Nuxnáa núma̱aʼ Jeobá numuu rí naʼni mba̱a̱ a̱jkiu̱u̱n

1, 2. Xú káʼni embrígui̱i̱n xóo nixtáa dxámá bi̱ naʼthí numuu náa timbá kutriga̱, ga̱jma̱a̱ xóo kuwáanʼ ikháánʼlú rá.

ATATSAʼWÁMINAʼ ga̱jma̱a̱ numuu mbáa dxámá bi̱ anu̱u̱ ga̱jma̱a̱ ru̱dúu̱ ra̱ʼkhá tháan guáʼdaa mbújkha̱a̱, mú mbá mbiʼi nutháán dí ikhiin nikháñún, mú ra̱ʼkhá i̱ndó rúʼko̱, ma̱ngaa dí anu̱u̱ ga̱jma̱a̱ ru̱dúu̱ niguámbúun mbújkha̱a̱ ndrígún ga̱jma̱a̱ ra̱ʼkhá tháán nini gidxóó. Ikha jngóo, dxámá bugi̱ tségruigúu mbújkha̱a̱, dí nagruigúu nindxu̱u̱ gidxóó ga̱jma̱a̱ ikhaa kaʼyoo maʼni numa̱a̱ gidxóó, nutháán dí gíʼmaa maʼni numa̱a̱ mbá nacha̱. Mú ra̱ʼkhá tháán mba̱a̱ gidxóó rí nditháan xáʼngo̱o̱ gáʼni numa̱a̱.

² Ikháanʼ kuwanlú xóo dxámá buʼko̱, timbáa anu̱lú Adán ga̱jma̱a̱ Eva, na̱nguá niguáʼdáá aʼkhá ga̱jma̱a̱ nikúwi̱i̱n náa mbá ku̱ba̱ʼ mitsaanʼ (Gén. 1:27; 2:7-9). Ikhiin ma̱ndoo makuwíin gagi asndu kámuu, mú nda̱wa̱á xúgíʼ nixtiʼkhuu. Nindáti̱gu̱u̱n rí makuwá kámuu mbiʼi. Ndiéjunʼ niniñaaʼ mundrígúu e̱jñún xá. Náa Biblia naʼthúlú: “Ga̱jma̱a̱ numuu mbáwíí xa̱bu̱, nito̱ʼo̱o̱ aʼkhá náa numbaaʼ, ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, ikha jngóo xúgíinʼ xa̱bu̱ nakháñún numuu rí xúgíinʼ nixudami̱jná aʼkhá” (Rom. 5:12). Adán niniñuuʼ rí mundrígu̱u̱ aʼkhá rí naʼni dí nakháñulú. Aʼkhá nindxu̱u̱ xóo mbá gidxóó dí ra̱ʼkhá tháán mba̱a̱ rí nimbáa dí ikháánʼlú xáʼngo̱o̱ gáʼni numaaʼ (Sal. 49:8).

3. Náá numuu dí náa Biblia naʼni mbríguíi aʼkhá ndrígulú ga̱jma̱a̱ mbá gidxóó rá.

³ Náá Biblia naʼni mbríguíi aʼkhá ga̱jma̱a̱ mbóo gidxóó (Mat. 18:32-35). Xóo muʼthá, mámbá índo̱ nuxudamijná aʼkhá nuʼni gidxóó gajmiúlú Jeobá rí mbaʼyóoʼ muʼni numa̱a̱. Á mu ikhaa nda̱a̱ dí niʼni mu maʼni mba̱a̱ a̱jkiu̱u̱n kaʼyoo aʼkhá ndrígulú, ikháánʼlú muʼni numa̱a̱ aʼkhá ndrígulú asndu índo̱ gákáñulú ga̱jma̱a̱ xándoo muguáʼthi̱i̱n makuwáánʼlú mbu̱júu̱ (Rom. 6:7, 23).

4. a) Á mu ndáwáa tsáá gámbáyulú, ndiéjunʼ gaguáʼníí rá. (Salmo 49:7-9.) b) Ndiéjunʼ eyoo gáʼthúún ajngáa aʼkhá náa Biblia rá. (Atayáá kúgumaʼá “Aʼkhá”.)

⁴ I̱ndó ikháánʼlú xáʼngo̱o̱ guʼni numa̱a̱ xúgíʼ dí Adán ga̱jma̱a̱ Eva nindáti̱gu̱u̱n (atraxnuu Salmo 49:7-9).a Xó má eʼyáá á mu nimbáa támbáyulúʼ, xándoo makuwáanʼlu kámuu ga̱jma̱a̱ ni xándoo makuwáanʼlu mbu̱júu̱. Xúgíanʼ maguáʼníí ikháá má xóo eguáʼníí xujkhú (Ecl. 3:19; 2 Ped. 2:12).

5. Xú káʼnii nimbáyulú Jeobá maʼni numa̱a̱ aʼkhá ndrígulú rá.

⁵ Atatsaʼwáminaʼ mbu̱júu̱ ga̱jma̱a̱ numuu dxámá bi̱ niʼthá náa timbá kutriga̱, xú káʼni gákumu̱u̱ ikhaa á mu mbáa xa̱bu̱ bi̱ gíʼdoo mbújkha̱a̱, naʼthí dí maʼni numa̱a̱ gidxawúu xá. Gajkhun rí dxámá buʼko̱ maniñuuʼ rí mambáyúu ga̱jma̱a̱ ra̱ʼkhá tháán gáxnáa numa̱a̱. Ikháá má kayuuʼ, Anu̱lú Jeobá bi̱ nandoo kaʼyulú, nimínáanʼlu mbá rí naʼni numa̱a̱ aʼkhá dí nindrigú náa Adán. Jesús niʼthí xígi̱ kaʼnii: “Numuu rí Dios ra̱ʼkhá tháán nindoo kaʼñún xa̱bu̱ numbaaʼ, ikha jngóo nixnájxi̱i̱ A̱ʼdióo bi̱ mbáwíí mu xúʼko̱ bi̱ gágiʼdoo fe náa ikhaa xákháñuu, maxtáa kámuu mbiʼi” (Juan 3:16). Ma̱ngaa rígi̱ naʼni dí ma̱ndoo mambáxulu májánʼ gajmiúlú Jeobá.

6. Ndiéjunʼ ajngáa dí na̱ʼkha̱ náa Biblia muʼnigajmaa náa artículo rígi̱ ga̱jma̱a̱ náá numuu rá.

⁶ Xú káʼni ma̱ndoo mambáyulú rí nimínáanʼlu Jeobá dí naʼni rí majngudi̱i̱ aʼkhá ndrígulú rá. Mu mbuʼyáá xóo exti̱ʼña̱a̱ grajxe̱ rígi̱, náa artículo rígi̱ mbuyáá ndiéjunʼ eyoo gáʼthúu̱n índo̱ náa Biblia naʼthí mambajxíi’ gajmiúlú, rí majngudi̱i̱ a’khá, rí niʼjuitsiwáanʼ, dí naguma káwánlu ga̱jma̱a̱ dí nanindxulú xa̱bu̱ jmbii. Á mu nundxaʼwamíjná májánʼ ga̱jma̱a̱ numuu ajngáa rígi̱, mambáyulú muxnáa itháán núma̱aʼ Jeobá ga̱jma̱a̱ numuu xúgíʼ dí niʼni mu maʼni mba̱a̱ a̱jkiu̱u̱n kaʼyulú.

JEOBÁ NINDOO DÍ MAMBAJXÍIʼ GAJMIÚLÚ

7. a) Ndiéjunʼ ma̱ngaa nindáti̱go̱o̱ Adán ga̱jma̱a̱ Eva rá. b) Ikháánʼ bi̱ naguwáʼ náa Adán ga̱jma̱a̱ Eva ndiéjunʼ dí ndayúlú rá. (Romanos 5:10, 11.)

⁷ Índo̱ Adán ga̱jma̱a̱ Eva nixudamíjna̱ aʼkhá nánguá nindoo makuwá kámuu mbiʼi ma̱ngaa nánguá nimbájxu̱u̱n gajmiún Anu̱u̱, Jeobá. Nákhá xóó tsexudamíjná aʼkhá ninindxu̱ún familióo Dios (Luc. 3:38). Mú índo̱ túnimbu̱u̱n kuyáá Jeobá, ikhaa nánguá niniñuuʼ rí makuwá náa familióo. Rúʼko̱ nirígá nákhá xóo tséguaʼdiin e̱jñún (Gén. 3:23, 24; 4:1). Nimbáa dí ikháánʼ xándoo maxtáa náa familióo Jeobá, ikha jngóo ndayóoʼ rí mbáa mambáyulú mu mambajxíiʼ gajmiúlú ikhaa (atraxnuu Romanos 5:10, 11). Ndayóo rí muniʼñááʼ rani̱ndxu̱lú xa̱bu̱ tsianʼ ndrígóo Dios, mu mambájxulú gajmiúlú. Ra̱ʼkhá tháán nagui̱i̱ rí Jeobá ndiyáaʼ rí maʼni mu mambajxíi’ gajmiúlú. Xú káʼnii niʼni xá.

JEOBÁ NIʼNI RÍ MAJNGUDI̱I̱ AʼKHÁ

8. Ndiéjunʼ nindxu̱u̱ rí naʼnijngudi̱i̱ aʼkhá rá.

⁸ Rí naʼnigudi̱i̱ a’khá nindxu̱u̱ rí Jeobá nigíʼ mu xa̱bu̱ aʼkhá ma̱ndoo mambajxúún gajmiún ikhaa. Jeobá niʼniratoo kamba̱a̱ mu ikháánʼ bi̱ nindxu̱lú xa̱bu̱ aʼkhá ma̱ndoo mambájxulú májánʼ gajmiúlú ikhaa, ndiyóoʼ maxná mbá rí gíʼdoo numuu ikháá má xóo dí nindáti̱go̱o̱ Adán. Náa Escrituras Griegas ma̱ngaa naʼthí xóo niʼni Jeobá mu mbáa xa̱bu̱ ma̱ndoo maxtáa tsímáá ga̱jmaaʼ o mambajxu̱u̱ ga̱jmaaʼ (Rom. 3:25, nota).

9. Ndiéjunʼ niʼni Jeobá mu maʼni mba̱a̱ a̱jkiu̱u̱n kaʼñún israelitas rá.

⁹ Nákhá nikúwá israelitas, Jeobá nigíʼ mbá rí xóo ikhiin ma̱ndoo muni̱ mu majngudi̱i̱ aʼkhá ndrígún ga̱jma̱a̱ mu ma̱ndoo mambájxuun májánʼ gajmiún ikhaa. Mbiʼi rí najngudi̱i̱ aʼkhá, naguma mbá miʼtsú rí mámbá tsiguʼ, ndxajkun bi̱ phú kayá edxu̱u̱ nixnajxíin xujkhú xóo tsigijñaʼ ga̱jma̱a̱ numún xa̱bu̱ xuajin, mú tsigijñaʼ rúʼko̱ tséʼngo̱o̱ gaʼni jngudi̱i̱ mbá kayúʼ aʼkhá ndrígún israelitas, numuu dí xujkhú na̱nguá guáʼdáá ikháá má numún xóo xa̱bu̱. Mú Jeobá nixtáá xawii maʼni mba̱a̱ a̱jkiu̱u̱n kaʼñún á mu ikhiin natanga̱a̱ a̱jkiu̱ún ga̱jma̱a̱ nuxnajxí tsigijñaʼ dí ikhaa na̱nda̱ʼa̱ (Heb. 10:1-4). Ma̱ngaa tsigijñaʼ dí nuxnajxí mbiʼi dí majngudi̱i̱ aʼkhá ga̱jma̱a̱ i̱ʼwáʼ tsigijñaʼ naʼni marmáʼáan a̱jkiu̱u̱n israelitas rí nindxu̱ún xa̱bu̱ aʼkhá ga̱jma̱a̱ dí ndañún mbá tsigijñaʼ rí ma̱ndoo maʼni jngudi̱i̱ mbá kayúʼ aʼkhá ndrígún.

10. Ndiéjunʼ niʼni Jeobá mu majngudi̱i̱ aʼkhá ndrígún xa̱bu̱ numbaaʼ rá.

¹⁰ Ndiéjunʼ niʼni Jeobá mu majngudi̱i̱ aʼkhá ndrígún xa̱bu̱ numbaaʼ rá. Niʼni rí Aʼdióo bi̱ nandoo kaʼyoo “maxnájximinaʼ káaʼ mbóó miʼtsú mu magu̱ aʼkhá ndrígu̱ún mbaʼin xa̱bu̱” (Heb. 9:28). Jesús “nixnájximinaʼ mu maʼnikáwíin mbaʼin xa̱bu̱” (Mat. 20:28). Ndiéjunʼ nindxu̱u̱ rí nijuiʼtsiwáánʼ rá.

JEOBÁ NIʼTSIWÁÁNʼ MÚ MAʼNI NUMA̱A̱ AʼKHÁ

11. a) Náá numuu ndiyóoʼ rí majuiʼtsiwáánʼ rá. b) Ndiéjunʼ gíʼmaa maʼnimbánuu bi̱ maʼtsiwáanʼ rá.

¹¹ Náa Biblia naʼthí rí Jeobá ndiʼyoo dí ndayóo majuiʼtsiwáánʼ, mu maʼni mba̱a̱ a̱jkiu̱u̱n kaʼyoo aʼkhá ndrígulú ga̱jma̱a̱ mu mambaxíiʼ gajmiúlú ikhaa. Ndiéjunʼ nixná mu maʼtsiwáanʼ ga̱jma̱a̱ mu xa̱bu̱ ma̱ndoo maguáʼdáá mbu̱jú rí Adán nindáti̱go̱o̱ rá. (1 Tim. 2:6.) I̱ndó xa̱bu̱ bi̱ naʼnimbánuu ajtsú enii rígi̱ maʼngo̱o̱ maʼni numa̱a̱: 1) Ndayóoʼ mani̱ndxu̱u̱ xa̱bu̱ jmbii, 2) ma̱ndoo maxtáá kámuu mbiʼi, ga̱jma̱a̱ 3) maʼndoo maxnáximinaʼ ga̱jma̱a̱ numulú. I̱ndó xúʼko̱ vida ndrígóo xa̱bu̱ buʼko̱ ma̱ndoo mariʼkuriya̱a̱ʼ vida rí nindáti̱go̱o̱ Adán ga̱jma̱a̱ majngudi̱i̱ aʼkhá.

12. Ndíjkha dí Jesús niʼngo̱o̱ niʼtsiwáanʼ rá.

¹² Guʼyáá ajtsú enii rí Jesús niʼni mu maʼngo̱o̱ maʼtsiwáanʼ. 1) nindxu̱u̱ xa̱bu̱ jmbii, “na̱nguá nikudaminaʼ nimbá aʼkhá” (1 Ped. 2:22). 2) Numuu rí nindxu̱u̱ xa̱bu̱ jmbii ma̱ndoo maxtáá kámuu mbiʼi náa tsu̱du̱u̱ ku̱ba̱ʼ, ga̱jma̱a̱ 3) nixtáa xawii makhañún ga̱jma̱á numulú ga̱jma̱a̱ maniñuuʼ xóo nixtáa (Heb. 10:9, 10). Jesús nindxu̱u̱ xa̱bu̱ jmbii xó má Adán nákhá xóó tsékudaminaʼ aʼkhá (1 Cor. 15:45). Ikha jngóo rí nikháñuu niʼngo̱o̱ niʼni numa̱a̱ aʼkhá rí nikudaminaʼ Adán, xóo muʼthá niriʼkuriya̱a̱ʼ dí Adán nindáti̱go̱o̱ (Rom. 5:19). Xúʼko̱ Jesús nijkha̱nú ninindxu̱u̱ “bi̱ iwáá Adán”. Tséyóoʼ má ma̱ʼkha̱ i̱mba̱a̱ xa̱bu̱ jmbii mu maʼni numa̱a̱ dí Adán nindáti̱go̱o̱. Jesús “nikháñuu mbóó miʼtsú asndu kámuu” (Heb. 7:27; 10:12).

13. Xú káʼnii mixtiʼkhu nindxu̱u̱ dí nijngudi̱i̱ aʼkhá ga̱jma̱a̱ rí nijuiʼtsiwáánʼ rá.

¹³ Xú káʼnii mixtiʼkhu nindxu̱u̱ rí majngudi̱i̱ aʼkhá ga̱jma̱a̱ rí nijuiʼtsiwáánʼ rá. Rí majngudi̱i̱ aʼkhá nindxu̱u̱ rí Dios naʼni mu ma̱ndoo mambajxíiʼ gajmiúlú ikhaa. Rí nijuiʼtsiwáánʼ nindxu̱u̱ rí naguma numa̱a̱ mu majngudi̱i̱ aʼkhá ndrígún xa̱bu̱ numbaaʼ. Rígi̱ niguma numa̱a̱ ga̱jma̱a̱ eʼdiuu Jesús rí nixídíí ga̱jma̱a̱ numulú ikháánʼ (Efes. 1:7; Heb. 9:14).

JEOBÁ NAʼNIKÁWÁÁNʼ NÁA AʼKHÁ GA̱JMA̱A̱ NANI̱NDXU̱LÚ XA̱BU̱ JMBII

14. Ndiéjunʼ gúʼyáálú ga̱jma̱a̱ náá numuu rá.

¹⁴ Xú káʼnii embáyulú rí Jeobá niʼni ga̱jma̱a̱ numulú rá. Mu muriʼña̱a̱ grajxe̱ rígi̱ guʼyáá ndiéjunʼ eyoo gáʼthúu̱n a̱jma̱ ajngáa dí na̱ʼkha̱ náa Biblia, mu makru̱ʼu̱lú itháán májánʼ xú káʼnii embáyulú rí Jeobá naʼni mba̱a̱ a̱jkiu̱u̱n kaʼyulú.

15, 16. a) Ndiéjunʼ eyoo gáʼthúu̱n náa Biblia rí niguma káwáánʼ rá. b) Xú káʼnii eʼni makumulú rígi̱ rá.

¹⁵ Náa Biblia naʼthí rí ga̱jma̱a̱ numuu dí nijuiʼtsiwáánʼ niguma káwáánʼlú. Apóstol Pedro niʼthí xígi̱ kaʼnii: “Ikháanʼ má ndu̱ya̱a̱la rí tájmaa plata ni má oro dí naguámbáa mu maguma káwáanʼla ga̱jma̱a̱ náa rí xóo kuwáanʼla nákha ginii dí ragíʼdoo numuu, dí xóo niniña̱a̱ʼ wajinʼ xiʼñála makuwáanʼ” (1 Ped. 1:18, 19).

¹⁶ Ga̱jma̱a̱ numuu dí nijuiʼtsiwáánʼ ma̱ndoo maguma káwáánʼ náa aʼkhá ga̱jma̱a̱ náa rí nakháñulú dí ra̱ʼkhá tháán naʼni mumíniiʼ (Rom. 5:21). Ikha jngó ra̱ʼkhá tháán nuxnáa núma̱aʼ Jeobá ga̱jma̱a̱ Jesús, numuu rí niʼni numa̱a̱ aʼkhá ndrígulú ga̱jma̱a̱ eʼdiuu o vida ndrígóo Jesús (1 Cor. 15:22).

17, 18. a) Ndiéjunʼ eyoo gáʼthúún rí nani̱ndxu̱lú xa̱bu̱ jmbii rá. b) Ndiéjunʼ eyoo gáʼthúún rígi̱ náa mámbáa dí ikháánʼlú rá.

¹⁷ Náa Biblia naʼthí rí xa̱bi̱i̱ Jeobá nanindxu̱ún xa̱bu̱ jmbiin. Rúʼko̱ eyoo gáʼthúu̱n rí tséndu̱ʼu̱lú dí muni̱ numa̱a̱ mámbá aʼkhá rí nuxudamijná. Ikhaa naʼthí rí nindxu̱lú xa̱bu̱ jmbii, raʼkáa ga̱jma̱a̱ numulú ikháánʼ. Ma̱ngaa Jeobá tsénigu̱u̱ʼ rí muʼni aʼkhá, mú ikhaa xtáa xawii mu maʼni mba̱a̱ a̱jkiu̱u̱n kaʼyulú, numuu dí nusngajma dí kuaʼdáá fe náa dí niʼni ikhaa ga̱jma̱a̱ Jesús mu maʼtsiwáánʼlú (Rom. 3:24; Gál. 2:16).

¹⁸ Ndiéjunʼ eyoo gaʼthí rígi̱ náa mámbáa dí ikháánʼlú rá. Tikhuun cristianos nixtaʼwíin mutañajunʼ gajmiún Jesús náa mekhuíí ga̱jma̱a̱ niguánú ninindxu̱ún eji̱i̱n Dios (Tito 3:7; 1 Juan 3:1). Niʼni mba̱a̱ a̱jkiu̱u̱n kaʼyoo aʼkhá ndrígún, nindxu̱u̱ xóo nánguá má kuaʼdáá aʼkhá. Ikha jngóo ma̱ndoo mutañajunʼ gajmiún Xa̱bu̱ ñajunʼ ndrígóo (Rom. 8:1, 2, 30). Bi̱ kua̱ʼthi̱i̱n makuwá náa tsu̱du̱u̱ ku̱ba̱ʼ nijuiʼtá rí nindxu̱ún xa̱bu̱ jmbiin ga̱jma̱a̱ dí nindxu̱ún xóo bi̱ nambájxu̱u̱n gajmiún Dios, ma̱ngaa niʼni mba̱a̱ a̱jkiu̱u̱n kaʼyoo aʼkhá ndrígún (Sant. 2:21-23). Mbaʼin xa̱bu̱ bi̱ gakáwíin náa Armagedón ma̱ndoo makuwá kámuu mbiʼi (Juan 11:26). Xa̱bu̱ bi̱ nikháñún xóo “bi̱ nini̱ rí májánʼ” ga̱jma̱a̱ “bi̱ túni̱ rí májánʼ” maguanu magabiín (Hech. 24:15; Juan 5:28, 29). Nda̱wa̱á xúgíinʼ xa̱bu̱ bi̱ niguájun jmbu náa Jeobá bi̱ gakuwá náa tsu̱du̱u̱ ku̱ba̱ʼ makáwíin “xó má nikáwíin e̱ji̱i̱n Dios” (Rom. 8:21). ¡Nadxu̱u̱ʼ a̱jkiu̱lú nuguaʼthi̱i̱n rí maʼga̱nú mbiʼi dí ma̱ndoo mambájxulú mbu̱júu̱ gajmiúlú Anu̱lú Jeobá!

19. Xú káʼnii kuwáánʼlú xúgi̱ ga̱jma̱a̱ numuu dí Jeobá ga̱jma̱a̱ Jesús ni̱ni̱ ga̱jma̱a̱ numulú rá. (Atayáá ma̱ngaa kúgumaʼá “Rí naʼni mba̱a̱ a̱jkiu̱u̱n Jeobá”.)

¹⁹ Nikuwáanʼ xóo nixtáa dxámá bi̱ nindáti̱go̱o̱ xúgíiʼ ga̱jma̱a̱ nigruigúu mbá gidxóó dí ra̱ʼkhá tháán mba̱a̱ dí nditháan xáʼngo̱o̱ gaʼni numa̱a̱. Mú nixtiʼkhuu xóo kuwáanʼ numuu rí Jeobá ndiyáá xóo maʼni mu maʼni mba̱a̱ a̱jkiu̱u̱n kaʼyoo aʼkhá ndrígulú, ga̱jma̱a̱ niʼtsiwáánʼlú. Fe dí kuáʼdáá náa Jesucristo naʼni rí maguma káwáanʼ náa aʼkhá ga̱jma̱a̱ náa dí nakháñulú. Ma̱ngaa aʼkhá ndrígulú ma̱ndoo majngudi̱i̱ xóo nditháan má túxudami̱jna̱ aʼkhá. Mú rí itháán gíʼdoo numuu nindxu̱u̱ dí xúgi̱ ma̱ndoo mambájxulú májánʼ gajmiúlú Anu̱lú Jeobá bi̱ xtáa mekhuíí, bi̱ ra̱ʼkhá tháán nandoo kaʼyulú.

20. Ndiéjunʼ guʼyáá náa imbo̱o̱ artículo rá.

²⁰ Ra̱ʼkhá tháán nuxnálú núma̱aʼ índo̱ nundxaʼwamíjná ga̱jma̱a̱ numuu xúgíiʼ rí Jeobá ga̱jma̱a̱ Jesús ni̱ni̱ ga̱jma̱a̱ numulú (2 Cor. 5:15). Á mu ikhiin tambáyulú nda̱a̱ rí kua̱ʼthi̱i̱n nda̱wa̱á. Náa imbo̱o̱ artículo mbuʼyáá mbaʼa xkri̱da dí na̱ʼkha̱ náa Biblia mu mambáyulú mbuʼyáá dí índo̱ Jeobá naʼni mba̱a̱ a̱jkiu̱u̱n kaʼyulú nánguá gíʼma makumulú itháán dí kuaʼdáá aʼkhá.