Referencias ndrígóo I̱yi̱i̱ʼ dí majmulú náa reunión

FEBRERO 6-12

GÍʼDOO NUMUU RÍ NA̱ʼKHA̱ NÁA BIBLIA| ISAÍAS 47-51

“Magumaa tsajkurámáánʼ á mu muʼnimbulúʼ kuʼyáá Jeobá”

(Isaías 48:17) Rígi̱ nindxu̱u̱ rí niʼthí Jeobá, bi̱ Niʼtsiriñanʼ, bi̱ nindxu̱u̱ Santo náa xuajin Israel: “Ikhúúnʼ, Jeobá, ni̱ndxu̱ʼ Dios ndrígáʼ, bi̱ naʼsngáaʼ xú káʼnii mambáyaʼ ikháánʼ, bi̱ naʼtháanʼ náa kamba̱a̱ gíʼmaa majngruigaʼ.

ip-2-S 131 ¶18

Jeobá naʼsngúlú mu mambáyulúʼ

‹Guʼgíʼ edxa̱la rí natañájuanla›

¹⁸ Xi̱ʼ kaʼwu ndrígóo Dios nixkaxi̱i̱ gaʼyee mu maʼthí: “Nikungunʼ Tátá Jeobá bi̱ Niʼni xúgíʼ dí rígá náa numbaaʼ, ga̱jma̱a̱ xi̱ʼ kaʼwu ndrígóo. Rígi̱ nindxu̱u̱ rí niʼthí Jeobá, bi̱ Niʼtsiriñanʼ, bi̱ nindxu̱u̱ Santo náa xuajin Israel: ‹Ikhúúnʼ, Jeobá, ni̱ndxu̱ʼ Dios ndrígáʼ, bi̱ naʼsngáaʼ xú káʼnii mambáyaʼ ikháánʼ, bi̱ naʼtháanʼ náa kamba̱a̱ gíʼmaa majngruigaʼ›” (Isaías 48:16b, 17). Ajngáa rígi̱ náa nasngájma rí Dios naxmiéjunʼ kaʼñún xa̱bi̱i̱, ndiyóoʼ munimbu̱ún israelitas rí ikhaa gáʼni káwíin náa Babilonia. Jeobá nindxu̱u̱ bi̱ Niʼtsiriñaanʼ (Isaías 54:5), ga̱jma̱a̱ nandoo mbá xúgíʼ a̱jkiu̱u̱n rí mambaxúún mbu̱júu̱ gajmiún ikhaa ga̱jma̱a̱ mugíʼ edxu̱ún rí naʼtáñajunʼ ikhaa. Rí mbuʼyamajkuíí Dios nandoo gáʼthúu̱n rí muʼnimbulúʼ rí naʼthí ikhaa. Xa̱bu̱ xuajen Israel na̱nguá xóo magún náa kamba̱a̱ rí jmbu á mu tsésngúún ‹kamba̱a̱ rí gíʼmaa majngruigu̱u̱n›.

(Isaías 48:18) ¡I̱ndó á mu natagíiʼ edxa̱ʼ náa rí natañájunʼ! Ikhú maraxtaa tsímáá xóo mbá mañu, ga̱jma̱a̱ jmbu rí natani mani̱ndxu̱u̱ xóo olas ndrígóo lamáa.

ip-2-S 131 ¶19

Jeobá naʼsngúlú mu mambáyulúʼ

¹⁹ Jeobá najmuu ajngáa mitsaan mu masngájma rí nandoo rí xa̱bu̱ xuajen muni gaʼduunʼ gamiéjunʼ ga̱jma̱a̱ makuwá tsímáá: “¡I̱ndó á mu natagíiʼ edxa̱ʼ náa rí natañájunʼ! Ikhú maraxtaa tsímáá xóo mbá mañu, ga̱jma̱a̱ jmbu rí natani mani̱ndxu̱u̱ xóo olas ndrígóo lamáa” (Isaías 48:18). ¡Ra̱ʼkhá tháán májánʼ eʼtáñajúnʼ bi̱ Niʼni xúgíʼ bi̱ gíʼdoo xúgíʼ tsiakii! (Deuteronomio 5:29; Salmo 81:13.) Israelitas ma̱ndoo makuwá tsímáá xóo iyaʼ rí na̱jkha̱ náa mañu ki xóo rí maʼga̱ kiʼdiin i̱mba̱ níʼkhá (Salmo 119:165). Dí májánʼ rí nuni ma̱ndoo mani̱ndxu̱u̱ mba̱a̱ wéñuʼ xóo iyaʼ rí naʼbaxu̱u̱ náa lamáa (Amós 5:24). Jeobá bi̱ naxmiéjunʼ kaʼñúún, nasngájmuun ga̱jma̱a̱ májánʼ kamba̱a̱ rí jmbu ga̱jma̱a̱ naʼthúún magún ikhí. ¡Ra̱ʼkhá tháán nindoo rí xa̱bu̱ mudxawíín!

(Isaías 48:19) E̱jña̱ʼ maguanu mani̱ndxu̱ún xóo jui̱ʼi̱ ga̱jma̱a̱ e̱jñún e̱jña̱ʼ xóo jui̱ʼi̱ rí mba̱ʼu̱. Mbiʼyuu mámbáa xajmangudi̱i̱ o xándáti̱ga̱a̱ náa inuʼ”.

ip-2-S 132 ¶20-21

Jeobá naʼsngúlú mu mambáyulúʼ

²⁰ Xú káʼnii gaguma tsajkurámááʼ Israel á mu natanga̱a̱ a̱jkiu̱u̱n xá. Jeobá naʼthí: “E̱jña̱ʼ maguanu mani̱ndxu̱ún xóo jui̱ʼi̱ ga̱jma̱a̱ e̱jñún e̱jña̱ʼ xóo jui̱ʼi̱ rí mba̱ʼu̱. Mbiʼyuu mámbáa xajmangudi̱i̱ o xándáti̱ga̱a̱ náa inuʼ” (Isaías 48:19). Dios naʼni marmáʼáan a̱jkiu̱u̱n xuajen dí nikudaminaʼ rí maʼni mbaʼin e̱ji̱i̱n Abrahán “xóo a̱ʼgua̱a̱n bi̱ kuwa mekhuíí ga̱jma̱a̱ xóo jui̱ʼi̱ náa rawunʼ lamáa” (Génesis 22:17; 32:12). Mú e̱ji̱i̱n Abrahán túnimbu̱ún, ikha jngó na̱nguá kaʼñúún mudrigú dí nikudaminaʼ Dios. Ga̱jma̱a̱ xóo nikuwa ninindxu̱u̱ raʼkhí wéñuʼ, xó má xtángoo ndrígóo Jeobá na̱nguá kaʼñúún magu̱ mbiʼñún xúʼko̱ kaʼnii (Deuteronomio 28:45). Maski ajndu xúʼko̱, Jeobá tsíyoo maʼni gámbáa xuajñu ni má maniñuuʼ.

²¹ Ikha rí na̱ʼkha̱ náa i̱yi̱i̱ʼ rígi̱ nambáñun xúgínʼ bi̱ nduyamajkuíí Jeobá dí mbiʼi xúgi̱. Ikhaa bi̱ niʼni makuwáanʼ, ndaʼyoo itháan májánʼ xú káʼnii gájmulúʼ vida ndrígúlú (Salmo 36:9). Xtángoo dí nixnúlú nambáyulúʼ, raʼkháa dí maʼni rí xákuwáanʼ tsímáá. Ikha jngó, cristianos bi̱ gajkhun nduyáaʼ ikha ndrígóo Jeobá (Miqueas 4:2). Xtángoo ndrígóo nambáyulúʼ mu mambaxúlúʼ májánʼ gajmiúlú, ga̱jma̱a̱ nañewu̱nlú náa xúgíʼ rí xkawiʼ rí naʼni Satanás. Índo̱ nduʼyáá náa numuu Jeobá niʼni mbá xtángoo, nduʼyáá rí ikhaa naʼsngúlú mu makuwáanʼ májánʼ ga̱jma̱a̱ “rí naʼtáñajunlú na̱nguá mingíjyúuʼ”. Ma̱ngaa á mu nuʼnimbulúʼ, makuwáanʼ kámuu mbiʼi (1 Juan 2:⁠17; 5:3).

Guʼyááʼ rí gíʼdoo numuu

(Isaías 49:6) Ga̱jma̱a̱ niʼthí: “Raʼkháa i̱ndó manindxa̱ʼ xa̱bi̱ʼ mu mataxuxíin xuajen ma̱jkha̱ʼ ndrígóo Jacob ga̱jma̱a̱ mu mi̱dxa̱ʼ xtiin mbu̱júu̱ bi̱ niguma káwíin náa Israel; Ikhúúnʼ mangúún nixna̱ʼ xóo aguʼ ndrígóo xuajen, mu makáwíin asndu náa nartumuu ku̱ba̱ʼ”.

w07-S 15/1 9 ¶8

Rí itháan nagajnuriyoo náa libro ndrígóo Isaías (parte 2)

49:6. Náa numuu rí najuiʼthá dí Mesías nindxu̱u̱ “aguʼ ndrígóo xuajen” á mu nákha nixtáa náa tsu̱du̱u̱ ku̱ba̱ʼ i̱ndó niʼtáruʼun israelitas rá. Nindxu̱u̱ rí nirígá nákha nikháñu Jesús. Náa Biblia naʼthí náa Isaías 49:6 rí nindxu̱ún discípulos ndrígóo (Hechos 13:46, 47). Rí mbiʼi xúgi̱, bi̱ kaxtaʼwíin, numbañún mbaʼin xa̱bu̱ bi̱ nduyamajkhuíí Dios, nindxu̱ún xóo “aguʼ ndrígóo xuajen”, mbá aguʼ rí na̱jkha̱nú “asndu náa nartumuu ku̱ba̱ʼ” mu mambiʼñún xúgínʼ xa̱bu̱ (Mateo 24:14; 28:19, 20).

(Isaías 50:1) Rígi̱ rí niʼthí Jeobá: “Náa rígá i̱yi̱i̱ʼ dí naʼthí rí niguanáa ru̱dála, rí ikhúúnʼ ni̱thu̱u̱n maʼga̱a̱ xá. O lá nigujuáanʼ náa mbáa bi̱ nawi̱ji̱ inuʼ ráʼ. ¡Gu̱ya̱a̱! Ga̱jma̱a̱ numuu aʼkhála nixtagujuánʼ, ga̱jma̱a̱ numuu rí nikiéʼkala ikháanʼ ru̱dála nijuiʼtháán maʼga̱a̱.

it-1-S 715 ¶5-6

Divorcio

Imbo̱o̱ rí nandoo gáʼthúu̱n rí muniñamijna̱a̱. Rí mubunʼ bi̱ nidamijná imbo̱o̱ xóo ejmuu náa Biblia. (Isa 54:1, 5, 6; 62:1-6.) Xúʼko̱ má imbo̱o̱ rí eyoo gáʼthúu̱n divorcio rí nindxu̱u̱ maniñuʼ maʼga̱a̱ aʼgiu̱u̱. (Jer 3:8.)

Tsiguʼ 607 ts. g., reino ndrígóo Judá niguma gámbáa, Jerusalén niguma gámbáa ga̱jma̱a̱ xa̱bu̱ bi̱ kuwa ikhí ni̱jkha̱ kiʼdiin náa Babilonia. Nákha xóó tsirígá rígi̱, Jeobá niʼtíriyaʼ rí judíos maʼga kiʼdiin: “Náa rígá i̱yi̱i̱ʼ dí naʼthí rí niguanáa ru̱dála, rí ikhúúnʼ ni̱thu̱u̱n maʼga̱a̱ xá.” (Isa 50:1.) ‹Rudún› o bi̱ nindxu̱u̱ organización nacional niniñaʼ rí maʼga̱a̱, raʼkháa numuu rí Jeobá táʼngo̱o̱ gambánuu rí nikudaminaʼ maʼni ga̱jma̱a̱ rí nikudaʼ i̱yi̱i̱ʼ mu maxnáa divorcio, ninindxu̱u̱ ga̱jma̱a̱ numuu aʼkhá ndrígóo náa xtángoo rí nimbánuu. Mú nikuwa mbá nguéjmi̱i̱n israelitas bi̱ nitangi̱i̱n ga̱jma̱a nitajkháan náa Jeobá mu magruiguíin mbu̱júu̱ʼ xóo bi̱ nindxu̱u̱ a̱ʼgiu̱u̱ ga̱jma̱a̱ maʼni májánʼ kubúnʼ. Ga̱jma̱a̱ numuu mbiʼyuu, nákha 537 ts. g., índo̱ niguámbá 70 tsiguʼ rí nimíniʼ, Jeobá niʼni rí matangi̱i̱n náa xuajñún ga̱jma̱a̱ náa ku̱búnʼ. (Sl 137:1-9; atayáá MATRIMONIO.)

Migixnuu Biblia

(Isaías 51:12-23) “Ikhúúnʼ ni̱ndxu̱ʼ Bi̱ xtáa raʼni̱i̱ a̱jkia̱la. Tsáa ni̱ndxa̱ʼ ikháánʼ mu mamiñáʼ xtayáá mbáa xa̱bu̱ bi̱ makhañúu, ga̱jma̱a̱ mbáa a̱ʼdióo xa̱bu̱ numbaaʼ bi̱ maguanúu xóo mbá iná maxaʼ rá. ¹³ Náa numuu rí nagumaʼ xtayáá Jeobá bi̱ Niʼníín, Ikhaa bi̱ xtáa rartiga mekhu ga̱jma̱a̱ bi̱ nigíʼ ku̱ba̱ʼ ráʼ. Ga̱jma̱a̱ niraxtaa má xúʼko̱ ga̱jma̱a̱ gamíi ga̱jma̱a̱ numuu bi̱ naʼni gínáán ma̱ngaa rí asndu xóo xtáa xawii mu maʼnimbátiga̱a̱n. Náa rígá sia̱nʼ ndrígóo bi̱ naʼni gínáán rá. ¹⁴ Bi̱ kaxtoʼóo ga̱jma̱a̱ cadena nacha̱ má murajkuííʼ, mu xakháñu ga̱jma̱a̱ xájnguáan náa iñáʼ, ga̱jma̱a̱ marigá má xúʼko̱ pan ndrígóo. ¹⁵ Mú ikhúúnʼ ni̱ndxu̱ʼ Jeobá Dios ndrígáʼ, Bi̱ naʼni maʼbaxu̱u̱ lamáa. Jeobá mbiʼyuu bi̱ gíʼdiin mbaʼin ejércitos. ¹⁶ Ga̱jma̱a̱ ajngóoʼ magida̱ʼ náa rawanʼ, ga̱jma̱a̱ xkamixoo ñawúunʼ maruguaruwi̱i̱n, mu matsi̱ji̱ mekhu ga̱jma̱a̱ magíʼ ku̱ba̱ʼ ga̱jma̱a̱ mathu̱u̱n Sión: ‹Ikháánʼ ni̱ndxa̱ʼ xuajñuʼ›. ¹⁷ Araxu̱nʼ, araxu̱nʼ, atuxaʼ, oh Jerusalén, ikháánʼ rí nigi̱i̱n náa ñawúunʼ Jeobá copa ndrígóo náa kajnu̱ʼ sia̱nʼ. Copa rí naʼni majnga̱a̱ edxa̱ʼ, nigi̱i̱n xúgíʼ rí kajnu̱ʼ náa copa. ¹⁸ Nimbáa bi̱ a̱ʼdióo ikhaa bi̱ niʼnii táxtáa mu maxná ikhoo, ga̱jma̱a̱ nimbáa a̱ʼdióo bi̱ ikhaa niʼnimba̱ja̱a̱ táxtáa mu magujtuun ñawúunʼ. ¹⁹ A̱jma̱ enii rí nigíʼnaʼ. Tsáa gagaʼwíínʼ a̱jkiu̱u̱n kaʼyaʼ rá. ¡Muriyaʼ kaʼyáʼ rí xtaʼdáá ga̱jma̱a̱ muni gámbáa xúgíʼ ga̱jma̱a̱ ewiʼ ma̱ngaa espada! Tsáa gáʼni̱i̱ a̱jkia̱nʼ rá. ²⁰ E̱jña̱ʼ nikaminduun. Nubúunʼ náa mámbá esquina náa calle xóo mugu̱ xáná náa amaʼ. Xóo bi̱ kajnííʼ náa ikhiin sia̱nʼ ndrígóo Jeobá, rí naxpriguaʼ Dios ndrígáʼ.” ²¹ ikha jngó, atadxun rígi̱, mbá péñu, oh a̱ʼgu̱ bi̱ xtáa gíná ga̱jma̱a̱ najnga̱a̱, mu raʼkháa ga̱jma̱a̱ vino. ²² Rígi̱ rí naʼthí Tátá Jeobá, Dios ndrígáʼ bi̱ nambáyúu xuajñu: “¡Atayáá! Mariya kaʼyáʼ copa rí naʼni majnga̱a̱ edxa̱ʼ. Copa, copa ndrígóʼ náa ga̱jnu̱ʼ sia̱nʼ. Ní xátangaán migi̱i̱n mbu̱juáʼ ²³ Marigu náa ñawúunʼ xa̱bu̱ bi̱ nuni gínáán, bi̱ nitha̱nʼ: ‹Atasmbatigaʼ mu manújnguxu náa tsudaʼ›, nitani̱ tsu̱da̱ʼ xóo ku̱ba̱ʼ, ga̱jma̱a̱ xó má calle mu manújngún”.

FEBRERO 13-19

GÍʼDOO NUMUU RÍ NA̱ʼKHA̱ NÁA BIBLIA | ISAÍAS 52-57

“Cristo nimínuuʼ ga̱jma̱a̱ numulúʼ”

(Isaías 53:3-5) Níjkuáa nigumaa ga̱jma̱a̱ xa̱bu̱ táʼnduun gúyáá, mbáa xa̱bu̱ bi̱ kaʼyoo mamínuʼ ga̱jma̱a̱ naninuʼ nandii. Ga̱jma̱a̱ asndu xóo narkaʼwuminaʼ náa ikháanʼ. Níjkuáa nigumaa, ga̱jma̱a̱ ndiʼyáá rí asndu xóo ragíʼdoo numuu. ⁴ Gajkhun má rí ikhaa ni̱jkha̱ kagu̱u̱ nandii ndrígúlú, ga̱jma̱a̱ ikhaa nigu gaʼkhu ndrígúlú. Mú ikháanʼ nduʼyáá rí ikhaa nigawúunʼ, rí Dios niʼni mamínuʼ ga̱jma̱a̱ rí niguma gínáa. ⁵ Mú ikhaa nixkruaʼaa ga̱jma̱a̱ numuu aʼkhúlúʼ, nixujmbi̱i̱ ga̱jma̱a̱ numuu dí nakiéʼkulu. Nimínuuʼ ikhaa mú makuwáanʼlu tsímáá, numuu dí ikhaa nigawúnʼ nirígá mbá rí maʼni tanulu.

w09-S 15/1 26 ¶3-5

Xa̱bi̱i̱ Jeobá: Niguma gínáa ga̱jma̱a̱ numuu aʼkhá ndrígúlú

“Níjkuáa nigumaa” ga̱jma̱a̱ “ndiʼyáá rí asndu xóo ragíʼdoo numuu”

³ (Atraxnuu Isaías 53:3.) A̱ʼdióo bi̱ mbáwíi mbáa niʼniuu mingíjyúuʼ wéñuʼ maniñuʼ Anu̱u̱, ma̱ʼkha̱ náa tsu̱du̱u̱ Ku̱ba̱ʼ ga̱jma̱a̱ maxnáximinaʼ mu maʼni káwíin xa̱bu̱ náa aʼkhá ga̱jma̱a̱ rí nakháñulú (Fili. 2:5-8). Tsigijñaʼ rúʼko̱ nindxu̱u̱ itháan májánʼ ki xóo tsigijñaʼ ndrígu̱ún xujkhúʼ bi̱ nuxnaxi̱i̱n xó má niʼthí náa Xtángoo ndrígóo Moisés numuu rí xúʼko̱ Dios ma̱ndoo maʼni mba̱a̱ a̱jkiu̱u̱n ga̱jma̱a̱ numuu aʼkhá ndrígúlú (Heb. 10:1-4). Ikha jngó xa̱bu̱ ndiyóoʼ mudriguíi májánʼ. Rúʼko̱ rí ndiyóoʼ muni judíos, bi̱ guáʼthi̱i̱n Mesías bi̱ nijuiʼthá ma̱ʼkha̱ (Juan 6:14). Mú “níjkuáa nigumaa” Cristo ga̱jma̱a̱ numún judíos, bi̱ xó má niʼtáriyaʼ Isaías, “ndiʼyáá rí asndu xóo ragíʼdoo numuu”. Apóstol Juan niʼnirámáʼ: “Ni̱ʼkha̱ náa goʼwóo, jame ikin-ma xabi tudrigüi” (Juan 1:⁠11). Ga̱jma̱a̱ apóstol Pedro niʼthún judíos: “[Dios ndrígu̱ún xiʼñúlú] neʼne mba Ade Jesús, tsi nixnaxi ikanʼla jame nitanla ri tsininuhuinla naʼ inu Pilato, naki niʼten ika ri maniñuʼ. Xoma ikanʼla nitanla ri tsininuhuinla tsi Kaʼhui Jame Jmbi” (Hech. 3:13, 14).

⁴ Isaías ma̱ngaa niʼtáriyaʼ rí Jesús ‹maninuʼ nandii›. Maski ajndu xó má naʼthí náa Biblia, Jesús nguáná nigaaʼ, mú nimbá miʼtsú táʼniuu nandii (Juan 4:6). Mú ndiéjunʼ eyoo gáʼthúu̱n rí ikhaa nininuʼ nandii xá. Índo̱ ikhaa niʼtáraʼa nininiúnʼ xa̱bu̱ bi̱ naʼniún nandii, bi̱ ikhaa niʼni thanún numuu rí nigáwiinʼ a̱jkiu̱u̱n kaʼñún (Mar. 1:32-34). Xúʼko̱ Jesús niʼnimbánuu rí kiʼtáriyaʼ: “Gajkhun má rí ikhaa ni̱jkha̱ kagu̱u̱ nandii ndrígúlú, ga̱jma̱a̱ ikhaa nigu gaʼkhu ndrígúlú” (Isa. 53:4a; Mat. 8:16, 17).

Asndu xóo “Dios niʼni mamínuʼ”

⁵ (Atraxnuu Isaías 53:4b.) Nguáthi̱i̱n xa̱bu̱ bi̱ nikuwa nákhi nixtáa Jesús nikru̱ʼu̱u̱n náa numuu rí nimínuuʼ ga̱jma̱a̱ nikháñu. Mbaʼin nikumu̱ún rí Dios niʼni mamínuʼ, asndu xóo nikuʼma mbá nandii rí na̱ʼkhu̱ wéñuʼ (Mat. 27:38-44). Bi̱ judíos nini tsu̱di̱i̱ dí niʼthá wéñuʼ Dios (Mar. 14:61-64; Juan 10:33). Nduʼyáá kaʼwu rí Jesús na̱nguá niʼni rígi̱ ni má takudaminaʼ nimbá aʼkhá. Mú numuu rí ikhaa nindoo kaʼyoo wéñuʼ Anu̱u̱, rí ikhaa makhañúu xóo mbáa bi̱ niʼthá wéñuʼ Dios niʼni rí mamínuʼ wéñuʼ. Maski ajndu xúʼko̱ nindoo maʼnimbánuu rí nindoo Jeobá (Mat. 26:39).

(Isaías 53:7, 8) Xa̱ʼ wéñuʼ niruguama̱ʼa̱a̱n ga̱jma̱a̱ niniñaminaʼ dí maguma gínáa, mu tambáʼtoo rawuunʼ. Nigún ku̱ya̱a̱ xóo mugu̱ bi̱ muxiyáa ga̱jma̱a̱ xóo mugu̱ bi̱ tsindxaʼwá índo̱ xtáa náa inún xa̱bu̱ bi̱ nudu̱u̱n mugu̱, ga̱jma̱a̱ tambáʼtoo rawuunʼ. ⁸ Nirujtuwiin ma̱ngaa tsáa gaxmiéjunʼ ga̱jma̱a̱ numún bi̱ gáguwáʼ náa ikhaa xá. Numuu rí nixiyáa náa numbaaʼ ndrígu̱ún xa̱bu̱ bi̱ nduya. Ga̱jma̱a̱ numuu aʼkhá ndrígóo xuajñuʼ nigawúunʼ.

w09-S 15/1 27 ¶10

Xa̱bi̱i̱ Jeobá: Niguma gínáa ga̱jma̱a̱ numuu aʼkhá ndrígúlú

“Nigún ku̱ya̱a̱ xóo mugu̱ bi̱ muxiyáa”

¹⁰ (Atraxnuu Isaías 53:7, 8.) Índo̱ Juan bi̱ nikumíínʼ iyááʼ xa̱bu̱ ndiʼyoo rí xtáa ra̱ʼkha̱ Jesús, niʼthí: “Jenla Aʼda Borregüi Dios tsi narigu aʼkun numba” (Juan 1:29). Índo̱ nijmuu ajngáa “Aʼda Borregüi”, mbáa nirmáʼáan a̱jkiu̱u̱n ga̱jma̱a̱ numuu ajngáa rí niʼthí Isaías: “Nigún ku̱ya̱a̱ xóo mugu̱ bi̱ muxiyáa” (Isa. 53:7, nota). Ma̱ngaa, Isaías niʼthí ga̱jma̱a̱ numuu ikhaa: “Nixídíí eʼdiu asndu nikháñu” (Isa. 53:12). Mbruʼun rí Jesús nigíʼ majmaku̱ma̱a̱ xóo nikháñu, nixnúún mbá copa náa kajnu̱ʼ vino bi̱ mbá gu̱wa̱ʼ imbi̱i̱n apóstoles bi̱ ni̱ndxu̱ún jmbiin ga̱jma̱a̱ niʼthún: “Rigueʼ ñajun iʼdiuʼ [rí nimbánuu] ri nagadiramu gajma numu mbaʼin xabo, numu ri ika ruʼkue maʼga jagu aʼkan” (Mat. 26:28).

(Isaías 53:11, 12) Ga̱jma̱a̱ numuu rí ikhaa nimínuuʼ, ikhaa maʼga̱nú mbaʼyoo ga̱jma̱a̱ maxtáa tsímáá. Ga̱jma̱a̱ ku̱ma̱ rí gíʼdoo xa̱bi̱ʼ bi̱ jmbii, maʼni rí mbaʼin xa̱bu̱ mani̱ndxu̱ún jmbiin ga̱jma̱a̱ ikhaa magu̱ aʼkhún ikhiin. ¹² Ikha jngó marigá rí makhánúu náa rí mbaʼin, ga̱jma̱a̱ rígi̱ maxnúu mámbáa bi̱ gíʼdoo tsiakii, numuu rí ikhaa nixídíí eʼdiu asndu nikháñu, ga̱jma̱a̱ nini̱i̱ xóo mbáa bi̱ nikiéʼkúun; ga̱jma̱a̱ ikhaa ni̱jkha̱ kagu̱u̱ aʼkhá ndrígu̱ún mbaʼin xa̱bu̱, ga̱jma̱a̱ ikhaa nixtáa náa majñúnʼ xa̱bu̱ aʼkhá.

w09-S 15/1 28 ¶13

Xa̱bi̱i̱ Jeobá: Niguma gínáa ga̱jma̱a̱ numuu aʼkhá ndrígúlú

Xa̱bi̱ʼ “maʼni rí mbaʼin xa̱bu̱ mani̱ndxu̱ún jmbiin”

¹³ (Atraxnuu Isaías 53:11, 12.) Jeobá niʼthí rígi̱ ga̱jma̱a̱ numuu Xa̱bi̱i̱ bi̱ ikhaa niraʼwíí: “Xa̱bi̱ʼ bi̱ jmbii, maʼni rí mbaʼin xa̱bu̱ mani̱ndxu̱ún jmbiin”. Ndiéjunʼ eyoo gáʼthi rígi̱ rá. Índo̱ na̱jkha̱ mambá versículo 12 nuxkamaa mbóo rí maʼni makru̱ʼu̱lú: “Ga̱jma̱a̱ [xa̱bi̱ʼ] nixtáa náa majñúnʼ xa̱bu̱ aʼkhá”. Xúgiáanʼ bi̱ naguwaʼ náa Adán nagumáanʼ ga̱jma̱a̱ aʼkhá, nikiéʼkulú, ga̱jma̱a̱ “índo̱ nakháñulú nuʼninuma̱a̱ aʼkhá” (Rom. 5:12; 6:23). Ikha jngó ndayúlú mambaxíiʼ gajmiúlú Jeobá. Capítulo 53 ndrígóo Isaías naʼthí májánʼ xú káʼnii Jesús niʼni káwíin xa̱bu̱ numbaaʼ. Naʼthí xúgi̱ kaʼnii: “Nimínuuʼ ikhaa mú makuwáanʼlu tsímáá, numuu dí ikhaa nigawúnʼ nirígá mbá rí maʼni tanulu” (Isa. 53:5).

Guʼyááʼ rí gíʼdoo numuu

(Isaías 54:1) “¡Atatsaʼwá ga̱jma̱a̱ gagi, ikháánʼ bi̱ tátani̱i̱n e̱ji̱n! Gaʼdxaʼ wéñuʼ ga̱jma̱a̱ atatsawaʼska, ikháánʼ bi̱ na̱nguá niraʼdáá gaʼkhu mu maraʼdiin e̱ji̱n, numuu rí e̱ji̱i̱n bi̱ xtáa gíná wéñuʼ ra̱ʼkhá tháán mbaʼin ki xóo e̱ji̱i̱n a̱ʼgu̱ bi̱ gíʼdaa ajmbio̱o̱”. Eʼthí Jeobá.

w06-S 15/3 11 ¶2

‹Mbá xkri̱da› rí gíʼdoo numuu náa ikháanʼlu

Ga̱jma̱a̱ ndiéjunʼ nindoo gáʼthúu̱n Sara, “bi̱ tsíñajun mbáá”, ga̱jma̱a̱ Isaac bi̱ ninindxu̱u̱ a̱ʼdióo xá. Pablo niʼthí dí Sara, a̱ʼgu̱ ‹bi̱ tséʼni e̱ji̱n›, nindoo gáʼthúu̱n a̱ʼgiu̱u̱ Dios, e̱ji̱i̱n Dios bi̱ kuwa mekhuíí. A̱ʼgu̱ bugi̱ bi̱ xtáa mekhuíí na̱nguá xóo magiʼdiin e̱ji̱n rí nandoo gáʼthúu̱n rí nákha xóó tséʼkha̱ Jesús, ikhaa na̱nguá gíʼdiin “e̱ji̱n” bi̱ kaxtaʼwíin ga̱jma̱a̱ espíritu náa tsu̱du̱u̱ Ku̱ba̱ʼ (Gálatas 4:27; Isaías 54:1-6). Mú, nákha Pentecostés tsiguʼ 33 nigadirámuʼ xi̱ʼ kaʼwu náa mbá nguéjmi̱i̱n xa̱bekha ga̱jma̱a̱ gu̱ʼu̱, bi̱ nigumiin mbu̱júu̱ xóo e̱ji̱i̱n a̱ʼgu̱ bi̱ xtáa mekhuíí. E̱ji̱i̱n bi̱ nigiʼdiin organización bugi̱ ninindxu̱ún e̱ji̱i̱n Dios ga̱jma̱a̱ niguaʼti̱i̱n mudrigú dí kaʼñúún gajmiún Jesucristo náa i̱mba̱ nuxi̱ʼ pacto (Romanos 8:15-17). Ikha jngó, mbáa bi̱ ada̱ bugi̱, bi̱ nindxu̱u̱ apóstol Pablo, nindoo niʼnirámáʼ: “Mú Jerusalén dí rígá rijma̱a̱ tsíñajun mbáá, ga̱jma̱a̱ ikhaa nindxu̱u̱ ru̱dúlú” (Gálatas 4:26).

(Isaías 57:15) Rígi̱ naʼthí bi̱ majphú Mba̱a̱, bi̱ xtáa kámuu mbiʼi ga̱jma̱a̱ bi̱ kaʼwu mbiʼyuu: “Ikhúúnʼ xtáá náa tsídánʼ ga̱jma̱a̱ náa rí mikaʼwu, ma̱ngaa xtáá náa bi̱ kuwa gíná ga̱jma̱a̱ xa̱bu̱ bi̱ guabaaʼ a̱jkiu̱ún mu mani rí marigá espíritu ndrígu̱ún xa̱bu̱ numbaaʼ mu mani rí maxtáa gagi a̱jkiu̱ún bi̱ kuwa gíná.

w05-S 15/10 26 ¶3

Ganindxulú xa̱bu̱ guabáanʼ

Bi̱ phú nindxu̱u̱ xa̱bu̱ guabaaʼ

³ Jeobá nindxu̱u̱ mba̱a̱ wéñuʼ ga̱jma̱a̱ xtáa mitsídaanʼ, mú maski ajndu xúʼko̱ “iduu [...] nayexi náa xúgíʼ ku̱ba̱ʼ mu masngájma tsiakii ndrígóo ga̱jma̱a̱ numún xa̱bu̱ bi̱ káxi̱ a̱jkiu̱ún náa ikhaa” (2 Crónicas 16:9). Ga̱jma̱a̱ ndiéjunʼ eʼni índo̱ naxkamiin xa̱bu̱ bi̱ ni̱ndxu̱ún jmbiin bi̱ kuwa ruraʼníí mbaʼa xkujndu rá. Asndu xóo ‹xtáa› gajmíi̱n ikhiin ga̱jma̱a̱ xi̱ʼ kaʼwu maʼni̱i̱ “espíritu ndrígu̱ún xa̱bu̱ numbaaʼ” mu maʼni rí “maxtáa gagi a̱jkiu̱ún bi̱ kuwa gíná” (Isaías 57:15). Xúʼko̱, xa̱bi̱i̱ guáʼdáá tsiakii mu muni ñajunʼ ndrígóo ga̱jma̱a̱ gagi. ¡Ra̱ʼkhá tháán guabaaʼ nindxu̱u̱ Dios!

Migixnuu Biblia

(Isaías 57:1-11) Xa̱bu̱ jmbii nikháñu, mú nimbáa tsixmiéjunʼ. Ga̱jma̱a̱ xa̱bu̱ jmbiin na̱jkha̱ kiʼdiin, nimbáa tséndxa̱ʼóo edxu̱u̱ rí xa̱bu̱ jmbii nigúun. Rígá gamiéjunʼ. ² Ikhaa nato̱ʼo̱o̱ tsímáá; ndu̱ya̱a̱ xúnʼ náa xiewún, mámbáa bi̱ najngrui̱go̱o̱ jmbu. ³ “Mú ikháanʼla, atsimala itháan mijngii, e̱ji̱i̱n a̱ʼgu̱ bi̱ naʼni xawan, e̱jñún yambaaʼ ga̱jma̱a̱ mbáa a̱ʼgu̱ bi̱ nagujuamínaʼ: ⁴ Tsáa etsijmáa rá. Ga̱jma̱a̱ tsáa numuu exuaja̱n mba̱a̱ rawanla ga̱jma̱a̱ nuxruíyaʼ rajuanla rá. Lá raʼkháa ikháanʼla nindxa̱la e̱ji̱i̱n aʼkhá, e̱jñún bi̱ minduwaʼ, ⁵ ikhiin bi̱ kuwa gagi náa agoo ixi̱ mba̱ʼu̱, náa agoo ixi̱ mitsaan, nuradíin e̱jñún náa mañu, náa agoo tsúwoʼ xpátsí ráʼ. ⁶ Ga̱jma̱a̱ itsí tsaʼtsaʼ dí rígá náa mañu ikhaa nikhánaʼ. Rúʼko̱ ninindxu̱u̱ suerte ndrígáʼ. Ma̱ngaa náa ikhaa nitaxidirámáʼ rí mitsáʼkhúun, niraxnáxi mbá regalo. Lá mani̱i̱ a̱jkiu̱nʼ ga̱jma̱a̱ numuu rígi̱ ráʼ. ⁷ Náa kúbá mitsídaanʼ nitaniratáá xiewaʼ. Ikhí ma̱ngaa nitsimaʼ mu maraxnaxí tsigijñaʼ. ⁸ Ga̱jma̱a̱ náa ki̱dxu̱ʼ xkrugua ga̱jma̱a̱ náa riejuun guʼwáaʼ nitagíʼma tsinaʼ mu marmáʼáan a̱jkia̱nʼ. Nitatsíñuʼ ga̱jma̱a̱ nitambaʼtaminaʼ ga̱jma̱a̱ nitsimaʼ ga̱jma̱a̱ nitani̱ ma̱ja̱nʼ xiewaʼ. Ga̱jma̱a̱ ikháánʼ nimbánaʼ gajmiáanʼ. Ninigua̱ʼ mataba̱ʼ gajmiáanʼ. Ga̱jma̱a̱ nitayáá rí ndrígóo xa̱biya̱. ⁹ Ni̱dxu̱ʼ náa Mélec ga̱jma̱a̱ aceite, ga̱jma̱a̱ nitani̱ maʼni mba̱ji̱nʼ perfume. Nitaxúnguinʼ mitsínguánʼ bi̱ nagún ku̱ñu̱u̱n ajngáa, nitani̱ rí maguajtaa náa iñáʼ wa̱jinʼ. ¹⁰ Náa mbaʼa kamba̱a̱ nitani̱ tsiakimínáʼ. Tárata: ‹¡Nda̱a̱ rí gakhánuʼ!›. Nitaxkama̱a̱ mbu̱júu̱ʼ tsiakii ndrígáʼ. Ikha jngó táʼniaʼ nandii. ¹¹ Tsáa niʼnimíñaʼ ga̱jma̱a̱ tsáa nimíñaʼ xtayáá ikha jngó nitani̱ nduwaʼ rá. Tsirmáʼáan a̱jkia̱nʼ xta̱yo̱ʼ. Na̱nguá nitagíwanʼ náa a̱jkia̱nʼ. Lá raʼkháa ikhúúnʼ nixtáá wíí ga̱jma̱a̱ nirkaʼwu rí nirígá ráʼ. Ikháánʼ támiñaʼ xta̱yo̱ʼ.

FEBRERO 20-26

GÍʼDOO NUMUU RÍ NA̱ʼKHA̱ NÁA BIBLIA | ISAÍAS 58-62

“Gúʼtaraʼa tsiguʼ májánʼ dí Jeobá nandoo maʼni”

(Isaías 61:1, 2) Xi̱ʼ kaʼwu ndrígóo Tátá Jeobá bi̱ naʼtáñajunʼ xúgíʼ numbaaʼ, numuu rí Jeobá niraʼñún mu mataruʼun ajngáa rí májánʼ xa̱bu̱ guabiinʼ. Nikungunʼ mu manitanún xa̱bu̱ bi̱ nigawúnʼ nímiu̱u̱n, mu mataráʼa rí maguma káwíin bi̱ ni̱jkha̱ kiʼdiin ga̱jma̱a̱ mambáʼtoo idún xa̱bu̱ bi̱ gajchún náa guʼwá e̱jua̱nʼ; ² Mú miʼtáriyaʼ tsiguʼ májánʼ dí Jeobá nandoo maʼni ga̱jma̱a̱ mbiʼi dí manda̱ʼa̱ cuenta Dios ndrígúlú; mu maʼni̱i̱ a̱jkiu̱ún xúgínʼ bi̱ kuwa gíná.

ip-2-S 322 ¶4

Náa Sión narígá rí jmbu

“Mú miʼtáriyaʼ tsiguʼ májánʼ”

⁴ Isaías naʼnirámáʼ: “Xi̱ʼ kaʼwu ndrígóo Tátá Jeobá bi̱ naʼtáñajunʼ xúgíʼ numbaaʼ, numuu rí Jeobá niraʼñún mu mataruʼun ajngáa rí májánʼ xa̱bu̱ guabiinʼ. Nikungunʼ mu manitanún xa̱bu̱ bi̱ nigawúnʼ nímiu̱u̱n, mu mataráʼa rí maguma káwíin bi̱ ni̱jkha̱ kiʼdiin ga̱jma̱a̱ mambáʼtoo idún xa̱bu̱ bi̱ gajchún náa guʼwá e̱jua̱nʼ” (Isaías 61:1). Tsáa nindxu̱u̱ xa̱bu̱ bi̱ nikána ñajunʼ rí maʼtáraʼa rá. Mbáa bi̱ nákha ginii ninindxu̱u̱ Isaías, bi̱ niʼnirámáʼ ga̱jma̱a̱ xi̱ʼ kaʼwu ajngáa rí májánʼ mu mudxawíín xa̱bu̱ bi̱ ni̱jkha̱ kiʼdiin Babilonia. Mú Jesús nisngájma rí nimbánuu náa ikhaa ajngáa rí niʼthí Isaías (Lucas 4:16-21). Jeobá nikunguanʼ Cristo mu maʼtáruʼun xa̱bu̱ guabiinʼ ajngáa rí májánʼ, ga̱jma̱a̱ mu ma̱ndoo maʼni rígi̱ niʼni rí magiʼdoo xi̱ʼ kaʼwu índo̱ nijngúun iyááʼ (Mateo 3:16, 17).

(Isaías 61:3, 4) mu mani dí marigá rí majuixnún bi̱ kuwa gíná ga̱jma̱a̱ numuu Sión, mu mixnún mbá rí marigu náa edxu̱ún ki xóo idiʼ mbajtsunʼ, aceite gagi ki xóo rí makuwa gíná, xtíin gagi ki xóo rí makáguabiinʼ ga̱jma̱a̱ magumbiʼñún ixi̱ mba̱ʼu̱ rí jmbu, rí niʼdu Jeobá mu ikhaa maguma mba̱a̱. ⁴ Ikhiin muni̱i̱ náa niguma gámbáa mba̱yu̱ʼ tsiguʼ; muxuxi̱i̱ náa niguma gámbáa nákha wajyúúʼ, ga̱jma̱a̱ muni̱i̱ xuajen rí niguma gámbáa, rí niguma gámbáa mba̱yu̱ʼ tsiguʼ xó má niguwáʼ rakuwa xa̱bu̱.

ip-2-S 326-327 ¶13-15

Náa Sión narígá rí jmbu

¹³ Índo̱ niʼni Pentecostés 33 ts. g., Dios niʼdu i̱ʼwáʼ “ixi̱ mba̱ʼu̱ rí jmbu”, cristianos bi̱ kaxtaʼwíin bi̱ tsímiñun, bi̱ mundrigúu mbá nuxi̱ʼ xuajen dí rígá rijma̱a̱, “Israel ndrígóo Dios” (Gálatas 6:16). Índo̱ ni̱jkha̱ ranújngoo tsiguʼ niguánu ninindxu̱ún mbá 144,000, ga̱jma̱a̱ xndú rí nixná rí nindxu̱u̱ niʼni mitsaan, xúʼko̱, niʼni mba̱a̱ Jeobá Dios (Revelación [Apocalipsis] 14:3). Rí iwáá “ixi̱” rí mba̱ʼu̱ wéñuʼ nijmi̱di̱ asndu nákha tsiguʼ 1919, índo̱ Jeobá nixkajuíín xa̱bu̱ bi̱ xóó niguanún náa Israel ndrígóo Dios índo̱ nda̱a̱ rí eni. Índo̱ nixnúún mba̱ji̱nʼ iyaʼ rí na̱ʼkha̱ náa Jeobá, bi̱ Niʼniáanʼ niʼni xa̱xi̱ náa rígá ixi̱ rí jmbu ga̱jma̱a̱ naxná xndúu (Isaías 27:6).

¹⁴ Isaías naʼthí xú káʼnii ñajunʼ niguáʼdáá “ixi̱” rúʼko̱: “Ikhiin muni̱i̱ náa niguma gámbáa mba̱yu̱ʼ tsiguʼ; muxuxi̱i̱ náa niguma gámbáa nákha wajyúúʼ, ga̱jma̱a̱ muni̱i̱ xuajen rí niguma gámbáa, rí niguma gámbáa mba̱yu̱ʼ tsiguʼ xó má niguwáʼ rakuwa xa̱bu̱” (Isaías 61:4). Ga̱jma̱a̱ rí niʼtáñajunʼ rey Ciro persa, judíos bi̱ ni̱ndxu̱ún jmbiin bi̱ nigájni̱i̱n náa Babilonia nuni̱i̱ Jerusalén ga̱jma̱a̱ templo, rí ndijyúuʼ wéñuʼ mu maguma̱a̱. Ma̱ngaa, ñajunʼ rí maguma maʼni rí magiʼdoo numuu tsiguʼ nda̱wa̱á rí 33 ts.g. ga̱jma̱a̱ tsiguʼ 1919.

¹⁵ Nákhi 33 ts.g., dí nirtuwiin ga̱jma̱a̱ rí nixiyáa Jesús niʼni dí mumíniiʼ wéñuʼ xa̱bi̱i̱ (Mateo 26:31). Mú ikhiin nindxa̱ʼwa̱míjna̱ i̱mba̱ núthu índo̱ nigabi̱i̱ bi̱ niʼsngúún, ga̱jma̱a̱ nda̱wa̱á dí nindrigú xi̱ʼ kaʼwu, ikhiin ninimbaníí ñajunʼ dí mutaraʼa ajngáa májánʼ “náa Jerusalén xúʼko̱ má náa xúgíʼ Judea, ma̱ngaa náa Samaria asndu náa wámbari̱go̱o̱ ku̱ba̱ʼ” (Hechos 1:8). Xúʼko̱ nigi̱ʼdi̱i̱ ndiyamajkuíí Jeobá mbu̱júu̱. Xúʼko̱ má asndu nákha tsiguʼ 1919, Jesucristo niʼni rí bi̱ kaxtaʼwíin bi̱ xóó naguanún muni̱i̱ “rí niguma gámbáa mba̱yu̱ʼ tsiguʼ xó má niguwáʼ rakuwa xa̱bu̱”. Mba̱yu̱ʼ tsiguʼ, clero ndrígóo cristiandad tséʼsngáa ku̱ma̱ ndrígóo Jeobá, nuriʼkuriyaʼ ga̱jma̱a̱ rí niguwáʼ runi xa̱bu̱ numbaaʼ ga̱jma̱a̱ kiʼsngáa dí ragájkhun rí na̱ʼkha̱ náa Escrituras. Cristianos bi̱ kaxtaʼwíin nini gámbáa náa congregación xúgíʼ rí na̱ʼkha̱ náa religión dí ragájkhun, mu xúʼko̱ maʼni̱i̱ mbóó kiʼsngáa rí gajkhun. Ma̱ngaa nigi̱ʼdi̱i̱ nitaraʼa náa xúgíʼ numbaaʼ (Marcos 13:10).

(Isaías 61:5, 6) “Ga̱jma̱a̱ bi̱ tseniʼnúnʼ makuwá ikhí ga̱jma̱a̱ muñewu̱u̱n mugiala, ga̱jma̱a̱ xa̱bu̱ bi̱ naguwáʼ mudu náa mbayala ga̱jma̱a̱ mudu uva ndrígála. ⁶ Mú ikháanʼ magumbiʼyala ndxajkun ndrígóo Jeobá, magumbiʼyala bi̱ nuni ñajunʼ Dios. Ikháanʼ muphula dí rígá náa xuajen, ga̱jma̱a̱ numuu gloria ndrígu̱ún ikháanʼ munimbaʼumíjna̱.

w12-S 15/12 25 ¶5-6

“Nanújngun náa ku̱ba̱ʼ” bi̱ nuni ñajunʼ Dios gajkhun mbóó jnduʼ

⁵ Xúgi̱ rá. Guʼyáá májánʼ dí kiʼtáriyaʼ náa capítulo 61 ndrígóo Isaías, rí nimbánuu rígi̱ kagujtuminaʼ ga̱jma̱a̱ congregación cristiana. Náa numuu rí náa versículos 5 ga̱jma̱a̱ 6 naʼthí rí makuwa bi̱ ‹tseniʼniúnʼ› bi̱ muñajunʼ gajmiún “ndxajkun ndrígóo Jeobá” rá.

⁶ Ndxajkun bugi̱ ni̱ndxu̱ún cristianos bi̱ kaxtaʼwíin, bi̱ “muguaxu̱ún ginuu”. Ikhiin “manindxu̱ún ndxajkun ndrígio̱o̱ Dios ga̱jma̱a̱ Cristo, ga̱jma̱a̱ mutañajunʼ gajmiún ikhaa mbá míí tsiguʼ” (Rev. 20:6). Rí xúgi̱ mbaʼin cristianos guáʼthi̱i̱n makuwá kámuu mbiʼi náa tsu̱du̱u̱ Ku̱ba̱ʼ raʼkháa náa mekhu. Bugi̱ ni̱ndxu̱ún bi̱ ‹tseniʼniúnʼ› nuñajunʼ gajmiún bi̱ muyambáá mekhuíí. Numbañún “ndxajkun ndrígóo Jeobá” ga̱jma̱a̱ xúgíʼ a̱jkiu̱ún, xóo muʼthá, nuñajunʼ xóo ‹xa̱bu̱ bi̱ nudu› ga̱jma̱a̱ ‹bi nudu uva›. Nuyambáá mu maguiʼtóo xndúu dí na̱ʼkha̱ rijma̱a̱ mu maguma mba̱a̱ Dios makuwa nuxunʼ discípulos. Xúʼko̱, bi̱ kaxtaʼwíin gajmiún “iʼhuinʼ mugu” nduñínʼ ma̱ngaa nuñewu̱u̱n ga̱jma̱a̱ ngajua xa̱bu̱ bi̱ májánʼ a̱jkiu̱ún bi̱ nandún muni ñajunʼ Dios kámuu mbiʼi (Juan 10:16).

Guʼyááʼ rí gíʼdoo numuu

(Isaías 60:17) Ma̱ʼkhá ka̱yo̱ʼ oro ki xóo cobre, ma̱ʼkhá ka̱yo̱ʼ plata ki xóo hierro, ma̱ʼkhá ka̱yo̱ʼ cobre ki xóo xajpa, ma̱ʼkhá ka̱yo̱ʼ hierro ki xóo itsí; ga̱jma̱a̱ mani dí marigá rí tsímáá xó má superintendentes ndrígáʼ, ga̱jma̱a̱ rí jmbu xóo bi̱ nutha̱nʼ rí matani.

w15 1/7 14-15 ¶14-17

Guʼni̱i̱ itháan mitsaan paraíso rí na̱ʼkha̱ náa Dios

¹⁴ Mbaʼin xa̱bi̱i̱ Jeobá bi̱ najmañún itháan ndiyáá tikhuu rí nixtiʼkhuu rí niʼni̱i̱ mitsaan xuajñu Dios náa tsu̱du̱u̱ Ku̱ba̱ʼ. Mbá xkri̱da, naʼni mba̱yu̱ʼ tsiguʼ, mámbá congregación gíʼdaa mbáa siervo ndrígóo congregación, mámbá sucursal gíʼdaa mbáa siervo ndrígóo sucursal ga̱jma̱a̱ náa guʼwá rí naxná ikha kayá edxu̱u̱ presidente ndrígóo Sociedad Watch Tower. Maski ajndu mámbáa ndxájulú bugi̱ niguáʼdiin bi̱ nimbañúún bi̱ ninindxu̱ún jmbiin, mbáwíi bi̱ phú naxná ikha náa mámbá congregación, náa mámbá sucursal ga̱jma̱a̱ náa mámbá guʼwá rí naxná ikha. Nda̱wa̱á rí ninújngoo tsiguʼ 1970 nirígá rí nixtiʼkhuu mu ikhú bi̱ muxna ikha mani̱ndxu̱ún mbá grupo bi̱ kuya̱ edxu̱u̱. Rí mbiʼi xúgi̱, náa mámbá congregación kuwa bi̱ kuya̱ edxu̱u̱, náa mámbá sucursal kuwa Comité ga̱jma̱a̱ bi̱ nutaraʼa numuu Jeobá nutañajúnʼ mbá nguéjmi̱i̱n bi̱ kuya̱ edxu̱u̱ bi̱ kaxtaʼwíin bi̱ nuxna mbiʼñúnxu Cuerpo Gobernante.

¹⁵ Rí nixtiʼkhuu rígi̱ niyambáá wéñuʼ náa xuajñu Dios. Náa numuu rá. Numuu rí xúgi̱ nakru̱ʼu̱lú itháan májánʼ rí naʼthí náa Biblia. Nayambáá náa xuajñu Dios numuu rí tséxna ikha mbáwíi xa̱bu̱. Rí xúgi̱ xúgínʼ bi̱ kuya̱ edxu̱u̱ bi̱ Jeobá nimínáanʼlu, ma̱ndoo muyambáá wéñuʼ ga̱jma̱a̱ rí xú ni̱ndxu̱ún (Prov. 24:6; Efes. 4:8).

¹⁶ Guʼtá ga̱jma̱a̱ tikhuu rí niriʼkhuíílu tsiguʼ rí ninújngoo. Mbá xkri̱da, rí mbiʼi xúgi̱ i̱yi̱i̱ʼ ndrígúlú nindxu̱u̱ mitsaan wéñuʼ ga̱jma̱a̱ naʼthí xkujndu dí rígá mbiʼi xúgi̱. Ma̱ngaa najmulú tecnología mu muʼtáraʼa. Náa ináa jw.org, mbaʼin xa̱bu̱ nambáñun wéñuʼ. Xúgíʼ rígi̱ nasngájma rí Jeobá nandoo kaʼñúún wéñuʼ xa̱bu̱ ga̱jma̱a̱ naxmiéjunʼ kaʼñúún.

¹⁷ Ma̱ngaa nduʼyamajkuíí rí nixtiʼkhuu náa reunión mu muguaʼdáá itháan mbiʼi mu muʼnigajmaa ndajkuáanʼ o náa mbá guʼwáanʼ. Ma̱ngaa nuxnáa núma̱aʼ ga̱jma̱a̱ numuu awan rí nixtiʼkhuu náa asamblea. ¡Mámbá tsiguʼ nindxu̱u̱ itháan májánʼ! Ma̱ngaa nuxnáa núma̱aʼ ga̱jma̱a̱ numuu xúgíʼ náa najuiʼsngáa ga̱jma̱a̱ numuu Biblia. Xúgíʼ rí naxtiʼkhuu rígi̱ nasngájma rí Jeobá exná ikha náa xuajñu ga̱jma̱a̱ rí naʼni̱i̱ itháan mitsaan náa paraíso rí na̱ʼkha̱ náa ikhaa.

(Isaías 61:8, 9) Numuu rí ikhúúnʼ, Jeobá, naniguʼ wéñuʼ rí jmbu, nawiyuʼ ka̱yo̱o̱ tsikuwaʼ ga̱jma̱a̱ rí na̱nguá nindxu̱u̱ jmbu. Mani̱ndxu̱ʼ jmbii índo̱ gáni numi̱i̱ ga̱jma̱a̱ mambanúʼ gajmíi̱nʼ kámuu mbiʼi. ⁹ E̱ji̱i̱n majmaʼnuʼ náa mbaʼa xuajen, mangiin e̱jñún náa tapo̱o̱ xuajen. Xúgínʼ bi̱ gúñún muniʼnuʼ rí ni̱ndxu̱ún bi̱ Jeobá niʼni tsajkurámiinʼ.”

w07-S 15/1 11 ¶4

Rí itháan nagajnuriyoo náa libro ndrígóo Isaías (parte 2)

Graxe̱ rí naxtiʼña̱a̱ náa Biblia:

61:8, 9. Xú káʼnii nindxu̱u̱ rí ‹mambanúu gajmíi̱n kámuu mbiʼi›, ga̱jma̱a̱ tsíin nindxúu̱n ‹e̱jñún› xá. Nindxu̱u̱ rí Jeobá nimbánuu nuxi̱ʼ gajmíi̱n cristianos bi̱ kaxtaʼwíin. “E̱ji̱i̱n” nindxu̱ún “iʼhuin mugu”, xóo muʼthá, mbaʼin wéñuʼ xa̱bu̱ bi̱ nudxawíín májánʼ ajngáa ndrígu̱ún bi̱ kaxtaʼwíin (Juan 10:16).

Migixnuu Biblia

(Isaías 62:1-12) Ga̱jma̱a̱ numuu Sión xaguanúʼ wíí ma̱ngaa numuu Jerusalén xaʼba ngañu̱u̱n asndu índo̱ gagájnuu rí jmbu náa ikhaa xó má índo̱ nambiʼiti̱ga̱, ga̱jma̱a̱ maguma kríyaaʼ xóo mbá xkójndo̱o̱ rí gíʼdoo agiuʼ. ² “Ga̱jma̱a̱ xuajen mba̱ʼu̱ mbuyáá rí natani rí jmbu, oh a̱ʼgu̱, ga̱jma̱a̱ xúgínʼ reyes mbuyáá gloria ndrígáʼ. Náa rawunʼ Jeobá gagájnuu rí muxnaʼ imbo̱o̱ nuxi̱ʼ mbiʼyaaʼ. ³ ga̱jma̱a̱ mi̱dxu̱ʼnú manindxa̱ʼ mbá corona rí mitsaan náa ñawúunʼ Jeobá, ga̱jma̱a̱ mbá xtíin rí nurigu náa edxu̱ún náa inuu ñawúunʼ Dios. ⁴ Ní xútha̱nʼ rí ni̱ndxa̱ʼ mbáa a̱ʼgu̱ bi̱ niguanáa mbá kayuʼ, ga̱jma̱a̱ ku̱ba̱ʼ ndrígáʼ ní xútha̱nʼ rí niguanáa. Ikháánʼ gagumbiʼyaʼ: Naniguʼ eʼni ikhaa, ga̱jma̱a̱ ku̱ba̱ʼ ndrígáʼ magumbiʼyuu bi̱ ninújunʼ. Numuu rí Jeobá manigu̱ʼ kaʼyaʼ, ga̱jma̱a̱ ku̱ba̱ʼ ndrígáʼ mani̱ndxu̱u̱ xóo bi̱ ninújunʼ. ⁵ Xó má mbáa dxámá ndayáa mbáa dxáʼgú, e̱jña̱ʼ munigu̱nʼ ga̱jma̱á ni̱ndxa̱ʼ. Xó má mbáa novio xtáa gagi ga̱jma̱a̱ numuu novia ndrígóo, Dios ndrígáʼ maxtáa gagi ga̱jma̱á numaʼ. ⁶ Ga̱jma̱a̱ numuu xtátsí ndrígáʼ, oh Jerusalén, nigruaʼmíʼ bi̱ muyejngoo. Kañiʼ mbiʼi ga̱jma̱a̱ kañiʼ mbruʼun, xaguanala wíí. Ikháanʼ bi̱ nuriyaʼ mbiʼyuuʼ Jeobá, xúya̱a̱xalaʼ, ⁷ ga̱jma̱a̱ xúya̱a̱xaʼla asndu índo̱ gawi̱ji̱ gujkhuʼ Jerusalén xúʼko̱, asndu índo̱ ikhaa gaʼni tsajkurámááʼ ku̱ba̱ʼ.” ⁸ Jeobá nikudaminaʼ ga̱jma̱a̱ ñawun mújúnʼ ga̱jma̱a̱ ñawúunʼ rí gíʼdoo tsiakii: “Ní xáxnu̱u̱n itháan tsígáʼ xóo ganitsu náa xa̱bu̱ bi̱ guáʼdáán sia̱nʼ, ní xúwáan vino nuxi̱ʼ ndrígáʼ xa̱bu̱ bi̱ naguwáʼ, rí ikháánʼ nitiejuíínʼ. ⁹ Mú, ikhiin má bi̱ niraxi̱i̱ mu̱phu̱, ga̱jma̱a̱ muni mba̱a̱ Jeobá; ga̱jma̱a̱ bi̱ nuraxi̱i̱ náa rexoʼ rí mikaʼwu”. ¹⁰ Agajnála, agajnála rexa̱a̱ náa xkrugua. Gurmbáʼtaa kamba̱a̱ mu maʼga̱ xuajen. Guni̱i̱, guni̱i̱ carretera. Gura̱xi̱i̱ itsí mu mbuyáá mbaʼa xuajen. ¹¹ ¡Gu̱ya̱a̱! Jeobá má niʼni mawáán rígi̱ asndu náa ku̱ba̱ʼ rí itháan mitsínguánʼ: “Aratháán wáxioo Sión: ‹¡Atayáá! Na̱ʼkha̱ rí maguma kríñanʼ. ¡Atayáá! Rí maxná rígá náa ikhaa, ga̱jma̱a̱ rí maʼni numa̱a̱ rígá náa inuu ikhaa›”. ¹² Ga̱jma̱a̱ xa̱bu̱ xuajen muxna mbiʼñún xuajen mikaʼwu, bi̱ niʼtsiwíin Jeobá, ga̱jma̱a̱ ikháánʼ maguma mbiʼyaaʼ: Nixtiyáaʼ, ga̱jma̱a̱ mbá xuajen rí túniñanʼ mbá kayuʼ.

FEBRERO 27–MARZO 5

GÍʼDOO NUMUU RÍ NA̱ʼKHA̱ NÁA BIBLIA | ISAÍAS 63-66

“Mbá ‹nuxi̱ʼ mekhu› ga̱jma̱a̱ ‹nuxi̱ʼ ku̱ba̱ʼ› naʼni dí makuwáanʼ gagi”

(Isaías 65:17) ¡Gu̱ya̱a̱!, mani mbá nuxi̱ʼ mekhu ga̱jma̱a̱ mbá ku̱ba̱ʼ nuxi̱ʼ; ga̱jma̱a̱ nimbáa ní xarmáʼáan a̱jkiu̱u̱n dí nirígá nákha ikhú.

ip-2-S 383 ¶23

“Gaʼdxalá ga̱jma̱a̱ gakuwáanʼ gagi kámuu náa rí mani”

²³ Náa libro ndrígóo Revelación naʼthí mbá visión rí ndiʼyoo apóstol Juan ga̱jma̱a̱ numuu mbiʼi ndrígóo Jeobá, náa maguma gámbáa dí rígá náa numbaaʼ. Nda̱wa̱á maruguaraʼaa Satanás náa iñáʼ dí na̱nguá tumuu (Revelación 19:11–20:3). Ga̱jma̱a̱ numuu rúʼko̱, Juan niʼnirámáʼ ga̱jma̱a̱ numuu niʼtáriyaʼ Isaías: “Ndi̱yo̱o̱ mbá mekhu nuxi̱ʼ ga̱jma̱a̱ mbá ku̱ba̱ʼ nuxi̱ʼ”. Versículos dí na̱ʼkha̱ nda̱wa̱á náa visión rígi̱ naʼthi ga̱jma̱a̱ numuu índo̱ Dios maʼni májánʼ Ku̱ba̱ʼ (Revelación 21:1, 3-5). Nakujmaa kaʼwu dí niʼthí Isaías ga̱jma̱a̱ numuu “mekhu nuxi̱ʼ ga̱jma̱a̱ mbá ku̱ba̱ʼ nuxi̱ʼ” mitsaan wéñuʼ gambanúu náa numbaaʼ nuxi̱ʼ ndrígóo Dios. Índo̱ gútañajunʼ mekhuíí, xa̱bu̱ bi̱ gakuwa náa numbaaʼ makuwá náa mbá ku̱ba̱ʼ mitsaan, ga̱jma̱a̱ paraíso rí na̱ʼkha̱ náa Dios. Índo̱ naʼthí “ga̱jma̱a̱ nimbáa ní xarmáʼáan a̱jkiu̱u̱n dí nirígá nákha ikhú [nandii, tsingíná ga̱jma̱a̱ i̱ʼwáʼ gamiéjunʼ rí nuraʼníí]”, naʼni̱i̱ a̱jkiu̱lú. Tséʼniuu má káʼnii garmáʼáan a̱jkiu̱lú ikhú, nimbá dí rúʼko̱ xáʼni gawúnlú wéñuʼ xóo rí naʼni gawúnlú xúgi̱.

(Isaías 65:18, 19) Gaʼdxalá ga̱jma̱a̱ gakuwáanʼ gagi kámuu náa rí mani. Numuu rí ¡gu̱ya̱a̱!, mani̱i̱ Jerusalén mu makuwáanʼ gagi ga̱jma̱a̱ xuajñu maʼdxuu. ¹⁹ Ga̱jma̱a̱ maxtáá gagi náa Jerusalén ga̱jma̱a̱ maʼdxuʼ ga̱jma̱a̱ numuu xuajñuʼ; ga̱jma̱a̱ ní xáwáán itháan rí numbiyaʼ ga̱jma̱a̱ aʼwá rí numíniiʼ”.

ip-2-S 384 ¶25

“Gaʼdxala ga̱jma̱a̱ gakuwáanʼ gagi kámuu náa rí mani”

²⁵ Rí mbiʼi xúgi̱, Jeobá ma̱ngaa naʼni “Jerusalén mu makuwáanʼ gagi”. Ndiéjunʼ eyoo gáʼthúu̱n rá. Xó má ndiʼyáá, nuxi̱ʼ mekhu rí nirígá nákha tsiguʼ 1914 makuwa mbá 144,000 bi̱ mutañajunʼ bi̱ makuwá náa Reino mekhuíí. Xúgínʼ ikhiin nagumbiʼñún “Jerusalén rí Nuxi̱ʼ” (Revelación 21:2). Bugi̱ nindxu̱u̱ bi̱ Dios naʼthí: “¡Gu̱ya̱a̱!, mani̱i̱ Jerusalén mu makuwáanʼ gagi ga̱jma̱a̱ xuajñu maʼdxuu”. Ikhaa majmiuu Jerusalén rí Nuxi̱ʼ mu xúʼko̱ maʼni tsajkurámiinʼ xa̱bu̱ bi̱ nunimbu̱ún. Ní xárígá gitsawaʼskha ní má gaʼkhu, numuu rí Jeobá ‹maxnúlú rí nandoo a̱jkiu̱lú› (Salmo 37:3, 4).

(Isaías 65:21-23) Munila guʼwá, ga̱jma̱a̱ makuwáanʼla ikhí; mudula ixi̱ uva ga̱jma̱a̱ muphula xndúu. ²² Raʼkháa muni mu imba̱a̱ tsáa gájmuu; raʼkháa mudu mu imba̱a̱ tsáa gíkhu. Numuu dí xóo mba̱yu̱ʼ rígá mbóo ixi̱ xúʼko̱ má mba̱yu̱ʼ gáxtáa xuajñuʼ, ma̱ngaa dí muni ga̱jma̱a̱ ñawúunʼ bi̱ niraʼwíin manigu̱nʼ wéñuʼ. ²³ Ni xáʼni néʼngu̱u̱n ni xítháan, ni xuguaʼdi̱i̱n e̱ji̱n bi̱ muni rí makuwá gíná; numuu rí ikhiin ni̱ndxu̱ún e̱jñún bi̱ Jeobá niʼni tsajkurámiinʼ, ga̱jma̱a̱ e̱jñún ikhiin.

w12-S 15/9 9 ¶4-5

Mbáa míí tsiguʼ tsímáá... ¡ga̱jma̱a̱ mba̱yu̱ʼ tsiguʼ xóó!

“MUNILA GUʼWÁ, GA̱JMA̱A̱ [...] MUDULA IXI̱ UVA”

⁴ Tsáa lá xániguʼ magiʼdoo goʼwóo, náa ma̱ndoo maxtáa májánʼ gajmíi̱n e̱ji̱i̱n xá. Mú náa numbaaʼ xúgi̱ xa̱bu̱ naʼniún gakhi̱i̱ muguaʼdáá mbá guʼwá. Náa xuajen mba̱ʼu̱ kajtíin wéñuʼ xa̱bu̱ ga̱jma̱a̱ mbaʼin nuni xó má eʼngu̱u̱n mu makuwa náa xuajen ma̱jkha̱ʼ náa rí migíná wéñuʼ. Nindxu̱u̱ xóo mbá xnuʼndaa náa xa̱bu̱ bugi̱ rí mundxa̱ʼwa̱a̱ edxu̱ún maguaʼdáá mbá guʼwá májánʼ.

⁵ Índo̱ gáxtáa raʼtáñajunʼ Reino, xúgínʼ xa̱bu̱ maguaʼdáá mbá guʼwá májánʼ, numuu rí Isaías niʼtíriyaʼ: “Munila guʼwá, ga̱jma̱a̱ makuwáanʼla ikhí; mudula ixi̱ uva ga̱jma̱a̱ muphula xndúu” (Is. 65:⁠21). Gajkhun má rí xúgi̱ kuwa xa̱bu̱ bi̱ guáʼdáá guʼwún ga̱jma̱a̱ tikhun mbá guʼwá mba̱a̱ wéñuʼ. Mú namíñun mandátigu̱u̱n ga̱jma̱a̱ numuu rí nánguá rígá mbújkha̱a̱ o ga̱jma̱a̱ rí matu̱ʼu̱u̱n xa̱bu̱ muni kuʼwáʼ o i̱ʼwáʼ gamiéjunʼ. Reino ndrígóo Dios ma̱ngaa maʼni gámbáa xúgíʼ gamiéjunʼ rúʼko̱, numuu rí gaʼyee Miqueas niʼnirámáʼ: “Mámbáa xa̱bu̱ magi̱ʼi̱ náa agoo ixu̱u̱ uva ga̱jma̱a̱ náa agoo ixi̱ higo, ga̱jma̱a̱ ní xáxtáa nimbáa bi̱ maʼnimiñun” (Miq. 4:4).

Guʼyááʼ rí gíʼdoo numuu

(Isaías 63:5) Niyexi má xúʼko̱, mú na̱nguá nixtáa nimbáa bi̱ ma̱ndoo mambáyuʼ; niʼniuʼ tsiánguá índo̱ ndi̱yo̱o̱ rí nda̱wa̱a̱ tsáa mambáyuʼ. Ga̱jma̱a̱ ñawúunʼ niʼni kríñunʼ, ga̱jma̱a̱ rí nakiʼnún niʼni rí xájpatrígún.

w07-S 15/1 11 ¶5

Rí itháan nagajnuriyoo náa libro ndrígóo Isaías (parte 2)

63:5. Ndiéjunʼ eyoo gáʼthúu̱n rí Dios naʼngo̱o̱ a̱jkiu̱u̱n dí xákiʼnáa rá. Rí nakiʼnáa Dios nindxu̱u̱ mbá rí naku̱mu̱u̱ rí naʼngo̱o̱ narikhoo: Dí nakiʼnáa nindxu̱u̱ jmbu. Rí narikhoo dí nakiʼnáa naxkajxi̱i̱ maʼnimbánuu rí nikudaminaʼ maʼni.

(Isaías 64:8) Rí xúgi̱, oh Jeobá, ikháánʼ nindxaaʼ Anu̱xu. Ikháanʼ ni̱ndxu̱xu ku̱ba̱ʼ, ga̱jma̱a̱ ikháánʼ ni̱ndxa̱ʼ bi̱ Niʼniáanʼxu, ma̱ngaa nitaniáanʼxu xúgiáanʼ ga̱jma̱a̱ ñawáanʼ.

w13-S 15/6 25 ¶3-5

Atatsiñaminaʼ maxpríguaʼ Jeobá

XÚ KÁʼNII EʼTÁÑAJUNʼ BI̱ NAʼNI DAAN

³ Índo̱ nuʼthá xóo eʼtáñajunʼ Jeobá náa xa̱bu̱ ga̱jma̱a̱ náa mbaʼa xuajen mba̱ʼu̱, Biblia najmuu xkri̱da rígi̱: “Rí xúgi̱, oh Jeobá, ikháánʼ nindxaaʼ Anu̱xu. Ikháanʼ ni̱ndxu̱xu ku̱ba̱ʼ, ga̱jma̱a̱ ikháánʼ ni̱ndxa̱ʼ bi̱ Niʼniáanʼxu, ma̱ngaa nitaniáanʼxu xúgiáanʼ ga̱jma̱a̱ ñawáanʼ” (Is. 64:8). Mbáa xa̱bu̱ bi̱ naʼni daan naʼni xó má eyoo ikhaa ku̱ba̱ʼ, ga̱jma̱a̱ ku̱ba̱ʼ nda̱a̱ rí gándoo maʼni. Xúʼko̱ má erígá náa xa̱bu̱ ga̱jma̱a̱ Dios. Xó má ku̱ba̱ʼ nda̱a̱ rí gándoo maʼthúu̱n bi̱ naʼni daan, xúʼko̱ má mangáanʼ xándoo muʼtháán Dios xú káʼnii gándoo maʼniulú (atraxnuu Jeremías 18:1-6).

⁴ Jeobá nisngájma náa xa̱bu̱ Israel rí ma̱ndoo maʼni xóo eʼni mbáa bi̱ naʼni daan ga̱jma̱a̱ ku̱ba̱ʼ. Mú rígá rí naxtiʼkhuu. Mbáa bi̱ naʼni daan ma̱ndoo majmuu ku̱ba̱ʼ mu maʼni rí nandoo ikhaa. Mú, lá Jeobá naʼniún xa̱bu̱ o xuajen mba̱ʼu̱ xó má eyoo ikhaa rí tikhun mani̱ndxu̱ún míjínʼ ga̱jma̱a̱ eʼwíínʼ ra̱míjínʼ ráʼ. Náa Biblia naʼthí rí na̱nguá. Jeobá nixnúún xa̱bu̱ mbá rí gíʼdoo wéñuʼ numuu: Rí muraʼwíí ikhiin rí muni. Ga̱jma̱a̱ índo̱ ikhaa eʼtáñajunʼ tséʼni gámbáa regalo rí nixnúún. Ikha jngó, mu ikhaa maʼni xó má eyoo, xa̱bu̱ ndayóoʼ rí manigu̱nʼ (atraxnuu Jeremías 18:⁠7-⁠10).

⁵ Mú xú káʼnii eʼni bi̱ naʼni itháan májánʼ daan náa xa̱bu̱ bi̱ tsíñún rí ikhaa maʼni míjínʼ xá. Atatsaʼwáminaʼ ga̱jma̱a̱ numuu ku̱ba̱ʼ rí tsíyoo ganiñaminaʼ majmaa xó má nikumu̱u̱ maʼni bi̱ naʼni daan. Ikhaa ma̱ndoo maʼni imbo̱o̱ daan o mada̱ʼ. Rígi̱ narígá numuu rí bi̱ niʼni na̱nguá niʼni májánʼ. Mú rígi̱ tsírígá náa bi̱ Niʼniáanʼ (Deut. 32:4). Índo̱ xa̱bu̱ tsiniñaminaʼ rí Jeobá maʼni̱i̱ májánʼ, ikhaa gíʼdoo aʼkhúun, raʼkháa Jeobá. Jeobá naʼtáñajúnʼ xa̱bu̱, á mu ikhiin nuniñami̱jna̱ ma̱ndoo maʼni míjínʼ. Bi̱ nuniñami̱jna̱, ikhiin bi̱ naguma míjínʼ májánʼ. Mbá xkri̱da, cristianos bi̱ kaxtaʼwíin ni̱ndxu̱ún “vasos rí niguma mba̱a̱ a̱jkiu̱ún kuñún” bi̱ niguma míjínʼ xóo “vaso rí magiʼdoo numuu”. Mú bi̱ tsénimbu̱ún náa Dios nanindxuún “vasos sia̱nʼ rí niguma kiejunʼ mu maguma gámbáa” (Rom. 9:19-23).

Migixnuu Biblia

(Isaías 63:1-10) Tsáa nindxu̱u̱ bugi̱ bi̱ na̱ʼkha̱ náa Edom, bi̱ kagúwunʼ mbá xtíin rí naxpíbiʼ bi̱ na̱ʼkha̱a̱ náa Bozrá, bugi̱ bi̱ kagúwunʼ xtíin mitsaan wéñuʼ, bi̱ na̱jkha̱ kruígo̱o̱ ga̱jma̱a̱ mba̱a̱ wéñuʼ tsiakii rí gíʼdoo xáʼ. “Ikhúúnʼ, bi̱ natha rí jmbu, Bi̱ gíʼdoo tsiakii mu maʼni káwíin.” ² Náa numuu rí maña̱ʼ xtíñaaʼ, ga̱jma̱a̱ náa numuu rí xtíñaaʼ nindxu̱u̱ xóo mbáa bi̱ nakujmbi̱i̱ uva rá. ³ “Náa nagumaa vino nikujmbíi mbáwun ikhúúnʼ, nimbáa bi̱ xa̱bu̱ xuajen táxtáa ga̱jma̱a̱ ni̱ndxu̱ʼ. Ga̱jma̱a̱ nikujmbíi ga̱jma̱a̱ sŋañuʼ ndrígóʼ, ga̱jma̱a̱ ikhúúnʼ nikujmbíi ga̱jma̱a̱ rí nakiʼnún. Ga̱jma̱a̱ eʼdiuu nigu̱u̱ náa xtíñúʼ, ga̱jma̱a̱ niʼni gachúu xúgíʼ xtíñúʼ. ⁴ Numuu rí mbiʼi rí ma̱ʼkhá ka̱yo̱ʼ venganza rígá náa a̱jkiu̱nʼ, ga̱jma̱a̱ ni̱ʼkha̱nú tsiguʼ rí matsiwíin. ⁵ Niyexi má xúʼko̱, mú na̱nguá nixtáa nimbáa bi̱ ma̱ndoo mambáyuʼ; niʼniuʼ tsiánguá índo̱ ndi̱yo̱o̱ rí nda̱wa̱a̱ tsáa mambáyuʼ. Ga̱jma̱a̱ ñawúunʼ niʼni kríñunʼ, ga̱jma̱a̱ rí nakiʼnún niʼni rí xájpatrígún. ⁶ Ga̱jma̱a̱ sia̱nʼ ndrígóʼ nikujmbíin gakhi̱i̱ xuajen, ga̱jma̱a̱ nini majngi̱i̱n ga̱jma̱a̱ sia̱nʼ ndrígóʼ ga̱jma̱a̱ nigadíri̱ga̱ eʼdiún asndu mbayííʼ.” ⁷ Mata rí májánʼ wéñuʼ a̱jkiu̱u̱n Jeobá, rí naʼni maguma mba̱a̱ Jeobá, ga̱jma̱a̱ numuu xúgíʼ rí niʼni Jeobá ga̱jma̱a̱ ni̱ndxu̱lú, ga̱jma̱a̱ mbaʼa rí májánʼ rí niʼni ga̱jma̱a̱ numuu goʼwóo Israel, numuu rí nagáwiinʼ a̱jkiu̱u̱n ga̱jma̱a̱ rí nandoo kaʼyulú má xúʼko̱. ⁸ Ga̱jma̱a̱ ikhaa niʼthí: “Ikhiin ni̱ndxu̱ún xuajñuʼ, e̱ji̱n bi̱ muni rí jmbu”. Ikha jngó ninindxu̱u̱ bi̱ maʼni káwíin. ⁹ Índo̱ ikhiin nikuwa náa awúu̱n gaʼkhu ikhaa nixmiéjunʼ kaʼñún. Ga̱jma̱a̱ bi̱ na̱jkha̱ kayóo ajngáa ndrígóo niʼni káwíin. Numuu rí ikhaa nindoo kaʼñún ga̱jma̱a̱ nigáwiinʼ a̱jkiu̱u̱n ikha jngó niʼtsiwíin, ga̱jma̱a̱ nikuxi̱i̱n ga̱jma̱a̱ ni̱jkha̱ kagu̱u̱n xúgíʼ tsiguʼ rí ninújngoo. ¹⁰ Mu ikhiin túnimbu̱ún ga̱jma̱a̱ nini dí xi̱ʼ kaʼwu magawúunʼ. Rí xúgi̱ ikhaa ninindxu̱u̱ xa̱bu̱ sia̱nʼ ndrígu̱ún; ma̱ngaa nixmínaʼ gajmíi̱n.