BIBLIOTECA NÁA INTERNET Watchtower
Watchtower
BIBLIOTECA NÁA INTERNET
me̱ʼpha̱a̱
a̱
  • ʼ
  • a̱
  • e̱
  • i̱
  • o̱
  • u̱
  • ŋ
  • BIBLIA
  • MBAʼA I̱YI̱I̱ʼ
  • REUNIÓN
  • w25 enero mbaʼa ináa 8-13
  • Xa̱bekha bi̱ ninigu̱nʼ guyamajkhún gu̱ʼya̱la

Nda̱a̱ video gi̱i̱ náa nitaxújmbi̱i̱

Atani̱ mba̱a̱ a̱jkia̱nʼ, tsíyoo gákujmaa video.

  • Xa̱bekha bi̱ ninigu̱nʼ guyamajkhún gu̱ʼya̱la
  • Bi̱ Nayejngoo Naʼtáraʼa numuu Reino ndrígóo Jeobá (Rí muʼnigajmaa) 2025
  • Subtítulos
  • Náa na̱ʼkha̱ i̱ʼwáʼ
  • XÁTANI NIMBÁ DÍ MAʼNI GAWÚUNʼ AʼGIA̱A̱ʼ
  • RÍ MA̱NDOO MUNI̱ XA̱BEKHA MU MUNIÑA̱A̱ʼ RUNI̱ DÍ RAʼKHÍ
  • XÓO MA̱NDOO MATASNGAJMÁÁ A̱ʼGIA̱A̱ʼ DÍ NATAYAMAJKUÍÍ
  • Xú káʼnii gándoo gakuwáanʼ gagi mbá guʼwáanʼ (níʼkhóo 1)
    ¡Araxtáa gagi kámuu mbiʼi! Gajmañaaʼ kiʼsngáa ndrígóo Biblia
  • Araxtaa tsímáá gajmiáanʼ bi̱ kuwa náa guʼwáaʼ
    Ndiéjunʼ eʼsngúlúʼ Biblia rá.
  • Náá numuu dí ra̱májánʼ kayuuʼ ma̱ta̱ya̱a̱ pornografía rá.
    I̱yi̱i̱ʼ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos 2023
Bi̱ Nayejngoo Naʼtáraʼa numuu Reino ndrígóo Jeobá (Rí muʼnigajmaa) 2025
w25 enero mbaʼa ináa 8-13

ARTÍCULO RÍ MUʼNIGAJMAA 2

AJMÚÚ 132 Rí xúgi̱ mbóó kuwáanʼlu

Xa̱bekha bi̱ ninigu̱nʼ guyamajkhún gu̱ʼya̱la

“Xa̱bekha bi̱ niniʼgúnʼ [...] guyamajkhún” (1 PED. 3:7).

EDXU̱U̱

Dí ma̱ndoo muni̱ xa̱bekha mu musngajmúún guʼñún rí nduyamajkhún dí xóo nuthi ga̱jma̱a̱ dí xóo nuni̱.

1. Náá numuu dí Jeobá niniñuuʼ dí xa̱bu̱ ma̱ndoo mudamijná rá.

JEOBÁ nindxu̱u̱ mbáa “Dios gagi” ga̱jma̱a̱ nandoo dí ikháánʼlú makuwáánʼ gagi (1 Tim. 1:11). Mbaʼa dí nimináanʼlú mu xúʼko̱ ma̱ndoo makuwáánʼ gagi (Sant. 1:17). Mbá dí nimináanʼlú nindxu̱u̱ dí xa̱bu̱ ma̱ndoo mudamijná. Índo̱ xa̱biya̱ ga̱jma̱a̱ a̱ʼgu̱ nudamijná, nuxna ajngún dí maʼndún kuyamijná, mbuyamajkumijná ga̱jma̱a̱ muñeumíjna̱. Rígi̱ naʼni dí mbá nájmi̱i̱n makuwá gagi (Prov. 5:18).

2. Xú káʼnii kúwá mbaʼin xa̱bu̱ gajmii rí mbiʼi xúgi̱ rá.

2 Phú ngíná dí náa numbaaʼ rígi̱ mbaʼin xa̱bu̱ gajmii na̱nguá enimbáníí dí nixudamíjna nákha nidamijná. Ga̱jma̱a̱ numuu rúʼko̱ naʼni dí xákúwá gagi. Xíjkóo Organización Mundial de la Salud niʼthí dí mbaʼin xa̱bekha nuxnún guʼñún, nuthúún dí raʼkhí ga̱jma̱a̱ nuni̱ gawúunʼ. Mbáa nuniu̱u̱n dí májánʼ índo̱ kúwá náa inún xa̱bu̱, mú índo̱ kúwá ndajkuíín nuni̱ ngíníi. Ma̱ngaa índo̱ xa̱bekha nduyáá pornografía, naʼni dí guʼñún xákúwá gagi.

3. Ndiéjunʼ eʼni dí mbáa xa̱biya̱ maʼnigínán a̱ʼgiu̱u̱ rá.

3 Náá numuu dí tikhuun xa̱bekha nuni̱ ngíníi guʼñún rá. Mbáa numuu dí anu̱ún ra̱ʼkhá tháán najmangu̱u̱nʼ ikha jngóo naku̱mu̱ún dí na̱nguá má nindxu̱u̱ raʼkhí dí matani ngíníi eʼwíinʼ. Eʼwíinʼ kúwá náa xuajin náa nusngáa dí gíʼmaa muni̱ ngíníi guʼñún mu musngajma dí xa̱bekha kaʼñúún mutañajun. O mbáa numuu dí na̱nguá nijuiʼsngúún muñewa̱a̱n xóo eni̱ o xóo nuthi. Tikhuun xa̱bekha nduyáá pornografía ikha jngóo naguánu nundxa̱ʼwa̱mijna dí gu̱ʼu̱ i̱ndó nindxu̱ún bi̱ ma̱ndoo mubún gajmiún. Ma̱ngaa bi̱ najmañún, nuthi dí ga̱jma̱a̱ numuu nandii COVID-19, nigíʼdi̱i̱ nini ngíníin itháan guʼñún. Mú dí phú gajkhun xa̱biya̱ ragíʼmaa maʼni gínáa a̱ʼgiu̱u̱.

4. Ndiéjunʼ dí ragíʼmaa muni̱ cristianos bi̱ guaʼdiin guʼñún ga̱jma̱a̱ náá numuu rá.

4 Xa̱bekha bi̱ nindxu̱ún cristianos gíʼmaa muñewa̱a̱n dí xundxaʼwamíjna xóo eni̱ xa̱bu̱ numbaaʼ ga̱jma̱a̱ numún gu̱ʼu̱.a Numuu dí nguáná, ikhaa dí nandxaʼwámi̱na̱ʼ xa̱bu̱ rúʼko̱ má e̱jkha̱nú eʼni. Gundxaʼwamíjna̱ ga̱jma̱a̱ numuu congregación dí nirígá náa Roma nákha siglo timbá náa kúwá cristianos bi̱ kaxtaʼwíin. Nda̱wa̱á dí nigi̱ʼi̱ congregación, Pablo ndiyóoʼ maʼnirámáʼ inún: “Xúniʼñámíjná rí numbaaʼ rígi̱ maʼniala xó má eyoo” (Rom. 12:​1, 2). Ajngáa rígi̱ naʼni makru̱ʼu̱lú dí tikhuun kaʼníí nuni̱ xó má eni̱ xa̱bu̱ numbaaʼ. Ikha jngóo Pablo niʼthúún dí gíʼmaa muriʼkhu̱u̱ xóo endxaʼwamíjna̱ ga̱jma̱a̱ eni̱. Consejo rúʼko̱ ma̱ngaa na̱jkha̱ inún bi̱ guaʼdiin guʼñún dí mbiʼi xúgi̱. Phú migíná dí tikhuun cristianos nuni̱ xóo endxaʼwamíjna̱ xa̱bu̱ numbaaʼ ga̱jma̱a̱ asndu nuni̱ ngíníin guʼñún.b Xú káʼnii eyoo Jeobá dí muniu̱u̱n guʼñún xa̱bekha rá. Grajxe̱ rígi̱ naxtiʼña̱a̱ náa texto dí kayá edxu̱u̱ artículo rígi̱.

5. Xó má naʼthí náa 1 Pedro 3:​7, xú káʼnii gíʼmaa muniu̱u̱n guʼñún xa̱bekha rá.

5 (Atraxnuu 1 Pedro 3:7). Jeobá naʼthúún xa̱bekha bi̱ ninigu̱nʼ dí gíʼmaa mbuyamajkún guʼñún. Nusngajmá dí nduʼyamajkuíí mbáa xa̱bu̱ ga̱jma̱a̱ xóo eʼni̱i̱lu. Mbáa xa̱biya̱ ndaʼyamajkuu a̱ʼgiu̱u̱ índo̱ naʼniuu dí májánʼ ga̱jma̱a̱ nasngájma dí nandoo kaʼyoo. Náa artículo rígi̱ mbuʼyáá tikhu rí ma̱ndoo muni̱ xa̱bekha mu musngajmá dí nandún kuñún guʼñún. Mú ginii guʼyáá ndiéjunʼ dí nditháan ragíʼmaa muni̱.

XÁTANI NIMBÁ DÍ MAʼNI GAWÚUNʼ AʼGIA̱A̱ʼ

6. Xú káʼnii eʼñún Jeobá xa̱bekha bi̱ nuxnún guʼñún rá. (Colosenses 3:19.)

6 Ragíʼmaa maraxnaa. Jeobá nditháan tsíyoo gáʼñúún xa̱bu̱ bi̱ najmangu̱u̱nʼ (Sal. 11:5). Ga̱jma̱a̱ itháan má bi̱ nuni̱ ngíníi guʼñún (Mal. 2:16; atraxnuu Colosenses 3:19). Xó má naʼthí náa 1 Pedro 3:​7, á mu mbáa xa̱biya̱ naʼni gínáa a̱ʼgiu̱u̱, xándoo mambájxu̱u̱ májánʼ ga̱jma̱a̱ Dios. Ga̱jma̱a̱ Jeobá xáʼdxawun dí naʼtájkáan.

7. Xó má eʼthí náa Efesios 4:​31, 32, ndiéjunʼ ajngáa ragíʼmaa majmúún xa̱bekha mu muthún guʼñún rá. (Atayáá ma̱ngaa náa naʼthí “Ku̱ma̱ rí gíʼdoo numuu”.)

7 Ragíʼmaa matani̱ gawíínʼ ga̱jma̱a̱ ajngáa dí naratá. Tikhuun xa̱bekha nutún guʼñún ajngáa mijkoo ga̱jma̱a̱ ajngáa dí naʼni magawúúnʼ. Mú Jeobá nditháan tsénigu̱u̱ʼ dí xa̱bu̱ majmangu̱u̱nʼ, makiʼníin, mundxa̱ʼwa̱ ga̱jma̱a̱ muthi ajngáa dí maʼni magawúúnʼ mbáa,c xó má naʼthí náa Efesios 4:​31, 32 (atraxnuu). Jeobá naʼdxawuun xúgíʼ ga̱jma̱a̱ ndaʼyoo xú káʼnii eniu̱u̱n guʼñún xa̱bekha, maski ajndu i̱ndó kúwá ndajkuíín náa guʼwún. Mbáa xa̱biya̱ bi̱ tséʼyamajkhuu a̱ʼgiu̱u̱ ma̱ngaa naʼthúu̱n ga̱jma̱a̱ ajngáa mijkoo, raʼkháa i̱ndó naʼni gachúu rí nidamijná, ma̱ngaa naʼni gachúu rí nambájxu̱u̱ ga̱jma̱a̱ Dios (Sant. 1:26).

8. a) Ndiéjunʼ endxa̱ʼwáminaʼ Jeobá ga̱jma̱a̱ numuu pornografía rá. b) Náá numuu rá.

8 Ragíʼmaa matayaa pornografía. Jeobá naguiyu̱u̱ʼ kaʼyoo pornografía. Índo̱ xa̱biya̱ ndaʼyoo xtiʼkhuu dí xkawiʼ naʼni gachúu rí nambájxu̱u̱ ga̱jma̱a̱ Jeobá ma̱ngaa tséʼyamajkhuu a̱ʼgiu̱u̱.d Jeobá nandoo dí xa̱bekha xúni̱ nduwiinʼ guʼñún, raʼkháa i̱ndó xóo eni̱ ma̱ngaa xóo endxaʼwamíjna̱. Jesús niʼthí dí índo̱ mbáa xa̱biya̱ nayejxu̱u̱ imba̱a̱ a̱ʼgu̱ dí asndu nagua̱ʼa̱ mabóoʼ ga̱jma̱a̱, ikhaa “nikudaminaʼ má aʼkhá ga̱jma̱a̱ náa a̱jkiu̱u̱n” (Mat. 5:​28, 29).e

9. Ndíjkha dí Jeobá nditháan tsénigu̱u̱ʼ dí mbáa cristiano matsudaaʼ a̱ʼgiu̱u̱ maʼni mbá rí tsíyóo gáʼni índo̱ nabóoʼ ga̱jma̱a̱ xá.

9 Xátatsudaaʼ a̱ʼgia̱a̱ʼ maʼni mbá rí tsíyóo gáʼni. Tikhuun xa̱bekha nutsudiin guʼñún muni̱ dí xkawiʼ índo̱ nubúúnʼ gajmiún rí asndu guʼñún naku̱mu̱ún dí naguma ngíníi o rí tsíñún gúñún. Jeobá tsénigu̱u̱ʼ dí xa̱bu̱ muni̱ i̱ndó rí nandún ikhiin. Ikhaa nagi̱ʼthu̱u̱n dí xa̱bekha maʼndún kuñún guʼñún, muniu̱u̱n dí májánʼ, mbuyamajkuíí xóo ku̱mu̱ún ga̱jma̱a̱ xóo endxaʼwamíjna̱ (Efes. 5:​28, 29). Mú ndiéjunʼ gíʼmaa maʼni mbáa cristiano bi̱ naʼni xó má naʼthí náa subtítulo rígi̱ rá. Ndiéjunʼ gándoo gáʼni mu mariʼkhu̱u̱ xóo endxa̱ʼwáminaʼ ga̱jma̱a̱ xóo eʼni xá.

RÍ MA̱NDOO MUNI̱ XA̱BEKHA MU MUNIÑA̱A̱ʼ RUNI̱ DÍ RAʼKHÍ

10. Ndiéjunʼ gándoo gájmañún náa Jesús xa̱bekha bi̱ ninigu̱nʼ rá.

10 Ndiéjunʼ gámbáyúu mbáa cristiano maniñuuʼ raʼni gawúunʼ a̱ʼgiu̱u̱ o maʼni maku̱mu̱u̱ dí nda̱a̱ numuu xá. Dí maʼniminaʼ mbaʼyaridoo Jesús. Gajkhun má dí ikhaa nditháan tánigúnʼ, mú xa̱bekha ma̱ndoo mbuyaridáá xóo ikhaa niʼniún rí májánʼ xa̱bi̱i̱ (Efes. 5:25). Guʼyáá ndiéjunʼ gándoo gajmañún xa̱bekha bi̱ ninigu̱nʼ náa xkridoo Jesús, xóo niʼniún ga̱jma̱a̱ xóo niʼthúún apóstoles ndrígióo.

11. Xú káʼnii niʼniún apóstoles ndrígióo Jesús rá.

11 Jesús niʼniún dí májánʼ apóstoles ndrígióo ga̱jma̱a̱ ndiʼyamajkhún. Nditháan táʼthún ga̱jma̱a̱ ajngáa mijkoo, maski ajndu ikhaa gíʼdoo itháan tsiaki̱i̱ ki xóo apóstoles, mú na̱nguá nijmuu tsiaki̱i̱ ndrígóo mu maʼni maku̱mu̱ún dí ikhiin na̱nguá guáʼdáá numún, ikhaa ninindxu̱u̱ xa̱bu̱ guabaaʼ náa ikhiin (Juan 13:​12-17). Ikhaa niʼthúún xa̱bi̱i̱: “Gajmañala xóo e̱ni̱ ikhúúnʼ, numuu rí tsékiʼnún ga̱jma̱a̱ ni̱ndxu̱ʼ mbáa xa̱bu̱ guabaaʼ. Náa ikhúúnʼ muxkamaa rí maʼni̱i̱ a̱jkia̱la” (Mat. 11:​28-30). Mbáa xa̱bu̱ bi̱ tsékiʼnáa najmaa narikhoo ga̱jma̱a̱ nañewu̱u̱n dí naʼni índo̱ nuni̱i̱ dí raʼkhí.

12. Xú káʼnii ajngáa nijmuu Jesús mu maʼthúún eʼwíinʼ rá.

12 Jesús nijmuu ajngáa dí maxnún tsiaki̱i̱ ga̱jma̱a̱ dí maʼni̱i̱ a̱jkiu̱ún. Nditháan táʼthún ga̱jma̱a̱ ajngáa mijkoo (Luc. 8:​47, 48). Índo̱ xa̱bu̱ sia̱nʼ nitha̱ wéñiiʼ ga̱jma̱a̱ nini dí ikhaa makiʼnáa, ikhaa na̱nguá “nitanga̱a̱ mu maʼtá wéñúúnʼ” (1 Ped. 2:​21-23). Ga̱jma̱a̱ nguáná nditháan táʼthí mbá kayuuʼ (Mat. 27:​12-14). ¡Ra̱ʼkhá tháán májánʼ xkri̱da niniñuuʼ mu mbuyaridáá cristianos bi̱ ninigu̱nʼ!

13. Ndiéjunʼ eyoo gáʼthúu̱n dí náa Biblia naʼthí rí xa̱biya̱ gíʼmaa maxtáa ga̱jma̱a̱ a̱ʼgiu̱u̱ rá. (Mateo 19:​4-6, ga̱jma̱a̱ nota; atayáá ma̱ngaa xtiʼkhuu.)

13 Jesús niʼthún xa̱bekha dí xúni̱ nduwiinʼ guʼñún. Nijmuu ajngáa dí niʼthí Anu̱u̱: “Xa̱biya̱ [...] maxtáa ga̱jma̱a̱ a̱ʼgiu̱u̱” (atraxnuu Mateo 19:​4-6, ga̱jma̱a̱ nota). Náa ajngáa griego dí gi̱i̱ najuiʼtájuíi “maxtáa ga̱jma̱a̱” nandoo gáʼthúu̱n dí “maruwaminaʼ ga̱jma̱a̱ mbá dí rakha”. Rígi̱ nandoo gaʼthí dí xóo embájxu̱u̱ xa̱biya̱ ga̱jma̱a̱ a̱ʼgiu̱u̱ gíʼmaa maʼni májánʼ wéñuuʼ dí nindxu̱u̱ asndu xóo rígá dí karkáʼmii ga̱jma̱a̱. Índo̱ mbáa dí ikhiin gáʼni mbá dí maʼni gawúunʼ bi̱ ndiyáa, mbá nájmi̱i̱n maʼni mumíniiʼ. Mbáa xa̱biya̱ bi̱ xtáa májánʼ ga̱jma̱a̱ a̱ʼgiu̱u̱ nditháan xáʼyoo pornografía. Ga̱jma̱a̱ mbá nacha̱ maʼni rí iduu “xáʼyoo nimbá dí ra̱májánʼ” (Sal. 119:37). Xóo muʼthá, nambánuminaʼ ga̱jma̱a̱ iduu dí xáʼyoo nimbáa a̱ʼgu̱ bi̱ raʼkháa a̱ʼgiu̱u̱ dí asndu magua̱ʼa̱ mabóoʼ ga̱jma̱a̱ (Job 31:1).

Mbáa ndxájulú xtáa náa naguma májáanʼ carro. A̱ngui̱i̱n kúwá ruyáá folleto náa na̱ʼkha̱ pornografía, mú ikhaa naʼni gaʼduunʼ mbaʼyoo.

Xa̱biya̱ tséʼni nduwaaʼ a̱ʼgiu̱u̱ índo̱ naʼni gaʼduunʼ mbaʼyoo pornografía. (Atayáá kutriga̱ 13).g


14. Ndiéjunʼ gáʼyóoʼ maʼni mbáa xa̱biya̱ mu matanga̱a̱ mambájxu̱u̱ ga̱jma̱a̱ Jeobá ma̱ngaa ga̱jma̱a̱ a̱ʼgiu̱u̱ rá.

14 Ma̱ngaa mbáa xa̱biya̱ bi̱ naʼnigínáa a̱ʼgiu̱u̱ o naʼthúu̱n ajngáa dí naʼni gawúunʼ, rígá dí ndayóoʼ maʼni mu mambáxu̱u̱ májánʼ ga̱jma̱a̱ mbu̱júu̱ a̱ʼgiu̱u̱ ma̱ngaa ga̱jma̱a̱ Jeobá. Ndiéjunʼ gíʼmaa maʼni xá. Timbá, gíʼmaa mbaʼyoo dí xtáa raʼni mbá dí raʼkhí kayuuʼ. Jeobá ndaʼyoo xúgíʼ ga̱jma̱a̱ nda̱a̱ nimbá dí ngo̱ʼo̱o̱ náa ikhaa (Sal. 44:21; Ecl. 12:14; Heb. 4:13). Ra̱gajma, maniñuuʼ raʼniuu dí raʼkhí a̱ʼgiu̱u̱ ga̱jma̱a̱ mariʼkhuu xóo eʼni (Prov. 28:13). Ragajtsú, maʼga̱nú mbaʼyoo dí niʼni gawúunʼ a̱ʼgiu̱u̱ ga̱jma̱a̱ dí niʼni gawúunʼ Jeobá ma̱ngaa dí maʼthúún ga̱jma̱a̱ xúgíʼ a̱jkiu̱u̱n dí muni̱ mba̱a̱ a̱jkiu̱ún kuyáá (Hech. 3:19). Gíʼmaa maʼtákáñúu Jeobá dí mambáyúu mañewu̱u̱n xóo endxa̱ʼwáminaʼ, xóo eʼthí ga̱jma̱a̱ xóo naʼni ma̱ngaa ma̱ndo̱ʼo̱o̱ mambáyúu mariʼkuminaʼ (Sal. 51:​10-12; 2 Cor. 10:5; Filip. 2:13). Raga̱jkhu̱, gíʼmaa maʼni xó má niʼtájkáan ga̱jma̱a̱ rí majmañuu mawi̱yu̱u̱ʼ kaʼyoo ajngáa dí maʼni gawúúnʼ eʼwíinʼ ga̱jma̱a̱ asndu ndiéjuunʼ má dí naʼni makujmaa dí najmangu̱u̱ʼ (Sal. 97:10). Witsu, dí mbá nacha̱ gáyáʼ dí ancianos bi̱ kúwá náa congregación mumbáyíí, ikhiin mumbayíí ga̱jma̱a̱ ngajua (Sant. 5:​14-16). Majun, dí maríya̱ʼ mbá awan maʼni mu xátanga̱a̱ maʼni nimbá dí niʼni. Mbáa xa̱biya̱ bi̱ ndaʼyoo pornografía ma̱ngaa gíʼmaa maʼni xúgíʼ rígi̱. Jeobá maʼni tsajkurámuuʼ xúgíʼ tsiaki̱i̱ dí gúni mu muriʼkumijná (Sal. 37:5). Mú mbáa cristiano raʼkháa i̱ndó ndayóoʼ maniñuuʼ raʼni dí mamínuuʼ a̱ʼgiu̱u̱; ma̱ngaa gíʼmaa majmañuu dí mbaʼyamajkuu. Guʼyáá xóo ma̱ndoo maʼni.

XÓO MA̱NDOO MATASNGAJMÁÁ A̱ʼGIA̱A̱ʼ DÍ NATAYAMAJKUÍÍ

15. Ndiéjunʼ ma̱ndoo maʼni mbáa xa̱biya̱ mu masngájmuu dí nandoo kaʼyoo a̱ʼgiu̱u̱ rá.

15 Atasngájmáá dí nandaaʼ xtayáá. Tikhuun xa̱bekha bi̱ kúwá tsímáá gajmiún guʼñún naguʼwún nusngajmún guʼñún xúgíʼ mbiʼi dí ra̱ʼkhá tháán nandún kuñún (1 Juan 3:18). Mbaʼa enii xóo ma̱ndoo maʼni mbáa cristiano mu masngájmuu a̱ʼgiu̱u̱ dí nandoo kaʼyoo, mbá xkri̱da xóo dí maguajtuun ñawúunʼ o mbayaráʼaa. Ma̱ngaa ma̱ndoo makunguanʼ mensaje náa maʼthúu̱n “nadxuu a̱jkiu̱nʼ tani” o “ndiéjunʼ xtaa ratani̱ xúgi̱ rá.” Nguáná ma̱ngaa ma̱ndoo maxnúu ri̱ʼi̱ o mbá regalo mu masngájmuu dí nandoo kaʼyoo. Índo̱ xa̱biya̱ naʼni rígi̱, nasngájma dí ndaʼyamajkuu a̱ʼgiu̱u̱ ga̱jma̱a̱ naʼni dí makuwá itháan májánʼ.

16. Náá numuu dí xa̱biya̱ gíʼmaa maʼthúu̱n a̱ʼgiu̱u̱ dí nangajo̱o̱ kaʼyoo rá.

16 Aratháán dí nandaaʼ xtayáá ga̱jma̱a̱ dí naraxnáa núma̱aʼ. Mbáa xa̱biya̱ ndaʼyamajkuu a̱ʼgiu̱u̱ índo̱ naʼthúu̱n náá numuu dí nangajo̱o̱ kaʼyoo ga̱jma̱a̱ naʼni dí maxtáa májánʼ. Mbá xkri̱da naxnáa má xúʼko̱ núma̱aʼ ga̱jma̱a̱ numuu xúgíʼ dí ikhaa naʼni mu mambáyúu (Col. 3:15). Índo̱ mbáa xa̱biya̱ naʼthúu̱n a̱ʼgiu̱u̱ ndiéjunʼ dí nanigu̱u̱ʼ eʼni, maʼni dí a̱ʼgiu̱u̱ maku̱mu̱u̱ dí nandoo kaʼyoo, dí xámíñuu ga̱jma̱a̱ dí ndaʼyamajkuu (Prov. 31:28).

17. Xú káʼnii gasngájmuu dí ndaʼyamajkuu a̱ʼgiu̱u̱ mbáa xa̱biya̱ rá.

17 Atani̱i̱ dí májánʼ ga̱jma̱a̱ atayamajkuíí. Mbáa xa̱biya̱ bi̱ nandoo kaʼyoo a̱ʼgiu̱u̱ ndaʼyoo xóo mbá dí ra̱ʼkhá tháán mitsaanʼ dí Jeobá nixnúu ga̱jma̱a̱ dí tsémbríguii ga̱jma̱a̱ nimbá (Prov. 18:22; 31:10). Ikha jngóo nangajo̱o̱ kaʼyoo, nañewu̱u̱n, naʼniuu dí májánʼ ga̱jma̱a̱ ndaʼyamajkuu, maski ajndu índo̱ kúwá i̱ndó ikhiin ga̱jma̱a̱ índo̱ nabóoʼ ga̱jma̱a̱. Tsétsudaa maʼni mbá dí tsénigu̱u̱ʼ, dí maʼni maku̱mu̱u̱ rí nda̱a̱ numuu o dí maʼni gawúunʼ ku̱ma̱ ndrígóo.f Ga̱jma̱a̱ ikhaa ma̱ngaa naʼniminaʼ maxtáa kaʼwu náa iduu Jeobá (Hech. 24:16).

18. Ndiéjunʼ gáʼyóoʼ muni̱ bi̱ guáʼdiin guʼñún rá. (Atayáá ma̱ngaa náa naʼthí: “A̱jkhu̱ enii xóo matasnga̱jmá dí natayamajkuíí a̱ʼgia̱a̱ʼ.”)

18 Xa̱bekha bi̱ ninigu̱nʼ, ma̱ndoo mbuya̱a̱ gajkhun dí Jeobá ndaʼyoo ga̱jma̱a̱ nangajo̱o̱ xúgíʼ dí nuni̱ mu musngajmúún má xúʼko̱ dí nduyamajkhún gu̱ʼya̱la. Guraʼwi̱i̱ munigaʼduunʼ xúgíʼ dí naʼni gawúunʼ gu̱ʼya̱la, guniu̱u̱n dí májánʼ, guyamajkhún ga̱jma̱a̱ gusngajmún dí nandala ku̱ñu̱u̱n. Xúʼko̱ musngajmá dí nangajuala ku̱ñu̱u̱n. Á mu nduyamajkhún gu̱ʼya̱la, kuwáanʼ ruñewa̱a̱n mbá dí gíʼdoo wéñuuʼ numuu, ikhaa nindxu̱u̱ dí mambáxala gajmiála Jeobá (Sal. 25:14).

Mbáa xa̱biya̱ naʼthúu̱n ga̱jma̱a̱ ajngáa májánʼ a̱ʼgiu̱u̱.

A̱JKHU̱ ENII XÓO MATASNGA̱JMÁ DÍ NATAYAMAJKUÍÍ A̱ʼGIA̱A̱ʼ

Náa Biblia naʼthúún xúgíinʼ cristianos dí ajngáa dí nuthi gíʼmaa mani̱ndxu̱u̱ májánʼ (Col. 4:6). Á mu ikháán xtaʼdaa a̱ʼgia̱a̱ʼ, xú káʼnii gándoo gátanimbaníí consejo rígi̱ índo̱ naratamijná ga̱jma̱a̱ʼ a̱ʼgia̱a̱ʼ o índo̱ narathúún eʼwíinʼ ga̱jma̱a̱ numuu ikhaa xá.

  1. 1. Atayaridáá Jeobá, gajmaaʼ ajngáa gamajkhu, xóo “mbá péñu” ga̱jma̱a̱ “núma̱aʼ” (Gén. 13:14; 15:5). Índo̱ natani̱ xúʼko̱ kaʼnii, raʼkháa i̱ndó natasngájma dí xtaʼdáá gamajkuaʼ ma̱ngaa natasngájma dí natayamajkuíí a̱ʼgia̱a̱ʼ.

  2. 2. Aratháán dí májánʼ eʼni a̱ʼgia̱a̱ʼ náa xúgíʼ rí májánʼ dí ikhaa naʼni (Prov. 31:​28, 29). Xárathu̱u̱n eʼwíinʼ dí raʼkhí eʼni o náa najnga̱wa̱a̱n (Sal. 50:20).

  3. 3. Atadxawíín nacha̱ dí gáʼtháanʼ, mú tsumáá gátayaa dí marata (Sant. 1:19).

  4. 4. Aratháán má xúʼko̱ ga̱jma̱a̱ ajngáa májánʼ, maski ajndu kuwáanʼ ruta ga̱jma̱a̱ mbá numuu dí migamíi maʼni dí makiʼnáaʼla (Col. 3:​8, 12).

Mbaʼa xtiʼkhu: 1. Xa̱biya̱ bi̱ nakujmaa náa xtiʼkhuu dí ginii naʼthí dí májánʼ ga̱jma̱a̱ numuu a̱ʼgiu̱u̱ náa inún eʼwíinʼ xa̱bu̱. 2. Ikhaa xtáa raʼdxawun májánʼ dí naʼthí a̱ʼgiu̱u̱, índo̱ xtáa raʼthúu̱n xú káʼnii ku̱mu̱u̱.

XÚ KÁʼNII GÁNDOO MUNIMBÁNII XA̱BEKHA BI̱ GUÁʼDIIN GUʼÑÚN CONSEJO DÍ NA̱ʼKHA̱ NÁA...

  • Colosenses 3:19

  • Efesios 4:​31, 32

  • Mateo 19:​4-6

AJMÚÚ 131 “Bi̱ naruwiin Dios”

a Májánʼ gáʼni dí xa̱bekha bi̱ guáʼdiin guʼñún muraxnuu artículo dí kayá edxu̱u̱ “Nataniu̱u̱ gu̱ʼu̱ ikháán xó má naʼni Jeobá ráʼ.” Dí nigájnuu náa i̱yi̱i̱ʼ Bi̱ Nayejngoo gu̱nʼ enero tsiguʼ 2024.

b Á mu ikháán nitamíniiʼ náa guʼwáaʼ, ma̱ndoo mambáyáaʼ rí matraxnuu artículo “Ayuda para las víctimas de la violencia doméstica”, dí rígá náa sección “Otros temas”, náa jw.org ga̱jma̱a̱ náa JW Library® náa ajngáa xtílóo.

c KU̱MA̱ RÍ GÍʼDOO NUMUU: Ajngáa dí “naʼni gawúúnʼ eʼwíinʼ” ma̱ngaa nindxu̱u̱ xúgíʼ ajngáa dí raʼkhí dí najmún mu muni̱ gawúúnʼ eʼwíinʼ, dí marata xúgíʼ dí tsénigua̱a̱ʼ eʼni dí ajndu matani̱ maku̱mu̱u̱ rí nda̱a̱ numuu. Ikha jngóo ajndu káʼnii má ajngáa dí raʼkhí dí najmuu xa̱biya̱ maʼthúu̱n a̱ʼgiu̱u̱, nindxu̱u̱ ajngáa dí naʼni gawúunʼ.

d Atayáá náa jw.org ga̱jma̱a̱ náa JW Library artículo dí kayá edxu̱u̱: “La pornografía puede destruir su matrimonio” náa ajngáa xtílóo.

e Artículo dí kayá edxu̱u̱ “Ndiéjunʼ gándoo gatani á mu ajmbia̱a̱ʼ ndaʼyoo pornografía rá.” Dí nigájnuu náa i̱yi̱i̱ʼ Bi̱ Nayejngoo gu̱nʼ agosto tsiguʼ 2023, ma̱ndoo mambáñún gu̱ʼu̱ bi̱ guaʼdiin ajmbiu̱ún bi̱ nduyáá pornografía.

f Náa Biblia na̱nguá eʼthí mbájmbu ndiéjunʼ nindxu̱u̱ dí májánʼ ga̱jma̱a̱ dí ra̱májánʼ dí ma̱ndoo muni̱ xa̱bekha índo̱ nubún gajmiún guʼñún. Xa̱biya̱ ga̱jma̱a̱ a̱ʼgiu̱u̱ ma̱ndoo muraʼwi̱i̱ mbóó dí ma̱ndoo muni̱ náa musngajmá dí nduyamajkuíí Jeobá, muni̱ gagimijná ga̱jma̱a̱ dí xáʼni gawúunʼ ku̱ma̱ ndrígu̱ún. Ma̱ngaa na̱nguá má ethún eʼwíinʼ ga̱jma̱a̱ numuu rígi̱.

g NAʼTHÍ NUMUU XTIʼKHUU: Mbáa Testigo xtáa náa nañajunʼ ga̱jma̱a̱ a̱ngui̱i̱n nutsudaa mbaʼyoo mbá i̱yi̱i̱ʼ náa na̱ʼkha̱ pornografía.

    I̱yi̱i̱ʼ náa ajngáa me̱ʼpha̱a̱ (2007-2025)
    Atrugua̱a̱
    Atambáʼtaa
    • me̱ʼpha̱a̱
    • Náa mataxuʼmá
    • Xóo nandaʼ ma̱ta̱ya̱a̱
    • Copyright © 2025 Watch Tower Bible and Tract Society of Pennsylvania
    • Xtángoo náa naʼthí rí xú káʼnii majmaaʼ
    • Xtángoo náa naʼthí rí nañewu̱u̱n dato ndrígáʼ
    • Configuración de privacidad
    • JW.ORG
    • Atambáʼtaa
    Náa mataxuʼmá