Gajngruigulú má xúʼko̱ ga̱jma̱a̱ fe

1. Ndíjkha dí Pablo nidxuu ga̱jma̱a̱ numuu dí niraʼwíí maʼni rá.

ÍNDO̱ apóstol Pablo ndiʼyoo dí inuu má muxiyáa, ikhaa nidxuu índo̱ nindxa̱ʼwáminaʼ ga̱jma̱a̱ numuu xúgíʼ rí niʼni. Ikhaa niʼthí: “Niga̱yúʼ asndu náa má niʼngo̱ʼ, nigúʼdoo má xúʼko̱ fe” (2 Tim. 4:​6-8). Pablo ndiʼyoo dí Jeobá nadxuu a̱jkiu̱u̱n kaʼyoo, numuu dí ikhaa niraʼwíí májánʼ dí maʼni mu maʼni ñajuunʼ. Ikháá má xó Pablo ikháánʼ mangáanʼ nandulúʼ muraʼwíí májánʼ dí muʼni ga̱jma̱a̱ muʼni rí maʼdxuu a̱jkiu̱u̱n Jeobá. Guʼyáá xóo ma̱ndoo muʼni.

2. Ndiéjunʼ nindoo gaʼthí Pablo náa 2 Corintios 5:7 rá.

² Pablo niʼthí ga̱jma̱a̱ numuu ikha ma̱ngaa ga̱jma̱a̱ numún cristianos bi̱ niguájun jmbu: “Najngruigulú ga̱jma̱a̱ fe raʼkháa rí nduʼyáá” (2 Cor. 5:7). Ndiéjunʼ nindoo gaʼthí xá. Índo̱ náa Biblia naʼthí ga̱jma̱a̱ numuu mbáa xa̱bu̱ bi̱ “najngrui̱go̱o̱” na̱nguá eyoo gáʼthúu̱n xóo ejkha̱ krui̱go̱o̱, nindxu̱u̱ ga̱jma̱a̱ numuu xóo xtáa. Mú índo̱ mbáa xa̱bu̱ bi̱ na̱nguá gíʼdoo fe náa Jeobá, naraʼwíí mbá dí maʼni ga̱jma̱a̱ numuu i̱ndó dí naʼngo̱o̱ ndaʼyoo, dí naʼdxawuun ga̱jma̱a̱ dí naku̱mu̱u̱. Mú mbáa xa̱bu̱ bi̱ gíʼdoo fe naraʼwíí maʼni dí nanigu̱u̱ʼ Jeobá, numuu dí ndaʼyoo dí ikhaa má gaʼni tsajkurámaaʼ. Ma̱ngaa ndaʼyoo dí á mu naʼnimbo̱o̱ Ajngá rawunʼ Dios mambáyúu má ikhaa (Sal. 119:66; Heb. 11:6).

3. Ndiéjunʼ embáyulú rí muguáʼdáá fe náa Jeobá rá. (2 Corintios 4:18.)

³ Gajkhun má nguáná najmulú dí nuʼdxawíín, dí nduʼyáá ga̱jma̱a̱ dí nakumulú mu muraʼwíí mbá dí muʼni. Mú á mu i̱ndó najmulú rígi̱ mu muraʼwíí muʼni mbá rí gíʼdoo numuu, xagájnuu májánʼ. Numuu rí nguáná dí nuʼdxawíín, dí nduʼyáá ga̱jma̱a̱ dí nakumulú ma̱ndoo maʼni jngawáanʼ. Ma̱ngaa á mu nuʼnilú rígi̱ manújngurámulú consejo dí naxnúlú Jeobá (Ecl. 11:9; Mat. 24:​37-39). Mú á mu naguáʼdáá fe náa Jeobá muraʼwíí muʼni dí naniguuʼ ikhaa (Efes. 5:10). Ga̱jma̱a̱ maʼni rí makuwáanʼ tsímáá ga̱jma̱a̱ gagi (Sal. 16:​8, 9; Is. 48:​17, 18). Ma̱ngaa maʼni rí makuwáanʼ kámuu mbiʼi (atraxnuu 2 Corintios 4:18).

4. Xú káʼnii guʼyáá á mu najngruigulú ga̱jma̱a̱ fe o i̱ndó ga̱jma̱a̱ dí naʼngo̱o̱ nduʼyáá rá.

⁴ Gurajximijnalú rígi̱ mu mbuʼyáá á mu najngruigulú ga̱jma̱a̱ fe o i̱ndó ga̱jma̱a̱ rí nduʼyáá: “Tsáá ku̱mu̱ʼ ka̱yo̱o̱ rá. Lá naku̱mu̱ʼ ka̱yo̱o̱ i̱ndó dí nda̱yo̱o̱ ráʼ. O naku̱mu̱ʼ ka̱yo̱o̱ Jeobá dxe̱ʼ.” Náa artículo rígi̱ mbuʼyáa ajtsú enii náa ma̱ndoo matasnga̱jmá dí naku̱ma̱a̱ʼ xtayáá Jeobá índo̱ gátraʼwíí mbá dí gíʼdoo numuu, xóo índo̱ natraʼwíí mbá ñajunʼ dí matani̱, índo̱ gátraʼwíi tsáá mbi̱ya̱a̱ ga̱jma̱a̱ índo̱ gátadrígú ikha náa xuajñuu Jeobá. Mbuʼyáá ndiéjunʼ gíʼmaa mundxaʼwamíjna̱ mu muraʼwíí májánʼ dí muʼni.

ÍNDO̱ GÁTRAʼWÍÍ MBÁ ÑAJUNʼ DÍ MATANI̱

5. Ndiéjunʼ gíʼmaa mundxa̱ʼwa̱míjna̱ índo̱ gúraʼwíí mbá ñajunʼ dí muʼni rá.

⁵ Xúgiáanʼ nandulúʼ muñajunʼ mu makhánulúʼ dí makuwáanʼ ga̱jma̱a̱, ma̱ngaa mu muxnún rí nda̱ñúunʼ bi̱ kúwá náa guʼwúlú (Ecl. 7:12; 1 Tim. 5:8). Tikhuun bi̱ nuñajunʼ nudaaʼ itháán mbújkha̱a̱ ga̱jma̱a̱ naʼngo̱o̱ nutsi rí nda̱ñúunʼ o ajndu naʼngo̱o̱ nuyejxi̱ tháán mu majmúún itháán nda̱wa̱á. Mú mbáa tikhuun na̱nguá edaaʼ mba̱a̱, mbáa i̱ndó naʼngo̱o̱ nutsi dí nda̱ñúunʼ bi̱ kúwá náa guʼwún. Ikha jngóo índo̱ nuraʼwíí mbá ñajunʼ dí muʼnilú mbáa nundxa̱ʼwa̱míjna̱ nguáthá mba̱a̱ mbújkha̱a̱ gúdaaʼlú. Mú á mu i̱ndó rígi̱ eʼyáá, xájngruigulú ga̱jma̱a̱ fe.

6. Xú káʼnii esngajmálú dí kuáʼdáá fe índo̱ nuraʼwíí mbá ñajunʼ dí muʼni rá. (Hebreos 13:5.)

⁶ Á mu kuáʼdáá fe, mbuyáá á mu ñajunʼ dí gúraʼwíí muʼni xáʼni gachúu rí nambájxulú gajmiúlú Jeobá. Atrajxi̱mínáʼ: “Lá náa mañajunʼ mbaʼyóoʼ maʼni rí tsénigu̱u̱ʼ Jeobá ráʼ. Lá maʼni dí ní xáʼgá reunión, ní xáʼgá gátaraʼa o ní xánigajmaa Biblia ráʼ. Lá mbaʼyóoʼ maʼgá mitsínguánʼ ga̱jma̱a̱ ní xáxtáa mbayuʼ gajmíʼ bi̱ kúwá náa goʼwóʼ ráʼ.” (Prov. 6:​16-19; Filip. 1:10.) Á mu dí xúʼko̱, itháán májánʼ dí xátadrígu matani̱ ñajunʼ rúʼko̱, maski ajndu maʼniaaʼ gakhi̱i̱ mataxkamaa i̱mba̱ ñajunʼ dí ma̱ndoo matani̱, mú á mu kuáʼdáá fe, dí gúraʼwíí masngájma dí nakumulú kuʼyáá Jeobá dí ikhaa má gáxnulú rí gáʼyulúʼ (Mat. 6:33; atraxnuu Hebreos 13:5).

7, 8. Xú káʼnii nisngájma ndxájulú Javier dí nigiʼdoo fe rá. (Atayáá ma̱ngaa xtiʼkhuu.)

⁷ Javier, mbáa ndxájulú bi̱ xtáa náa Sudamérica.a Ndiʼyoo dí gíʼdoo wéñuuʼ numuu dí magiʼdoo fe. Ikhaa naʼthí: “Nirígá mbá ñajunʼ náa ma̱ndoo madaaʼ itháán mba̱a̱ kí xóo dí nadaaʼ nákhá ginii ga̱jma̱a̱ nindxu̱u̱ ñajunʼ rí nindxa̱ʼwa̱mínáʼ rí maʼni maxtáá gagi”. Mú Javier ma̱ngaa nindoo mani̱ndxu̱u̱ precursor, ikhaa naʼthí xóó: “Ni̱jkhá mu muniuʼ mbá estrevista náa mañajunʼ, nákhá xóó tséjkhá nitakáñuu Jeobá, ndi̱yo̱o̱ dí ikhaa má ndaʼyoo ndiéjunʼ dí itháan mambáyuʼ. Nindoʼ mañajunʼ itháán mu madaaʼ itháán, mú xágruígú ma̱ni̱ ñajunʼ rígi̱ á mu xániñuʼ ma̱ni̱ itháán ñajuunʼ Jeobá”.

⁸ Javier naʼthí dí índo̱ nixtrajxi̱i̱ á mu ma̱ndoo mañajunʼ itháán mbayuʼ ikhaa niʼthí rí xándoo, numuu dí ikhaa nandoo maʼni itháán ñajunʼ Dios. Ikha jngóo Javier na̱nguá má niñajunʼ náa madaaʼ itháán mba̱a̱ mbújkha̱a̱, ga̱jma̱a̱ a̱jma̱ semana nda̱wa̱á ninindxu̱u̱ precursor. Tsiguʼ má rúʼko̱ nixkamaa i̱mba̱ ñajunʼ náa mañajunʼ kááʼ tikhu mbiʼi. Ikhaa naʼthí: “Jeobá niʼdxawun rí nitakáñuu ga̱jma̱a̱ nixnúʼ mbá ñajunʼ dí naniñuʼ mani̱ndxu̱ʼ precursor. Ra̱ʼkhá tháán nadxu̱ʼ dí nandoo nani itháán ñajuunʼ Jeobá ga̱jma̱a̱ nambáñúún a̱ngiu̱lú”.

9. Ndiéjunʼ nijmañaaʼ ga̱jma̱a̱ numuu rí nigíʼnuu ndxájulú Trésor rá.

⁹ Á mu nduʼyáá dí ñajunʼ dí kuáʼdáá naʼni dí xambájxulú májánʼ gajmiúlú Jeobá rá. Guʼyáá rí nigíʼnuu Trésor mbáa ndxájulú bi̱ xtáa náa Congo. Ikhaa naʼthí: “Nixkamaa mbá ñajunʼ dí naniguʼ, náa nadaaʼ itháán mba̱a̱ ki xóo nákhá ginii ga̱jma̱a̱ ikhí nduyamajkhuʼ”. Mú Trésor mbaʼa nuthu nandátigo̱o̱ reunión numuu rí naguanúu nañajunʼ ajndu wakíʼ. Ma̱ngaa nutsudaa maʼni nduwaʼ ga̱jma̱a̱ numuu rí naʼni empresa, nindoo maniñuuʼ rañajunʼ ikhí, mú nixmiéjuunʼ dí xáxkamaa i̱mba̱ ñajunʼ. Ndiéjunʼ nimbáyúu xá. Ikhaa naʼthí: “Ajngáa dí naʼthí náa Habacuc 3:​17-19 nimbáyuʼ mba̱yo̱o̱ dí Jeobá má gáñewu̱nʼ, ikha jngóo niniʼñúuʼ ñajunʼ rúʼko̱ ga̱jma̱a̱ nánguá nidaaʼ mbaaʼ mbújkha̱a̱”. Ikhaa naʼthí xóó: “Mbaʼin patrúun nakumu̱ún dí xa̱bu̱ muni̱ ajndu ndiéjunʼ má mu maguáʼdáá mbá ñajunʼ náa mudaʼ mbaaʼ mbújkha̱a̱ dí ajndu muniñu̱u̱nʼ bi̱ kúwá náa guʼwún o ajndu muniñaaʼ runi̱ ñajuunʼ Dios. Ra̱ʼkhá tháán nadxuʼ dí tániʼñúuʼ rani̱ ñajuunʼ Dios, ma̱ngaa dí niñewu̱u̱n bi̱ kúwá náa goʼwóʼ. Mbá tsiguʼ nda̱wa̱á Jeobá nimbáyuʼ maxkamaa mbá ñajunʼ náa madaaʼ mbújkha̱a̱ mu mutsi dí ndayúxuʼ ma̱ngaa mu ma̱ndoo ma̱ni̱ ñajuunʼ. Índo̱ nuʼgíʼ nuʼni ginii ñajuunʼ Jeobá mbáa marigá mbiʼi dí xáguáʼdáá mba̱a̱ mbújkha̱a̱, mú Jeobá má gañewunlúʼ”. Ikha jngóo á mu nuʼnimbulú consejo dí ikhaa naxnúlú ga̱jma̱a̱ dí nakudaminaʼ maʼni, musngajmá rí kuáʼdáá fe náa Jeobá ga̱jma̱a̱ ikhaa maʼni tsajkurámáánʼlú.

ÍNDO̱ GÁTRAʼWÍÍ TSÁÁ MBI̱YA̱A̱

10. Xú káʼnii gásngájma mbáa ndxájulú dí i̱ndó najngrui̱go̱o̱ náa dí naʼngo̱o̱ ndaʼyoo índo̱ gáraʼwíí tsáá mba̱ya̱a̱ xá.

¹⁰ Rí xa̱bu̱ nudamijná nindxu̱u̱ mbá regalo ndrígóo Jeobá. Ikha jngóo na̱nguá má nindxu̱u̱ raʼkhí á mu nandaaʼ mataniʼgúnʼ o matanujúnʼ. Índo̱ mbáa ndxájulú a̱ʼgu̱ nandoo mbayáa mbáa ndxájulú xa̱biya̱, ikhaa ndaʼyoo xóo nindxu̱u̱ ndxájulú, xóo kujmaa, xóo eʼni, ndiéjunʼ e̱ndxa̱ʼwa̱míjna̱ eʼwíinʼ ga̱jma̱a̱ numuu, xú káʼnii eñawu̱u̱n mbújkha̱a̱, á mu ndayóoʼ mañe̱wu̱u̱nʼ bi̱ kúwá náa goʼwóo ga̱jma̱a̱ á mu nani maxtáa gagi.b Maski ajndu rígi̱ gíʼdoo numuu, mú á mu i̱ndó rígi̱ eʼyoo, masngájma dí i̱ndó najngrui̱go̱o̱ náa dí naʼngo̱o̱ ndaʼyoo.

11. Xú káʼnii esngájma mbáa dí naku̱mu̱u̱ kaʼyoo Jeobá índo̱ naraʼwíí tsáá mbayáa rá. (1 Corintios 7:39.)

¹¹ Jeobá nadxuu kaʼñúún a̱ngiu̱lú bi̱ nunimbu̱u̱n consejo ndrígóo índo̱ nduyáaʼ bi̱ mbu̱ya̱a̱. Mbáa bi̱ nandoo manigúúnʼ o manújúnʼ naʼnimbo̱o̱ consejo náa naʼthí rí gíʼmaa magiʼthu̱u̱n rí magiʼdoo tsiguuʼ mu ma̱ndoo majngrui̱go̱o̱ ga̱jma̱a̱ mbáa (1 Cor. 7:36). I̱mba̱ consejo nindxu̱u̱ dí gíʼmaa mbaʼyoo á mu xa̱bu̱ bi̱ nandoo mbayáa nindxu̱u̱ mbáa májánʼ xa̱bu̱, xó má eyoo Jeobá rí mani̱ndxu̱u̱ (Prov. 31:​10-13, 26-28; Efes. 5:33; 1 Tim. 5:8). Ga̱jma̱a̱ á mu mbáa bi̱ xóó tséjngúun iyááʼ naʼthúu̱n dí majngrui̱go̱o̱ ga̱jma̱a̱, naʼnimbo̱o̱ consejo rí naʼthí dí gíʼmaa manigúúnʼ o manújunʼ náa Tátá xó má naʼthí náa 1 Corintios 7:39 (atraxnuu). Araʼdáá má xúʼko̱ fe náa Jeobá ga̱jma̱a̱ ikhaa má gáxnáaʼ dí gáʼyáaʼ (Sal. 55:22).

12. Ndiéjunʼ nijmañaaʼ ga̱jma̱a̱ numuu rí nigíʼnuu Rosa rá.

¹² Guʼyáá rí nigíʼnuu Rosa mbáa precursora bi̱ xtáa náa Colombia, náa nañajunʼ nininiiʼ mbáa xa̱bu̱ bi̱ nindoo kaʼyoo bi̱ na̱nguá nindxu̱u̱ Testigo. Ga̱jma̱a̱ ma̱ngaa ninigiu̱u̱ʼ. Ikhaa naʼthí: “Nakujmaa dí nindxu̱u̱ mbáa májáanʼ xa̱bu̱, nambáñúún bi̱ kúwá náa xtáa ga̱jma̱a̱ na̱nguá etsikhá ndíí, ní má droga ní má tséʼga̱a̱n wéñuuʼ iyaʼ najnga̱a̱, naniguʼ xóo eʼniuʼ ga̱jma̱a̱ nindxu̱u̱ mbáa xa̱bu̱ bi̱ ikhúún nindoʼ mba̱ya̱a̱, mú na̱nguá nindxu̱u̱ Testigo”. Naʼthí xóó: “Niʼniuu gakhi̱i̱ mathu̱u̱n dí xándoo majngruigoʼ gajmuʼ numuu dí ikhúún nandoʼ ka̱yo̱o̱. Nákhá ikhú ikhúún nindoʼ manújunʼ, mú na̱nguá nixkamaa nimbáa náa xuajñuu Jeobá”. Mú Rosa táraʼwíí dí maʼni ga̱jma̱a̱ numuu i̱ndó dí naʼngo̱o̱ ndaʼyoo. Ikhaa nindxa̱ʼwáminaʼ xú káʼnii gáʼni gachúu rí nambájxu̱u̱ ga̱jma̱a̱ Jeobá dí gáraʼwíi maʼni. Ikha jngóo niniñuuʼ raʼtáminaʼ ga̱jma̱a̱ xa̱bu̱ ma̱ngaa nigíminaʼ maʼni itháán ñajuunʼ Dios. Itháán nda̱wa̱á nitháán maʼga náa Najuiʼsngúún bi̱ Nutaraʼa numuu Reino, ga̱jma̱a̱ dí xúgi̱ nindxu̱u̱ precursora especial. Ikhaa naʼthí: “Nguáná naʼni gakhi̱i̱ matani̱ rí naniguuʼ Jeobá, itháán má índo̱ nandaaʼ xtayáá mbáa. Mú índo̱ nundxa̱ʼwa̱míjna̱ xóo endxa̱ʼwáminaʼ Jeobá nambáyulú má ikháánʼ”.

ÍNDO̱ GÁTADRÍGÚ IKHA NÁA XUAJÑUU JEOBÁ

13. Ndiéjunʼ gamíi muʼni índo̱ nundrígú ikha náa xuajñuu Jeobá rá.

¹³ Mbaʼa nuthu nakánulú ikha dí na̱ʼkha̱ náa xuajñuu Jeobá, dí nuxnulu a̱ngiu̱lú ancianos, superintendentes ndrígóo circuito, dí na̱ʼkha̱ náa sucursal o náa a̱ngiu̱lú Cuerpo Gobernante. Mú, dí gúʼni á mu tséʼngo̱o̱ gákru̱ʼu̱lú náá numuu dí a̱ngiu̱lú nuxnulúʼ tikhu ikha rá. Mbáa gamíi muʼni a̱jma̱ a̱jkiu̱lú á mu májánʼ gánindxu̱u̱ dí muʼnimbaníí ikha rúʼko̱ o mbáa i̱ndó mbuʼyáá dí a̱ngiu̱lú bi̱ nuxkulú ikha nindxu̱ún xa̱bu̱ aʼkhá. Á mu xúʼko̱ eʼni xúsngajmá dí kuáʼdáá fe.

14. Ndiéjunʼ gámbáyulú mu muʼnimbulú ikha dí nakánulú náa xuajñuu Jeobá rá. (Hebreos 13:17.)

¹⁴ Índo̱ kuáʼdáá fe náa Jeobá nduʼyáá gajkhun dí ikhaa naxnúu ikha xuajñuu ga̱jma̱a̱ rí ndaʼyoo xóo kuwáanʼlu. Ikha jngóo mbá nacha̱ eʼnimbulúʼ ga̱jma̱a̱ tséʼni a̱jma̱ a̱jkiu̱lú (atraxnuu Hebreos 13:17). Nduyáá dí á mu nuʼnimbulú maʼni dí makuwá mbá jnduʼ náa congregación (Efes. 4:​2, 3). Maski ajndu a̱ngiu̱lú bi̱ nuxnulúʼ ikha nindxu̱ún xa̱bu̱ aʼkhá. Mú Jeobá maʼni tsajkurámáanʼ á mu nuʼnimbulú (1 Sam. 15:22). Ga̱jma̱a̱ á mu rígá náa ndayóoʼ maxtiʼkhuu, Jeobá má gáriʼkhu̱u̱ náa mbiʼi dí kaʼyoo (Miq. 7:7).

15, 16. Ndiéjunʼ nimbáyúu Kevin mu magiʼdoo fe náa Jeobá rá. (Atayáá ma̱ngaa xtiʼkhuu.)

¹⁵ Guʼyáá dí narígá índo̱ naguáʼdáá fe. Náa Perú nuthi ajngáa xtílóo, mú kúwá mbaʼin xa̱bu̱ bi̱ nuthi eʼwáʼ ajngáa, xóo ajngáa quechua. Mbayuʼ tsiguʼ a̱ngiu̱lú bi̱ nuthi ajngáa quechua nduñíinʼ xa̱bu̱ bi̱ nuthi ajngáa rígi̱ mu mutarúʼún. Mú rígi̱ nixtiʼkhuu índo̱ nixtiʼkhuu xtángoo ndrígóo xuajin (Rom. 13:1). Ikha jngóo nirajxi̱míjna̱ á mu ma̱ndoo xóó muxkamiin xa̱bu̱ bi̱ nuthi ajngáa quechua. Mú a̱ngiu̱lú ninimbu̱ún ikha dí nikhánún ga̱jma̱a̱ niriʼkhuu xóo etaraʼa, rígi̱ niʼni rí Jeobá maʼni tsajkurámiinʼ mu muxkamiin mbaʼin xa̱bu̱ bi̱ nuthi ajngáa rúʼko̱.

¹⁶ Kevin nindxu̱u̱ mbáa anciano náa mbá congregación dí nuthi ajngáa quechua. Ikhaa nixmiéjuunʼ ga̱jma̱a̱ numuu xóo mutaraʼa. Ikhaa naʼthí: “Nirajximínáʼ, xú káʼnii lá gúxkamiin xa̱bu̱ bi̱ nuthi ajngáa quechua xúgi̱ rá.” Mú ndiéjunʼ niʼni Kevin rá. Ikhaa naʼthí: “Nindxa̱ʼwáminaʼ dí naʼthí náa Proverbios 3:5 ma̱ngaa nindxa̱ʼwa̱mínáʼ ga̱jma̱a̱ numuu xkridoo Moisés, Jeobá niʼthúu̱n dí maguwíin israelitas náa Egipto ga̱jma̱a̱ dí maʼga kagui̱i̱n náa lamáa maña̱ʼ, náa nikujmaa dí xáʼngu̱u̱n gakáwíin náa ñawúúnʼ xa̱bu̱ egipcios. Mú Moisés niʼnimbo̱o̱, ikha jngóo Jeobá niʼni tsajkurámááʼ ga̱jma̱a̱ niʼni mbá milagro dí ra̱ʼkhá tháán nagui̱i̱” (Éx. 14:​1, 2, 9-11, 21, 22). Kevin niʼnimbo̱o̱ ga̱jma̱a̱ nigíʼdu̱u̱ má niʼtáráʼa, ndiéjunʼ nirígá rá. Ikhaa naʼthí: “Ra̱ʼkhá tháán nagui̱i̱ xóo Jeobá niʼni tsajkurámáanʼxu. Nákhá niʼníí na̱jkuáxu̱ mitsínguánʼ mu mutaraʼa ga̱jma̱a̱ kááʼ nuxkamiin mbáwíi o a̱jmi̱i̱n xa̱bu̱ bi̱ nuthi quechua. Mú rí xúgi̱ nuʼtáráʼa náa xuajin dí kúwá mbaʼin xa̱bu̱ bi̱ nuthi ajngáa rígi̱. Nandoo nuʼtámíjná gajmiúxu mbaʼin xa̱bu̱, kuáʼdáá revisita ga̱jma̱a̱ nusngúún ga̱jma̱a̱ Biblia. Ma̱ngaa itháán mbaʼin xa̱bu̱ nagún reunión”. Nakujmaa kaʼwu dí índo̱ naguáʼdáá fe náa Jeobá ikhaa naʼni tsajkurámáanʼlu.

17. Ndiéjunʼ nijmañulúʼ náa artículo rígi̱ rá.

¹⁷ Ndiʼyáá ajtsú enii náa ma̱ndoo musngajma dí kuáʼdáá fe. Náa xúgíʼ dí gúraʼwíí muʼni gíʼmaa muʼni dí nandoo Jeobá, xóo índo̱ gúraʼwíí dí película gúʼyáá, dí muʼni gagimijná ga̱jma̱a̱, nguáthá mitsídánʼ escuela gúʼnigajmaa. Ma̱ngaa xú káʼnii gúʼni mba̱ji̱i̱n e̱jñu̱lúʼ. Índo̱ gúraʼwíí mbá rí muʼni, guʼyáá á mu xáʼni gachúu rí nambájxulú gajmiúlú Jeobá, guʼnimbulúʼ consejo ndrígóo ga̱jma̱a̱ garmáʼáan a̱jkiu̱lú dí ikhaa má gañewunlúʼ. Ma̱ngaa xúʼyáá i̱ndó náa dí nakujmaa, xúʼko̱ muʼnimbulú kuʼyáá mbiʼyuu Dios ndrígulú ajndu kámuu mbiʼi (Miq. 4:5).