin a̱ngui̱nʼ. Xkri̱da ndrígu̱ún nimbáyuʼ maʼgíʼ ma̱ni̱ ginii ñajuunʼ Jeobá ga̱jma̱a̱ niʼsngóo mbá dí mambáyuʼ náa xúgíʼ mbiʼi dí gáxtáa. Dí á mu naʼgíʼ ndaʼyáʼ ginii ma̱ni̱ ñajuunʼ Dios, Jeobá má gáñewu̱u̱n (Mat. 6:33).

NAGÍʼDU̱U̱ NA̱NI̱ KÁJXI̱ ÑAJUUNʼ JEOBÁ

Nákha 1980, niniʼgúnʼ gajmuʼ mbáa ndxájulú mitsiʼyáa bi̱ mbiʼyuu Debbie, ikhaa nagíʼ naʼni ginii ñajuunʼ Jeobá. Mbá nájmáanʼ ninduxu̱ʼ muni̱ kájxi̱ ñajuunʼ Jeobá. Ikha jngóo índo̱ niʼni má ajtsú igu̱nʼ dí nidamijnáxu, Debbie ninindxu̱u̱ precursora. Mbá tsiguʼ nda̱wa̱á ni̱jkuá gákuwáanʼ náa rígá mbá congregación chíʼgíiʼ, náa ndayóo miʼtáraʼa ga̱jma̱a̱ ikhúún mangúún ninindxu̱ʼ precursor.

Índo̱ mbayuʼ má kúwáanʼxu ikhí, nikawabáanʼxu ga̱jma̱a̱ ninduxu̱ʼ muniʼñááʼ congregación, mú ginii nitamíjná gajmiúxu ndxájulú circuito. Ikhaa niʼthúxu mbájmbu: “Ikháanʼ má nu̱nila rí maʼni mba̱a̱ xkujndu ndrígala, numuu dí nundxa̱ʼwa̱míjnala wéñuuʼ ga̱jma̱a̱ numuu rí tséʼngala gúni o rí tsénigua̱la”. Ga̱jma̱a̱ niʼtúxu rí mundxaʼwamíjna̱xu náa dí májánʼ rí xtáa rarígá. Rígi̱ dí phú ndiyúxu mudxawíín (Sal. 141:5). Nini̱xu xó má niʼthúxu ndxájulú ga̱jma̱a̱ ikhú nijkuánuxu ndi̱ya̱a̱ dí mbaʼa rí májánʼ xtáa rarígá. Mbaʼin bi̱ kúwá náa congregación nandún muni̱ itháan ñajuunʼ Jeobá, asndu e̱ji̱n ga̱jma̱a̱ tikhuun a̱ngiu̱lú gu̱ʼu̱ bi̱ guáʼdiin ajmbiu̱ún bi̱ na̱nguá nindxu̱ún Testigos, rígi̱ niʼsngúxu dí gíʼdoo wéñuuʼ numuu, dí mundxaʼwamíjna̱ i̱ndó náa dí májánʼ rí xtáa rarígá. Ga̱jma̱a̱ dí maku̱mu̱xu ku̱ya̱a̱ Jeobá dí ikhaa má gáʼnimbánuu asndu káʼníí má xkujndu náa mbiʼi rí kaʼyoo (Miq. 7:7). Mbu̱júu̱ nikúwáanʼxu gagi ga̱jma̱a̱ nikúwáanʼxu májánʼ.

Timbá aʼphu̱ dí ni̱jkuáxu náa escuela ndrígún precursores, nikúwá a̱jkhui̱i̱n a̱ngiu̱lú bi̱ nisngáa. Ajtsíin dí ikhiin nikúwá runi̱ ñajuunʼ Jeobá náa i̱mba̱ níʼkhá xuajin, nisngajmúxu fotos ga̱jma̱a̱ nituxu̱ xkujndu dí niraʼníí ma̱ngaa xóo Jeobá niʼni tsajkurámíinʼ. Rígi̱ niʼni dí mangáanʼxu̱ muʼgímijna mani̱ndxu̱xuʼ misioneros.

Numuu dí ninduxu̱ʼ muni̱ ratamíjná, ikha jngóo nákhá 1984 ni̱jkuáxu gákuwáanʼ náa Quebec, dí naʼni itháan rí 4,000 kilómetros dí mitsínguánʼ asndu náa Columbia Británica. Ikhí nuthi ajngáa francés, ikha jngóo ndiyóo majmañuxu i̱mba̱ nuxi̱ʼ ajngáa ga̱jma̱a̱ maguʼunxu̱ xóo kúwá xa̱bu̱ ikhí. Mbaʼa nuthu na̱nguá niguáʼdáá mbújkha̱a̱ dí ndiyúxu. Mbá míʼtsú mbáa xa̱bu̱ bi̱ gíʼdoo mbá granja niniñuuʼ dí murajxi̱i̱ papa dí naguanáa náa nudu, ikha jngóo i̱ndó niguáʼdáá papa mu mu̱púxuʼ. Debbie mbaʼa enii xóo niʼni mújúunʼ papa ga̱jma̱a̱ miʼtsí má nigájnuu. Maski ajndu nirígá mbaʼa dí niʼniuxu̱ gakhi̱i̱, mu niʼngu̱xu niraʼníí xúgíʼ rígi̱ ga̱jma̱a̱ gagi. Ma̱ngaa ndiʼyáá mbájmbu xóo Jeobá xtáa rañewunxu̱ (Sal. 64:10).

Mbóo mbiʼi nindrígúxu llamada dí na̱nguá kuáʼti̱i̱n, nituxu̱ muʼgua náa Betel dí rígá náa Canadá. Mbaʼa dí ni̱ʼkha̱ edxuxu ga̱jma̱a̱ dí nikumuxu numuu dí nákhá wapháá nixuʼmáxu solicitud dí nandu̱xu mu̱ʼguáxu náa Escuela ndrígóo Galaad, mú niraʼwííxu má muʼgua náa Betel. Índo̱ nijkuánuxu nirajxi̱i̱ ndxájulú Kenneth Little, bi̱ nindxu̱u̱ Comité ndrígóo Sucursal: “Ndiéjunʼ gúnixu̱ á mu nutuxu muʼgua náa Galaad rá.” Ikhaa niriʼña̱a̱: “Mbuʼyáálú má ikhú, índo̱ gútala maʼguala”.

Mbá xmáná nda̱wa̱á Debbie ga̱jma̱a̱ ikhúún nituxu̱ muʼgua náa Galaad, ikha jngóo ndiyóo muraʼwi̱i̱ májánʼ dí mu̱nixu̱. Ndxájulú Little niʼthúxu: “Asndu ndiéjunʼ má dí gura̱ʼwi̱i̱la muni̱, mbáa marigá mbá mbiʼi dí mundxa̱ʼwa̱míjna̱la dí itháan má májánʼ á mu dí i̱mba̱ dí niraʼwi̱i̱la muni̱. Nda̱a̱ mbá kamba̱a̱ dí nindxu̱u̱ itháan májánʼ, Jeobá ma̱ndoo maʼni tsajkurámuuʼ asndu ndiéjunʼ má”. Niraʼwi̱i̱xu muʼgua náa Galaad, ga̱jma̱a̱ náa xúgíʼ tsiguʼ rígi̱, ndiyaxu̱ dí gajkhun má dí niʼthí ndxájulú Little. Nguáná ikháanʼxu̱ nuʼthúún ajngáa rígi̱ a̱ngiu̱lú bi̱ tséyáá ndiéjunʼ gúraʼwi̱i̱ mu muni̱ ñajuunʼ Jeobá.

ÍNDO̱ NININDXU̱XUʼ MISIONEROS

Ra̱ʼkhá tháán nikuwáanʼxu gagi dí nindoo ni̱jkuáxu náa clase 83 ndrígóo Galaad, gajmiúxu mbá 22 a̱ngiu̱lú, nigi̱ʼdu̱u̱ nákhá abril tsiguʼ 1987 náa Brooklyn (Nueva York). Bi̱ nisngáa ninindxu̱ún a̱ngiu̱lú Ulysses Glass ga̱jma̱a̱ Jack Redford. Tájyúuʼ nijngoo dí witsu igu̱nʼ ga̱jma̱a̱ nirámuxu nákha 6 ñajunʼ gu̱nʼ septiembre. Nixuʼmánʼxu muʼgua náa Haití gajmiúxu John ga̱jma̱a̱ Marie Goode.

Ikháanʼxu̱ ninindxu̱xuʼ timbíin misioneros bi̱ nagún náa Haití asndu nákha 1962, índo̱ misioneros bi̱ kúwá ikhí ndiyóo magajníín náa xuajin. Ajtsú xmáná nda̱wa̱á dí nirámuxu náa Galaad, niguáʼdi̱i̱ niyambáá náa mbá congregación chíʼgíiʼ náa kúwá 35 publicadores dí rígá náa ta̱pha̱ kúbá. Xóó na̱nguá waniáanʼxu, ikha jngóo rígá mbaʼa dí majmañuxu. I̱ndó ikháanʼ nikúwáanʼxu náa guʼwá dí nakhánún makuwá misioneros. Xa̱bu̱ bi̱ kúwá náa Haití ra̱ʼkhá tháan mingíníi ga̱jma̱a̱ mbaʼin dí ikhiin tséjmañuu gúraxnuu. Índo̱ nikúwáanʼxu ikhí, xa̱bu̱ nijmangu̱u̱nʼ ga̱jma̱a̱ numún xa̱bu̱ ñajunʼ, nindúún muriya̱a̱ʼ bi̱ naʼtáñajunʼ, nini̱ plantón, ma̱ngaa nitsikha dí nuruguáá ga̱jma̱a̱ kamba̱a̱, ma̱ngaa nixnúu ruʼwa mbiiʼ.

Mbaʼa dí nijmañuxuʼ náa a̱ngiu̱lú bi̱ kúwá náa Haití. Ikhiin naguájun jmbu maski ajndu nuraʼníí mbaʼa xkujndu, nandún kuyáá Jeobá ga̱jma̱a̱ nanigu̱u̱nʼ mutaraʼa. Mbáa ndxájulú nikhi̱i̱ bi̱ tséjmañuu gáguxnuu, nigídáʼ edxu̱u̱ mbá 150 textos ndrígóo Biblia. Índo̱ ndi̱ya̱a̱xu̱ xóo kúwá rumíniiʼ xa̱bu̱, nixkajxáánʼ muʼthúún ga̱jma̱a̱ numuu Xa̱bu̱ Ñajuunʼ ndrígóo Dios dí i̱ndó ikhaa maʼngo̱o̱ maʼnimbánuu xkujndu dí rígá náa numbaaʼ. Ra̱ʼkhá tháan nadxuxu índo̱ nduya dí tikhuun xa̱bu̱ bi̱ niguáʼdi̱i̱ nisngúún ga̱jma̱a̱ Biblia niguanúʼ ninindxu̱ún precursores regulares, precursores especiales ga̱jma̱a̱ ancianos.

Náa Haití niniʼníiʼ mbáa dxámá bi̱ nindxu̱u̱ misionero mormón bi̱ mbiʼyuu Trevor, mbaʼa nuthu nindoo nitamíjnáxu ga̱jma̱a̱ numuu Biblia. Nguáthá tsiguʼ nda̱wa̱á ra̱ʼkhá tháan niʼniuʼ tsiánguá dí nikuʼma mbá carta náa naʼthí: “Majngu̱ʼ iyááʼ náa asamblea dí marigá, nandoʼ matangu̱ún Haití mu mani̱ndxu̱ʼ precursor especial náa nixtáa nákha ninindxu̱ʼ misionero mormón”. Ga̱jma̱a̱ xúʼko̱ má nirígá, mbayuʼ tsiguʼ nixtáa ikhí mbóó ga̱jma̱a̱ a̱ʼgiu̱u̱.

NI̱JKUÁXU EUROPA NDA̱WA̱Á NÁA ÁFRICA

Nixuʼmanʼxu muʼgua náa Europa, ikhí ndiʼkhún eniñu̱nʼ a̱ngiu̱lú muni̱ mbu̱júu̱ ñajuunʼ Jeobá. Nákhá 1992 nijkuánuxu náa Liubliana (Eslovenia). Náa mijngii xuajin rí anu̱ʼ ga̱jma̱a̱ ru̱dúʼ niganii, nákhá xóó tségún gakuwá náa Italia. Nákha tsiguʼ rúʼko̱ kaʼníí xtáa rarígá guerra náa mbaaʼ rí nákha niʼníí najmaʼnuuʼ xóo Yugoslavia. Sucursal dí rígá náa Viena (Austria) ga̱jma̱a̱ oficinas dí rígá náa Zagreb (Croacia) ga̱jma̱a̱ Belgrado (Serbia), kúwá ruxna ikha náa mbaaʼ rúʼko̱. Mú rí xúgi̱, mbá nájkhu̱ xuajin dí nákha ginii kaʼyoo xuajin Yugoslavia mbaʼyóoʼ magiʼdoo Betel ndrígóo.

Ikha jngóo ndiyóo majmañuxu i̱mba̱ ajngáa ma̱ngaa magu̱ʼwu̱nxu i̱mba̱ núthu xóo kúwá xa̱bu̱ ikhí. Xa̱bu̱ Eslovenia nituxu̱: “Dí majmañaaʼ i̱mba̱ ajngáa nindxu̱u̱ gakhi̱i̱”. Gajkhun má dí nithi. Ra̱ʼkhá tháán ni̱ni̱gu̱xu̱ índo̱ ndi̱ya̱a̱ dí a̱ngiu̱lú naguájun jmbu ga̱jma̱a̱ kúwá xawii munimbu̱u̱n índo̱ rígá mbá dí nariʼkhu̱u̱ xuajñuu Jeobá ga̱jma̱a̱ ndi̱ya̱a̱xu̱ xóo Jeobá niʼni tsajkurámíinʼ ga̱jma̱a̱ numuu rígi̱. Mbu̱júu̱ nijkuánuxu ndi̱ya̱a̱ dí Jeobá naʼnimbánuu xkujndu náa mbiʼi rí kaʼyoo, mbaʼa dí nijmañuxuʼ náa xúgíʼ tsiguʼ dí nikúwáanʼxu náa Eslovenia. Ma̱ngaa dí nijmañuxuʼ má nákha ginii nimbáyúxu̱ muraʼníí xkujndu dí nikágaa inuxu̱ʼ.

Mbu̱júu̱ má nixtiʼkhuu xóo nikúwáanʼxu. Tsiguʼ 2000, nixúʼmanʼxu náa Costa de Marfil, África Occidental. Mú nigíʼdu̱u̱ nirígá mbá guerra, ikha jngóo nákha noviembre tsiguʼ 2002, nigún kudáanʼxu náa Sierra Leona. Ikhí ndiʼkhún nijngoo dí nirígá guerra rí ndijyúuʼ 11 tsiguʼ. Niʼniuxu̱ gakhi̱i̱ dí mbá nacha̱á magajnúxu náa Costa de Marfil, mú xúgíʼ dí nijmañuxuʼ nákha ginii nimbáyúxu̱ mu makuwáanʼxu má xúʼko̱ gagi.

Nindxa̱ʼwa̱míjna̱xu ga̱jma̱a̱ numún xa̱bu̱ bi̱ nanigu̱u̱nʼ majmañún dí gajkhun bi̱ kúwá ikhí, ma̱ngaa dí a̱ngiu̱lú nusngájma nusngajma ngajua. Maski ajndu ngíníi mu nindúún muxná dí guáʼdáá, mbáa ndxájulú a̱ʼgu̱ nindoo mamini̱nʼ tikhu xtiin Debbie. Nákhi wapháá Debbie nindoo maʼthúu̱n dí xágruigú, mú ndxájulú niʼni káñuu dí maguéʼga, ga̱jma̱a̱ niʼthúu̱n: “Índo̱ nirígá guerra, a̱ngiu̱lú bi̱ kúwá náa i̱mba̱ níʼkhá xuajin, nimbayúxu̱, mú rí xúgi̱, ikháanʼ nanduxuʼ mumbáñún a̱ngiu̱lú”. Ikha jngóo mangáanʼ niʼgímíjnaxu̱ mbuʼyaridúún a̱ngiu̱lú bugi̱.

Itháan nda̱wa̱á nitangáanʼxu náa Costa de Marfil, mú xkujndu dí niʼni xa̱bu̱ ñajunʼ niʼni dí xa̱bu̱ magi̱ʼdu̱u̱n mbu̱júu̱. Ikha jngóo nákha noviembre tsiguʼ 2004, nigún kudáanʼ ga̱jma̱a̱ helicóptero, mámbáa káaʼ nindoo ndiyá mbá mochila dí ki̱wu̱n 10 kilo. Niguanúxu ninuʼxu mbayíʼ náa kúwíin soldado francés, i̱mba̱ mbiʼi nigún kudáanʼxu ga̱jma̱a̱ avión náa Suiza. Itháan maʼni tikhu mbruʼun nijkuánuxu náa sucursal. Ra̱ʼkhá tháán nikúwáanʼxu gagi índo̱ ndi̱ya̱a̱ dí Comité ndrígóo Sucursal ga̱jma̱a̱ bi̱ nusngáa náa Escuela de Entrenamiento Ministerial gajmiún guʼñún kúwá raguáʼtunxu, nidaraʼánxuʼ, kuda ganitsu dí mijkha ma̱ngaa kuda mbaʼa chocolate dí naguma náa Suiza.

Nixuʼmáanʼxu muʼgua mbá xngaa náa Ghana ga̱jma̱a̱ índo̱ nijxoo xkujndu, nitangáanʼxu náa Costa de Marfil. Ngajua dí nisngájma a̱ngiu̱lú nimbáyúxu̱ mu muraʼníí mbá xúgíʼ xkujndu, xóo índo̱ nigún kudáanʼ i̱mba̱ níʼkhá xuajin ga̱jma̱a̱ índo̱ ninimbániixu mixtiʼkhu enii ñajunʼ náa mámbá congregación. Debbie ga̱jma̱a̱ ikhúún nitamíjnáxu dí maski ajndu náa xuajñuu Jeobá ngajua nindxu̱u̱ dí itháan gíʼmaa magájnuriyo̱o̱ʼ mú nditháan xúniʼñáánʼ ruxnáá núma̱aʼ ga̱jma̱a̱ numuu rígi̱. Ikha jngóo náa xúgíʼ gamiéjunʼ dí niraʼnííxu nijmañuxu mbaʼa dí gíʼdoo numuu rí nimbáyúxu̱ náa makuwáanʼ runi̱ ñajuunʼ Jeobá.

NIKÁNUXU I̱MBA̱ ASIGNACIÓN

Nákha 2006, nindrígúxu mbá carta rí na̱ʼkha̱ náa Guʼwá rí phú na̱ʼkha̱ ikha. Ikhí nituxu̱ dí nikánuxu i̱mba̱ nuxi̱ʼ asignación. Nixuʼmáanʼxu muʼguaaʼ náa Asia occidental (Oriente Medio). Rígi̱ nandoo gáʼthúu̱n dí maxtiʼkhuu xóo kuwáanʼxu̱, muraʼníí i̱ʼwáʼ xkujndu, majmañuxu i̱mba̱ ajngáa ga̱jma̱a̱ maguʼunxu xóo kúwá xa̱bu̱ ikhí. Rígá mbaʼa rí majmañuxu náa xuajin dí xa̱bu̱ nagiʼdu̱u̱n ga̱jma̱a̱ numún xa̱bu̱ ñajunʼ ga̱jma̱a̱ náa xa̱bu̱ guáʼdáá má religión ndrígún. Mú niniguxu̱ʼ dí náa congregación kúwá mbaʼin a̱ngiu̱lú bi̱ naguwáʼ náa mixtiʼkhu xuajin, ikha jngóo nuthi mixtiʼkhu ajngáa. Ma̱ngaa niniguxu̱ʼ dí kúwá mbóo jnduʼ numuu dí nunimbu̱ún ikha dí nikhánún. Ra̱ʼkhá tháán nixnúxu̱ tsiaki̱i̱ índo̱ ndiʼyáá dí mbaʼin a̱ngiu̱lú naguájun jmbu índo̱ tsíñún gúñún bi̱ kúwá náa guʼwún, compañeriu̱u̱n náa escuela, bi̱ nuñajunʼ gajmiún o bi̱ kúwá náa mijngii guʼwún.

Nákhá 2012 nikúwáanʼxu náa asamblea dí nirígá náa Tel Aviv (Israel). Asamblea rígi̱ ninindxu̱u̱ kiejunʼ numuu rí nindxu̱u̱ timbá aʼphu̱ dí ra̱ʼkhá tháan mbaʼin xa̱bi̱i̱ Jeobá nigimbíin náa mbaaʼ rígi̱ asndu nákhá tsiguʼ 33 dí nirígá ndxa̱a̱ Pentecostés.

Tsiguʼ rúʼko̱ nixuʼmáanʼxu muʼgua náa mbá xuajin dí tséniñu̱u̱nʼ dí a̱ngiu̱lú muni̱ ñajuunʼ Jeobá. Ni̱jkua̱ ku̱ʼda̱ tikhu i̱yi̱i̱ʼ, ni̱jkua̱ gúʼtáraʼa ga̱jma̱a̱ ni̱jkuáxu tikhu asamblea náa káaʼ nguéjmi̱i̱n a̱ngiu̱lú egimbíin. Kúwá soldados kuda ajua̱nʼ ga̱jma̱a̱ asndu náá kúwá ruñewa̱a̱n. Mú tamíñuxu numuu dí tikhuun a̱ngiu̱lú bi̱ kúwá ikhí, nigún ga̱jma̱a̱ nindxu̱xu̱ ma̱ngaa nimbáyúxu̱ mu nguʼwáá gájngruigu̱xu̱.

NATANGÁANʼXU NÁA ÁFRICA

Nákhá tsiguʼ 2013, i̱mba̱ núthú asignación nikhánuxu, nituxu̱ dí muʼgua náa sucursal dí rígá náa Kinsasa (República Democrática del Congo). Ra̱ʼkhá tháán mba̱a̱ xuajin, mitsaanʼ dí rígá ikhí, mú ra̱ʼkhá tháán mingíníi xa̱bu̱ ga̱jma̱a̱ nagiʼdu̱u̱n má xúʼko̱. Nákhá wapháá ni̱taxu: “Nuniʼnúuʼ má África, nikuwáánʼlú má ikhí, nduʼyáálú má xóo gákuwáanʼ”. Mú nirígá mbaʼa dí ndiyóoʼ majmañuxu. Xóo dí majngruiguxuʼ náa nda̱a̱ carretera ni má puente. Maski ajndu xúʼko̱, ndi̱ya̱a̱xu̱ i̱ndó dí májánʼ dí rígá ikhí, xóo dí naʼngo̱o̱ a̱jkiu̱ún a̱ngiu̱lú ga̱jma̱a̱ dí kúwá gagi maski ajndu nda̱a̱ mbújkha̱a̱, dí nanigúnʼ mutaraʼa ma̱ngaa tsiaki̱i̱ dí nuni̱ mu magún reunión ga̱jma̱a̱ asamblea. Ndiyaxu xóo Jeobá nimbáñún mu maʼni itháan mbaʼin a̱ngiu̱lú. Xúgíʼ tsiguʼ dí nikúwáanʼxu náa Congo-Kinsasa nijmañuxuʼ mbaʼa dí gíʼdoo wéñuuʼ numuu ga̱jma̱a̱ niguáʼdiin mbaʼin bi̱ nimbájxuxu gajmiúxu bi̱ niguánu ninindxu̱ún xóo familiuxu̱.

Índo̱ na̱jkha̱ rámbá tsiguʼ 2017, nixuʼmáanʼxu muʼgua náa Betel dí rígá náa Sudáfrica, rígi̱ nindxu̱u̱ Sucursal dí itháan mba̱a̱ náa nikúwáanʼxu. Ikhí nikhánuxu ñajunʼ dí nditháan túnixu nákha ginii, mbu̱júu̱ má nirígá mbaʼa dí ndiyóo majmañuxu, mú nimbáyúxu̱ wéñuuʼ xúgíʼ dí nijmañuxuʼ nákha ginii. Kúwá mbaʼin a̱ngiu̱lú bi̱ mbayuʼ má kúwá runi̱ ñajuunʼ Jeobá ga̱jma̱a̱ nanduxuʼ kuñu̱u̱n. Ra̱ʼkhá tháán mitsaanʼ nindxu̱u̱ Betel, kúwá mbá jnduʼ maski ajndu kúwíin mbaʼin enii a̱ngiu̱lú ga̱jma̱a̱ mixtiʼkhu xuajin náa naguwáʼ. Nakujmaa xóo Jeobá naʼni tsajkurámíinʼ xa̱bi̱i̱, naʼni dí makuwá tsímáá numuu dí ikhiin nuriʼkhumijnáa, nugíʼ nunimbáníí ikha dí na̱ʼkha̱ náa Biblia.

Náa xúgíʼ tsiguʼ rígi̱ Debbie ga̱jma̱a̱ ikhúún mbaʼa asignación dí ra̱ʼkhá tháan nagui̱i̱ nikhánúxu, niguʼunʼxu xóo mixtiʼkhu enii kúwá a̱ngiu̱lú ga̱jma̱a̱ nijmañuxuʼ eʼwáʼ ajngáa. Maski ajndu nguáná niʼniuxu̱ gakhi̱i̱, mú ndiya̱xu̱ xóo Jeobá nijmiuu a̱ngiu̱lú mu masngájma dí nandoo kaʼyuxu̱ (Sal. 144:2). Xúgíʼ dí nijmañuxuʼ náa nikúwáanʼxu runi̱ kájxi̱ ñajuunʼ Jeobá, nimbáyúxu̱ mu mani̱ndxu̱xuʼ itháan míjíinʼ xa̱bu̱.

Naxnáa núma̱aʼ anu̱ʼ ga̱jma̱a̱ ru̱dúʼ numuu dí nisngóʼ, ma̱ngaa a̱ʼgiu̱ʼ Debbie náa xúgíʼ rí nimbáyuʼ. Ma̱ngaa ga̱jma̱a̱ numuu májánʼ xkri̱da dí nugíʼ a̱ngiu̱lú náa xúgíʼ numbaaʼ. Índo̱ nundxaʼwamíjna̱xu dí marigá nda̱wa̱á kuwáanʼxu̱ xawii mu majmañuxu má xúʼko̱ náa bi̱ Najmañuu Naʼsngáa.