Ndiéjunʼ ejmañulúʼ náa iwáá ajngáa dí niʼthí Jacob rá. (Níʼkhóo 1.)

1, 2. Ndiéjunʼ niʼni Jacob nákha inuu makhañúu ga̱jma̱a̱ náá numuu rá. (Atayáá ma̱ngaa xtiʼkhuu .)

NIʼNI má 17 tsiguʼ dí Jacob nigájnuu náa Canaán mu maʼga gáxtáa náa Egipto gajmíi̱n familióo (Gén. 47:28). Ikhaa nixtáa gagi mbu̱júu̱ numuu dí nitanga̱a̱ ndiʼyoo a̱ʼdióo José ga̱jma̱a̱ mbá xúgíinʼ kúwá mbá jnduʼ. Ga̱jma̱a̱ Jacob ndaʼyoo ma dí inuu makhañúu, ikha jngóo nigimbíin mbá xúgíinʼ e̱ji̱i̱n mu maʼthúún mbá dí gíʼdoo numuu (Gén. 49:28).

² Nákhá wajyúuʼ índo̱ xa̱bu̱ nikhi̱i̱ inuu makhañún, nagímbíin mbá xúgíinʼ bi̱ kúwá náa goʼwóo mu maʼthúún iwáá ajngáa (Is. 38:1). Nguáná ikhú xa̱bu̱ nikhi̱i̱ naʼthí tsáá a̱ʼdióo mani̱ndxu̱u̱ bi̱ mayéʼga edxu̱u̱ náa goʼwóo.

3. Xó má eʼthí náa Génesis 49:​1, 2, ndíjkha dí nigiʼdoo numuu ajngáa dí niʼthí Jacob rá.

³ (Atraxnuu Génesis 49:​1, 2). Índo̱ Jacob nigímbíin bi̱ kúwá náa goʼwóo ninindxu̱u̱ mixtiʼkhu numuu dí ikhaa ninindxu̱u̱ profeta ga̱jma̱a̱ Jeobá nijmiuu mu maʼthí dí gaguáʼníí e̱ji̱i̱n ga̱jma̱a̱ bi̱ kúwá náa guʼwún nda̱wa̱á. Ikha jngóo dí Jacob niʼthún e̱ji̱i̱n ninindxu̱u̱ ajngáa kiʼtáriyaʼ.

4. Ndiéjunʼ gúʼyáá náa artículo rígi̱ rá. (Atayáá ma̱ngaa náa kúgumaʼá “Bi̱ kúwá náa goʼwóo Jacob”.)

⁴ Náa artículo rígi̱ mbuʼyáá rí Jacob niʼthún a̱jkhui̱i̱n e̱ji̱i̱n: Rubén, Simeón, Leví ga̱jma̱a̱ Judá. Náa i̱mba̱ artículo mbuʼyáá dí niʼthún bi̱ i̱mbá migiñiiʼ. Ajngáa rígi̱ niʼthún e̱ji̱i̱n ga̱jma̱a̱ xúgíinʼ bi̱ gaguwaʼ náa ikhiin bi̱ maguanu mani̱ndxu̱ún xuajin Israel. Mbuʼyáá xóo nimbánuu kiʼtáriyaʼ rígi̱ ga̱jma̱a̱ rí nigíʼnuu xuajin Israel. Ma̱ngaa majmañulú dí ma̱ndoo muʼni, mu muʼni rí naniguuʼ Anu̱lú Jeobá.

RUBÉN

5. Ndiéjunʼ nigi̱ʼthu̱u̱n Rubén rí makhánáá náa anu̱u̱ rá.

⁵ Jacob niʼthúu̱n Rubén: “Ikháán nindxa̱a̱ʼ a̱ʼdá giʼniu” (Gén. 49:3). Mbáa Rubén nikumu̱u̱ dí ikhaa makhánáá itháan mbáa ki xóo a̱ngui̱i̱n numuu rí ikhaa nindxu̱u̱ a̱ʼdá giʼnii, mbáa ma̱ngaa nikumu̱u̱ dí mayéʼga edxu̱u̱ náa xúgíinʼ bi̱ kúwá náa goʼwóo nda̱wa̱á rí gákháñuu anu̱u̱, ga̱jma̱a̱ dí bi̱ gáguwáʼ náa ikhaa mani̱ndxu̱ún bi̱ muyégún edxu̱u̱ náa mbá xúgíinʼ familióo.

6. Náá numuu dí Rubén tágruigú dí kaʼyoo makhánaa xóo a̱ʼdá giʼnii rá. (Génesis 49:​3, 4).

⁶ Maski ajndu Rubén nindxu̱u̱ a̱ʼdá giʼnii mu tágruigúu dí kaʼyoo (1 Crón. 5:1). Numuu rí tsiguʼ wapháá ikhaa nibóoʼ ga̱jma̱a̱ Bilhá a̱ʼgú ñawuun anu̱u̱. Bilhá nindxu̱u̱ ñumbáá ndrígóo Raquel bi̱ itháan nindoo kaʼyoo anu̱u̱ (Gén. 35:​19, 22). Náá numuu dí Rubén niʼni xígi̱ rá. Rubén ninindxu̱u̱ a̱ʼdióo Lea, i̱mba̱a̱ a̱ʼgiu̱u̱ Jacob. Numuu dí Raquel nikháñuu má, mbáa Rubén nikumu̱u̱ dí á mu natsíjmaa Bilhá anu̱u̱ ní xáʼndoo kaʼyoo, ga̱jma̱a̱ maʼndoo kaʼyoo itháan Lea ki xóo eʼwíinʼ. O mbáa Rubén ninigu̱u̱ʼ kaʼyoo Bilhá ikha jngóo nibóoʼ ga̱jma̱a̱, asndu káʼnii má nirígá mú Jeobá ga̱jma̱a̱ Jacob tánigu̱u̱nʼ rí niʼni (atraxnuu Génesis 49:​3, 4).

7. Ndiéjunʼ nigruigúu Rubén gajmíi̱nʼ bi̱ naguwaʼ náa goʼwóo rá. (Atayáá ma̱ngaa náa kúgumaʼá: “Ajngáa dí niʼtáriyaʼ Jacob nákha inuu makhañúu”.)

⁷ Jacob niʼthúu̱n Rubén: “Xáraʼdáá itháán numaaʼ”. Ajngáa rígi̱ nimbánuu numuu dí náa Biblia na̱nguá eʼthí á mu mbáa bi̱ na̱ʼkha̱ náa Rubén ni̱jkha̱nú ninindxu̱u̱ rey, ndxajkun o profeta. Maski ajndu xúʼko̱, Jacob nixnúu mbá dí magruigúu Rubén gajmíi̱nʼ bi̱ kúwá náa goʼwóo, niguánu ninindxu̱ún mbá xuajin chíʼgíiʼ ndrígóo Israel (Jos. 12:6). Rubén ma̱ngaa nisngájma dí májánʼ a̱jkiu̱u̱n ga̱jma̱a̱ tátanga̱a̱ makudaminaʼ aʼkhá xóo dí niʼni ga̱jma̱a̱ Bilhá (Gén. 37:​20-22; 42:37).

8. Ndiéjunʼ eʼsngúlú dí nigíʼnuu Rubén rá.

⁸ Ndiéjunʼ ejmañulúʼ rá. Dí gíʼmaa muʼni tsiakimijna muñewa̱a̱n dí guʼni ga̱jma̱a̱ muʼni gaʼduunʼ dí muʼbúlú xkawiʼ gajmiúlú mbáa. Índo̱ gúraʼníí mbá tsáʼkhá, gundxaʼwamíjna̱ xú káʼnii gamíi maʼni gawúnʼ Jeobá, bi̱ kúwá náa guʼulúʼ ga̱jma̱a̱ eʼwíinʼ dí ikháanʼ gúraʼwíí muʼni. Ma̱ngaa ragíʼmaa mambumulú “rí xtáa raʼdu mbáa, rúʼko̱ má gágujxi̱i̱” (Gál. 6:7). Dí nigíʼnuu Rubén ma̱ngaa naʼni marmáʼán a̱jkiu̱lú dí Jeobá ra̱ʼkhá tháán nagáwíinʼ a̱jkiu̱u̱n kaʼyulú. Mú mbáa mbaʼyóoʼ má mumíniiʼ ga̱jma̱a̱ numuu aʼkhá ndrígulú, mú á mu natanga̱a̱ a̱jkiu̱lú ga̱jma̱a̱ nuʼni tsiakimijna mu̱ʼni̱ dí májánʼ. Jeobá maʼni mba̱a̱ a̱jkiu̱u̱n kaʼyulú ga̱jma̱a̱ maʼni tsajkurámáánʼlú.

SIMEÓN GA̱JMA̱A̱ LEVÍ

9. Náá numuu dí Jacob tánigu̱u̱ʼ dí niʼni Simeón ga̱jma̱a̱ Leví rá. (Génesis 49:​5-7.)

⁹ (Atraxnuu Génesis 49:​5-7). Nda̱wa̱á Jacob niʼthúu̱n Simeón ga̱jma̱a̱ Leví mbá ajngáa dí nisngájma rí tánigu̱u̱ʼ dí nini̱. Nákha tsiguʼ wapháá Siquem mbáa xa̱bu̱ bi̱ na̱ʼkha̱ náa Canaán nitsijmaa Dina, wáxióo Jacob. Ikha jngóo xúgíinʼ e̱ji̱i̱n Jacob nikiʼníin ga̱jma̱a̱ numuu dí nigíʼnuu giʼtiún. Mú Simeón ga̱jma̱a̱ Leví mba̱áʼ nújngo̱ó nikiʼníin. E̱ji̱i̱n Jacob nini̱ nduwiinʼ xa̱bi̱i̱ Siquem, nithúún dí makuwá tsímáá gajmiún á mu ikhiin nurujtu xtóo xuyuuʼ tsáʼkhún. Ikhiin nini̱ xó má nithúún, índo̱ ikhiin kaʼníí xóó tséʼni̱i̱ májánʼ a̱jkiu̱ún, Simeón ga̱jma̱a̱ Leví “niriyaʼ espada ga̱jma̱a̱ nigún náa xuajin” “niradíin xúgíinʼ xa̱bekha” (Gén. 34:​25-29).

10. Xú káʼnii nimbánuu ajngáa dí niʼtáriyaʼ Jacob ga̱jma̱a̱ numuu Simeón ga̱jma̱a̱ Leví rá. (Atayáá ma̱ngaa náa kúgumaʼá: “Ajngáa dí niʼtáriyaʼ Jacob nákha inuu makhañúu”.)

¹⁰ Jacob ra̱ʼkhá tháán nikiʼnáa dí a̱jmi̱i̱n e̱ji̱i̱n niradíin mbaʼin xa̱bu̱, ikha jngóo niʼtáriyaʼ dí ikhiin magadríʼiin náa xúgíʼ mbayuuʼ Israel. Ajngáa rígi̱ nimbánuu itháan dí 200 tsiguʼ nda̱wa̱á, índo̱ israelitas nita̱ʼa̱án náa Ku̱ba̱ʼ rí nijuiʼthá makánún. Xuajin chíʼgíiʼ ndrígóo Simeón nikhánáá tikhu xuajin dí rígá náa mbayuuʼ Judá (Jos. 19:1). Ga̱jma̱a̱ dí nigruigúu Leví ninindxu̱u̱ mbá 48 xuajin dí rígá náa xúgíʼ Israel (Jos. 21:41).

11. Ndiéjunʼ dí májánʼ nini̱ bi̱ naguwáʼ náa xuajin majkhaʼ ndrígóo Simeón ga̱jma̱a̱ Leví rá.

¹¹ Bi̱ naguwaʼ náa Simeón ga̱jma̱a̱ Leví túxudami̱jna̱ ikháá má aʼkhá dí nini̱ wajin xiʼñúúnʼ. Mbaʼin levitas ndiyamajkuíí Jeobá. Índo̱ Moisés nitsimuu náa kúbá Sinaí mu magruigú Xtángoo ndrígóo Jeobá. Mbaʼin israelitas niguáʼdi̱i̱ ndiyamajkuíí mbáa a̱ʼdá xedi̱. Mú levitas túyamajkuíí mbáa dios bi̱ ragájkhun. Ga̱jma̱a̱ nda̱wa̱á nimbayíí Moisés mu munigámbíin bi̱ ndiyamajkuíí a̱ʼdá xedi̱ (Éx. 32:​26-29). Jeobá niraʼwíin tikhuun xa̱bekha bi̱ naguwaʼ náa xuajin chíʼgíiʼ ndrígóo Leví mu mani̱ndxu̱ún ndxajkun náa Israel (Éx. 40:​12-15; Núm. 3:​11, 12). Itháan nda̱wa̱á bi̱ naguwaʼ náa xuajin chíʼgíiʼ ndrígóo Simeón nimbañúún bi̱ naguwáʼ náa xuajin chíʼgíiʼ ndrígóo Judá muxmíjná gajmiún cananeos, mu xúʼko̱ mata̱ʼa̱án náa Ku̱ba̱ʼ rí nijuiʼthá makánún (Juec. 1:​3, 17).

12. Ndiéjunʼ ejmañulúʼ ga̱jma̱a̱ numuu dí niʼni Simeón ga̱jma̱a̱ Leví rá.

¹² Ndiéjunʼ ejmañulúʼ rá. Xákiʼnáanʼlú wéñuuʼ. Na̱nguá má nindxu̱u̱ raʼkhí dí makásngañulú á mu nuniulú dí ra̱májánʼ o nuni̱i̱ dí raʼkhí mbáa bi̱ nandulúʼ kuʼyáá (Sal. 4:4). Mú garmáʼáan a̱jkiu̱lú dí Jeobá tsénigu̱u̱ʼ dí ikháanʼ muʼni o muʼthá mbá dí maʼni gawúunʼ eʼwíinʼ (Sant. 1:20). Índo̱ gúniulú dí ra̱májánʼ o índo̱ gúʼyáá dí narígá mbáa dí ra̱májánʼ, tséʼniuu má náa awúu̱n congregación o rexa̱a̱, guʼni tsiakimíjna̱ muʼnimbaníí dí naʼthí náa Biblia mu xúʼko̱ xúʼni̱ gawúunʼ eʼwíinʼ (Rom. 12:​17, 19; 1 Ped. 3:9). Á mu ana̱a̱ʼ ga̱jma̱a̱ ru̱dáaʼ nuni̱ dí tsénigu̱u̱ʼ Jeobá, ikháán tséyóo matani̱ xóo eni̱ ikhiin. Xáku̱ma̱a̱ʼ rí nditháan xándoo matani̱ dí nanigu̱u̱ʼ Jeobá, ikhaa mambáyáaʼ matani̱ rí májánʼ ga̱jma̱a̱ maʼni tsajkurámaaʼ ga̱jma̱a̱ numuu rígi̱.

JUDÁ

13. Náá numuu dí mbáa nixmiéjuunʼ Judá índo̱ Jacob niʼthúu̱n ikhaa xá.

¹³ Rí xúgi̱ Jacob naʼthúu̱n Judá. Nda̱wa̱á rí Judá niʼdxawun dí anu̱u̱ niʼthúún a̱ngui̱i̱n, mbáa nixmiéjunʼ numuu rí ikhaa ma̱ngaa niʼni mbaʼa enii dí raʼkhí. Nijkha ma̱ngaa gajmíi̱n a̱ngui̱i̱n ga̱jma̱a̱ niguwíi xúgíʼ dí rígá náa xuajin ndrígóo Siquem (Gén. 34:27). Ma̱ngaa niyambáá mu magujua̱a̱ José xóo ñumbáá ga̱jma̱a̱ niʼni nduwaaʼ anu̱u̱ (Gén. 37:​31-33). Itháan nda̱wa̱á, Judá nibóoʼ ga̱jma̱a̱ guʼgiúunʼ bi̱ mbiʼyuu Tamar numuu dí nikumu̱u̱ dí ikhaa nindxu̱u̱ a̱ʼgu̱ bi̱ nagujuamínáʼ (Gén. 38:​15-18).

14. a) Ndiéjunʼ niʼthúu̱n Jacob Judá rá. b) Ga̱jma̱a̱ ndiéjunʼ rí májánʼ niʼni Judá rá. (Génesis 49:​8, 9.)

¹⁴ Mú, Jeobá niʼni rí Jacob maʼthí i̱ndó dí májánʼ ga̱jma̱a̱ numuu Judá, ma̱ngaa dí ikhaa gajmíi̱n bi̱ kúwá náa goʼwóo mundrigúu dí májánʼ (atraxnuu Génesis 49:​8, 9). Judá nisngájma dí nixmiéjuunʼ kaʼyoo anu̱u̱ bi̱ nikhi̱i̱ má. Ga̱jma̱a̱ nigáwíinʼ a̱jkiu̱u̱n kaʼyoo giʼtio̱o̱ Benjamín ma̱ngaa niñewu̱u̱n (Gén. 44:​18, 30-34).

15. Xú káʼnii nimbánuu kiʼtáriyaʼ dí niʼthí Jacob ga̱jma̱a̱ numuu Judá rá.

¹⁵ Jacob niʼtáriyaʼ dí Judá mani̱ndxu̱u̱ bi̱ mayéʼga edxu̱u̱ náa a̱ngui̱i̱n. Mú mbajyúuʼ mbayuʼ mu mambanúu rígi̱, 200 tsiguʼ nda̱wa̱á índo̱ israelitas nigájníin náa Egipto ga̱jma̱a̱ nigún náa ku̱ba̱ʼ mijxooʼ mu mata̱ʼa̱a̱n náa Ku̱ba̱ʼ rí nijuiʼthá makánún. Xuajin majkhaʼ ndrígóo Judá ninindxu̱ún bi̱ nigún ginii ga̱jma̱a̱ eʼwáʼ xuajin majkhaʼ nigún kidxu̱únʼ ikhiin (Núm. 10:14). Tsiguʼ nda̱wa̱á Jeobá niraʼwíin xa̱bekha bi̱ kúwá náa Judá mu magún guxmíjná gajmiún cananeos mu mundrigúu Ku̱ba̱ʼ rí nijuiʼthá makánún (Juec. 1:​1, 2). Ga̱jma̱a̱ David ninindxu̱u̱ timbáa rey náa xúgíinʼ reyes bi̱ niguwáʼ náa xuajin chíʼgíiʼ ndrígóo Judá. Mú raʼkháa i̱ndó rígi̱ nimbánuu náa Judá.

16. Xú káʼnii nimbánuu kiʼtáriyaʼ dí na̱ʼkha̱ náa Génesis 49:10 rá. (Atayáá ma̱ngaa náa kúgumaʼá: “Ajngáa dí niʼtáriyaʼ Jacob nákha inuu makhañúu”.)

¹⁶ Jacob niʼthí dí xa̱bu̱ ñajunʼ bi̱ maʼtáñajúúnʼ xúgíinʼ xa̱bu̱ ñajunʼ ma̱ʼkha̱ náa Judá, ga̱jma̱a̱ ikhaa maʼtáñajunʼ asndu kámuu (atraxnuu Génesis 49:10 ga̱jma̱a̱ nota). Jacob nixnáʼ mbiʼyuu Siló, ikhaa nindxu̱u̱ Jesucristo. Mbáa ángel niʼthí rígi̱ ga̱jma̱a̱ numuu Jesús: “Jeobá Dios maxnúu xíliu̱u̱ David bi̱ nindxu̱u̱ anu̱u̱” (Luc. 1:​32, 33). Ma̱ngaa Jesús nagumbiʼyuu “León bi̱ na̱ʼkha̱ náa xuajen chíʼgíiʼ ndrígóo Judá” (Apoc. 5:5).

17. Xú káʼnii gándoo guʼyaridáá Jeobá rá.

¹⁷ Ndiéjunʼ ejmañulúʼ rá. Jeobá ndaʼyoo náa dí májánʼ rí nuni̱ xa̱bi̱i̱. Niʼni tsajkurámaaʼ Judá maski ajndu nikudaminaʼ aʼkhá mbiiʼ. Mbáa a̱ngui̱i̱n niʼniún tsiánguá ga̱jma̱a̱ nirajximíjna̱ náá numuu rí Jeobá niʼni tsajkurámaaʼ. Na̱nguá eʼyáá á mu xúʼko̱ nindxaʼwamíjna̱, mú nduʼyáá dí Jeobá ndiʼyoo rí májánʼ dí niʼni Judá ga̱jma̱a̱ niʼni numa̱a̱ ga̱jma̱a̱ numuu rígi̱. Xú káʼnii gándoo guʼyaridáá Jeobá rá. Guʼyáá i̱ndó rí májánʼ dí nuni̱ a̱ngiu̱lú. Índo̱ mbáa ndxájulú nakánáá mbá asignación dí gíʼdoo numuu, numuu rí á mu i̱ndó nduʼyáá náa rí nakiéʼkúún mbáa murajximíjnalú náá numuu dí nikhánaaʼ ñajunʼ rúʼko̱. Garmáʼáan a̱jkiu̱lú dí Jeobá nadxuu a̱jkiu̱u̱n kaʼyoo ndxájulú bugi̱ numuu dí ndaʼyoo i̱ndó náa dí májánʼ rí naʼni.

18. Xú káʼnii gándoo guʼyaridúún bi̱ naguwáʼ náa Judá rá.

¹⁸ I̱mba̱ dí naʼsngúlú dí nigíʼnuu Judá, nindxu̱u̱ dí gíʼmaa maʼngo̱o̱ a̱jkiu̱lú. Jeobá naʼnimbánuu rí naʼthí maʼni. Mú nguáná ndayóo muguaʼthi̱i̱n maski ajndu nguáná xárígá xó má eyulú ikháanʼ. Raʼkháa mbá nacha̱ niguáʼdi̱i̱ nitañajunʼ bi̱ naguwaʼ náa xuajin chíʼgíiʼ ndrígóo Judá, mú niguájun jmbu náa bi̱ Jeobá nigruiguíin mbuya̱ edxu̱u̱, xóo náa Moisés bi̱ nindxu̱u̱ levita, Josué bi̱ nindxu̱u̱ efraimita o rey Saúl bi̱ nindxu̱u̱ benjamita. Guʼni xó má nini̱ ikhiin, guʼnimbulúʼ kuʼñúún bi̱ Jeobá nigruiguíin mu muxna ikha náa xuajñuu dí mbiʼi xúgi̱ (Heb. 6:12).

19. Ndiéjunʼ ejmañulúʼ ga̱jma̱a̱ numuu Jeobá náa kiʼtáriyaʼ dí Jacob niʼthí nákha inuu makhañúu rá.

¹⁹ Ndiéjunʼ nijmañulúʼ náa kiʼtáriyaʼ dí Jacob niʼthúún e̱ji̱i̱n nákha inuu makhañúu rá. Nijmañulúʼ dí “Dios tséʼyoo xóo rí ndaʼyoo mbáa xa̱bu̱” (1 Sam. 16:7). Ma̱ngaa nijmañulúʼ dí ikhaa naʼngo̱o̱ a̱jkiu̱u̱n ga̱jma̱a̱ naʼni mba̱a̱ a̱jkiu̱u̱n. Ikhaa tsénigu̱u̱ʼ índo̱ nuʼni dí ra̱májánʼ mú tségiʼthu̱u̱n dí manindxu̱lú xa̱bu̱ jmbii. Asndu niʼni tsajkurámíinʼ xa̱bu̱ bi̱ nixudamíjna̱ aʼkhá mbiiʼ mu nitanga̱a̱ a̱jkiu̱ún ga̱jma̱a̱ nini̱ tsiakimíjna̱ muni̱ rí nindxu̱u̱ májánʼ. Náa i̱mba̱ artículo mbuʼyáá ndiéjunʼ niʼthún Jacob bi̱ i̱mbá migiñiiʼ e̱ji̱i̱n.