Dxámá, atayaridáá Marcos ga̱jma̱a̱ Timoteo

1, 2. Ndiéjunʼ dí ma̱ndoo marikhoo Marcos ga̱jma̱a̱ Timoteo mu xúni̱ itháan ñajuunʼ Jeobá rá.

Á MU nindxa̱a̱ʼ mbáa dxámá, mbáa nandaaʼ matani̱ itháan ñajuunʼ Jeobá ga̱jma̱a̱ matambáñún itháan a̱ngiu̱lú náa congregación. Nadxuxu wéñuuʼ índo̱ ndu̱ya̱a̱xu dí kúwá mbaʼin jiámá bi̱ nandún mumbañún eʼwíinʼ (Sal. 110:3). Mú rígi̱ naʼni gakhi̱i̱. Mbáa nguáná tséʼkha̱ a̱jkia̱a̱nʼ matani̱ itháan náa najuiʼtáraʼa ga̱jma̱a̱ numuu rí namíñáaʼ, o nitani̱ gaʼduunʼ mbá ñajunʼ rí nikhánaaʼ, numuu rí nikumaaʼ dí xóó na̱nguá xtaa xawii. Xájmaaʼ, raʼkháa mbáwíín ku̱ma̱a̱ʼ xígi̱ kaʼnii.

² Xúʼko̱ má kayuuʼ nigíʼnuu Marcos ga̱jma̱a̱ Timoteo ma̱ngaa, mú túniña̱a̱nʼ dí namíñún o dí tséjmañún marikhún mu xúmbañún eʼwíinʼ. Mbáa Marcos ga̱jma̱a̱ ru̱dúu nikúwíin náa mbá guʼwá májánʼ índo̱ apóstol Pablo ga̱jma̱a̱ Bernabé nitháán rí maʼga̱ ga̱jma̱á nindxu̱ún índo̱ nigún gútaraʼa timbá miʼtsú (Hech. 12:​12, 13, 25). Marcos nixtáa xawii maniñuuʼ goʼwóo mu xúʼko̱ ma̱ndoo maʼtáraʼa itháan. Ginii ni̱jkha̱ náa Antioquía, nda̱wa̱á ni̱jkha̱ ga̱jma̱a̱ Pablo ma̱ngaa Bernabé náa i̱ʼwáʼ xuajin dí tri̱ga̱ mitsínguánʼ (Hech. 13:​1-5). Xúʼko̱ má kayuuʼ ga̱jma̱a̱ numuu Timoteo ma̱ngaa, mbáa kaʼníí xtáa ga̱jma̱a̱ anu̱u̱ ma̱ngaa ru̱dúu̱ índo̱ Pablo niʼthúu̱n dí maʼga̱ gáʼtaraʼa ga̱jma̱a̱. Timoteo ma̱ndoo mandxaʼwáminaʼ dí kaʼníí nindxu̱u̱ mbáa dxámá ga̱jma̱a̱ tséjmañuu mu maʼga̱ ga̱jma̱a̱ Pablo (atayáá ma̱ngaa 1 Corintios 16:​10, 11 ga̱jma̱a̱ 1 Timoteo 4:12). Mú Timoteo niraʼwíí dí maʼga̱ ga̱jma̱a̱ Pablo ga̱jma̱a̱ ra̱ʼkhá tháán niguma tsajkurámáánʼ (Hech. 16:​3-5).

3. a) Xú káʼnii eʼyáá dí Pablo ndiʼyoo dí Marcos ga̱jma̱a̱ Timoteo niguáʼdáá numún rá. (2 Timoteo 4:​6, 9, 11; atayáá ma̱ngaa xtiʼkhuu.) b) Ndiéjunʼ grajxe̱ gúriʼña̱a̱ náa artículo rígi̱ rá.

³ Marcos ga̱jma̱a̱ Timoteo nijmañún munimbáníí mbaʼa ñajunʼ náa congregación nákha kaʼníí jiámá nindxu̱ún. Pablo ndiʼyoo dí niguánu niguáʼdáá numún, índo̱ ndiʼyoo rí inu makhañúu nindoo makuwá ga̱jma̱á nindxu̱u̱ (atraxnuu 2 Timoteo 4:​6, 9, 11). Xú káʼnii cualidad nigiʼdoo Marcos ga̱jma̱a̱ Timoteo dí ninigu̱u̱ʼ Pablo rá. Xú káʼnii a̱ngiu̱lú jiámá ma̱ndoo mbuyaridáá xkridún xá. Ga̱jma̱a̱ xú káʼnii consejo rí nixná Pablo ma̱ndoo mambáñún xá.

ATAMBÁÑÚN EʼWÍINʼ XÓ MÁ NIʼNI MARCOS

4, 5. Xú káʼnii nisngájma Marcos dí nixtáa xawii mambáñún eʼwíinʼ rá.

⁴ Náa mbá i̱yi̱i̱ʼ naʼthí dí matambáñún eʼwíinʼ nandoo gáʼthúu̱n rí “ndayóoʼ dí matani̱ tsiaki̱i̱ má xúʼko̱” mu matambáñún, rígi̱ dí niʼni Marcos. Índo̱ Pablo nánguá nindoo maʼga̱ ga̱jma̱a̱ índo̱ ni̱jkha̱ dí maʼni a̱jma̱ nuthu náa niʼtáráʼa, mbáa Marcos nigawúunʼ ga̱jma̱a̱ nijmúu (Hech. 15:​37, 38). Lá nijmáa a̱jkiu̱u̱n ga̱jma̱a̱ niniñuuʼ rambáñún a̱ngiu̱lú xáʼ. ¡Na̱nguá!

⁵ Marcos ni̱jkha̱ gáyambáá i̱mba̱ níʼkhá ga̱jma̱a̱ Bernabé bi̱ nindxu̱u̱ prímiu̱u̱. Xóo mbá 11 tsiguʼ nda̱wa̱á, índo̱ Pablo ni̱jkha̱ guʼwá ejua̱a̱nʼ náa Roma, Marcos ninindxu̱u̱ mbáa bi̱ nimbáyúu (Filem. 23, 24). Apóstol Pablo ra̱ʼkhá tháán nidxuu, dí asndu niʼthí dí Marcos “nindxu̱u̱ bi̱ niʼni̱i̱ a̱jkiu̱u̱n” (Col. 4:​10, 11).

6. Xú káʼnii nimbáyúu Marcos dí mañajunʼ gajmíi̱n cristianos bi̱ nambájxu̱u̱n májánʼ gajmiún Dios rá. (Atayáá ma̱ngaa nota.)

⁶ Rí nimbáyúu wéñuuʼ Marcos nindxu̱u̱ dí niñajunʼ gajmíi̱n cristiano bi̱ nambájxu̱u̱n májánʼ gajmiún Dios. Nda̱wa̱á dí ni̱jkha̱ gáʼyoo Pablo náa guʼwá ejua̱a̱nʼ dí rígá náa Roma, ni̱jkha̱ gáʼyoo apóstol Pedro náa Babilonia. Nimbájxu̱u̱n májánʼ wéñuuʼ dí asndu Pedro niʼthúu̱n “a̱ʼdióʼ” (1 Ped. 5:13). Mbáa índo̱ nikúwá mbóó, Pedro niʼthúu̱n kuduun xú káʼnii nixtáa ga̱jma̱a̱ xóo niʼtáráʼa Jesús, ga̱jma̱a̱ mbiʼi nda̱wa̱á, Marcos niʼnirámáʼ rígi̱ náa Evangelio ndrígóo.a

7. Xú káʼnii ndiʼyaridoo Marcos mbáa ndxájulú dxámá rá. (Atayáá ma̱ngaa xtiʼkhuu.)

⁷ Marcos ra̱ʼkhá tháán nigiʼdoo dí maʼni náa ñajuunʼ Jeobá ma̱ngaa nixtáa rañajunʼ gajmíi̱n cristianos bi̱ nambájxu̱u̱n májánʼ gajmiún Dios. Xú káʼnii gándoo gátayaridáá xá. Á mu nitagíʼ meta dí maraʼdáá tikhu ñajunʼ náa congregación ga̱jma̱a̱ xóó tsékánáaʼ, gaʼngo̱o̱ a̱jkia̱a̱nʼ ga̱jma̱a̱ atayáʼ má xúʼko̱ xóo ma̱ndoo matani̱ itháan ñajuunʼ Jeobá ga̱jma̱a̱ rí matambáñún a̱ngiu̱lú. Atayáá xóo niʼni ndxájulú Seung-Woo, bi̱ xúgi̱ nindxu̱u̱ anciano. Ikhaa nákha dxámá nindxu̱u̱ naʼni mbríguminaʼ gajmíi̱n bi̱ mbrígúú tsiguuʼ gajmíi̱n. Índo̱ ndaʼyoo rí tikhuun dí ikhiin itháan má wapha ekhánún ñajunʼ ki xóo ikhaa, nikumu̱u̱ rí tséyáá a̱ngiu̱lú dí xtáa raʼni. Ikha jngóo nda̱wa̱á niʼtámijna gajmíi̱n anciano ga̱jma̱a̱ numuu rígi̱, mbáa dí ikhiin niʼthúu̱n rí maʼni tsiakimínáʼ itháan mu mambáñún eʼwíinʼ, maski ajndu nguáná eʼwíinʼ xúyáá rígi̱. Ikha jngóo nigiminaʼ rí mambáñún a̱ngiu̱lú bi̱ wanii ga̱jma̱a̱ bi̱ nda̱a̱ carro magún ga̱jma̱a̱ náa reunión. Ikhaa narmáʼáan a̱jkiu̱u̱n ga̱jma̱a̱ naʼthí: “Ni̱jkhánú ndi̱yo̱o̱ ndiéjuunʼ phú eyoo gáʼthúu̱n rí matambáñún eʼwíinʼ ga̱jma̱a̱ ni̱jkhánú ndi̱yo̱o̱ rí mambáñún eʼwíinʼ a̱ngiu̱lú niʼni dí maxtáá gagi”.

GAXMIÉJUAANʼ XTAÑÚÚN EʼWÍINʼ XÓ MÁ NIʼNI TIMOTEO

8. Náá numuu dí Pablo nindoo maʼga̱ ga̱jma̱a̱ Timoteo náa na̱jkha̱ rá. (Filipenses 2:​19-22.)

⁸ Índo̱ Pablo nitanga̱a̱ náa xuajin náa dí nákha ginii nini ngínáa, ndiyóoʼ dí maʼga̱ gajmíi̱n a̱ngiu̱lú bi̱ tsémíñún. Ginii, ndiyáaʼ Silas bi̱ nindxu̱u̱ mbáa cristiano bi̱ najmañuu má (Hech. 15:​22, 40). Nda̱wa̱á niraʼwíí Timoteo, náá numuu rí nindoo maʼga̱ ga̱jma̱a̱ dxámá bugi̱ xá. Timbá, numuu dí cristianos nuthi dí májánʼ ga̱jma̱a̱ numuu (Hech. 16:​1, 2). Dí maʼni a̱jma̱, Pablo ndiʼyoo dí Timoteo gajkhun nixmiéjuunʼ kaʼñúún xa̱bu̱ (atraxnuu Filipenses 2:​19-22).

9. Xú káʼnii nisngájma Timoteo dí gajkhun nixmiéjuunʼ kaʼñúún a̱ngiu̱lú rá.

⁹ Asndu nákha timbá mbiʼi dí Timoteo nigíʼdúu niñajunʼ ga̱jma̱a̱ Pablo, nisngájma rí itháán má naxmiéjuunʼ kaʼñúún eʼwíinʼ ki xóo maxmiéjuunʼ kaʼyaminaʼ ikhaa. Ikha jngóo Pablo niniñuuʼ dí maguanúu náa Berea mu xúʼko̱ maxnún tsiaki̱i̱ eʼwíinʼ cristianos bi̱ nuxi̱i̱nʼ (Hech. 17:​13, 14). Mbiʼi rúʼko̱, Timoteo mbaʼa wéñuuʼ rí nijmañuu ma̱ngaa náa Silas, bi̱ ma̱ngaa niguanúu náa xuajin rúʼko̱. Mú mba̱yu̱u̱ʼ mbiʼi nda̱wa̱á, Pablo nikuʼmaa mbáwíí Timoteo náa xuajin Tesalónica mu maxnún tsiaki̱i̱ cristianos (1 Tes. 3:​2, nota). Náa i̱mbá 15 tsiguʼ nda̱wa̱á, Timoteo ra̱ʼkhá tháán nindoo kaʼñúún a̱ngiu̱lú dí asndu nimbiyaʼ gajmíi̱n bi̱ numbiyaʼ (Rom. 12:15; 2 Tim. 1:4). Xú káʼnii gándoo a̱ngiu̱lú jiámá mbuyaridáá xkridoo xá.

10. Xú káʼnii nijmañuu mbáa ndxájulú mu maxmiéjuunʼ kaʼñúún itháán eʼwíinʼ rá.

¹⁰ Mbáa ndxájulú bi̱ mbiʼyuu Woo Jae, nijmañuu rí maxmiéjuunʼ kaʼñúún eʼwíinʼ a̱ngiu̱lú. Nákha nindxu̱u̱ dxámá, naʼniuu gakhi̱i̱ maʼtamijna gajmíi̱n a̱ngiu̱lú bi̱ wanii. Ikha jngóo índo̱ ndaʼñún náa Salón káaʼ i̱ndó má narajxi̱ín, mbáa ndxájulú anciano niʼthúu̱n rí maʼthúún a̱ngiu̱lú rí nanigu̱u̱ʼ dí ikhiin nuni̱, mu xúʼko̱ ma̱ndoo maʼtamíjná gajmíi̱n. Nda̱wa̱á niʼthúu̱n mbaʼyoo ndiéjunʼ rí nanigu̱u̱nʼ ikhiin. Woo Jae niʼnimbo̱o̱ kaʼyoo ndxájulú. Dí xúgi̱, ma̱ngaa nindxu̱u̱ anciano ga̱jma̱a̱ ikhaa naʼthí: “Dí xúgi̱ tséʼniuʼ gakhi̱i̱ matamíjná gajmíʼ xa̱bu̱, tséʼniuu má xú káʼnii tsigúúnʼ. Naxtáá itháán májánʼ numuu dí nakro̱ʼo̱ʼ ka̱ñu̱u̱n índo̱ nuthu̱nʼ xkujndu ndrígu̱ún ga̱jma̱a̱ rígi̱ naniñuʼ mambáñún a̱ngiu̱lú ga̱jma̱a̱ rí nda̱ñúunʼ”.

11. Xú káʼnii gándoo a̱ngiu̱lú jiámá majmañún maxmiéjúúnʼ kuñún a̱ngiu̱lú náa congregación rá. (Atayáá ma̱ngaa xtiʼkhuu.)

¹¹ Dxámá, ikháán mangáán majmáán majmañaaʼ rí maxmiéjuanʼ xtañún eʼwíinʼ. Índo̱ nadxu̱ʼ reunión, aratámíjná gajmiáanʼ xúgíinʼ, tséʼniuu nguáthá tsigúúnʼ. Atrajxu̱u̱n xú káʼnii kúwá ga̱jma̱a̱ atadxawíín rí gúthaanʼ. Rúʼko̱ mambáyaaʼ ma̱ta̱ya̱a̱ xóo gátambáñún. Mbáa matañu̱u̱n a̱ngiu̱lú gajmíi̱n bi̱ wanii, bi̱ nda̱ñúunʼ mixtambáñún xóo majmúún JW Library^® o bi̱ ndawa̱a̱ tsáa magajnún gajmiún gútaraʼa. Lá maʼngo̱o̱ matambáñún xóo majmúún celular o tablet o magajnáaʼ marataráʼa gajmiáanʼ xáʼ. Á mu ndayá edxa̱a̱ʼ xóo matambáñún, mataʼgíʼ mbá májánʼ xkri̱da náa a̱ngiu̱lú bi̱ kúwá náa congregación.

MA̱NDOO MAMBÁYÁAʼ CONSEJO RÍ NIXNÁ PABLO

12. Ndiéjunʼ ma̱ndoo muni̱ a̱ngiu̱lú jiámá mu mambáñún mangiin consejo rí Pablo nixnúu Timoteo rá.

¹² Pablo nindoo kaʼyoo Timoteo xóo mbáa a̱ʼdióo, ikha jngóo nixnúu consejo rí mambáyúu maxtáa májánʼ ga̱jma̱a̱ dí mambáyúu náa maʼtáraʼa (1 Tim. 1:18; 2 Tim. 4:5). Ndiéjunʼ gándoo gátani̱ mu consejo dí nixná Pablo ma̱ndoo mambáyaaʼ mangáán rá. Atayáá xóo ikháán e̱jkha̱ inaaʼ mbá nájma̱ carta dí niʼnirámáʼ Pablo náa inuu Timoteo ga̱jma̱a̱ atayáá xú káʼnii gándoo gátanimbáníí consejo rúʼko̱. Guʼyáá tikhuʼ consejo rígi̱.

13. Ndiéjunʼ gámbáyáaʼ mu matayamajkuíí Dios rá.

¹³ “Atani̱ rataminaʼ matayamajkuíí Dios xó má gíʼmaa” (1 Tim. 4:7b). Rí matayamajkuíí Dios nandoo gáʼthúu̱n dí marajún jmbu náa Jeobá ga̱jma̱a̱ dí matani̱ rí ikhaa nanigu̱u̱ʼ. Tségumáánʼlú ga̱jma̱a̱ rígi̱, ndayóoʼ dí muʼnimíjna̱ rí muguaʼdáá. Xú káʼnii gáʼngo̱o̱ rá. Pablo niʼthúu̱n Timoteo: “Atani̱ rataminaʼ”. Náa ajngáa griego, ajngáa rígi̱ najmaa mu majuiʼthá ga̱jma̱a̱ numuu mbáa bi̱ naʼnirataminaʼ wéñuuʼ mu maʼngo̱o̱ náa mbá gitsíin. Xa̱bu̱ bugi̱ ndayóoʼ dí maʼtsíin májánʼ mu xúʼko̱ maʼngo̱o̱, mangáánʼ ndayóoʼ mu̱ʼni̱ rí mambáyúlú mu mambajxúlú itháan májánʼ gajmiúlú Jeobá.

14. Ndiéjunʼ eyulú índo̱ nuraxnuu Biblia rá. Aratá mbá rí ma̱ndoo mu̱ʼni̱.

¹⁴ Mbá dí ikhaa nindxu̱u̱ dí matraxnuu Biblia xúgíʼ mbiʼi. Garmáʼáan a̱jkia̱a̱nʼ rí natraxnuu numuu dí nandaaʼ mambajxáaʼ itháán májánʼ ga̱jma̱a̱ʼ Jeobá. Guʼyáá xóo gándoo gátani̱ rígi̱, atatsaʼwáminaʼ dí xtaa ratraxnuu náa naʼthí índo̱ Jesús niʼtámíjná ga̱jma̱a̱ mbáa xa̱bu̱ ñajunʼ dxámá bi̱ gíʼdoo (Mar. 10:​17-22). Xa̱bu̱ ñajunʼ bugi̱, ndaʼyoo má dí Jesús nindxu̱u̱ Mesías, mú na̱nguá gíʼdoo mba̱a̱ fe mu maʼga̱nú mani̱ndxu̱u̱ xa̱bi̱i̱. Maski ajndu xúʼko̱ náa Biblia naʼthí dí Jesús nigáwíinʼ a̱jkiu̱u̱n kaʼyoo. Mbáa ikháán nanigua̱a̱ʼ índo̱ Jesús niʼthúu̱n ga̱jma̱a̱ ajngáa wabaʼ. Nikujmaa kaʼwu dí Jesús nindoo dí dxámá bugi̱ maraʼwíí májánʼ dí maʼni. Ndiéjunʼ gándoo gátani̱ ikháán mu majmañaaʼ itháán ga̱jma̱a̱ numuu Jeobá rá. Xó má Jesús nisngájma kaʼwu xú káʼnii nindxu̱u̱ anu̱u̱, náa relato rígi̱ naʼsngáaʼ dí Jeobá nindoo kaʼyoo dxámá bugi̱ (Juan 14:9). Ga̱jma̱a̱ índo̱ ikháán gátatsaʼwamínáʼ ga̱jma̱a̱ numuu dxámá bugi̱ ma̱ngaa xóo xtaa ikháán, ma̱ndoo matrajximínaʼ: “Ndiéjunʼ gáʼyóoʼ ma̱ni̱ ikhúún mu makuʼmaminaʼ itháán náa Jeobá ga̱jma̱a̱ rí mambáñún itháán eʼwíinʼ rá.”

15. Náá numuu dí jiámá ndayóoʼ munimíjna̱ mugíʼ mbá májánʼ xkri̱da rá. (1 Timoteo 4:​12, 13.)

¹⁵ “Ataniminaʼ mani̱ndxa̱a̱ʼ mbá xkri̱da náa bi̱ guájun jmbu” (atraxnuu 1 Timoteo 4:​12, 13). Pablo niʼthúu̱n Timoteo dí gíʼdoo wéñuuʼ numuu dí majmañuu maguxnuu májánʼ ga̱jma̱a̱ rí maʼsngáa májánʼ. Ma̱ngaa niʼthúu̱n rí maʼniminaʼ masngájma cualidad xóo rígi̱: “Ngajua, fe ga̱jma̱a̱ kaʼwu rí gáʼni”. Ndíjkha rá. Numuu dí itháán má nayambáá dí matani̱ ki xóo dí marata̱. Atatsaʼwáminaʼ dí nakhánaaʼ mbá discurso náa ndayóoʼ marata̱ xú káʼnii gándoo mu̱ʼni̱ mu muʼtáraʼa itháan. Magiʼdoo numuu dí gárata á mu natani̱ tsiakimínáʼ marataráʼa xó má eʼngo̱o̱. A̱ngiu̱lú itháan má mbuyáá dí natani̱ ki xóo dí naratá (1 Tim. 3:13).

16. a) Náá dí mbá witsu ma̱ndoo mugíʼ mbá májánʼ xkri̱da a̱ngiu̱lú jiámá rá. b) Ndiéjunʼ gándoo maʼni mbáa dxámá mu magíʼ mbá májánʼ xkri̱da ga̱jma̱a̱ dí xóo naʼthí rá.

¹⁶ Náa 1 Timoteo 4:​12, Pablo naʼthí mbá witsu náa mbáa dxámá ma̱ndoo magíʼ mbá májánʼ xkri̱da. Májánʼ gáʼni dí ma̱ta̱ya̱a̱ rígi̱ índo̱ gátaniga̱jma̱a̱. Guʼthá rí ikháán nandaaʼ matani̱ rí timbá, “xóo naratá”. Atatsaʼwaminaʼ májánʼ dí gárata mu maxnún tsiaki̱i̱ eʼwíinʼ. Á mu kaʼníí xtaa ga̱jma̱a̱ʼ anaaʼ ga̱jma̱a̱ rudáaʼ, ma̱ndoo maraxni̱í núma̱aʼ ga̱jma̱a̱ numuu mbá xúgíʼ rí nuni̱ ga̱jma̱á numaaʼ. Ma̱ngaa ma̱ndoo matani̱ tsiakimínaʼ dí maraxna̱ comentario ga̱jma̱a̱ ajngáaʼ náa reunión. Ga̱jma̱a̱ índo̱ gámbá ma̱ndoo maratha̱a̱n mbáa ndxájulú dí ninigua̱a̱ʼ mbá dí nixná náa reunión. Á mu nataniminaʼ mataʼgíʼ mbá májánʼ xkri̱da ga̱jma̱a̱ xóo narathá, eʼwíinʼ mbuyáá rí na̱dxu̱ʼ ranindxa̱a̱ʼ mbáa májáanʼ xa̱bi̱i̱ Dios (1 Tim. 4:15).

17. Ndiéjunʼ gámbáyúu mbáa dxámá mu maʼngo̱o̱ maxkamaa meta dí maʼni itháan ñajuunʼ Dios rá. (2 Timoteo 2:22.)

¹⁷ “Atani̱ gaʼduunʼ rí nagua̱ʼa̱ muni̱ jiámá ga̱jma̱a̱ wa̱ʼxa̱ʼ, atayáʼ rí jmbu” (atraxnuu 2 Timoteo 2:22). Pablo niʼthúu̱n Timoteo dí maʼni gaʼduunʼ mbá xúgíʼ dí gamíi marikhoo maʼni ñajuunʼ Jeobá ga̱jma̱a̱ dí maʼni matsíngu̱u̱nʼ náa ikhaa. Mbáa ma̱ta̱ya̱a̱ dí rígá tikhuu dí natani̱, maski ajndu na̱nguá má nindxu̱u̱ ra̱májánʼ, mú narígú káyáaʼ mbiʼi mu matani̱ ñajuunʼ Jeobá. Atatsaʼwáminaʼ nguáthá mba̱yu̱u̱ʼ ejyáaʼ náa naratsíin o índo̱ nata̱ʼa̱a̱ʼ náa internet o naratsíin ga̱jma̱a̱ videojuegos. Ma̱ndoo majmaaʼ tiempo rúʼko̱ mu matani̱ itháan ñajuunʼ Jeobá ga̱jma̱a̱ dí matambáñún a̱ngiu̱lú. Mbáa ma̱ndoo maraxnajximinaʼ matiembáá náa ñajunʼ dí naguma náa Guʼwá nagimbáanʼ o marataráʼa itháan ga̱jma̱a̱ carritos. Rúʼko̱ gámbáyáaʼ mu mambajxáaʼ itháan gajmiáanʼ bi̱ muxnaaʼ tsiaki̱i̱ dí maraʼdáá meta matani̱ itháan ñajuunʼ Dios ga̱jma̱a̱ dí maʼnga̱a̱ʼ matanimbaníí.

DÍ MATAMBÁÑÚN EʼWÍINʼ MAGUMA TSAJKURÁMÁÁʼ

18. Náá numuu nuʼthá dí Marcos ga̱jma̱a̱ Timoteo nikúwá tsímáá rá.

¹⁸ Marcos ga̱jma̱a̱ Timoteo nini̱ mbá tsiaki̱i̱ mba̱a̱ mu mumbañún eʼwíinʼ a̱ngiu̱lú, dí nini̱ xúʼko̱ kaʼnii nindoo nikúwá tsímáá ga̱jma̱a̱ gagi (Hech. 20:35). Marcos ni̱jkha̱ raʼtáráʼa náa mixtiʼkhu xuajin. Ma̱ngaa niʼnirámáʼ xóo nixtáa Jesús. Timoteo nimbáyúu Pablo mu magruiga̱ congregación ga̱jma̱a̱ mu maxnún tsiaki̱i̱ a̱ngiu̱lú. Nakujmaa kaʼwu dí Jeobá nidxuu a̱jkiu̱u̱n kaʼyoo Marcos ga̱jma̱a̱ Timoteo, numuu dí ikhiin nini̱ tsiakimíjna̱ muni̱ ñajuunʼ.

19. Ndíjkha dí gíʼdoo wéñuuʼ numuu dí a̱ngiu̱lú jiámá munimbáníí consejo dí nixná Pablo, ga̱jma̱a̱ xú káʼnii gámbáñún xá.

¹⁹ Ndiéjunʼ eʼsngúlú carta dí nigumarámáʼ ga̱jma̱a̱ espíritu santo dí Pablo nikuʼma náa Timoteo rá. Timbá, naʼsngúlú dí Pablo nindoo kaʼyoo wéñuuʼ dxámá bugi̱ bi̱ nimbájxu̱u̱ ga̱jma̱a̱. Raga̱jma̱, Jeobá nandoo kaʼyaaʼ mangáán, nandoo dí maraxtaa májánʼ ga̱jma̱a̱ tsímáá. Ikha jngóo gíʼdoo wéñuuʼ numuu dí matanimbáníí consejo dí nixná Pablo ga̱jma̱a̱ dí maʼndaaʼ matambáñún itháan a̱ngiu̱lú. Á mu xúʼko̱ etani̱, maraxtaa gagi xúgi̱ ga̱jma̱a̱ nda̱wa̱á maraxtaa májánʼ (1 Tim. 6:​18, 19).