Kíxnuu 12

Káʼnii egiʼnii índo̱ nakhañulúʼ

Índo̱ mbá nakañu nánguá eʼya itháan. Ikhaa nindxu̱u̱ xóo mbóó ginuʼ rí mbá ekañaʼ enuʼ (Juan 11:11-14). Bí nakañun nánguá edxawiin ndi tsiyexi ndi tsethi ndi tsendxawa̱a̱ edxu̱ún (Eclesiastés 9:5, 10). Kamba̱a̱ rí tseʼsngáá gajkhun nuti rí bí nakañun naguun imbá ni̱ʼkha̱ numbaa gakuwi̱i̱n gajmiún angiún bí nikañun. Mú, ra̱ʼkháa ríʼkhín rí naʼsngáá ajngáa raunʼ anu̱lú Dió.

Xa̱bu̱ bí nikañun nangua muruguambayulúʼ ndu nangua muniulúʼ dí raʼkhí. Mbó kri̱ga̱ wajpa eni xa̱bu̱ rí nuxnaxi tsigijñaʼ mbaʼa rí eni mú ikhíínʼ ekumún rí wa̱jinʼ enigu̱nʼ rígi̱. Mú, kustumbre rígi̱ tsiyo gaʼyoo Dió mú xúgíʼ ndu̱wa̱ʼ rígi̱ na̱ʼkha̱ náa Gixa̱a̱. Ndu nangua má xó manigu̱nʼ xúgíʼ rígi̱ wa̱jinʼ, numuu rí ikhíínʼ nánguá e̱ya̱. Ragiʼmáanʼ mamiñulúʼ kámí mbuʼyamajkun bí nikañun. Giʼmáanʼ mbuʼyamajkuíí mbáwii Dió (Mateo 4:10).

Bí nikañun mukuwá mbujúu. Nda̱wa̱á, Jeobá gaxkajuíín bí nikañun mú makuwá náa ku̱ba̱ʼ mitsaan (Juan 5:28, 29; Hechos 24:15). Dió mandoo maxkajuín xa̱bu̱ bí nikañun xó má ikháanʼ nandoo nuxkaxi̱i̱ mbá bí naʼgu̱ (Marcos 5:22, 23, 41, 42).

Gaku̱ma̱ʼ rí tsekañuluʼ ndu̱wa̱ʼ nindxu̱u̱, Gixa̱a̱ eʼni rí mbíʼín xa̱bu̱ gunimbu̱u̱n ríʼkhín. Gixa̱a̱ gajmíín xa̱bu̱ wéñiʼ ndrigio̱o̱ nuni rí xa̱bu̱ mundxaʼwa̱a̱ edxu̱ún rí níma̱ ndrigúún bí nikañun nduya, mangoo ikhíínʼ eni rí maguaʼda nandii jma̱a̱ iʼwaaʼ gaʼkhu̱. Gixa̱a̱ naʼninduwíín xa̱bu̱, nguánáa jma̱a̱ xnuʼndaa naʼniún ajndu mbuñún wa̱jinʼ. Ikha jngó Jeobá naguiyuʼ kaʼyóo xa̱bu̱ bí nagi̱ʼ naʼthimijna jma̱a̱ wa̱jinʼ (Deuteronomio 18:10-12).