Rí najmañulú náa milagro ga̱jma̱a̱ numuu pan

1. Ndíjkha dí nigiʼdoo wéñuuʼ numuu pan nákha wajyúuʼ rá.

PAN nindxu̱u̱ ganitsu dí itháan naʼphu̱ nákha wajyúuʼ (Gén. 14:18; Luc. 4:4). Ra̱ʼkhá tháán nigiʼdoo numuu dí mbaʼa nuthu náa Biblia najmuu mu maʼthí ga̱jma̱a̱ numuu ganitsu (Mat. 6:11; Hech. 20:7). Ma̱ngaa Jesús nijmuu pan mu maʼni a̱jma̱ milagro dí najmaʼnuuʼ májánʼ (Mat. 16:​9, 10). Guʼyáá ga̱jma̱a̱ numuu mbá milagro dí ikhaa niʼni dí na̱ʼkha̱ raʼthí náa Juan capítulo 6, ga̱jma̱a̱ guʼyáá ndiéjunʼ gáʼsngúlú dí mbiʼi xúgi̱.

2. Nguáná ndiñún’ ganitsu mbaʼin wéñuuʼ xa̱bu̱ rá.

² Apóstoles ndrígóo Jesús ra̱ʼkhá tháán niʼni néʼngu̱u̱n numuu dí nigún gutaraʼa mitsínguánʼ. Ikha jngóo nikidaa gajmíi̱n náa ridoo lamáa ndrígóo Galilea, ni̱jkha̱ kagui̱i̱n mitsínguánʼ náa ma̱ndoo mbuya̱a̱ jxu̱ún náa mijngii xuajen Betsaida (Mar. 6:​7, 30-32; Luc. 9:10). Mú, ikhí niguánu mbaʼin xa̱bu̱ bi̱ nigún guyáá Jesús. Ikhaa nigriguíin májánʼ, niríyaʼ mbiʼi mu maʼthúún ga̱jma̱a̱ numuu Xa̱bu̱ ñajunʼ ndrígóo Dios ga̱jma̱a̱ niʼni thanún bi̱ niʼniuu nandii. Numuu dí ni̱jkha̱ raʼni wakíʼ má, ikha jngóo xa̱bi̱i̱ Jesús nirajximijna ndiéjunʼ gándoo muni̱ xa̱bu̱ buʼko̱ mu mbuyáaʼ dí muphu. Mbáa tikhuun dí ikhiin kuda má mbá chíʼgíiʼ dí muphu, mú mbaʼin ndayóoʼ magún asndu náa xuajin gúyáʼ mutsi dí muphu (Mat. 14:15; Juan 6:​4, 5). Ndiéjunʼ gáʼni Jesús rá.

NIʼNI MBÁ MILAGRO MU MAXNÚN PAN

3. Ndiéjunʼ niʼni Jesús índo̱ ndiʼyoo rí ndañún xa̱bu̱ rá. (Atayáá ma̱ngaa xtiʼkhuu dí na̱ʼkha̱ náa.)

³ Jesús niʼthúún apóstoles ndrígióo: “Tséyóoʼ má magúun, guxnu̱u̱n má ikháanʼ rí mu̱phu̱” (Mat. 14:16). Rígi̱ ninindxu̱u̱ mingíjyúuʼ numuu dí nikúwá mbá 5,000 xa̱bekha, ga̱jma̱a̱ á mu nigixniin gu̱ʼu̱ ma̱ngaa i̱ji̱n, mbáa naʼni 15,000 xa̱bu̱ (Mat. 14:21). Andrés niʼthí: “Gi̱jyooʼ xtáa mbáa ada̱ bi̱ kagu̱ witsu pan ga̱jma̱a̱ a̱jmi̱i̱n e̱gi̱ʼ. Mú, lá maʼngo̱o̱ rígi̱í mu̱phu̱ xúgíinʼ xa̱bu̱ bugi̱ ráʼ.” (Juan 6:9.) Pan ndrígóo cebada nijmaʼnuuʼ nákha ikhú ga̱jma̱a̱ na̱nguá minumuu wéñuuʼ, ma̱ngaa e̱gi̱ʼ mbáa nijnduwiin ga̱jma̱a̱ mbríníi. Mú, rúʼko̱ xáʼngo̱o̱ muphu xúgíinʼ xa̱bu̱ buʼko̱.

4. Ndiéjunʼ eʼsngúlú dí na̱ʼkha̱ raʼthí náa Juan 6:​11-13 rá. (Atayáá ma̱ngaa xtiʼkhuu.)

⁴ Numuu dí Jesús nindoo maxnún dí muphu xa̱bu̱ ikha jngóo niʼthúún dí mutrigi̱i̱n mámbá guéjmi̱i̱n náa rajxa̱ (Mar. 6:​39, 40; atraxnuu Juan 6:​11-13). Náa Biblia naʼthí dí Jesús nixnáa núma̱aʼ Anu̱u̱ ga̱jma̱a̱ numuu pan ma̱ngaa ga̱jma̱a̱ numún e̱gi̱ʼ. Májánʼ wéñuuʼ dí xúʼko̱ niʼni, numuu dí Dios nindxu̱u̱ bi̱ phú niʼni dí marigá ganitsu. Rígi̱ naʼni marmáʼáan a̱jkiu̱lú dí ndayóoʼ mbuʼyaridáá Jesús ga̱jma̱a̱ muʼtájkáan nákha xóó tséphiʼtsu, tséʼniuu á mu kuwáánʼ ndajkuáánʼ o kuwáánʼ gajmiúlú eʼwíinʼ. Nda̱wa̱á Jesús nikuíʼtáa ganitsu ga̱jma̱a̱ xúgíinʼ xa̱bu̱ bi̱ nigún nipiʼtsu asndu nigiʼmún. Asndu nipídún xóó ganitsu, mú Jesús tándoo dí magadíí. Ikhaa niʼtañéjunʼ dí mixtagijxi̱i̱, mbáa mu muphu itháan wakíʼ. Xígi̱ kaʼnii niʼsngúlú Jesús dí majmulú májánʼ dí kuaʼdáá. Xabuanii ma̱ndoo matangi̱ín muraxnuu náa na̱ʼkha̱ raʼthí rígi̱ gajmiún e̱jñu̱ún mu musngúún mutajkáan, mudriguíin májánʼ eʼwíinʼ ga̱jma̱a̱ muxnaʼ dí kuaʼdáá.

5. a) Xú káʼnii nikumu̱ún xa̱bu̱ índo̱ ndiyáá milagro dí niʼni Jesús mbiʼi rúʼko̱ rá. b) Ndiéjunʼ niʼni ikhaa xá.

⁵ Xa̱bu̱ ra̱ʼkhá tháán niguánún tsiánguá dí xóo Jesús niʼsngáa ma̱ngaa ga̱jma̱a̱ milagro dí niʼni. Ndiyáá má dí Moisés niʼthí, dí Dios nikudaminaʼ rí magíiʼ mbáa profeta kiejunʼ, ikha jngóo ikhiin niraximíjna̱ á mu ikhaa nindxu̱u̱ Jesús (Deut. 18:​15-18). Á mu xúʼko̱, mbáa ikhiin nikumu̱ún dí Jesús maʼga̱nú mani̱ndxu̱u̱n mbáa májánʼ xa̱bu̱ ñajunʼ ga̱jma̱a̱ maʼngo̱o̱ maxniʼtsún xúgíinʼ xa̱bu̱ xuajin. Ikha jngóo xa̱bu̱ nigíʼ magún “gúyáa ga̱jma̱a̱ tsiakii mu manidxu̱u̱ rey” (Juan 6:​14, 15). Á mu Jesús niniñaminaʼ dí mugíiʼ rey, nikudaminaʼ náa política ndrígu̱ún judíos, bi̱ nikúwá náa naʼtáñajunʼ Roma. Mú ikhaa na̱nguá nikudaminaʼ, náa Biblia naʼthí dí ikhaa táʼni a̱jma̱ a̱jkiu̱u̱n “nitsimuu [...] náa kúbá”. Maski ajndu nitsudaa, ikhaa na̱nguá nikudaminaʼ náa política. ¡Ra̱ʼkhá tháán májánʼ ikha dí niʼsngúlú!

6. Xú káʼnii gándoo mbuʼyaridáá Jesús rá. (Atayáá ma̱ngaa xtiʼkhuu.)

⁶ Gajkhun má dí ndawa̱a̱ tsáa gaʼthúlú dí muʼni milagro mu muʼni marigá ganitsu o dí muʼni thanún bi̱ naʼniún nandii. Ni má dí mudrigáanʼ manindxu̱lú rey ni má xa̱bu̱ ñajunʼ. Mú, mbáa mutsudáánʼ mu muxuʼdamijná náa política, mu nuxnáá voto o mumbáyíi mbáa bi̱ ikhiin naku̱mu̱ún dí maʼtáñajunʼ májánʼ. Mú, Jesús nigíʼ mbá májánʼ xkri̱da. Ikhaa tándoo gákudaminaʼ náa política, ga̱jma̱a̱ nda̱wa̱á ikhaa niʼthí: “Náa Matañájunʼ na̱nguá rígá náa numbaaʼ rígi̱” (Juan 17:14; 18:36). Bi̱ nindxu̱lú cristianos ndayóoʼ mundxaʼwamíjná xóo nindxaʼwámi̱na̱ʼ Jesús ma̱ngaa muʼni xóo ikhaa niʼni. Ikháánʼlú i̱ndó numbáyíí Xa̱bu̱ ñajunʼ ndrígóo Dios, nuʼthá ga̱jma̱a̱ numuu ikhaa ma̱ngaa nuʼtajkháan dí ma̱ʼkha̱ (Mat. 6:10). Guʼyáá ndiéjunʼ xóó gándoo majmañulú náa milagro dí Jesús niʼni índo̱ nikuíʼtáa pan.

DÍ NANDOO GÁʼTHÚU̱N MILAGRO GA̱JMA̱A̱ NUMUU PAN

7. Ndiéjunʼ imbo̱ʼ milagro niʼni Jesús ga̱jma̱a̱ xú káʼnii nini apóstoles ndrígióo xá. (Juan 6:​16-20.)

⁷ Nda̱wa̱á dí nixniʼtsún mbaʼin xa̱bu̱. Jesús niʼthúún apóstoles ndrígióo dí matangi̱ín náa Capernaúm ga̱jma̱a̱ barco, ikhú ikhaa nitsimuu náa kúbá mu xúʼko̱ xúxkamaa mugíiʼ mani̱ndxu̱u̱ rey (atraxnuu Juan 6:​16-20). Índo̱ kúwá ragún ga̱jma̱a̱ barco niʼni mbá giñán mbiʼ dí niʼni maʼbajxu̱u̱ iyaʼ. Ikhú Jesús ni̱jkha̱ kruámuʼ náa inuu iyaʼ mu maʼga gáʼñúún ga̱jma̱a̱ niʼthúun apóstol Pedro dí ma̱ngaa maʼga̱ kruámuuʼ náa inuu iyaʼ (Mat. 14:​22-31). Índo̱ Jesús nitsimuu náa barco, ikhú giñán niwi̱ji̱. Xa̱bi̱i̱ ra̱ʼkhá tháán niguanún tsiánguá dí asndu nithi: “Gajkhun dí nindxa̱a̱ʼ A̱ʼdióo Dios” (Mat 14:33).a Xa̱bi̱i̱ Jesús nithi rígi̱ nda̱wa̱á dí ni̱jkha̱ kruámuuʼ náa inuu iyaʼ raʼkháa índo̱ ikhaa niʼni milagro dí niʼni mbaʼa pan. Marcos niʼnirámáʼ náá numuu: “Tájmiin gákru̱ʼu̱u̱n milagro dí nirígá ga̱jma̱a̱ numuu pan, ikha jngóo náa a̱jkiu̱ún xóó tséʼngo̱o̱ gákru̱ʼu̱u̱n” (Mar. 6:​50-52). Xa̱bi̱i̱ na̱nguá niʼngo̱o̱ gákru̱ʼu̱u̱n dí Jeobá nixnúu tsiaki̱i̱ Jesús mu maʼni mbaʼa milagro. Nda̱wa̱á Jesús nitanga̱a̱ niʼthí ga̱jma̱a̱ numuu milagro dí niʼni pan, mu xúʼko̱ maʼsngulúʼ i̱mba̱ ikha dí gíʼdoo wéñuuʼ numuu.

8, 9. Náá numuu dí mbaʼin xa̱bu̱ nigún gúyáaʼ Jesús rá. (Juan 6:​26, 27.)

⁸ Rí itháan niʼni maxmiéjúnʼ xa̱bu̱ bi̱ nixniʼtsun Jesús nindxu̱u̱ rí makánún dí muphu ga̱jma̱a̱ dí nda̱ñúunʼ. Gajkhun má dí imbo̱ʼ mbiʼi índo̱ ndiyáá dí Jesús gajmíi̱n apóstoles ndrígióo nigúun, ikhiin nitsimún náa i̱ʼwáʼ barco dí na̱ʼkha̱ náa Tiberíades mu magún náa Capernaúm mu mbuyáaʼ Jesús (Juan 6:​22-24). Mú, lá nini rígi̱ ga̱jma̱a̱ numuu dí nindúún mudxawíín itháan ga̱jma̱a̱ numuu Reino xáʼ. Nakujmaa kaʼwu dí na̱nguá. Dí itháan nindúún nindxu̱u̱ dí makánún dí muphu. Xú káʼnii eʼyáá rá.

⁹ Guʼyáá dí nirígá índo̱ xa̱bu̱ nixka̱ma̱a̱ Jesús náa mijngii Capernaúm. Jesús niʼthúún kaʼwu dí ikhiin i̱ndó nixmiéjúúnʼ ga̱jma̱a̱ numuu dí muphu. Niʼthúún dí ikhiin ‹nipiʼtsu asndu nigiʼmún› ga̱jma̱a̱ “ganitsu rí nachúu”. Mú ikhaa niʼthún dí gíʼmaa munimi̱jna̱ mudrigú ‹ganitsu rí ndajyúuʼ ga̱jma̱a̱ rí maʼga kagui̱i̱n makuwá kámuu mbiʼi› (atraxnuu Juan 6:​26, 27). Ma̱ngaa niʼthúún dí Anu̱u̱ maxnún ganitsu rúʼko̱. Índo̱ xa̱bu̱ nidxawíín dí rígá ganitsu dí maʼga̱ kagui̱i̱n makuwá kámuu mbiʼi, mbáa ra̱ʼkhá tháán niʼniún tsiánguá. Mú ndiéjunʼ nindxu̱u̱ ganitsu rúʼko̱ ga̱jma̱a̱ xú káʼnii gákhánún xá.

10. Ndiéjunʼ dí “nandoo Dios” gíʼmaa muni̱ xa̱bu̱ mu ma̱ndoo makuwá kámuu mbiʼi rá.

¹⁰ Mbáa judíos nikumu̱ún dí ndiyóoʼ muni̱ mbá ñajunʼ mu ma̱ndoo makánún ganitsu rúʼko̱. Mbáa nindxaʼwamíjna ga̱jma̱a̱ numuu “ñajunʼ” dí na̱ʼkha̱ raʼthí náa Xtángoo dí niʼnirámáʼ Moisés. Mú Jesús niʼthúún: “Rígi̱ rí nandoo Dios: Rí maguaʼdáála fe náa bi̱ ikhaa nikungua̱a̱nʼ” (Juan 6:​28, 29). Mu makuwá “kámuu mbiʼi”, ndiyóoʼ dí maku̱mu̱ún kuyáá bi̱ Dios nikungua̱a̱nʼ. Nákha má ginii Jesús niʼthí ga̱jma̱a̱ numuu rúʼko̱ (Juan 3:​16-18, 36). Ga̱jma̱a̱ nda̱wa̱á nitanga̱a̱ niʼthí ndiéjunʼ gíʼmaa muʼni mu makuwáánʼ kámuu mbiʼi (Juan 17:3).

11. Xú káʼnii nisngajma judíos dí i̱ndó nindúún makánún ganitsu rá. (Salmo 78:​24, 25.)

¹¹ Judíos buʼko̱ na̱nguá nindrigú dí Jesús niʼsngúún ga̱jma̱a̱ numuu dí “nandoo Dios” muni̱. Ikha jngóo nirajxi̱: “Mu maku̱mu̱xu ku̱ya̱a̱ʼ, ndiéjunʼ milagro gátani̱ mu mbu̱ya̱a̱xu rá.” (Juan 6:30.) Ikhú nitháán dí wajin xiʼñúnʼ bi̱ nikúwá nákha mbiʼi dí nixtáa Moisés nindrigú maná dí nindxu̱u̱ xóo pan (Neh. 9:15; atraxnuu Salmo 78:​24, 25).b Nakujmaa kaʼwu dí i̱ndó nixmiéjúúnʼ dí muphiʼtsu. Ikha jngóo na̱nguá nitháán Jesús dí maʼthúún itháan ga̱jma̱a̱ numuu “ganitsu rí na̱ʼkha̱ mekhuíí”, dí nindxu̱u̱ asndu xóo maná rí na̱ʼkha̱ mekhuíí dí naʼni maraxtaa (Juan 6:32). I̱ndó nindxaʼwamíjna̱ ga̱jma̱a̱ numuu dí nda̱ñúunʼ dí asndu túgíʼ edxu̱ún mudxawíín dí Jesús nindoo maʼsngúún. Ndiéjunʼ gándoo gajmañulú ikháanʼ ga̱jma̱a̱ numuu rígi̱ rá.

DÍ ITHÁAN GÍʼMAA MAGIʼDOO NUMUU NÁA IKHÁÁNʼLÚ

12. Xú káʼnii niniñuuʼ kaʼwu Jesús ndiéjunʼ dí itháan gíʼdoo numuu rá.

¹² Mbá ikha dí gíʼdoo wéñuuʼ numuu dí nuxkamaa náa Juan capítulo 6 nindxu̱u̱ rígi̱: Dí muʼnimbulú kuʼyáá Dios ga̱jma̱a̱ mambáxulu gajmiúlú ikhaa. Asndu nákha má ginii Jesús nisngájma rígi̱ índo̱ niʼni gaʼduunʼ mbá tsáʼkhá dí nigíʼ Gixa̱a̱ (Mat. 4:​3, 4). Ma̱ngaa náa Discurso dí nixná náa inuu Kúbá niʼthí dí itháan gíʼdoo numuu dí mambáxulu gajmiúlú Dios (Mat. 5:3). Ikha jngóo, gurajximíjnalu: “Lá nasngájma rí xóo xtáá dí naxmiéjunʼ itháan mambájxuʼ gajmuʼ Dios ki xóo mbaʼyáaʼ i̱ndó dí nandoʼ ikhúún ráʼ.”

13. a) Ndíjkha dí na̱nguá má raʼkhí dí manigulúʼ ganitsu rá. b) Ndiéjunʼ dí gíʼmaa muʼgíʼ muʼnimbánii rá. (1 Corintios 10:​6, 7, 11.)

¹³ Na̱nguá má raʼkhí dí munda̱ʼa̱ Dios maxnúlú dí ndayúlú ga̱jma̱a̱ nda̱wa̱á manigulúʼ dí ikhaa nixnúlú (Luc. 11:3). Náa Biblia naʼthí dí ga̱jma̱a̱ numuu ñajunʼ rí nuʼni nandoo nuphiʼtsu ga̱jma̱a̱ naʼwan, naʼni makuwáánʼ gagi ga̱jma̱a̱ dí rúʼko̱ “na̱ʼkha̱ náa Dios bi̱ gajkhun” (Ecl. 2:24; 8:15; Sant. 1:17). Maski ajndu xúʼko̱, mú, awan gíʼmaa mbuʼyáá dí ndayúlúʼ. Rúʼko̱ dí apóstol Pablo niʼni marmáʼáan a̱jkiu̱ún cristianos nákha ikhú. Niʼnirámáʼ náa inún rí xú káʼnii niguáʼníí israelitas, xóo índo̱ nikúwá náa mijngii kúbá Sinaí. Ga̱jma̱a̱ niʼthún dí xáyóoʼ ‹magua̱ʼa̱ muni̱ dí ra̱májánʼ› xóo nini israelita buʼko̱ (atraxnuu 1 Corintios 10:​6, 7, 11). Jeobá niʼni milagro mu maxniʼtsún israelitas, mú ga̱jma̱a̱ numuu dí i̱ndó nindúún muphiʼtsu, ikha jngóo i̱ndó nindúún “mu̱ʼni̱ dí ra̱májánʼ” (Núm. 11:​4-6, 31-34). Xúʼko̱ má nini ma̱ngaa índo̱ nipiʼtsu, niʼwa̱a̱n ga̱jma̱a̱ nini gagimijná índo̱ ndiyamajkuíí a̱ʼdá xedi̱ bi̱ nigumaa ga̱jma̱a̱ oro (Éx. 32:​4-6). Pablo niʼthí ga̱jma̱a̱ numuu rígi̱ índo̱ niʼtámuʼún cristianos bi̱ nikúwá nákha xóó tséguma gámbáa Jerusalén ga̱jma̱a̱ templo ndrígóo, dí niguma gámbáa nákha tsiguʼ 70 tsiguʼ nda̱wa̱á. Dí mbiʼi xúgi̱ mangáanʼ kuwáánʼ náa mbá numbaaʼ dí inúu mambáa dí ra̱májánʼ, ikha jngóo ikháánʼlú ma̱ngaa ndayóoʼ muʼnimbánii consejo dí nixná Pablo.

14. Ndiéjunʼ eʼthí náa Biblia ga̱jma̱a̱ numuu ganitsu dí marigá náa numbaaʼ nuxi̱ʼ rá.

¹⁴ Índo̱ Jesús niʼsngúlú dí munda̱ʼa̱a̱ Dios dí ‹maxnúlú dí mu̱ʼphu̱›, ma̱ngaa niʼsngúlú muʼtájkáan dí mambanúu dí nandoo Dios “xó má mekhuíí xúʼko̱ má náa tsu̱du̱u̱ ku̱ba̱ʼ ma̱ngaa” (Mat. 6:​9-11). Xú káʼnii ku̱ma̱a̱ʼ ikháán dí mani̱ndxu̱u̱ ikhú rá. Náa Biblia naʼthí dí Dios nandoo marigá ganitsu dí májánʼ náa tsu̱du̱u̱ Ku̱ba̱ʼ. Náa Isaías 25:​6-8 naʼthí dí índo̱ gaʼtáñajunʼ Reino ndrígóo Jeobá marigá ganitsu dí itháan májánʼ. Ga̱jma̱a̱ náa Salmo 72:16 niʼtáriyaʼ: “Maʼga̱nú marigá wéñuuʼ ganitsu náa tsu̱du̱u̱ ku̱ba̱ʼ; ra̱ʼkhá tháán garigá ganitsu náa inu kúbá”. Lá nandaaʼ maʼga̱nú mbiʼi rúʼko̱ mu majmaaʼ dí gárígá ikhú mu matani májánʼ dí miʼtsu o matani i̱mba̱ ganitsu dí xóó na̱nguá nitsu ráʼ. Ga̱jma̱a̱ dí miʼtsu uva dí ikháán má nitadu ráʼ. (Is. 65:​21, 22.) Ma̱ngaa xúgíinʼ xa̱bu̱ bi̱ gákúwá maʼdxúún ga̱jma̱a̱ numuu dí Jeobá gáʼni tsajkurámiinʼ.

15. Ndiéjunʼ gáʼyóoʼ majmañún xa̱bu̱ bi̱ gátujxi̱ín rá. (Juan 6:35.)

¹⁵ (Atraxnuu Juan 6:35). Ndiéjunʼ guáʼthi̱i̱n xa̱bu̱ bi̱ ni̱ʼphu̱ pan ga̱jma̱a̱ e̱gi̱ʼ dí Jesús niʼni milagro mu makuwi̱i̱n nákha ikhú rá. Índo̱ gátujxi̱ín xa̱bu̱, mbáa muniʼnúnʼ tikhun dí ikhiin. Mbáa matujxi̱ín maski ajndu na̱nguá niguaʼdáá fe nákha ikhú (Juan 5:​28, 29). Mbaʼyóoʼ majmañún rí nandoo gáʼthún ajngáa dí niʼthí Jesús: “Ikhúúnʼ ni̱ndxu̱ʼ ganitsu rí ndaʼya. Bi̱ gáʼkha̱ náa ikhúúnʼ nditháan xáxkidxuu”. Mbaʼyóoʼ maguaʼdáá fe náa Jesús dí ikhaa nixnáximinaʼ makhañúu ga̱jma̱a̱ numún. Ikhú má ma̱ngaa marigá mbá awan dí majuiʼsngúún ga̱jma̱a̱ numuu Dios xúgíinʼ bi̱ gátujxi̱ín ga̱jma̱a̱ asndu xúgíinʼ e̱ji̱n bi̱ gágumii náa numbaaʼ nuxi̱ʼ. ¡Ra̱ʼkhá tháán gakuwáánʼ gagi dí muʼsngúún xa̱bu̱ ga̱jma̱a̱ numuu Dios! Itháan má gaʼdxu̱u̱ a̱jkiu̱lú muʼni ñajunʼ rígi̱ ki xóo dí i̱ndó mu̱ʼphu̱ ganitsu. Ikha jngóo, itháan má gíʼdoo numuu dí mambájxulú gajmiúlú Dios.

16. Ndiéjunʼ guʼyáá náa i̱mba̱ artículo rá.

¹⁶ Asndu xúgi̱ ndiʼyáá mbá chíʼgíiʼ dí na̱ʼkha̱ náa Juan capítulo 6. Mú Jesús nigiʼdoo itháan dí maʼthí ga̱jma̱a̱ numuu dí ‹makuwáánʼ kámuu›. Ninindxu̱u̱ mbá dí ndiyóoʼ mudxawíín judíos ma̱ngaa ikháánʼlú ndayóoʼ mbuʼyáá. Náa i̱mba̱ artículo mbuʼyáá xóo itháan dí naʼthí náa Juan capítulo 6.