Cristianos bi̱ nuni̱ guerra | Ndiéjuunʼ eʼthí náa Biblia rá.

Xkujndu dí narígá náa Ucrania nasngájma kaʼwu dí bi̱ kuya̱ edxu̱u̱ náa i̱ʼwáʼ religión nuxkajxi̱i̱n xa̱bu̱ dí mumbayíí guerra. Guʼyáá xú káʼnii ethi a̱jmi̱i̱n xa̱bu̱ ede̱ bi̱ kúwá náa mambá xuajen rígi̱:

• “Nanduxu muxnií núma̱aʼ ga̱jma̱a̱ mbuʼya majkhúún xúgíinʼ xa̱bu̱ bi̱ nagún náa guerra mu muñewa̱a̱n Ucrania náa xa̱bu̱ sia̱nʼ […]. Makuwáanʼxu má xawii mumbáñún ma̱ngaa mutajkáan ga̱jma̱a̱ numún” (metropolitano Epifanio I bi̱ na̱ʼkha̱ náa Kiev, The Jerusalem Post, 16 ñajunʼ gu̱nʼ marzo tsiguʼ 2022).

• “Domingo rígi̱ bi̱ kayá edxu̱u̱ náa guʼwá ndxajkun Ortodoxa dí rígá náa Rusia niʼni mbá misa ga̱jma̱a̱ numún soldado bi̱ kúwi̱i̱n náa Rusia, ikhí niʼthúún dí xakáguabiinʼ mu muñewa̱a̱n má xúʼko̱ xuajñún ‹xó má eguʼwún eni̱›. Mú soldado bi̱ naguwáʼ náa Moscú kúwi̱i̱n ragiʼduun má xúʼko̱ náa Ucrania (Reuters, 3 ñajunʼ gu̱nʼ abril tsiguʼ 2022).

Lá gíʼmaa magún guerra cristianos ráʼ. Ndiéjunʼ eʼthí náa Biblia rá.

Dí naʼthí náa Biblia

Náa Biblia naʼthí dí bi̱ gajkhun nagún kidxuuʼ Jesús tségún guerra.

• “Atiéjxi̱i̱ espada, numuu rí xúgíinʼ bi̱ najmún espada, espada má gákháñún ga̱jma̱a̱” (Mateo 26:52).

  Lá naʼnimbánuu dí niʼtáñajunʼ Jesús mbáa xa̱bu̱ bi̱ naniñuuʼ marígá guerra o na̱jkha̱ ikhí ma̱ngaa xáʼ.

• “Naxna̱la i̱mba̱ nuxi̱ʼ kiʼtáñajunʼ: Rí gaʼndala kuyamíjna̱ kaníkháanʼ; xó má ikhúúnʼ nindoʼ ka̱ya̱la, xúʼko̱ má gáʼndala kuyamíjna̱ mangáanʼ. Á mu nuni̱la xúgi̱ kaʼnii, xúgíinʼ gúyáá rí ikháanʼ nindxa̱la xa̱bi̱ʼ: Á mu nandala kuyamíjna̱” (Juan 13:34, 35).

  Lá nasngájma dí nindxu̱u̱ xa̱bi̱i̱ Jesús mbáa bi̱ nayambáá mu marigá guerra ráʼ.

Á mu nandaaʼ ma̱ta̱ya̱a̱ itháán, atraxnuu artículo “El cristianismo y la guerra: ¿son compatibles?”.

Lá gíʼmaa magún náa guerra cristianos bi̱ kúwá dí mbiʼi xúgi̱ ráʼ.

Lá ma̱ndoo maguáʼthi̱i̱n dí cristianos bi̱ kúwi̱i̱n dí mbiʼi xúgi̱ xúxudamijna náa guerra ráʼ. Xúʼko̱. Náa Biblia naʼthí dí náa “iwáá mbiʼi” rígi̱ makuwá xa̱bu̱ bi̱ naguwáʼ náa xúgíʼ xuajen, bi̱ xáʼndúún muni̱ itháan guerra, xó má niʼsngáa Jesús (Isaías 2:2, 4).

• Mu matayaa itháan, atraxnuu artículo dí na̱ʼkha̱ náa i̱yi̱ʼ Bi̱ Nayejngoo “Xú káʼnii eʼyoo Dios guerra rá.”

Nánguá má mbayuuʼ dí Jeobáa “Dios bi̱ naxná rí tsímáá” majmiuu xa̱bu̱ ñajunʼ ndrígóo mu “maʼni káwíin náa rí najma gíníi ga̱jma̱a̱ náa rí najuixnún” xa̱bu̱ (Filipenses 4:9; Salmo 72:14).

• Mu matayaa xú káʼnii gáʼni, atayáá video Ndiéjunʼ nindxu̱u̱ Reino ndrígóo Dios rá.