Jesús naʼtáraʼa Reino ndrígóo Diúu̱

NÁA numuu ni̱ʼkha̱ Jesús náa tsu̱du̱u̱ ku̱ba̱ʼ rá. Ikhaa má niʼthí: «Pu-ndaʼyo ri maʼga iʼhua xuajin gataraʼa ajnga ri majan nuxiʼ ri naʼtañajunʼ Dios; numu ri ika numu ruʼkue huaxungunloʼ» (Lucas 4:43, AMM). Guʼyáá májánʼ ajkhu̱ enii dí niʼsngáa Jesús ga̱jma̱a̱ numuu Reino, ikhaa rígi̱ ñajunʼ edxu̱u̱ rí phú numuu niʼtáraʼa.

1. Jesús mani̱ndxu̱u̱ Rey. Ikhaa nisngájmaminaʼ pajnu rí ni̱ndxu̱u̱ Mesías (Juan 4:25, 26). Ma̱ngaa, niʼthí rí ikhaa ni̱ndxu̱u̱ Rey bi̱ ndiʼyoo gaʼyee Daniel. Niʼthúún apóstoles ndrígio̱o̱ (bi̱ nijngrui̱go̱o̱ gajmíi̱n) dí ikhaa magi̱ʼi̱i̱ náa «xili gloria» ga̱jma̱a̱ dí ikhíínʼ mani̱ndxu̱u̱n mbá guájmi̱i̱n xa̱bu̱ bi̱ maʼtañajunʼ gajmíi̱n (Mateo 19:28, AMM). Xa̱bu̱ bugi nigumbiʼñún «mugu su rambaʼjin». Ma̱ngoo niʼthí ga̱jma̱a̱ numún «iʼhuinʼ mugu» bi̱ raʼkhíin xóo bugi (Lucas 12:32; Juan 10:16, AMM).

2. Reino ndrígóo Diúu̱ phú jmbu maʼtáñajunʼ. Jesús nisngájma dí Reino maʼnigámbáa dí phú itháan raʼkhí: Rí niʼni Satanás náa mbiʼyuu Diúu̱. Xú káʼnii gáʼni xá. Dí maʼni ka̱ʼwu̱u̱ mbiʼyuu ga̱jma̱a̱ xúgíʼ xtujtaa rí ni̱ʼngo̱o̱ niraʼnu asndu nákha náa Edén (Mateo 6:9, 10). Ma̱ngaa, Cristo nisngájma rí índo̱ maʼtáñajunʼ xaxtaʼwíín xa̱bu̱ mbáa ga̱jma̱a̱ i̱mba̱a̱, numuu rí ikhaa niʼsngúún xa̱bekha ga̱jma̱a̱ gu̱ʼu̱, xa̱bu̱ bi̱ guaʼda wéñuʼ ga̱jma̱a̱ bi̱ migíniin, dí xaxtaʼwíín. Maski ajndu numuu dí ni̱ʼkha̱ ikhaa mu maʼtaruʼun israelitas, niʼni ajndu náa ma ni̱ʼngo̱o̱ mu mambañun samaritanos ga̱jma̱a̱ xa̱bu̱ bi̱ kuwa iʼwáa xuajin. I̱mbá nuthi nini̱ndxu̱u̱ Jesús, raʼkháa xóo xa̱bu̱ ede̱ bi̱ nikúwi̱i̱n ikhú, bi̱ nurawimijna mu mbá nuthu endxaʼwa̱a̱ edxu̱ún ga̱jma̱a̱ umún xa̱bu̱ bi̱ tseniʼnunʼ ma̱ngaa nagun numún xa̱bu̱ bi̱ nandun kuñún.

3. Reino ndrígóo Diúu̱ xaxtáa náa numbaaʼ rígi̱. Índo̱ nixtáa Jesús nirígá xkujndu náa xa̱bu̱ judíos xuajin náa kúwi̱i̱n, numuu dí i̱mba̱ xuajin mba̱a̱ eʼtáñajunʼ. Mú xa̱bu̱ nindún dí ikhaa maʼtáñajunʼ mú ikhaa taʼndoo (Juan 6:14, 15). Índo̱ niʼnidxájkhun ga̱jma̱a̱ mbáa Xa̱bu̱ Ñajunʼ, niʼthúu̱n: «Raʼka naʼ numba rigueʼ itañajunloʼ-jun» (Juan 18:36, AMM). Ga̱jma̱a̱ discípulos ndrígio̱o̱ niʼthúún: «Numu ri [ikháanʼ] rañajuanʼla naʼ numba» (Juan 15:19, AMM). Ma̱ngoo, taniñunʼ murugua̱ ajua̱nʼ, jnii má rí mumbayíí ikhaa (Mateo 26:51, 52).

4. Cristo maʼtáñajunʼ ga̱jma̱a̱ ngajua. Jesús nikudaminaʼ rí mambáñun xa̱bi̱i̱ bi̱ nagun kidxuuʼ ga̱jma̱a̱ rí kuda (Mateo 11:28-30). Xúʼko̱ má niʼni. Nixnún ajngáma̱ʼa̱ ga̱jma̱a̱ numuu rí naxmiéjúnʼ, ga̱jma̱a̱ numuu rí maguaʼdá wéñuʼ, ga̱jma̱a̱ rí mambaxun gajmiúnʼ eʼwíínʼ ma̱ngaa rí makuwíín tsímáá (Mateo, Tsinaʼ mba̱ʼu̱ 5 asndu 7). Ikhaa nindoo kaʼñun xa̱bu̱ ma̱ngaa niniñaminaʼ dí maguwáʼ náa ikhaa. Asndu xú káʼnii má xa̱bu̱, mangiin xa̱bu̱ gíniin naʼniún magun guyaa Jesús, numuu dí ikhaa ndaʼyamajkhun eʼwíínʼ. Tsáa lá tsiyo magiʼdaa mbáa Xa̱bu̱ Ñajun xúʼko̱ kaʼnii rá.

Jesús niʼni mbaʼa milagro, ikhaa rúʼko̱ nisngajma rí xú káʼnii gáʼni Reino ndrígóo Diúu̱ nda̱wa̱á. Ndiéjunʼ nikánaa ga̱jma̱a̱ dí niʼni xá. Guʼyaa.

(Na̱ʼkha̱ náa i̱yi̱i̱ʼ ndrígóo Mateo, Marcos, Lucas, ga̱jma̱a̱ Juan.)