Graxe̱ rí nuni bi̱ nuraxnuu
Tsíín nindxu̱ún “ángeles bi̱ kaxtaʼwíin” bi̱ naʼthí ga̱jma̱a̱ numún náa 1 Timoteo 5:21 rá.
Apóstol Pablo niniraʼmáʼ ajngáa rígi̱ náa inuu Timoteo bi̱ ma̱ngaa nindxu̱u̱ anciano. “Natañéjuaanʼ náa inuu Dios ga̱jma̱a̱ náa Cristo Jesús ma̱ngaa náa ángeles bi̱ kaxtaʼwíin rí matanimba̱a̱ʼ ikha rígi̱, atayáá tsumáá wéñaaʼ nákhá xóó tsétraʼwíí mbá rí matani̱” (1 Tim. 5:21). Tsíín nindxu̱ún “ángeles bi̱ kaxtaʼwíin” rá.
Mu mbuʼyáá tsíín nindxu̱ún ángeles bugi̱. Guʼthá ginii ga̱jma̱a̱ numún ángeles bi̱ xándoo mani̱ndxu̱ún, nakujmaa kaʼwu dí Pablo na̱nguá xtáa raʼthí ga̱jma̱a̱ numún bi̱ mbá 144,000. Índo̱ niniraʼmáʼ ajngáa rígi̱ náa inuu Timoteo nimbáa cristiano bi̱ nixtiyáaʼ xóó tségabi̱i̱ maʼga̱a̱ mekhuíí, apóstoles ga̱jma̱a̱ eʼwíinʼ bi̱ kaxtaʼwíin xóó na̱nguá nindxu̱ún “ángeles bi̱ kaxtaʼwíin” (1 Cor. 15:50-54; 1 Tes. 4:13-17; 1 Juan 3:2).
Ma̱ngaa xándoo mani̱ndxu̱ún ángeles bi̱ nixujximíjna̱ nákha nixnúu ruʼwa mbiiʼ, numuu dí ángeles bugi̱ nigún kidxuuʼ Gixa̱a̱, nirtaximi̱jna̱ xa̱bu̱ wéñiiʼ ga̱jma̱a̱ ninindxu̱ún xa̱bu̱ sia̱nʼ ndrígóo Jesús (Gén. 6:2; Luc. 8:30, 31; 2 Ped. 2:4). Inuu má dí Jesús, madumi̱ʼi̱i̱n náa iñá mbiʼ mbá 1,000 tsiguʼ ga̱jma̱a̱ nda̱wa̱á maʼnigámbíin mbóo gajmiún Gixa̱a̱ (Jud. 6; Apoc. 20:1-3, 10).
Náa najuiʼthá ga̱jma̱a̱ numún “ángeles bi̱ kaxtaʼwíin” náa 1 Timoteo 5:21, ikhí ma̱ngaa naʼthí ga̱jma̱a̱ numuu Dios, ma̱ngaa ga̱jma̱a̱ numuu Cristo Jesús, ikha jngóo gíʼma mani̱ndxu̱ún ángeles bi̱ naguajún jmbu bi̱ kúwá mekhuíí rumbañúún ikhiin.
Kúwá mbaʼin ga̱jma̱a̱ ra̱ʼkhá tháan mbaʼin ángeles bi̱ naguajún jmbu (Heb. 12:22, 23). Nakujmaa dí Jeobá na̱nguá exnún ikháá má ñajunʼ xúgíinʼ ángeles (Apoc. 14:17, 18). Garmáʼáan a̱jkiu̱lú dí mbá miʼtsu, mbáwíi ángel nikhánáá ñajunʼ dí magudíin 185,000 soldado asirios (2 Rey. 19:35). Ga̱jma̱a̱ xó ma niʼthí Jesús, nakujmaa dí mani̱ndxu̱ún mbá nguéjmi̱i̱n ángeles bi̱ “murawíin xa̱bu̱ bi̱ nuni̱ dí muxudami̱jna̱ aʼkhá eʼwíinʼ ga̱jma̱a̱ bi̱ nanújngorámúnʼ xtángoo náa maʼtáñajunʼ” (Mat. 13:39-41). Mbáa mani̱ndxu̱ún eʼwíinʼ ángeles bi̱ mugímbiin bi̱ kaxtaʼwíin mu maguáan mekhuíí (Mat. 24:31). Ga̱jma̱a̱ eʼwíinʼ ángeles nakhánún ñajunʼ dí muñewu̱nlú náa xúgíʼ kamba̱a̱ dí najkua xó má naʼthí náa Salmo 91:11 (Mat. 18:10; atanimbríguii ga̱jma̱a̱ Mateo 4:11 ga̱jma̱a̱ Lucas 22:43).
Xó má eʼyáá “ángeles bi̱ kaxtaʼwíin” bi̱ najuiʼthá ga̱jma̱a̱ numún náa 1 Timoteo 5:21 mbáa nindxu̱ún tikhuun ángeles bi̱ kúwá ruyambáá mu muñewa̱a̱n congregación. Náa capítulo rígi̱, Pablo xtáa raʼthí ga̱jma̱a̱ numún ancianos ga̱jma̱a̱ naʼthúún a̱ngiu̱lú dí gíʼmaa mbuyamajkún. Pablo niʼthún ancianos dí gíʼmaa munimbáníí “tsumáá wéñaaʼ” ñajunʼ rí kuaʼdáá nákha xóó tséraʼwíi mbá rí muni̱, ga̱jma̱a̱ nditháan ragíʼmaa muraʼwíí mbá na̱cha̱á dí muni̱, náá numuu rá. Pablo niʼthí mbá rí gíʼdoo numuu dí ikhiin gíʼmaa munimbu̱ún consejo rígi̱, dí ikhiin kúwá rumbañúún a̱ngiu̱lú “náa inuu Dios ga̱jma̱a̱ Cristo Jesús, ma̱ngaa náa ángeles bi̱ kaxtaʼwíin”. Xóo muʼthá, Jeobá, Jesús ga̱jma̱a̱ “ángeles bi̱ kaxtaʼwíin” kúwá ruyáá xú káʼnii ancianos numbañún bi̱ kúwá náa congregación, ikha jngóo nakujmaa dí kúwá tikhuun ángeles bi̱ kuaʼdáá ñajunʼ rí muñewa̱a̱n congregación, xóo muñewu̱u̱n xa̱bi̱i̱ Dios, mumbañúún náa nutaraʼa ga̱jma̱a̱ nutháán xúgíʼ Jeobá dí ikhiin nduyáá (Mat. 18:10; Apoc. 14:6).